/سواقة بالخلا خشوم بيوت/

علا لاكين ترا شقي الحال يقع في القيد

عمومن ، كغييرها في خضم صيحات موضة الواندوق لما بعد الثورة،
دا إذا كانت هناك ثورة أساسن أم أنثى ثَورٍ ، ظهرت هذه العبارة النشاز
في سياق محدد لتطير بها الأخبار و تسير الرُّكبان و يجري حشر أنفها في
كل شيء، شأننا شأن الدولة العميكة، ( Deep State) بوخة الشَّدة ، نار
الضلع ، وكبرا بالبات الورا ورا وأنك فى فتيل والقونات دي بالزات
سامعاعن عمو جقود دافنشي و ماني ناقش معناها يشهد الله.

الزيت :أانو سواقة الخلا ماشة كخبط عشواءَ،
لا فيها قواعد سير عبر قيعان المدينة و لا هم يحزنون ,
و الحكومة القاعدة فوق روسينا متل ديك العدة كما يضفها
البعض بشقيها كان عسكرهمج ولا حرامية ناشطين متفندقين
و كلاهمامصابان بالعمى و العمه ، بلا بصر و لا بصيرة
و لا برنامج عمل وسايقننا ساكت بالعراء الطلق.

عشان نوري إنوالظاهرة ضاربة بأطنابها
في كل الاتجاهات دي دراما ملطوشة بحذافيرها
و شراك نعليه على مسئولية راويها ولينا بس
حق السلبة بشوية حرابيش و توابل
////////
حيث كتب د/ احمد الطيب إبراهيم
استشاري جراحة الكلي والمسالك البولية
ما يلي نصه حول:
(تاريخ الاطباء المزيفيين في السودان )
يلا قول واحد...

شنو يعني شابكننا ليك: القبض علي طبيب بروفيصور
من برة هلا هلا و من جوة يلعم الله ، ولا اعتقال ديك/ تور سايق
التاس بالخلا و ساقيهم الموية بي دودا، و كأنكم اكتشفتوا الذرة ،ثمح
أها، و بالموناصبة دي قالو في عالم ظراط ف يا مبدة كرور شغال
عشواوي مع الطبيعة ينتج دواءً لكل داءٍ عبارتن عن رشوشة من
دفرنش النملة على شوية بصلةكلاب على لبن عُشر مقنن،
ياخ أقوللك حاجة ،قوم لف بالله وسينو الخلق للخالق.

و يعني شنو ما زيو و زي أخوانو المزيفين الباقين في زول قبضهم .
تمامن متل ما في سيارات بوكو حلال في سيارات بوكو حرام ...و متل ما في
رتب ضباط قوات "مُشلحة" برضو في ضباط رتب خلا "مَصلحة" و زي ما برضو
في تمرجية من قدجامى المحاربين تلاقهم الواحدج شايل "عدتو" في عجلة ولا دحشة
صحباء و حاين بين القرى والحضر يطهر الوليدات و يمكن كمان يولد ا لنسوان
وأدوات التعقثم عادجي ممكن تكون عبارتن عن مكمدان من الكربون
من فوينة حجر بطارية مجدوع في أقرب كوشة.

كدي يا ود مهدينا أولن بالتبادي أدن جاي
نشم ريحتك و نقولك جيدن جيتا و خمدله على السلامة
تاينن بالتبادي سمعت قالو أبريش مداقرك ن في شنو ؟!
افففو يا صيدق ما بتقول لاخوك ننصرك تب ظالمن و
مظلومن و نقلِع لك ريش البعاديك،علا برضك حبيبنا
أبريش والله بالخ فوكا عاد كان أتلوم معاك.

ورني البوست بس و زح لي منو بوريهو ليك سواقة الخلا البي صح .
يلا تعال نونسو شوية، شخصياً،و الذمة على الراوي، من خلال تجربتي مريت بحالات
سواقة بالخلا تفوق الكم و كم مع أطباء مزيفين لكن حأذكر منهم تلاتة فقط لطرافاتهم :
التجربة الأولي كانت في مستشفي الخرطوم في التسعينات و كان في نائب اختصاصي
جراحة شاطر و وجيه مكسر المرافقات والطبيبات و اليوم كله داخل عملية وطالع من
عملية والغريبة يوم واحد ما حصل دخل عملية و حصلت ليه مضاعفات مما يؤكد أنه
المضاعفات دي نحن بعلمونا ليها في كلية الطب عشان نعملها للعيانين....و الله اعلم ؟
_ اها في دكتورة حلوة و بنت ناس النوع البجيبوا بالسيارة و يرجعوا بالسواق
_ النوع المتخيلة الدنيا كلها باسطة وناس كويسين وطيبين و صادقين .
عموما الدكتور الشاطر و وجيه ده اتقدم لي المزة دي و طوالي
الموضوع جاب المأذون و شبك شبك كوستي ربك ....
و بعد شهر من العسل و الدكتورة اتكشفت أنه الراجل لا
دكتور ولا نائب جراحة ولا نائب فاعل بل هو الفاعل نفسه ....
و طلع زولنا طبيب مزيف وجراح مزيف لكن عريس اصلي اصلي ...
_ و الدكتورة طلبت الطلاق و العريس رفض يطلق وقال الشرع معاه
والما عاجبو يسأل دكتور ابراهيم الشرعي ذاتو ... و طالب بي تعويض
لو داير يطلق __ لكن يا اخوانا زي ما الحلة فيها عمد وشيوخ حلة المستشفيات
فيها برضو عمد كباااار و شيوخ مستشفيات قعدوا معاه يا يطلق يا نمشي
نجيب اي مريضة دخلتها عملية و نخليها تفتح بلاغ فيك وفي ابو اهلك.
__ و كمان في مدير طبي مفتح و شفت جاب دفتر الوفيات ختاه قدامه
و قال ليه ديل كلهم تبعك كدي ورينا المقابر البنسجلها باسمك بتطلع منها برأة كيف ...
__ صاحبنا طلق و الدكتورة شالت أوراقها و هاجرت وهي تلعن في بلد المواسير الحت
ي عرسانها مواسير ..ومن اليوم داك لو في دكتور اتقدم ليه لي دكتورة مافي طريقة
توافق الا تتأكد عن طريق دفعته في الكلية أو عن طريق المجلس الطبي

استمرت ظاهرة الاطباء المزيفيين في تفشٍ خطيرٍ و مرات بتكون
برعاية الدولة العميكة نفسها حيث شهدت الإنقاض أخطر مرحلة من ظهور هولاء
الفئة الطفيلية و كان اي إضراب أطباء ينسحب فيه الأطباء و الكوادر الطبية من المستشفيات
يتم استدعاء كوادرهم النائمة لسد الطلب من ممرضين و تقنيين و حرس أبواب و يلبسون لاب
كوتات و يتم ملئ الفراغ الناتج من انسحاب الاطباء المضربين طبعا مع وجود عدد من الأطباء
الإسلاميين الكاسرين الإضراب و قد اضرب نواب الاطباء لمدة خمسة وتلاتين يوم سنة 2010
مما ادي الي شلل في الخدمة الطبية تم ملء الفراغ علي مرأي و مسامع الشعب السوداني الكان
عامل فيها ما عارف أو عارف وعامل فيها رايح ( و تلاتين سنة ما حصل زول كضب علي الشعب) ...
نفس السيناريو حاولت "الحركة الما كويسة" أن تقوم به في 2019 لكن التصوير ورفع الصور في
الفيس و كشف معلومات الكوادر التي حاولت أن تستعين بهم جعل حتي الأطباء المتخرجين من
كلية الطب يبتعدون عن الزج بأنفسهم في هذا المعترك الذي قد يلحق الاذي بسمعتك
الطبية و مؤهلاتك العلمية وقد يطول افراد اسرتك و سمعتهم إذا رفعت
صورتك الي قروب منبرشات للافادة والتحقيق.

+ شكرن جزيلن زهدينا و لاك مشحود علينا.
يلا الدرامة التانية حدثت سنة 2013 وكنت وقتها استأجر عيادة
بمجمع بشارع الدكاترة أمدرمان أنا ومعاي د. اسكندر ادم الطاهر
اختصاصي الأذن والأنف والحنجرة المعروف ..
أها يوم جانا دكتور كبير جلحات عريضة لاحسة الفاخورة مخلياه
بيت نمل إلا من بضعة سبايب يحبحبن منل بوخ اللُّقمة، و كرشة
مديدة و عنقرة غليدة ما شاء الله تبارك الله...و النظارات و خاتي
السماعة في رقبته ..و قام أجر عيادة في المجمع.
+ الراجل ضايرنا ليك أنا واسكندر بي جنبة متل جدادة "الخلا"
و استلم المجمع عدلة وقلباء ...و المرضى ديل ماشاء الله بقو كاسرين
على من كل حدبٍ و صوب زرافاتٍ و ووحدانا،رجالاً وعلى كل ضامر
ياتون من كل فجٍ عميقٍ و يدخولن في مجمعهالطبي أفواجاً ، شي
عربات وشيء جايبنهم بالاسعافات وشيء شايلنهم بالنقالات ...
+ بتاع المعمل في "" وكرنا المهجور" اسمو الطيب عثمان قال لي ديل الدكاترة وللا بلاش
.. الواحد في روشتة واحدة يكتب ليك خمسطاشر فحص ما زيك اسبوعين حتي تطلب فحص
بول عمومي و كمان تتصل علي تقول لي طلعوا سريع ...ستة الشهور الصيدليات الجنبنا
دواهن قرب يخلص مع النابغة الذبياني الفتح معانا في المجمع ..
+ اها ربك رب الخير مشيت للدكتور ده قلت الراجل ده جارنا و زميل نطق معاه حنك
و نشوف العيادات دي بشغلوها فللي كده كيف ؟؟؟عرفتو بي نفسي وسألته من تخصصه
قال اختصاصي باطنية جهاز هضمي (الراجل في الباطنية طلع باطنية حُرة ما شاء الله).
سالته و شغال في ياتوا مستشفي حكومي يااللخو ؟قال لي شغال في مستشفي ابن سيناء .
+ والله بختكم يا ناس ابن سيناء جاكم عالم ظراط جديد دفرنش تقيل و دفع رباعي.. الراجل
شبكني ليك مصطلحات و مناظير و الرويال كوليدج و الامريكان بورد.. وشيء مايو كلينك،
غايتو اخدت بعضي وقلت أرجع ألم باقي خيبتي على خيبة صاحبي أسكندر ...
+ جيت لي اسكندر وقلت لي جارك ده كتر خيرو جاب لي قزازة بستيكوليا وأنت
مصاقرني عشرين سنة مناخيرك في مناخيري متل حماتي الغالية، ما اكرمتني
بي كباية شاي باجقلي ضحك وقال لي يازول، إتا جادي ، الوقت للعمل ..
+ اها طبعا بدينا كطيعة الدكاترة مع بعض وقلت ليه الراجل شغال في ابن سيناء ..
_اسكندر قال لي يا زول أنا قال لي شغال في مستشفي المناطق الحارة جهاز هضمي ...
__ قلت لي المناطق الحارة دي مافيها جهاز هضمي ظاطو لكن كدي قوماكا نمشي عليه
الاتنين مع بعض نشوف الزول ده حكايته شنو ....غايتو الراجل زرزناه و عصرناه لامن جاب
الزيت و نحن جوة و المرضي برة و العيادة لسوء حظه مافيها شباك ذاتو يتخارج بيهو ..
+ قلنا ليه بكرة نحن منتظرنك تجيب شهادتك و تسجيل الاختصاصيين و لو اتاخرت
حنجيب البوليس و نجيك نحن ...و من اليوم داك ما ظهر و لا فتح تلفونه ولا عرفنا
عنوانه لكن تصورو ليوم الليلة في مرضي بجوا يسألوا من الاخصائى بتاع الباطنية
الشاطر الكان هنا في المجمع و كلمنا السكرتيرة تقول ليهم هاجر استراليا ...
+ بالموناصبة هي السكرتيرة لو قالت ليهم طلع مزيف ما
كان دقوها بعد "الدفع قبل الرفع" الدفعتهم ياهو!!

 فما هي ضوابط بناء الأسرة المسلمة؟ وماهي أهمية بناء الأسرة من الأساس
ووظائفها وكيف تكون معايير ومقاييس هذا البناء؟ بعبارة أخرى مباشرة، ما هو هدفك
من الإقدام على فلعةٍ سبقك إليها الأوولون كقفزة متهورة في الظلام، و سوف يتبعك إليها
الذين إن شاء الله بك وبهم لاحقون. وهنا طرفةٌ تُنسب إلى العم جحا، إذ حُطيَ عنه أن ذات
مرة صب جام غضبه علىمن سبقوه على دخول القفص الذهبي لأنهم لم يبلغوه بأن
المسألة عبارة عن برميل زفت كاببين عليه باقة عصير روزا نظام طوبينغ(وشية)،
و برضو زعلان طاقي حتى ممن تزوجو بعده لأنهم لم يسألوه!!