♧صُباعُ المَعجون في فَتيلٍٍ£

 《1》
♧ لست مجنونًا، و لكن جئتُ رغم أنفي £
●عندنا بينتهي صباع المعجون الوااااحد دا، و هو
في ريعان نخبه الأول عادةً في غضون فترة أسبوعين
تلاتة بالكتير عند الناس البحكوها شديد ثميصمد
لأربعة أشهرٍ و عشرة أيامٍ أُخَرٍ حسوماً!!
☆ ود ااح ي ش ا ن ال ت ل ا ت ة
مؤذنٌ محجورٌ منزلياً بجزيرة مالطة

《2》
● بعد انقضاء مُدة العِدة حنمُر بمراحل التِّجِضم،
اللِوْلَيو ثم«العِصَّير» و« البعبيص» لا مواخزة لامن
يجيب الزيت ظاطو.، و من ثم الكرفيس و الشفط
بالهوفر ، حتين بعداك يجي الكرِش و اللِّطَّيش والفجيخ
و الظِّعميط فالشِّرَّيط و النَّخِر يحشرو فرشة الاسنان في
كناكينه و ينخشوه بعود الفسو و الماني عارف شنو داك؛
إلي أن نصل مرحلة الكِطَّيع و المدغ ساي راسو عديل
كدي؛ ثم التلاشي غير مأسوفٍ على شبابه
لأنو فعلن (غلتان المرحوم).

《3》
●أيوة غلتان المعجون و60 ختيان و متختري الدرب كمان؛
طبعن تراهو بي شلاقتو باقي متل الشعيرية كانت فعلن غلتانة
يوم حتها جاتنا مشاقة بديار صباح في أم هبج أرض البطانة !!
يوم أختنا تام زينو صاحت لأخوها اللفندي من وسط ضيفانو في
الخلوة بقرو معاهو فوق جامعة الخرتوم: هوي آباشَري خوي تعاللي
مد لي راسك بي فوق الصريف ساااه عندي معاك حديث ، أها بدور
أسعلك : إتا النصيبة الجبتها لينا دي أنا غايتو قدرت عليها درجتها
تب بالمفراكة متل سواة أم تكشو بالويكاب .علا بعداك غلبني شن
أسوْ لها، تحين ما أتوكلو ألايكَّا ليكن متل ناس البنادر ؛ ظنيت
حتهن بلايقوها متلنا كدي يعشقوها بي تُرتار ويكة !!

《4》
● صباع المعجون الفارغ(إن وُجِد)
فيعتبر من النفايات نادرة الحدوث، و التي
لا يمكن التفريط فيها بأخوي و أخوك، مسلن
عشان يتعمل ليها نظان ( Recycling ) أي:
مجازفة إعادة تدوير و كدي! و قلما نلقاه
مرمياً في كوشة زبالة وهو سالمٌ غانمٌ.

《5》
♡ بالعكس حبيبو ود مهدينا. دا أقل بكتير
من فروض الوتجب و قد لقنتنا صروف القدر
و نوائب الدهر دروياً أقسى من أن تُنسىبأنه لولا
علم المولى بما تنطوي عليه مثل هذه الجوائح و
المحن لما لما أذاقنا منها أذى و نصباً و لت وصبا
حتى الشوكة نُشاكها. إذن، علينا فانصبر و لنحتسب
و ليضع لله كل ذلك مثقالاً في موازين حسناتنا.

●و عاى طاري المحن تعال نشوف طيلة هذه الأربعة
أشهرٍ و عشرة، و هي مظبوطة على (عدة حبس الأرملة )
موش عارف ليه ؟ علا يمكن فيها إشارة ذكية إلى رمزية
كونإكرام الميت ؛ رغم إنو سمعنا قالو : إكرام الميت دفنو ؛
موش يبهدلوه جنس دا ؛ زي سواة جزاء الباشنهمس/ سنمار
على يد الملك النعمان بن المنذر يوم أن رماه ليلقى حتف أنهه
من أعلى سطوح صرح قصر الخورنق الذيصممم عمارته و بناه
له بنفسه.ياخي ليه داياً كدا" خيرن تفعل ..شرن تلقى"

《6》
● الشاهد:أنو، و رغم تيقنك تمامن بما لا يدع مجالاً لمناورات
اللَّتو (العجن) بأن المعجون قد نفد أجله و خلا وِفاض أنبوبه بفعل
عوامل التعرية العاتية التي تعرض ليها على يديك أخخخ منك إتا ؛
يا سفاح يا وحش يا كاسر!! علا أنو النتيجة النهائية انك في نهاية
النفق المظلم بتتسوك منو يعني بتسوك منو سيك سيك معلق فيك،
و باتباع أي من السبل (الملتولية) و الحيَل المتخلفة المبتكرة
المذكورة حسب وصفات الخلطة السحرية بالعنوان أعلاه.

《7》
● أما مرحلة غسيل المعاجين فلا تبعد كثيراً فزلقة غسيل الأموال فكلها
جرائم منظمة ضد الإنسانية .و هي مرحلة متأخرة شديد و حديثة جدن لم
تخطرمن ذي قبل على قلب بشر و لا أي ذي كبد رطب؛ و لم أكن شخصياً علي
أيةدرايةٍ بها إلا بعدما قابلت صاحبنا (كوتش) بالامس وجبنا سيرة المرحوم. قال
لي:إتا عارف يا دفعة انا اخر مرة دي لمن قمتا اتسوك الصباح وشفتا حالة صباع
المعجون بصراحة تحنن فعلن حنيت عليهو لانو ما فيهو أي حاجة تدل علي
انو كان هناك أثرٌ بعد عينٍ رضا كليلةٍ لوجود أيتها دعكة معجون .

《8》
● المهمراحتا فاتح خشمو بيدي العِسرا و نفختو نفخ خروف العيد بالكُنُش،
و كبيت فيه موية و مسكت الفرشاة بيدي اليمنا يلا وخجيت الموية ديك شوية
و كتحتها ليك في خشمي عامل زي الود بشرب لي في سفن أب نظام حاجة
باردة و كدي، و بلا لحقتها ليك سريع بالفرشاة و بلا هاك يا برط نضيف!!

《9》
● قت ليو، بعدما كدت أشرق من الضحكعلا بس "أنا ماشرقتا.. (أنا جيت أعاين"
في محن و بلاوي آخر زمان: قت ليو تعرف يابو الكواتش إتا دايناصور شبه منقرض
السلالةوشكلك جايبنا ناطي من غباعب العصر الجيري؛ فا شنو، مفروض يكلبشوك و
يتربسوك جوة مع الخرافيات المحنطة في متحف الشمع الأحمر في لندن؛ و ما تدبرس
بتلقى شلتك قدامىالمخاربين هناك ناس الغول و العنقاء و الخل الوفي. و لا قول ليك حاجة
يابوالكواتش، ياخي تيمح لي أقولك: تبن لك و ثكتك أمك وأخواتك من الرضاعة! يعني
لو ما كان حنيت عليو كان أكلتو موش بس قوللي. بالله عليكم دي أمة يشفعو ليها؟!!

《10》
كسرة:
● صباع المعجون تجاوز سعرو حاجز ال( مليون م/ج أي:(ميل / جنيه )
و ما زال (العِصَّير) مستمراً و كمان ما بتصدقو الصباع الحاقد زاتو قايلني
شمتان فوقو فرفع رويسو صرلي إأصابعينو المكنكشات الخمسة وقاللي شنو:"اسنع
هوي، كدي خلوني أنا ترا البقت فيني بقت خلاس.علا اصبرو أنتو زاتكن و بس
أرجو البلا الجاييكم؛ و هو إنتو لسة شفتو جنس "عَّصَّير" أنا اتخصبنتا منو و قت
ليو : يا كافي البلا و ياوحايد المحن . فعلن والله "يا ما تحت السواهي دواهي"

(11)
* ةكمان عندنا الله يعزكم استعملالات تانية مبتكرة للعجون
خلرج نطاق فطرته اللتي فطر الله الناس عليها ، و لو اهدت
غليها منظمة التقييس الدولية (ISO) أوالمنظمة الدولية لمعايرة
القنونية(O.I. M . L) أو حتى المنظمه الدولية الكهروتقينة الكائن
مقرها بجنيف، و أنا واثغ جدن إنهم حيمنحونا عليها براءة الاختراع
و موش بعيد ظاطو نفوز بجايزة نوبل للسلام في مجال إعادة
تدوير القمامات والزبالة لأغراض الترششيد و التقشف !!!

(13)
*فمرة عمك دا مرض رقدوه الحصاحيصا طبعاً مرض كبر ساي ..
ماليه علاج لكن تحصيل حاصل فأهلو حيرانين و هو زاتو قرفان الكتمة
عايزيتخارج فقام المريض البي جوارو اليوم داك كتبولو خروج ومشى دخل
السوق يلقط ليه شوية حاجات من ضمنها معجون جابو ختاه على السرير وفات
للحمام . هنا قام عمك علي كنان سحب المعجون على حين غرةٍمن صاحبه وجلبط
ليك بيه روحو بطن و ضهر.. ظناً منه أنه يعالج آلامه ا لمقلقة منامو دي ...فأولادو
جو داخلين لقو ليك الريحة ظايطة العنبر قام أصغرهم ظريف جدن اسمو مأمون
لامن شاف ليك أبو بلونين المعجون(أبيض وأحمر) قام قال لينا: من دربي دا ماشي
ناس الإذاعة ديل أقول ليهم من الليلة دي لازمن تغيرو شعار دععايتكم للمعجون
و تقولو: "سيجنال تو بالفلورايت يودر عسيم الضهر و يكافح الفلايت..

₩نضحك شوية£
«بي تخريمة شمال من مٱسي صباع المعجون»
........................
●جداً لينا من كواهلة بحر أبيض.. مسكوا وجع بطن
لواية دايرة تودِّر ذمتو خلتو يهضرب:(يا ناس المزاريق
والسكاكين و الخناجر تحش في مصاريني حش).
∆الجماعة ختفوهو لحقوبو عيادة أجدع أخسَّاوي باطنية
في منطفة الكوة .. دخلوه على الحكيم و شكالو الحسس
..الدكتور قال ليهو: "أمش جيب لينا فسحة و تعال".
مرق برة لقالو شباب المسطبة عواطلية لاغبين ليدو :
" ها جنيات هوووي وروني محل المروق بي وين؟!!
ضحكو عليه و قالولو : يا حاج ( المروق ) في جيهة سوق
العناقريب. زولك شم ريحة القهنبة قام كورك فيهم صرف
لهم بركاوي صاح و رجع مقبل على جماعتو قاللهم أرحكن
آناس دي عافيتن اتقسَّت بلحيل و جابت لها فنقسة؛
تحين قوموا نشيل أهلنا نتكامل عقابنا من ضو "
😂😂😂

و قد آن له الألوان ليرى سوات القرض في جلد كريت
كدة.. و.. كدة
تقول الدرامة أن رجلا ذهب ليشتري سيارة من سوق السيارات
(الكرين بحري و لا كونيكا مثلاً) و معه من المليارات عشرة خدمة
يمين و عرق جبين، وبعدما طاف على ما لذّ و طاب من وارد كوريا
و اليابان رأى عربة ( بيجو) قديمة و ( مكركعة) ارتأى أن يسأل
صاحبها عن سعرها من باب جبر الخواطر و ( كدة)..
: السلام عليكم
: و عليكم السلام يا وجيهنا
: مطلوب كم في البيجو دي يا شيخ العرب
: عايز خمسة عشر مليار نهائي
: ههههههههه يا زووول
: تضحك..... مسكين تعال نوريك سرها
العربية دي فيها جان مارد زي بتاع مصباح علاء الدين
: قهقهة
: تعال نوريك البرهان بيان بالعمل
و يفتح الرجل غطاء العربية ثم يمسح على اللديتر فيتصاعد
منه دخان كثيف يخرج من وسطه جان ضخم
يصيح بصوت راعد : شبيك لبيك
صاحب البيجو : بالله جيب لينا اتنبن شاي مظبوط
سمعا و طاعة يقول الجان ثم يضع أمامهما كوبي شاي
يتصاعد بخارهما... يصاب الرجل بالذهول إذ كيف يبيع
هذا الغبي كنزاً مثل هذا...بعد مفاصلات و أخذ ورد اشترى
الرجل البيجو بملياراته العشرة و هو يضحك من غباء صاحب
البيجو. قاد الرجل العربة مسرعن قبل أن يحدث ما يفسد
الصفقة حتى إذا وصل مقره سأله أصحابه.
: ده شنو ده
: زي ما شايفين بيجو
: بيجوووووو و بكم
: بعشرة
: عشرة شنو؟؟
: مليااااار
لكن هسه برجعها
دهشة شديدة : يا زووول
بحركة غريبة يفتح الرجل غطاء
( كبوت) العربية و هو ينظر ضاحكا فسيريهم
«البرهان»بالعمل ثم يفرك ( اللديتر) فيخرج المارد
شبيك لبيك
يقول الرجل ضاحكن :«عايز لي عشرة
مليارات..صرة في خيت، و سريع بالله!
المارد : يااا أبو الشباب أنا متخسس جبنة
و شاي بس ما مسموح لي بغير كدا!!
فيا فگينا المفترس جبرين ما عصروتا!!
داير تصرف الباش بزغ تبعك من بند أرباب
المعاشات، فعلن اللختشو ماتو!!

∆حي الله ناس نيويورك المدينة الخارقة لجدار الزمان باتجاه المستقبل. لنتصور
حياة كنداكاتنا « لمسنوحات» لامن يبقن حبوبات الأزمنة الجاية بعد سنين ضوئية
إلى أن يرث الأاله الأرض ومن عليها . كحبوباتالألفية الرابعة مثلاً والألفيات التي سوف
تليها، ثم التي تليها، حبوبات آخر زمن، كلام عجيب! فيذلك الزمان حتماً سوف يتغير
كل شيء.. ستبلغ حبوباتنا درجة عالية من التشرب بمعطيات التكنولوجيا ..
∆ يلا نسوق معانا مهدينا المنتظر دا ل«نعبر» إلى عالم حنكوشات الألفية الرابعة.
حيث قالت حبوبة (نانسي) مخاطبة حاجة "شاهيناز"التي كانت منهمكة في فرك
البامية المحورة جينياً!!!!!
- والله يا شاهيناز ياختي أنا ما عارفاك بتفركي كيف بي (مفراكة الليزر)
دي الناس بقو يفركو بي (المفراكة الكهرومغناطيسية . فقام ردت عليها
حبوبة(نانسي) وهي تطفئ البوتجاز الذي يعمل بنظرية الأوتار الفائقة:
- نسوي شنو يا بت أمي نحنا لسه ما دخلنا في عصر الصرخة العلمية لكن
أسكتي ساي ما وريتك أمس حاجة هيام بت هيثم ود لؤي عملت شنو؟! ..
نططت حاجة شاهيناز عيونها تهيؤاً لاستقبال الشمار وقالت:
- مالا ؟! .. أنا عارفاها دي زولة عندها (ضلالات عدمية) تلقاها
سوت ليها عملة كبيرة!! أجابتها حبوبة نانسي:
- أمس مشيت ليها البيت كنت دايرة لي (ثالث كروموزومات
السايكوبالتيك) عشان ألون الخبيز ..لقيتا ليكي ماسكة (اللا بتوب)
بتاعا وعاملة (شات) مع واحد عجوز من (هضبة التبت) .. تصوري
المرا الما بتخجل دي! .ثم إمعاناً في هذه عشرة (النميمة الإلكترونية)
قالت حاجة شاهيناز: أنا زاتي المره دي) بقيت مكجناها) مما سوت
لينا القهوة في الجبنة الصانعنها من (معدن التيتانوم) ،يعني المتخلفة
ما سمعت بي (جبنة الألياف الضوئية؟ ) ولا شنو يعني؟!
∆أضافت حاجة نانسي في استهجان بعد أن صعرت خدها الأيسر:
والله صحي (الماوس ما بزيل بلم) ..العالم رامي قدام و ديل لسة
في التخلف، لكن إنتي أمس مالك ما مشيتي معانا لي الاحتفال بالذكرى
السنوية لـ (جولدن جلاشو) عالم الفيزياء المشهور؟أجابتها حاجة شاهيناز:
أمس بعيد عنك مشيت غشيتطبيب أسرتنا فحص (الجينات الورلثية) بتاعتي
أصلو عندي زي ما تقولي طفيرة (جينية) وثابة كدا و مغلباني بلحيلقلت أقلعا
من كناكينا و أرتاح منها مرة واحدة..وبالمرة غشيت الصائغ بتاعي غيرت غوايشي
بي معدن نفيس جديد إسمو (الزرانكلينيوم) جابوه من «حبل عامر» على كوكب
ما متذكراه لكن بدور حول نجم اسمو (لالاند) مننا تمانية سنين ضوئيةبس.!
∆هزت حبوبة نانسي رأسها وقالت: و الله بقيتي خطيرة عديييل كدا .غوايش
البتاع القلتيهو ده أنا زاتي ما سمعت بيها .. كدي وريني واحدة!!!!
قالت لها حبوبة نانسي: ديل يابت أمي للمناسبات بس ما بطلعو بيهن ساي
ثم رفعت حاجبها الأيمن بنوع من الغنج ودهاءمصطنع أصلو لمان موبالة
ثم أضافت: وبعدين إنت الظاهر عليكي برضو ما سمعتي بي شنطة اليد
الجديدة العاملنها من (رقائق السيلكون) فى؟تنشقت حاجة شاهيناز نفساً
عميقاً وهي تجهز عبارات مناسبة لترد بها هذه الهجمة الشرسة لترد ليها
البوبار بمثله بوبارين ثم قالت:حاجات االقلتيها دي أنا صاح ما نقشتها ..
لكن إنتي برضو ما سمعتي بي الكفتيرات الجديدة البتعمل بي (ألترا ساوند)
و (موجات ألفا)و لا بـ (الكمشة الاستقطابية) .. ودي كمشة بتغرف الملاحات
براها وبتكبهن في الصحن ..وعندك كمان (الحلة الفوتونية) ودي بتنجض الملاح
بـ (الطاقة القمرية.....)
∆في هذه الأثتاء كبس عليهن (حاج رامي) عمك جلكين كدا ، زوج حبوبة نانسي
وهو يناهز في الثمانمائة و نيف من عمره.. و توقف موارباً للباب و ركب مجساالسونار
ليتنصت على هذا (البوباريشن) المعتق، سمع حاجة شاهيناز تستطرد في حديثها لزوجته
حبوبة نانسي هي تقول: وبعدين أنا ولدي المغترب في (كوكب نبتون) جاب ليهو (شويفع آلي)
صغيرو′ني يساعد مرتو في تقطيع السلطة وغسيل العـدة .. وفي هذه اللحظة دخل حاج رامي
وقال: قومن يا نسوان سون لينا الغدا و بطلن (الفشخرة) الفاضية دي .. وأضاف في سره
بغضب وان شاء الله تقوم بيكن قنبلة (بوزوترونية). تريحنا من نقتكن الكتيرة دي.
تعيش كتير تشوف كتير إن شاء الله عمرا طويل يحضرنا زمن حبوبة
نانسي وشاهيناز وجدو رامي وعمو هيثم وحاجة تغريد وعماتو
ي ناس حاجة مارغريتا و سندريلا!!!
إلى ودمتم سالمين