♧كَلْبُ طُرُمْبِةَ ياخد بُمْبَةً€

* خلي تيس الحلبة (يلبلب) بس في محلو .
و يغور العلج بومبيو ضهرو يقمِّر عيش؛ إن
شاء الله قشة ما تعتر ليهو و لا اليتشدد ليهو .
《و أبشر لينا بالخير إتا يا حمدوك ، اسم
على مسمى. و من الليلة ، البتاكلو ينفعك 》
●شدوا لك رِكِبْ فوق مُهرك الجماح
ضرغام الرجال الفارس الجحجاح
تمساح الدميره الما بيكتلو سلاح
السم النقوع الفي البدن نتاح
يا عُصار المفازه اللعيون كتاح
المال مابيهمك إن كتر وإن راح

●بطناً جابتك والله ما بتندم
يا اسد الكُداد الفي خلاك رزم
يا رعد الخريف الفي سماك دمدم
بابك ما أنقفل نارك تجيب اللم
مابتعزم تقول غيرإستريح حرّم

●أبواتك جبير بيحلو للعوجات
مطمورتك تكيل للخاله والعمات
في الجود والكرم إيديك دوام بارزات
يا أب قلباً حديد في الحوبه ما بتنفات

●عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق للفارغه ما بتحوم
لا بتنلام و لا بتعرف تجيب اللوم
ود ناساً عُزاز جمعوا المكارم كوم
تفخر بيك بنات الباديه والخرطوم.
.

يا زول من الليلة دي نعلها مدويةً :
حمدوكية للنخاع . ثم مين قالك أصلن :
إنو التطبيع مع القردة و الخنازير حيرفع
عننا عقوبات العلوج . عشان نربط بيها
كشرط وجوبٍ . مالكم كيف تحكون؟ ياخي
ثكلتكم أمهاتكم و أخواتكم من الرضاعة.

ياخي إنتو فاقدين الذاكرة¿¡¡. معقول
نسيتو أيام الراقص المخلوع القريبة دي ،
لامن جونا بي وهمة الرفع جزئياً لقعوبات
الجن ، كان سعر الصرف ب07 جنيهات فقط
لا غير، للدولار.ثم بعد ساعات معدودة قفز
الجان بالزانة إلى أرقام فلكية و لا يزال!!

* و من الليلة ح نعمل حزب " حَمَدَوك يسلمو الجابوك "
و شعارنا (تنقد الرهيفة إن شاء ما تترتق و مرحبتين حبابو
الشر محل ما بتَّق) . براعة فزاعة رعاية إرهاب برا قلة حيا
معاهم!! ياخي نحن ح نفضل لمتين خايفين من ضلنا . أها سمح ،
أقول ليكي حاجة ، ضلنا دا ظاتو لو كترو و قللو معانا بعدا حنقول
ليه: يا زول أخير لك تختانا والله روحنا بقت في راس مناخيرنا،
فلو انشبكنا فيك علا بعدينك يفرزونا بلون اللباسات . قوم لف
بالله تبَّن لك و الله آخرتا يقودنا واحد رويبضة زي بن زايد.

مصارعة حرة ، و لا مصارعة تيران و لا رومانية ياهو كلو
(عيتنوبة ، دواس نوبة). ما هو يا دكتورة ، لامن خلاس الواحد فينا
رويحتو تجيه في الطقاق بيبقى (We'he Got Nothing To Lose)
يلا بعداك نقوللهم : نتلاقى نتلاقى في الرملة الدقاقة و يا روحي المشتاقة
يلا الديرىة الملاقا و لا كيف ، صاح و لا أنا ماني غلتان؟!!

.

والله كمان الحاجة البتففع المرارة بالجد سطحية بعض
المنبطحين منا لامن يعلقو مسألة التطبيع من عدمها بمصير
الفلسطيينيين و فعايل زعمائهم المتناحرين سواءٌ منهم المهرولون
منذ أوسلو وراء حلول الدولتين و خلافه، أو الهتَّافون بشعار المقاومة،
إنما القضية مبدأ أخلاقي ، سواءٌ أخذناه من زاوية معتقدٍ دينيٍّ بواحٍ ،
أو من باب التشدق بأية آيديولو جية. أخرى كانت ؛ المهم أن يكون نلك
موقفٌ حضاريٌّ من دولة تغصب أرضاً و تشرد شعباً أعزلَ و تمارس
ضده أبشع صور الفصل العنصري على مرأىً و مسمعٍ من أحرار
العالم بأسره في مشارق الأرض ومغاربها. خلينا ياخي نعيد أحواء
(لاءاتنا التلاتة ) نكملابرابعة الأثافي و بعدينك نرجى الله في
كبري بيكة بعد الكريبة. ربنا لا تؤاخنا بما فعل الجبناء منا.