|
|
|
 Re: مليونية طوكر (Re: بدرالدين بابكر مصطفى)
|
سلام استاذ بدر الدين
دعم المزارعين في طوكر واجب على كل السودانيين.
ما عارفة ليه طماطم طوكر ما بتوصل للخرطوم و مناطق
أخرى؟ هل السبب أزمة الوقود أم الجبايات أم غياب متعمد
لتجار الجملة؟
شخصياً أود أن أشارك في دعم المزارعين و لكن حتى بائع
الخضار في الحي او السوبرماركت ما عارفين الخضار
العندهم جاي من وين؟
| |
 
|
|
|
|
|
|
|
|
Re: مليونية طوكر (Re: نعمات عماد)
|
مرحباً استاذة نعمات
المزارعين والله الأيام ديل حالتهم تحنن اليتيم
كتير جداً بجي السوق ما يلقى مشتري خاصة انو الأسواق الأيام ديل ملانة بالطماطم
يضطر يدفقا في الواطة ويرجع ..
المهم في الموضوع إنو طماطمهم نقية ونضيفة من أي ملوثات ومسرطنات
والطماطم مهمة جداً لأي أسرة سودانية وبعد شهر واحد الناس ببدوا يعانوا من أسعارها
نحن عندنا فكرة نمشي نشتري منهم كمية كبيرة ونقطعها وننشفها وممكن نسحنها بعد تصل الخرطوم
وتتعبا تعبئة كويسة وتتباع ..والسنة الجاية ان شاء الله ناويين نخش في مشروع الصلصة البلدية وهي مسألة ساهلة ما صعبة
بس دايرة تحضير من بدري للموقع والعمالة والأدوات..
من ناحية انها مربحة .. مربحة ومن ناحية بتساعد المزارعين بتساعدهم
عشان ما يبطلوا الإنتاج ويمشوا الدهب
لازم الناس الزي ديل نقيف معاهم .. ما نفقدهم
وتحياتي مثنى وثلاث ورباع
| |
|
|
|
|
|
|
|
|
|
Re: مليونية طوكر (Re: بدرالدين بابكر مصطفى)
|
بدرالدين سلمات ,
مثل هذا البوست يجب أن يكون دائما فى المقدمة .
المعروف عن دلتا طوكر أنها من اخصب اراضى العالم , وكان مشروع الجزيرة ذات نفسه يقوم بعملية إكثار تقاوى القطن الخاصة به فى دلتا طوكر وذلك لخصوبته الفائقة .
كم حبانا الله من الثروات والنعم التى لو احسنا إستثمارها لكفتنا شر التسول وإراقة ماء الوجه .
ألا يشعر مسئولينا عن الزراعة فى السودان بل ألا نشعر نحن كمواطنين سودانيين بالخجل والأستفزاز عندما تأتى الشاحنات المصرية لتشترى محصولاتنا الزراعية مثل الطماطم والسمسم من المنتجين بتراب القروش وتعيد تصديرها لأوروبا وأمريكا تحت ديباجة ( انتاج مصر) ؟ لماذا نحن هكذا قليلي الوطنية ؟
والله لن تخرجنا لا اوروبا ولا امريكا ولا حتى الجن الأزرق من أزماتنا الأقتصادية يقدر ما ستخرجنا الزراعة وصادر الزراعة بنوعيه النباتى والحيوانى من الدرك الذى نحن فيه .
بالمناسبة يا بدرالدين وزير الزراعة بتاعنا أسمه منو ؟
| |
|
|
|
|
|
|
|
|
 Re: مليونية طوكر (Re: بدرالدين بابكر مصطفى)
|
| Quote: نحن عندنا فكرة نمشي نشتري منهم كمية كبيرة ونقطعها وننشفها وممكن نسحنها بعد تصل الخرطوم |
سلام عليكم
قريت قبل كم يوم احيانا الكيلو وصل 2 جنيه.
بالنسبه لى حل التحويل لى صلصه اغتقد اهم لانو حتى لو ناس قدرو يشترو ويرحلوها لى مناطق استهلاك تانيه دا حياثر على السعر فى المناطق دى حسب العرض والطلب.
لكن الحل الافضل هو استنفار الشباب خاصه هريجى التغذيه او الزراعه للمشاركه فى مجموعات لتجهيز صلصه سواء يالتجفيف او فى شكل معجون -ودا الاهم - لانو بصراحه الصلصه اليومين ديل بقت غاليه .واعتقد الشباب ناس الاغذيه بيكونو عارفين سنجزو القصه دى بشكل علمى جيد
غلبه الصلصه الكبيره وصلت 75 جنيه يعنى انتاج شباب متخصصين صلصه (معجون) حيخفف ضغط على الاسره فى قصه الصلصه اللى تقريبا الاسره فى حاجه ليها بشكل يومى تقريبا .وماننسى انو بتكون صحيه وطازجه مش زى الصلصه المصنوه ومضاف ليها مواد حافظه (لمدى طويل)
من جانبى حاتبى طرح الفكره فى فرصه على الوسائط ولفت انظار الشباب خاصه ابناء البحر الاحمر ودعوه برضو لراس المال الوطنى حتى يدعمو ويشجعو الشباب
| |
|
|
|
|
|
|
|
|
|
Re: مليونية طوكر (Re: Asim Ali)
|
بعرف مجموعة عندهم مشروع لحل مثل هذه المشاكل كنت في البداية معاهم لطرح هذه المشاريع لحكومات الولايات
تصدقوا إنو صاحب الفكرة استبعد تقديمها للحكومة الاتحادية وناس حمدوك عشان
متوقع الرفض لأنو السلطة في الخرطوم معيارها سياسي وولاء سياسي وما أدراك
سبتهم وكانوا بحاولوا يعرضوا الفكرة لحكومات الولايات في معرض الخرطوم
وصراحة بطني كانت طامة وما متفائل عشان كدا ما واصلت معاهم
صراحة القيادات السياسية المسيطرة الأن تشعرك أنها مؤدلجة ولا تريد من الناس غير التصفيق
لهم وتقديسهم ولا يبدون أي رغبة لمشاركة الشعب
وهناك عشرات من الخبراء ومن يحملون حلول لمثل هذه المشاكل لكن للأسف
لا توجد نية من حكومة حمدوك لاشراك الشعب وفق آليات وبفتح أبواب
ونوافذ مشرعة ومعلنة لهذا الغرض!
| |
|
|
|
|
|
|
|
|
|
Re: مليونية طوكر (Re: منتصر عبد الباسط)
|
الحلول تكمن في شيئين
1ـ فتح نوافذ تصدير لخارج السودان
وعملية التصدير تحتاج معينات وضبط للمواصفات والتغليف والتبريد وما شابه
وكذلك التسويق والنقل والترحيل والدعم الحكومي وما يعود على البلاد من عملة
أجنبية
2ـ التصنيع كصناعة الصلصة والمربى
حكومة حمدوك ليها ستة شهور مما اتكونت ولسع مجرد رؤى على ورق ما عندها!!!!
ونحن عايزين نمدح ونطبل
طيب لايمين مطبلاتية الكيزان زمان عشان شنو؟!
| |
|
|
|
|
|
|
|
|
|
Re: مليونية طوكر (Re: Asim Ali)
|
تحياتي عاصم
المشكلة الرئيسية هي إنو مافي زول منتبه ليهم اصلاً
في مشكلة في الترحيل من منطقة طوكر لكن دي ما مشكلة كبيرة وخطيرة
تصنيع الصلصة البلدية ساهل جداً وما محتاج تقنيات متطورة ..
التجفيف يتخيل لي هو الحل الأنسب في حالة طماطم طوكر .. تجفيف وسحن
لأنو ال10 طن طماطم طازجة بتعمل طن واحد مجففة .. والطماطم المجففة أسعارها عالية جدا في الخارج
المؤسف إنو الموسم دا خلاس راح، وغالباً المزارعين يتكبدوا خسائرهم واحتمال كبير يتسرب منهم جزء كبير للتعدين
الموضوع محتاج لي وقفة من أبناء الولاية .. الراسماليين
وفيه فائدة عظيمة جداً للكل .. وفيه فائدة كبيرة للبلد ..
غير كدي الطماطم دي أفضل طماطم على مستوى السودان مع بتاعة الله كريم البتجي من جنوب كردفان
طماطم عضوية .. والمتوفرة في السوق دي كلها ملانة مصايب
تحياتي مثنى وثلاث ورباع
| |
|
|
|
|
|
|
|
|
|
Re: مليونية طوكر (Re: بدرالدين بابكر مصطفى)
|
Quote: الحلول تكمن في شيئين
1ـ فتح نوافذ تصدير لخارج السودان
وعملية التصدير تحتاج معينات وضبط للمواصفات والتغليف والتبريد وما شابه
وكذلك التسويق والنقل والترحيل والدعم الحكومي وما يعود على البلاد من عملة
أجنبية
2ـ التصنيع كصناعة الصلصة والمربى
حكومة حمدوك ليها ستة شهور مما اتكونت ولسع مجرد رؤى على ورق ما عندها!!!!
ونحن عايزين نمدح ونطبل
طيب لايمين مطبلاتية الكيزان زمان عشان شنو؟! |
مرحب منتصر
الحكومة محتاجة زمن عشان تحل مشكلة زي دي .. ونحن نتكلم عن موسم باقي فيه ايام فقط
انا والله كان همي ما تتصدر زاتو .. همي انها تستهلك في داخل البلد طالما إنها رخيصة كدي وصعب تلقى منتج بالجودة دي بسعر رخيص كدي
السياسات بتاعة التصدير عندنا محبطة جداً واي زول داير حقو عشان يمرر لك شي .. ودي ما مشكلة الحكومة الانتقالية الحالية بل إرث ثقيل لقتو من الفترة السابقة
المفروض الحكومة لو جيت شايل ليك بصلة واحدة داير تصدرها تقيف كلها على رجل واحدة لحدي ما بصلتك دي تصل الوجهة الماشة ليها
لكن دا موضوع داير زمن، والحكومة لا يمكن نلومها في دي بالذات
المطلوب نبادر نحن كشعب نحل المشاكل الصغيرة دي برانا
ياخ لو كل زول اشترى كيلو واحد فقط .. حتى لو اتصدق بيه بنكون ساعدنا المزارع وشجعناه عشان ينتج تاني بنفس الكيفية
تحياتي
| |
|
|
|
|
|
|
|
|
|
Re: مليونية طوكر (Re: بدرالدين بابكر مصطفى)
|
سلام عليكم اخ بدرالدين و ضيوفك
نسبة لبعد المسافة و انتهاء الموسم هل ممكن ان تتوفر أرقام تلفونات
لتجار معروفين أو وسطاء موثوقين بحيث يتصل عليهم الأفراد أو
تجار و يتم الإتفاق بأرسال مبالغ لشراء و تجفيف الطماطم ثم ارسالها
لاحقاً بالباصات او الشاحنات او عبر مكاتب الشحن. يرسل المشتري
نصف المبلغ الآن و النصف بعد التسليم. و لتجنب الغش يتبادل المشتري
و البائع صورة من الرقم الوطني. الترويج يتم عبر الوسائط مع التنبيه
على الطرفين بالإحتفاظ بمستندات التحويل عبر البنك و إيصالات الشحن
و حتى تسجيل المكالمات للضمان.
| |
|
|
|
|
|
|
|
|
|
Re: مليونية طوكر (Re: نعمات عماد)
|
مرحباً نعمات
دا بالضبط الدايرين نعملو نحن .. وحاولنا ندخل جمعية اليسر لتشتري بمبلغ 100 مليون ونحن كأفراد نجمع مبلغ 100 مليون
لكن العقبة الوحيدة القابلتنا إن الطماطم لامن تتجفف وتتسحن بتنقص كتير جداً .. وحتى مع سعرها الرخيص دا ما بتتباع ..
يعني الـ 10 طن بتعمل طن واحد مما يجعل تكلفة الكيلو بعد التقطيع والتجفيف واللم تساوي 150 ج في محلها (في طوكر)
ودا سعر صعب جداً الزول يقدر يبيع بيه في الخرطوم، رغم إنها طماطم طبيعية تستحق أكثر من ذلك لكن نظراً لمستوى دخل الناس صعب تبيع بالسعر دا
خاصة في وجود بدائل ذات جودة متدنية واسعار منخفضة
الفكرة دي دايرة استعداد من بدري وتواجد في المنطقة قبل الحصاد .. وبراس مال كويس
بس لازم الزول يفتح مجال للتصدير للخليج ولا أوروبا .. لأنو الكيلو في السعودية غالي جداً
تحياتي
| |
|
|
|
|
|
|
|
|
|
Re: مليونية طوكر (Re: بدرالدين بابكر مصطفى)
|
فى دارفور تجربه جميعه نسويه لمنتجات عده من اهمها منتجات من اللبن جبنه ......الخ مثلا
.
بالنسبه للطماطم اذا كان فى انتاج لدرجه يتم استفاده المصريين منها معناها حتى لو تم التسويق داخل السودان حيكون ليهو تاثير على انتاج الطماطم من مناظق اخرى .يعنى فى الخرطوم عندنا سعر الكيلو 20 - 30 جنيه والفريشه مافاضل ليهم الا يجروك جر عشان تشترى.
من المحاصيل البطاطس ليها فتره- من شهور - موجوده بكميات كبيره لدرجه انو المعروض اصبح جودتو تقل بفعل التخزين
ونشوف كلام عن وفره المنقه فى ابو جبيهه
Quote: تغريده @Mohd_Sidahmed
بمنطقة ابو جبيهة تحرق المنقة حتى لا يحدث تلوث بيئي لانها بتكون مرمية في الارض
برميل معجون المنقة المركزة سعره 1800 دولار
مصنع معجون عصير المنقة المركز مصنع ساهل عبارة عن حوض تعقيم وقشارة وبعديها تبخير وتكثيف
سعر المصنع لايتجاوز 15 الف دولار
وبرضك جنوب سنار بيأكلوا المنقة للبهايم
.
رد
عندنا في الجنينة كذلك في الموسم طماطم بكون صندوق رخيص شديد و أحياناً يتركوه للغنم مفكر امشي اعمل مصنع صلصة الله لكن الوضع غير مطمن شوية مع انتشار السلاح
.
منقول
|
ثقافه التصنيع بدايه من الاسرالمنتجه ووالمصانع الصغيره ضروريه جدا بدل نتعامل مع منتجاتنا تعامل التجار والسماسره
لازم نتعلم نستفيد من معرفه الشباب فى انشاء مصانع صغيره وتشجيع الاسر المنتجه فى مجال تصنيع الانتاج الرزاعى والحيوانى باعتبارو خطوه اولى فى طريق نهضه صناعيه على مواردنا الطبيعيه
| |
|
|
|
|
|
|
|
|
|
Re: مليونية طوكر (Re: بدرالدين بابكر مصطفى)
|
الغالي الأخ بدر الدين مشتاقين كيف اخبارك والوليدات ان الله طيبين في البلد المبارك مكة المكرمة
جدي والد امي عند مشروع بدلتا طوكر والد عضو المنبر المهندس محمد الشيخ محمد الامين
وفي هذه الأيام ذهب الي طوكر شقياقي للمشروع وحدثني عن طماطم طوكر الطازجة الطبيعية
الخالية من المبيدات والمواد المسرطنة
المفروشة في الارض علف للجمال والحيونات
والله ارسل لي صور تدمي القلب اتمسحت من الجوال سوف اتصل به لارسالها مرة اخري
لتشاهد هذه النعمة التي تذهب وقلوب المزارعين تبكي عليها
لي عودة باذن الله
| |
|
|
|
|
|
|
|
|
|
Re: مليونية طوكر (Re: هشام الدرديري)
|
ما عارف ناس طوكر ديل بزرعو كيف ، هل زراعة مطرية - فيضية ام ري مستديم ؟
ولييه ما بستخدمو اسمدة ؟
بشكل عام عدم استدامة الري عامل مشكلة كبيرة جدا بالنسبة للمنتجات الغير معمرة بالذات
تلقا الدنيا كلها زارعة طماطم في الشتاء تطلع الكيلو بي سعر تافه جدا وجزو كبير جدا منها
يتلف ساي ..
الحل في استدامة الري وتعدد المواسم وادخال البيوت المحمية ومضاعفة اوعية التخزين
عشان الكل يستفيد
ازيك يا بدر
| |
|
|
|
|
|
|
| |
بدرالدين بابكر مصطفى
نعمات عماد
قلقو
Asim Ali
منتصر عبد الباسط
هشام الدرديري
Abdullah Idrees
فيس بوك
تويتر
انستقرام
يوتيوب
بنتيريست