|
|
|
 Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
هسي كلامي ده فيه غلط
والله لو يقطعوني حته حته ويقتلوني في اليوم سبعة مواتات
ما بفرش لي شوال ابيع فيه انكسة نسوان
ولا تربيزة ابيع فيها أحمر شفايف
انتو بدل تقعدوا لينا زي الهم في نفسنا
امشو الدهب محل شغل الرجال الجد والقروش الجد
شيلو القروش عمروا ضهاريكم
كل العالم المتحضر ما بيسكن العاصمة فيه إلا الأجانب وقلة من أصحاب العاصمة المعزورون
هنا لقيتوها فاكة ساي
زول بيسالكم مافي
إثيوبيا دي لو داير تجي أديس أببا إلا الشديد
القوي وبإذن وتصريح ومحدد يوم رجوعك لديارك
اها كلكم جيتو هنا
البينتج لينا منو
حبوبتي الخواجية صوفيا مثلا ....
| |
 
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
Quote: استاذ توفيق
كل عام وانتم بخير 🌹
فعلا يجب أن يرجع الناس لاقاليمهم المنتجة
من أجل بناء قدرات السودان الاقتصادية. |
شكرا يا دكتور وانت بخير يارب وقول ليهم أمكن منك يقتنعوا
اصلوا البيني وبينهم ما عامرة
عشان من قولة تيت ما جاملتهم قلت ليهم الحقيقة في وشهم
نحن في زمن البقول الحقيقة والنصيحة مكروه
بس بنقولها عشان بنحب بلدنا ودايرنها تمشي لي قدام
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
قصدك حمدوك ولا منو
على العموم ناس الظهاري دينمو الخرطوم....بدونهم البلد واقفه
وحكمه الله كمان الحاكمين والمسلحين ناس ضهاري
وإذا عندك كلام امشى شوف ناس فريق الخلا وشلته وقول ليهم اتخارجو:)
يا امير الرايات الكانت سريه مشكلتك شنو معنا نحن ناس الضهاري
يا توفيق السوق عرض وطلب وكونك تحتقر بيع سلع دون اخرى فهذه مشكله تصور شخصى لن تخوض فيها لكن لاعلاقه لها ب سوق العمل وكنت احسبك من اهل التجاره والاقتصاد....
التحيه للباعه المتجولين فى الحر وفى البرندات لا عيب فى المعروض ولا فى البائع.....
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: Abdelrahim Mohmed Salih)
|
| Quote: على العموم ناس الظهاري دينمو الخرطوم....بدونهم البلد واقفه |
هل قبل ما يجو الخرطوم كانت واقفة مثلا بالعكس كانت أكثر اذدهار وعطاء للكل
بعدين الأشغال الهامشية دي ما بتودينا قدام لابد من تفريغ العاصمة ولو بالقوة القصة
أصبحت غير محتملة وما تفرح بالقعاد بالسلاح الدنيا دي ما بيصح فيها إلا الصحيح
بكره بكره جاييكم الفريق جلحة وشوف حا يحصل شنو
وما عندي قصد إلا حب سوداننا ده
حاول أفهمها بالعربي
ولا الأوضاع كده عاجباك
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
حمدوك وحميدتى ناس ضهاري افتكرتك قاصدهم معانا:)
زمان كنا نلعب بلى فى الشارع فى حركه معينه فى اللعبه ما متذكر كويس اسمها تكس يرجع تسمح لللاعب بإعاده المحاوله وهو ما تفعله الان يا امير...وما الحرب إلا كر وفر
غايتو تانى لو جبت سيره ناس الضهاري طوالى بنكلم ليك ولدنا حميدتى ممثل الضهاري فى الخرطوم ولا عذر لمن انذر
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
توفيق وينا الاقليم والانتخابات وحاكم اقاليم وبرلمان الاقليم ومجالس الاقاليم المنتخبة والادارة الاهلية والجنسية الخضراء
مع مواسير
المركز ديل ودرويلات الامارات وقطر والسعودية وتركيا ومصر والنهب مستمر
الاتغير شنو
الانقاذ قاعدة
ديل ما سمعو كلام جون قرنق نقل المدينة الي الريف يسمعو كلامك انت
وعايزين داااااااااااااااااااااااااااابهم يعملوووووووووووووووووووووو مؤتمررررررررررررررررررررر للحكم الاقليمي
وورجغك وورجغك وورجغك
امشي كلمهم وشارك في المؤتمر
يرجعو قانون 1974 ودستور 1973 كارضية كل مشاكل السودان بتنتهي
يما يقدونا الشيوعيين و البعثيين والناصريين دين وعقاب كيزان الترابي
الناس ديل ما عندهم لا موضوع ولا مشروع من الاساس وما بحترمو مشاريع الاخرين
والناس مابرنهم والمعيشة الضنكة مستمرة
| |
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: adil amin)
|
لو قدر لك قضاء أيام العيد في الضهاري
لتركت هذه العاصمة الجافة مدى الحياة
هذا ان لم تقابل المأذون
وتمنحها صك الطلاق
طلقة ثانية رجعية
تمنحها فرصة 90 يوما
اما ان تعود إليك
او تحمل متاعها وبقجتها وترحل عن قلبك
حينما تأتي من الضهاري لتسكن هنا
حيث أطول قبلة في التاريخ
صدقني ليس من السهل ان تتصالح مع العاصمة
تشعر وكأنك تتنفس برئة واحدة
هنا يعيش إنسان الضهاري ك دجاج ميكو المجمد
بلا روووح
وبلا أحاسيس
وبلا مشاعر
هنا يختلط الفرح والحزن في مشهد واحد
وهنا تمتزج الكوميديا بالتراجيديا في خلطة واحدة
خلطة غير صالحة للاستهلاك الآدمي
ولا حتى كعلف بروتيني لابقار المراعي
هنا كل الأشياء لاتتنفس
ولاتنمو
ولاتنبض
وأن لم تراجع اخصائي القلب في كل حين وحين
ستجد ان الصدأ قد أغلق كل منافذ الأوردة والشرايين
الحياة هنا كلها متاريس
ولا أعني تلك التي يصنعها الثوار لأجل التغيير
بل متاريس اجتماعية وقبلية غاية في المعاناة والتعقيد والبوبار
يا اخي في ملتقى النيلين
حتى العلاقة الحميمية الحلال مع ام العيال تحتاج للمزيد من الضوابط والمعادلات
وقبل الضوابط إستغلال الفرص
فلو انتظرت حتى يرخي الليل سدوله كما تفعلون انتم هنا
والله العظيم انت تنوم في كاب الجداد
بينما تجد مرتك نايمة في عد الغنم
حتى تربيزة المكوة التي فرجت عن كربة زميلنا في سودانيز
ونام عليها هو والمدام حينما تكالب عليه أهله المعتمرين
واثمرت هذه التربيزة عن طفل غاية في الروعة والجمال
فالاشياء التي تأتي خلسة وبعيدة عن أعين وفضول المعتمرين
تكون بنكهة وطعم مختلف
هنا في الخرطوم حتى هذه التربيزة ربما تجدها مشغولة
بعكس الأمور في الضهاري
حيث ينام الناس باكرا
وربما أغلب الشفع الذين تجدهم حائمون في الضهاري
كل هؤلاء قد تمت زراعتهم في أرحام خصبة
وفي وقت لايتجاوز العاشرة مساءا
وبعدها ينام كل الناس
حتى التي قضيت معها غرضك ستجدها تغط في نوم عميق
بينما انت ابو القدح لو ( ختفك) ك ل ب او تمساح
فإن حكومتك الرشيدة لاتعطيك بالا او اهتماما
ياتوفيق .. الحياة في الضهاري جميلة جدا
والغيوم التي تراها هنا تغطي سماء بحري والكلاكلة صنقعت
هناك في الضهاري تكاد تلامس الأرض
غيوم ورذاذ
وخضرة على مد البصر
حتى هذا الرذاذ حينما يمتزج بالأرض
يحدث كيمياء رائعة
صدقني أمضيت أسبوعا كاملا في الضهاري
في قريتنا الجميلة (ودربيعة الانثى)
رجال شامخون كالهملايا
ونساء بنكهة الياسمين
وبلون الأناناس
وفي كل زقاق من ازقتها الضيقة دفنت بعضا من ذكرياتي
وفي كل عام أجدها وقد تخصبت بانفاس الناس الجميلين هناك
لتخلف من ورائها ملايين السنابل
ورجعنا
لم نحمل معنا قزازة السمن التي يأتي بها أهل العوض كما تطلقون علينا
بل حملنا معنا حفنة من تراب الضهاري
ستفناه بين طيات ملابسنا
لانه تراب معجون بالحنين ومسكون بالوطن
فمن يدري
ربما نرجع يوما ما للريف
للجمال والدهشة وكيمياء الحب الحقيقي
للشهامة التي تسيل كاودية من نور
لتسقي كل الوطن من الوريد للوريد
هجمة مرتدة
تعرف ياتوفيق انا مكجن العاصمة دي منذ أيام الثانوي
أيام الجاهلية
حينما كنا بي تحت تحت نشجع قريش
حيث كانت لي علاقة عاطفية مع واحدة من هنا
وكنت ألتقي معها في كافتيريا بالسوق الشعبي
طبعا ببيعنك بي سرعة عجيبة جدا
علاقة روحية صفر
ضحاكاتك انتهت بتروح في خبر كان
توادعنا على ان نلتقي
فاجأني صاحب الكافتيريا بانها تزوجت مغترب من أبوظبي
ويومها كرهت أيضا الشارقة وعجمان ودبي والفجيرة وجبل علي ذاتو
والمدهش أنني رجعت كداري من السوق الشعبي للفتيحاب
واي زير سبيل قابلني في الطريق اخذت منه جغمة
والآن حينما اتجه بسيارتي برفقة العائلة
من الفتيحاب حتى السوق الشعبي في ساعة كاملة
اقول للعائلة لاحولااااااا
ويقول لي الأبناء يا ابوي مالك كلما تصل هنا تقول لاحولاااااا ؟
قال ضهاري قال !!!
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: muntasir)
|
الحبيب توفيق حفيد امراء أكد وسروج
طبعا هم كمان من مؤسسي امدرمان
كمان حي في امدرمان أسمه ( ود اورو ) ديل كمان من أهلنا
أورو بالدنقلاوية معناها الملك أو الأمير أو الزعيم ( اور باب )
وأورو كلمة مستخدمة عندنا الى اليوم يذكرها الناس عند الشكر والمديح
وتعظيم شأن الشخص ..
تحياتي حفيد أميرنا
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: خضر الطيب)
|
أخي الحبيب عادل طبعا بالفعل قاعدة وباخوي واخوك ما بتفوت
اها نعمل شنو ؟ مش اخير نشتت نسيبها ليهم نمشي نعمر اقاليمنا وخلانا
هنا عشان الثقافة بقت سلب ونهب قروش الحرام بتاعت الناس المغلوب على
أمرها المغيبين نقوم نعمل ثقافة تكس يرجع نقفلها ليهم كل زول في منطقته
وكل زول في منطقته ساي ما حل إلا الناس تتفق تدقش الخلا تنتج وتعمر وتصل
وتبقى عندها قروش اها بالقروش الحلال دي عشان فيها بركة الحرامية أغلبهم حا
يخجل من نفسه يا تاب يا رجع يعمل زي ما الناس بتعمل
والسلطة في السودان مهلكة أولها عسل آخرها بصل وحنضل الخلا فيه منقة وانناس يا ناس
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
| Quote: لو قدر لك قضاء أيام العيد في الضهاري |
يا سلام يا ابو حراز يا حبيبنا يا جميل
قريت كلامك عشرة مرات عشان سمح بالحيل
انا حقيقي كل همي الناس بعد انتفاء المسببات ترجع أماكنها ونحاول ننتج لا أكثر
شوف سبحان الله أمكن عيدت في عشرة دول مصر دي عيدت فيها 14 عيد من أيام
الجامعة لكن للأسف ما حصل عيدت خارج الخرطوم في الضهاري ولا مع حبوباتي وخالاتي في النمسا
مع أنه والدتي كردفانية بزعية ووالدي محسي من أكد شمال دنقلا بس لما الناس ترجع ويحكوا
لينا كيف أنه تاني يوم مشو رحلة والخرفان كلها عملوها اقاشي من أصوله والفواكه اقطافها دانية
يقول ياريت لو كنت معاهم
انا كلامي ده للمصلحة العامة زمان انا وعادل أمين اخوي كان اقترحنا حل ننقل العاصمة زول اشتغل
بينا مافي وانا مرة اقترحت يوم الوقفة بالليل نقوم نقفلها عليهم بالضبة تاني الجوه جوه خلص العيد جونا
متلبين بعقابهم لمن العاصمة دفقت وظهرت الخرطوم الجديدة قصدي أمدرمان الجديدة غرب سوق ليبيا قربت تصل بارا
اها بس وريني دي يحلوها كيف
خت نفسك مكاني حبوبتك خواجية ووزارة الثقافة والإعلام كان بيتكم وجيت العاصمة دي قبل المهدية زاتها وعمرتها لمن بقت
من أجمل مدن أفريقيا والشرق الأوسط وفجأة جو ناس الخلا دافرين اتحكروا ليك فيها ووسخوها ليك وقلو ادبهم عليك ولو عليهم يطردوك منه ما للضهاري الجميلة لكن يسمبكوك بالسمبك لأوروبا والسعودية تعمل شنو
هل بتقعد في صمة خشمك ولا تعمل زي سواتي دي ؟
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
Quote: كمان حي في امدرمان أسمه ( ود اورو ) ديل كمان من أهلنا
أورو بالدنقلاوية معناها الملك أو الأمير أو الزعيم ( اور باب )
وأورو كلمة مستخدمة عندنا الى اليوم يذكرها الناس عند الشكر والمديح |
حبيبنا وقريبنا الزول الجميل علي عبد الوهاب شكرا للمعلومة أول مرة أسمع بيها
ياريت الناس تعرف تاريخها الحقيقي وأنه الأمير عثمان أزرق والأمير إبراهيم الخليل هم من قاد
أم الملاحم السودانية كرري ما الخليفة ولا أخوه دي زي لمن واحد يسأل منو الحرر توريت يقوم واحد
جاهل بالتاريخ يقول ليك البشير أو الترابي المعارك تعرف بالقائد الميداني ما الرئيس
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: خضر الطيب)
|
الأخ توفيق
كل سنة وانت طيب ولجميع البورداب والقراء
الأخ علي عبدالوهاب شكرا للمعلومة أتذكر كنت دائماً أذهب م الوالد الله يرحمه منطقة (ود درو) لزيارة أقارب أو معارف وأول مرة أعرف المعلومة
Quote: كمان حي في امدرمان أسمه ( ود اورو ) ديل كمان من أهلنا
أورو بالدنقلاوية معناها الملك أو الأمير أو الزعيم ( اور باب )
وأورو كلمة مستخدمة عندنا الى اليوم يذكرها الناس عند الشكر والمديح
وتعظيم شأن الشخص .. |
بالنسبة لموضوع البوست من وجهة نظري (ما زراعة بس) و يحتاج تكثيف إعلامي يوضح مدى فائدة (الزراعة، الثروة الحيوانية، الصناعة .... إلخ) كأمثلة
المهم أنه حاليا نسبة المزارعين قلت بكثير لأسباب يعلمها الكل منها عدم تشجيع الشباب وتمويلهم لإقامة مشاريع زراعية وووو
مثلا أنا أجدادي كانوا مزارعين ولكن منهم من كان يتمنى الدخول لمعاهد فنية أو الدخول للجامعة وللأسف وقتها كان يضطر السفر للخرطوم لذا كانت الهجرة لأغلبهم ومن بعدها أصبحت الهجرة خارجياً
وأقصد بكلامي (رجوع الشباب للأقاليم) أو الأرياف.. ما الكل بيشتغل في الزراعة أو له ميول أنه يزرع أيضا فهنالك مهن مرتبطة ببعضها وضروريات مثل الصناعة والثرورة الحيوانية وووو إلخ والدولة بحاجه لكل منها
يعني المزارع (يحتاج معدات) وهي مرتبطة (بالصناعة) إما تصنيع أو قطع غيار او او والمهندس الميكانيكي او الفني وووو له دور فيها
المزارع يحتاج علاج (هنا دور الطبيب/ه والممرض/ه والصيدلي) إلخ وبالمثل يحتاج أن يعلم اولاده او بناته يعني محتاج معلمين/ات فنجد المدارس والجامعات ووووو
إذا من وجهة نظري الحكومة تضع في مناهجها الدراسية من المرحلة الإبتدائية فكرة وأهمية الزراعة والصناعة ووووو ومن ثم تسهيل منح الأراضي لكل من يرغب في إستثمارها من السودانيين
في الأقاليم والأرياف التي تتوفر بها أراضي خصبة يتم توفير مباني بمستوى عالي فيها تضم (منازل سكنية وعيادة صحية ومدارس وووو) بشروط أن يجد المزارع فرصة التعليم المجاني ودراسة التخصص الذي يرغبه أثناء عمله
إضافة لتشجيع الطلاب في الإجازات الذهاب للمناطق الزراعية إما للزراعة أو الحصاد مع منحهم مقابل مادي مجزي
وبنفس الطريقة والفكرة تتم في المدن والأرياف التي يمكن أن تكون مناطق ثروة حيوانية (بتوفير مزارع لها ومباني وعيادة طب بيطري وووو إلخ)
أيضا المناطق الصناعية (لدينا مصانع السكر بالقرب من مناطق زراعة السكر)
مصانع (الجلود) من القرب لمناطق الثرورة الحيوانية حيث يتم تصدير الذبائح للعاصمة والأقاليم منها يومياً
مصانع السيارات أو المعدات الطبية او أي مصنع يتم توزيع المصانع حسب الأقاليم التي يمكن أن تتوفر بها مواد أو الأيدي العاملة
الفكرة هي
كل مدينة زإقليم يتم توفير كل المتطلبات فيها للمواطن من (صحة وأمن وتعليم وتوفير فرص عمل) كزراعة وصناعة وتجارة ومدارس وجامعات ومستشفيات ووووو
وفتها ستكون الأقاليم جاذبة للمواطن
| |
|
|
|
|
|
|
|
|
|
Re: يا ناس الضهاري النبي فيكم ماترجعوا لينا ت� (Re: توفيق عيسى مكي)
|
یعنی بس دایرین فواكهنا و خضارنا.
وحات الله الخلق الناس لو ما الضهاری دی الخرطوم تانی الا ترجع لی صناعة القوارب الخشبیة من جدید.
اتخیل ناس بورتسودان قفلو منكم المینا و ناس القضارف مسكو السمسم و العیش و ناس ابو جبیهة مسكو المنقة و ناس حلفا مسكو الفول و ناس دارفور مسكو البطاطس و الفول و البرتقال و الشمالیة مسكت علیها خضارا و تمرها و فواكها و ناس الجزیرة مسكو القمح و واردات القطن والبطانة مسكت علیها السكر و الله تانی سكر الشای الا من البرازیل و بعد دا تشوفو لیكم مینا تدخلو بیهو الحاجات دی.
و ما تقول لی ما بناكل ذرة و تمر لكن بتتاجرو فیها و لو ناس دنقلا قطعو منكم الفول یفرق معاكم اكتر من قطوع الكهربا اللی هی نفسها منتج ضهاری عتیق.
السودان دا خلوهو كدا زی ما هو و ای تعدیل فی الرصة دی سوف یخسر منه الجمیع.
| |
|
|
|
|
|
|
| |
توفيق عيسى مكي
Abdelrahim Mohmed Salih
adil amin
ابوحراز
ABUHUSSEIN
علي عبدالوهاب عثمان
خضر الطيب
طارق محمد الطيب
فتحي عباس نقد
فيس بوك
تويتر
انستقرام
يوتيوب
بنتيريست