الحبيب عثمان موسى .. تحياتي يا جميل انا كنت حائر ما بين قناة النيل الازرق ( اغاني واغاني ) وقناة الخرطوم ( معاني الغناء ) المشكلة ان البرامج في نفس الوقت هنا قدور وهناك جمال النحاس نفس الكلام الحقيبة والبداية حتى ذكروا التاريخ 1917م
لكن ما شاء الله بناتنا وأولادنا شيء جميل انا اقفز من هنا إلى هناك ما بين القناتين الى ان انتهى في النفس الوقت ربما 5 دقائق الفرق لصالح اغاني واغاني
المهم أول اسمع لبنتنا الأمورة هدى عربي صوتها جميل ما شاء الله .. مكارم فنانة صح كنت اتمنى سميرة دنيا وخاصة في اغاني عثمان حسين رحمه الله ..
وشاب اسمه شرف الدين ,, نسيت باقي الاسم .. صوتو جميل مبدع في قناة الخرطوم
حبيبنا عثمان تحياتي .. حبس كورونا خلانا نتابع بناتنا وأولادنا الجميلين ديل ربنا يغفر لينا ويعوضنا خير على صلاة التراويح ..
أخونا علي عبدالوهاب تصوم عافية . البت قطعت نفسنا . وقطعت نفس عمك قدور . ونفس الكمنجات . يا حاج علي اظنك في الحتة بتاعت ( الحسن الحلال ) اكيد بتكون رميت كباية الحلو مر في صحن التقلية .
04-25-2020, 08:33 PM
محمد محمد قاضي محمد محمد قاضي
تاريخ التسجيل: 12-23-2014
مجموع المشاركات: 1605
مجنونة شنو يا عم السر يا أخي دي طلعت ميتين الغنية... معقولة والله لو ما لحقتها إنصاف كان جاها هارت اتاكت في نص الغنية والله حرام البرنامج دي يكون مستمر بهذا التكرار الملل والبايخ الله يرحمك يا وردي كل عام وأنتم بخير يا عثمان وضيوفك الكرام
04-25-2020, 08:49 PM
عبد الصمد محمد عبد الصمد محمد
تاريخ التسجيل: 12-12-2004
مجموع المشاركات: 1402
Quote: جنونة شنو يا عم السر يا أخي دي طلعت ميتين الغنية... معقولة والله لو ما لحقتها إنصاف كان جاها هارت اتاكت في نص الغنية والله حرام البرنامج دي يكون مستمر بهذا التكرار الملل والبايخ الله يرحمك يا وردي كل عام وأنتم بخير يا عثمان وضيوفك الكرام
أتفق
04-25-2020, 09:45 PM
Mohammed Abuzaid Mohammed Abuzaid
تاريخ التسجيل: 01-16-2013
مجموع المشاركات: 619
حبيبنا محمد محمد قاضي كتير من الفانين الشباب أبدعوا في أداء أغنيات غيرهم أحياناً بفضل الفرقة الموسيقة المواكبة للذوق الحالي والأهم منذلك بفضل جودة التسجيل. الكلام دا ما بينطبق على أغنيات وردي ويظل أدا أي أغنية لوردي تحدي كبير
أمكا إذا كان لابد فأنا أتفق مع معاوية محمد في ترتيبه ولا تفق معه في النسب، فهي في تقديري أقل من ذلك بكتير
نسمعها من سيد الشي ذاتها وبعدين نقارن
04-26-2020, 10:17 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
يا حافظ البنت دي النص ذاتو ما حافظاهو بتقطع من راسها بس و تغني
حلفتك ياقلبى وحملتك امانه الفاتت عهوده ما تبكى عشانه حلفتك تقول لى اية اخرة بكانا الدنيا الجميلة والحسن الحدانا الطير فى غصونو والساجعة في حنانه كل الناس تغنى ونحن الهم طوانا لية ياقلبى ليه قولى بى امانة اوع يا قلبي تنسي
الحسن الحدانا ما في الحسن الحلال و لا الحسن الحرام لا تتفق في المعني و لا القافية
و نصيحة ليك يا مكارم عشان انتي لسه جديدة في الشغلة ارجعي للنصوص الصحيحة للاغاني او اسمعيها يالراحة من سيدها الاصلي انا شايفك متأثرة بعمار السنوسي شديد و هو فنان مجود لكنه للاسف الشديد كان تعبان في الحفظ في بداياته
04-26-2020, 10:11 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
والله يا علو حنيت عليها أمس مكارم بشير .. قلت شوية كده وحتغرق .. خخخخ غايتو ما قصرت انصاف فتحي لحقتا .. والا كان حنجيب ليها غطاس ينكتا من تحت برضو عمك طه الضرس اتورط في الحالم سبانا وعروق رقبته دايرات ينشرطن من العالي (فوق) .. وطبعا (تحت) هو معروف ببح يخربو .. ما عارف ليه بيتم توريط أصوات لا تناسب الاغنيات ويطلبوا منهم يغنوها ! .. ليه ؟ بعدين الفنان ذاتو مفروض يكون عارف يغني شنو وما يغني شنو حتى لو طلبو منو وفقا لطبقات صوته وامكانيات حنجرته .. اللازم يكون عارف ما يناسبها شنو أي غنية الواحد يغمض ويخش فيها لامن في نص الاغنية يدور ليهو أنبوبة أكسجين في زمن كرونا و انعدام انابيب الاكسجين عمر جعفر صوته مناسب وغنى سمح لكن كوجن اللحن ولعب فيهو كتير .. زرياب أبوهو سيد اللحن فبيكون حافظو عن ظهر قلب أكيد (بيكون هروهو بروفات في البيت) عصام محمد نور راجل متمكن .. ومساحة صوتة كبيرة ولا يحتاج تعليق ... يا معاوية عمار السنوسي رهيب وذكرنا الذي مضى .. هسه البيهججوا ديل أغلبيتهم دفعة .. وكانوا معانا بنكتل حفلات السنوسي الهجيج ده فيهو استمتاع بالاغنية أي نعم لكن كتير منو اجترار لماضي الحفلات الجميل .. أغاني وأغاني جوابه باين من عنوانو .. حيكون برنامج مكوّع وهبوب السنة دي اللهم الا عمك قدور يلحق نفسه بالاولاد الغنايين ناس سوار الدهب واحمد المامون
رمضان كريم على الجميع تصوموا وتفطروا على خير
04-26-2020, 10:42 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
تحية وسلام لكل المتداخلين ولصاحب البوست ، عثمان موسى.. حقيقة برنامج السر قدور أغاني وأغاني قتل بحثا .. إجترارأ وتكرارأ أبقاه على نفس المنوال ، بالرغم من أنه كان يتحدث في البدء عن ماضي الأغنية التراثية ، ثم يعتمد على الشباب الفنانين من أدائها ، ولكني آخذ عليه وقد تحدثت إليه قبلا أن الصوت النسائي لا يصلح لكل أغاني التراث الخالدات، وخاصة بعد فترة الحداثة للأغنية وموسيقاها لكثير من الفنانين الكبار، لأن صوت الأنثى له طبقاته ، وإمكانية حناجربعضهن لا يتلاءم مع الأداء، فلا يستوي أن يطلب السر قدور أن يسمع أغاني لها وقع في نفسه وهذا بكل تأكيد، بصوت أنثوي وهي لا تتناسب مطلقا فيأتي العمل مزعجا ومشوشا لجمال اللحن والكلمات ، والعزف المصاحب هو العزف بكل دقة ومهنية لا شك.. ، أضف الى أن كثير من الفنانات الشابات الآتي ظهرن من خلال هذا البرنامج يعتقدن أن أي أغنية رجالية يمكنهن ان يتغنين بها وبذلك يلحقن التشويه بالكثير من الأغاني الخالدة .. وتحيتي ..
04-27-2020, 10:09 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
فعلا الجار للجار... وجيراننا ظهرت إمكانياتهم الصوتية لما وصلوا لي "يا قلبي ليه ليه يا قلبي ليه". ليس من الذكاء محاولة تقليد أغاني وردي وأبوداؤود فهما لا يتركان لغيرهما أية فرص للمناورة والتنغيم.
04-26-2020, 12:31 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
Quote: دا شنو دا يا معاوية، إنت قدرت الدرجة 59% ولما جيت تكتبها جمهور دبي زغلل عيونك وخلاك تكتبها 95% ولا أنا غلطان؟!
يا محمد الامين رمضان كريم
دبي شنو يا زول عمار دا معجبينو كتار و نحن منهم سكينا حفلاته من بدأ لحدي ما اغترب السعودية و صوتوا كان عجيب زمان هسه نقص كتير بحاول انزل ليك تسجيلات قديمة ليهو
04-26-2020, 12:41 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
يا معاوية ياخي الله يفتح عليك و يطول في عمرك . ياخ كورك لي أخونا بدر الدين . قولو اليجي يشوف الاناقة الكان بيتكلم عنها . الجاكت لون الجهنمية الفاتح. و الساعة الجورج ارماني مع مسبحة اليد ال jet black التنورة الماتشنق مع كل حاجة . ياخ البت قامت بالنهاية زي قيام ال f15 ماشاء الله عليها . لكن عملت في عمك قدور عمايل . ياربي عمك ده في النهاية بكون خلتو يمشي الدامر و يرجع كم مره ؟ .. يا بدر عليك الله تعال عاين . ...
04-28-2020, 06:19 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا معاوية د. عمار في اغنية النهاية ما كان جيد . ولا كان منفعل . دي النهاية . اغنية من امهات الاغنيات. ولو ما انفعل فيها تاني ينفعل متين ؟ لكن بنتك ابدعت .
04-26-2020, 04:25 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الأخ جمال القوز سلام ورمضان كريم مشكور كتير علي المرور علي مسرح عمك قدور . طال عمرو . الرجل ما زال يحاول اسعاد الناس . وفي أشد الأزمان حزن و صعوبة . ارجو ان يبعد الله البلاء . ويعود رمضان القادم والعالم اجمل .
04-26-2020, 03:05 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
ولدنا أستاذ معاوية محمد سلام وينك يا فنان ؟ ياخ الناس في البلد تسأل منك يا زول. اها الليلة خليك قريب . انت زول صاحب اضان نضيفة واحساس عالي . الليلة عمك قدور عندو ترتيبات كاربة. الزول ده ربنا يطول عمرو حافظ الكثير عن تاريخ وأسرار الغناء و يستحق المتابعة . والله يا معاوية انا قاعد ازعل لما واحد جاهل يقول ليك قدور ده مفروض يقعد في المصلاية .
04-26-2020, 03:29 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
أخونا أستاذ محمد الامين موسى سلام ح تظل الأجيال الجايه كلها تردد وتردد وتردد . ما ياهو من عظمة الغناء القديم يا أخ محمد . يعني بعد ناس عثمان حسين و سيد خليفة و وردي . تاني في شنو ؟ يتخيل ليك انو في فنان شاب جديد ممكن يطلع ليك اغنية زي الحزن القديم ؟ لا . ونستمتع بالترديد من شدة محبتنا للقديم . و بتخيل العالم كلو نفس الشي. في البرازيل . و في أمريكا . وفي اليمن . كل المواهب في العالم مش قادرة تنفك من القديم . انا بفتكر مكارم محبة العظيم وردي ودخلت في الأغنية و هي متعطشة زي عطش الأمة كلها لوردي . خلوها تغني .
04-26-2020, 08:23 PM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
دا كان زمان يا أبا عفان الآن الغنا القديم موجود في اليوتيوب بأصوات أصحابه (قبل أسبوع استمعت لأغنية مي من خلال أربع نسخ للراحل ابن البادية في اليوتيوب، فارتويت). هؤلاء الشباب المساكين يفتقرون لموهبة التقليد المبدع - إن جاز التعبير - (إلا القلة من أمثال عصام محمد نور وعاصم البنا وأبوبكر سيد أحمد وفهيمة وصباح عبدالله) الذي ينبري له أصحاب الأصوات المميزة: ابن البادية يغني لسيد خليفة واللحو يغني لعثمان حسين...
04-27-2020, 07:17 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22972
أخونا بدرالدين سلام ويا شباب معليش خلوني انزل اجاوب أخونا بدر قبل ما المدام تظهر و تطربق عليه حلة بليلة الحمص. تشكر يا بدرالدين علي الشجاعة النادرة . والله انا زاتو معجب باناقتها . تتذكر يوم جات بالجاكت الوردي ؟ ياخ عمك قدور زاتو معجب . عمك طلع خارج النص . وخارج المتفق عليه قبل دخول الاستوديو . شوف لحظة قال يا مجنونة . الزولة يا بدرالدين جادة في أنها تكون فنانة . و تجيد . و تجيد . ياخ تتذكر يوم موقعة اغنية النهاية ؟ وبرجع ليك .
04-27-2020, 03:16 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا بدرالدين ياخ امرق علي الصقيعة دي . قلنا لك ناس معاوية بهلوها الفيديوهات . وجاءت بالجهنمية ترقش والساعة تراري و المسبحة تراري. كتلت خمسة في نفس اللحظة بالنهاية. خمسة ماتو بالضربة القاضية الفنية. الموت ده ما بي فعل الكورونا .
04-27-2020, 04:36 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
عثمان أنا خلاص مرقت للربا والتلافة المدام شكلها مرت من هنا الضهر قالت لى شايفاك مركز مع اغانى واغانى ومكارم قلت ومتين شفتينى مشغل قناة النيل الازرق قالت المهم انا بسأل قلت ماانتى مركزة مع مسلسل تاريخ اليهود في الخليج هل سألتك اخدت صنة وبعد دقايق رجعت ورسلتنى الدكان
04-27-2020, 07:08 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12482
يا سلام الحبيب الامير بدرالدين صدقني انتو ناس رائعين .. حفظكم الله أنا غايتو مع سودانيز ونشرات الاخبار والمواقع مشيت قناة الشمالية ( الرطانة حسب ما تطلق علينا ) لقيت امس الضيف ( حنان بلوبلو ) واليوم الممثل اسمه ( شكسبير ) تخيل الشمالية وردي والخليل والنعام وحاج الماحي ..
الحاجة كانت تنتظر اغاني نوبية ,, زعلت وفتحت المصحف .. وانا مع قدور والجقر وسودانيز .. الحبس مشكلة
حبيبنا عثمان .. الحبيب بدر اضاف جمال للبوست للبوست الجميل ياريت يبقى
04-27-2020, 07:39 PM
Fatima Alhaj Fatima Alhaj
تاريخ التسجيل: 05-06-2014
مجموع المشاركات: 712
سلام عثمان أنا غايتو الوصية دي بتوديني لبلاد ما منها رجعة، عشان كدا البغنيها منو دي بتفرق معاي شديد، بس مكارم في الحلقة دي ضرستنا بمنتهى القسوة. كتر خير أخونا محمد القاضي اسعفنا بالرائع عصام محمد نور. أغناني و أغاني أصبح تكرار ممل.
04-28-2020, 07:40 AM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
يا بدرالدين ياخ انت ما تركز في القناة شديد . برحلوك . والطيران واقف . والظرف صعب . انت خلي الريمود في يدك . أي حركة . اقلب . انشاءالله مسلسل سوداني . ولا دعاية عدس الوابل . التركيز في اغاني قدور بعمل ليك كركبة. علي كل حال الحمد لله الوقفت علي مرسال الدكان . هههههه امس بس مطلع الأغنية.
04-28-2020, 08:16 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا بدرالدين ياخ انت ما تركز في القناة شديد . برحلوك . والطيران واقف . والظرف صعب . انت خلي الريمود في يدك . أي حركة . اقلب . انشاءالله مسلسل سوداني . ولا دعاية عدس الوابل . التركيز في اغاني قدور بعمل ليك كركبة. علي كل حال الحمد لله الوقفت علي مرسال الدكان . هههههه امس بس مطلع الأغنية.
04-28-2020, 09:44 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22972
عثمان ياخى انت وقريبك على عبدالوهاب دايرين تضيعونى اكتر مما انا ضايع كرونا وفلس وسجن مع المدام فى البيت اها انحدثك طلاق بتلاتا انا مابعرف اجيب قناة النيل الازرق لابرموت ولابتردد مع انو الشقة فيها تلفزيونين واحد فى غرفة صغيرنا أمير ذو الخمسة سنوات والتانى فى الصالون وبتاع الصالون انا باخد الاذن قبل وقت لمن يكون فى برنامح بهمنى متابعته بس مكنكش فى جوالى وجوالى بقفل بعد كل عشرة ثوانى خوف من النعسات والطشمات اها الايام دى بقيت زى على عبدالوهاب مبارى بوستاتك المنغير صور ووقعت فى اشر اعمالى لقيت فى بوست مكارم صور وحاجات تانية مانعانى وخد فى بالك المدام بتاعت هندسة شبكات ومن الاعضاء المؤسسين لسودانيز فبلاش انت وعلى تخربو بيتى خلوها مستورة على قول د.على الحاج وأنا لوحكيت ليكم قصتى مع د.على الحاج فى احد المؤتمرات بالدوحة حاتجيكم صدمة من الضحك والسخرية
04-28-2020, 10:41 AM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 10913
و الله يا عثمان دمك عسللللل ياخ انت راجل جميل حسب تعبير أخونا علي عبدالوهاب
منتهى خفة الدم أقرأ في تعبيرات التحت دي و أضحك و أضحك..
الله يديك العافية:
Quote: يا معاوية ياخي الله يفتح عليك و يطول في عمرك . ياخ كورك لي أخونا بدر الدين . قولو اليجي يشوف الاناقة الكان بيتكلم عنها . الجاكت لون الجهنمية الفاتح. و الساعة الجورج ارماني مع مسبحة اليد ال jet black التنورة الماتشنق مع كل حاجة . ياخ البت قامت بالنهاية زي قيام ال f15 ماشاء الله عليها . لكن عملت في عمك قدور عمايل . ياربي عمك ده في النهاية بكون خلتو يمشي الدامر و يرجع كم مره ؟ .. يا بدر عليك الله تعال عاين .
04-28-2020, 10:56 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22972
أخونا محمد ع الحسين سلامات ورمضان كريم كتر خيرك ياخ علي حسن الظن . العسل الأصلي هو عمك قدور . صاحب الضحكة الفرحة . بلا شك . العسل عمك قدور القدر يشعلل المنابر . ويقرب الناس من بعض . . عمك عرف الناس بالعديد من المواهب . زي زولتنا صاحبة السيرة في البوست . الموهوبة مكارم . مكارم البت ال strawberry . عمك قدور يا حاج محمد بعد مكارم انتهت . عمك هاج من الطرب وقاليها ( يا مجنونة ) ممتازة . .. ياخ ألف شكر علي المرور
04-28-2020, 01:13 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12482
انت خلي الريمود في يدك . أي حركة . اقلب . انشاءالله مسلسل سوداني . ولا دعاية عدس الوابل . التركيز في اغاني قدور بعمل ليك كركبة. علي كل حال الحمد لله الوقفت علي مرسال الدكان . هههههه امس بس مطلع الأغنية. ===============================
الحبيب عثمان تحياتي يا جميل شوف كيف حبيبنا بدر الرائع جعلك تبدع لتأتي لنا بالمخارج المناسبة من زنقة الحاجة .. تعرف الحبيب عثمان .. أولى اعراض الزهايمر أن لا تتذكر أين وضعت الريموت هي مشكلتي الرئيسية كل عشرة دقائق أبحث عن مكان الريموت ..
مشكلة الحقيبة أصبحت عامة أمس في قناة الشمالية (دنقلا) فنان اسمه محجوب مقدم البرنامج طلب منه الغناء بالنوبية أغنية رواويس .. رفض وقال ( سوف أغني احدى اغنيات كرومة ) .. شفت كيف تأثير ناس قدور .. طبعاً غيرت القناة ما دام حقيبة أحسن نسمع من مكارم بدل التربال ده
يا عثمان .. بدرالدين ده زول جميل ومدمن اخوانيات ومتنفس لنا مع حبس الكورونا .. مشكلتي عايز أدخل معاه في ونسة ولكن اللغة ( غير ناطق ) اول كما يقول هو ( رطاني )
مودتي الاحباب تدوم الاخوة .. هو ده الجمال ..
04-28-2020, 03:55 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
حتي عمك قدور زاتو ما كان متوقع ولا مصدق انو بعد اغنية الراحل صلاح ابن البادية مطر الحزن ح تصب وبي دي الطريقة علي الاستوديو وتمرق و تعم السودان كلو . .. ليك الرحمة يا شيخ صلاح
Quote: ما دام حقيبة أحسن نسمع من مكارم بدل التربال ده يا عثمان .. بدرالدين ده زول جميل
والله يا أستاذنا علي طريتونا أخونا الكبير زميل البورد صديق الموج الله يطراه بالخير مع أغاني وأغاني وأفراح عصام قبل كم سنة كده العزيزة فاطمة الحاج المعلم عصام محمد نور هو ملك المقلدين أو هوأجود من يبدع في تقليد أغاني الأخرين بدون منازع .. عصام فنان بالسليقة حتي في أغانيه الخاصة عليك الله أسمعي دي
04-28-2020, 08:55 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12482
عصام محمد نور هو ملك المقلدين أو هوأجود من يبدع في تقليد أغاني الأخرين بدون منازع .. عصام فنان بالسليقة حتي في أغانيه الخاصة ========================== حبيبنا محمد .. تحياتي يا سلام عصام زول مثالي ومهذب جداً تعرفنا عليه في جدة لأنه هو من قرية كودي ودبلا من عمق دنقلا شرق النيل ( بلد الشاعر توفيق صالح جبريل )
كان على زيارة دائمة لجدة .. واحيا عدد من الليالي ووزعنا التذاكر في الجمعيات حتى واحد من شباب دبلا عبدالهادي سخانة كان عمل ليهو اقامة يمشي ويجي بدل الزيارات
أول مرة اشوف فنان يكون مواظب على الصلاة ويمشي المسجد قبل الاذان .. كنا نعلق عليهو في مطعم دنقلا في البغدادية في جلسات اخوانية
زول جميل .. وغنى في حضرة وردي وعثمان حسين .. ونال استحسانهم
حكاويه جميلة .. يا سلام زول ودبلد
التحية خاصة لصاحب البوست الزول الجميل عثمان موسى معليش يا عثمان تمددنا شوية في البوست بوستاتك مهمة للتنفيس ايام حبس الكورونا
04-30-2020, 03:50 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
أخونا علي عبدالوهاب الإنسان الظريف . سلام ياخ انت تتمدد والله علي كيفك . والله ما حصل ناس المنبر من جيت شافوا منك كلمة شينة ولا مشاترة. كلامك كلو عديل وطيب و مفيد . ربنا يطول عمرك . ويديك عشرة فدان في دنقلا تزرعها نبق فارسي. لو عمك حمزة خلالو شبر واطة ما سجلو للجيش المصري . غايتو نحنا بس نتابع اغاني واغاني دي ما دايرين ولا ربع فدان .
04-29-2020, 05:56 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
الأوركسترا ظلمت مكارم بشير وهى نفسها ظلمت نفسها لأنه مقارنة بتسجيل وردى فارق كبير فى سرعة إيقاع والزمن الموسيقى .. عند مكارم كانت أسرع فكانت مكارم تلهث لكب الكلمات، بينما عند وردى الموسيقى بإيقاع وسرعة معتدلة مكنته بالمهلة يطرب ويبدع. دا طبعاً مع فارق قدرات التطريب العالية للراحل المقيم محمد وردى. أنصح مكارم إن كانت تستمتع وتحس هذه الأغنية أن تعيد أدائها بالإيقاع والزمن الموسيقى المناسب لها. بالمناسبة بهذه السرعة الزايدة للموسيقى مافى فنان بيقدر يغنى ويطرب بيها غير الذرى إبراهيم عوض وإبراهيم حسبن رحمهما الله.
04-29-2020, 07:58 AM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
Quote: أنصح مكارم إن كانت تستمتع وتحس هذه الأغنية أن تعيد أدائها بالإيقاع والزمن الموسيقى المناسب لها.
وليه التعب دا كلو أخي نادر، الأفضل تشوف ليها كلمات وألحان تناسب بصمتها الصوتية حتى تُكتب فنانة حقيقية وليست مقلدة، والحمد لله الشباب مليان شعر وأنغام وتتوفر له العديد من فرص التجديد والإبداع الموسيقي. طالما أن هذه الأغاني موجودة بأصوات أصحابها، فتقليدها مضيعة للزمن الإبداعي ولا مكان في التاريخ لشباب أغاني وأغاني وأخشى أن يُحكم عليهم (كنفايات فنية)!
04-29-2020, 04:48 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
أخونا أستاذ نادر الفضلى سلامات ورمضان كريم ياخ انت زول صاحب زوق عالي جد . ومستمع جيد مافي كلام. نعم الأوركسترا كشت مكارم كشة سريعة . لكن تظل مكارم من احسن المجتهدات الخمسة . كان حضور وكان اناقة وكان غناء . الف شكر يا استاذ وبلاي خليك قريب. تحياتي
04-30-2020, 08:04 PM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
أخونا محمد الأمين الناقد الفني الممتاز . انا معاك ليلة البارح كانت تعبانة . ابن البادية يستحق الكتير من ورش الغناء و الكتير من التحضيرات. الحلقة واضح كان فيها كلفتة . واستعجال. والشاب د. عبدالله ده صوتو ضعيف ومحتاج تمارين . والتاني الجمبو الاسمو السراج تعبان برضو .
05-11-2020, 03:59 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
معليش يا جماعة علي الصنة. و نعود نتابع إبداعات بعض الشباب والاهم كمان حديث عمنا قدور التاريخي عن سيرة الشعراء والفنانين والملحنين الخالدين لهم الرحمة جميعا .
05-02-2020, 09:29 PM
محمد محمد قاضي محمد محمد قاضي
تاريخ التسجيل: 12-23-2014
مجموع المشاركات: 1605
الفنان عثمان يأخي رمضانك كريم أنا بتابع الحلقات من اليوتيوب عشان أنا ما قعد أشوف قنوات سودانية خالص وحقيقة أغاني الفنان العملاق المرحوم صلاح بن البادية الناس دي طلعت زيتها عديل وكلفتوها وبهدلوها بهدلة السنين والله عمنا السر قدور بالغ مع المرحوم لكن قولك عن الشاب أمجد السراج وقفني لأنو المفروض كلو أغاني بن البادية أو الحلقة كاملة المفروض يخلوها لهذا الأمجد اللي أدهش بن البادية ذات نفسه يوم تكريمه في أغنية فات الأوان، بس عمنا قدور الظاهر ما خلاه بي راحته عليك الله أسمعه هنا
05-03-2020, 06:30 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
اسمح لي عثمان اختلف معاك أنت كدا ظلمت إنصاف فتحي، إنصاف صوت مميز، مكارم لا تطربني أبدأ، أحس أن تونها عالي جداً، أعتقد ( وأنا لست متخصصة) إنها لو زلت شوية ما حيكون عندها شيء. و أعتذاري لجمهور مكارم. البقية أعتقد أنهم تُمامت جرتق ساي.
05-13-2020, 05:03 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
يا أبوعفان النجمة الليلة ما ظهرت قلنا نصبرك بي ظلموني الناس من حلقة أول أمس
هدي عربي ونجود عجب أصوات عادية جدا بالنسبة لي بس زايدنها شوية في لغة الجسد يعني over acting أو قول over dancing شنو طوالي فاكنها باليدين والعيون والكتافين هههههه الرزانة والتقل برضو سمحة ولا شنو؟
05-11-2020, 04:35 PM
نادر الفضلى نادر الفضلى
تاريخ التسجيل: 09-19-2006
مجموع المشاركات: 7022
غايتو حلقة الراحل عبد العزيز المبارك حركت أشجان ومواجع .. ذكرتنا أيام الصبا عندما ظهر ولمع نجمه فى الساحة وليالى الخرطوم. وقميض تحرمنى منك كمان. رحمة الله عليه.
برضو أعتقد مكارم بشير فنانة موهوبة ويمكن أن تتطور، ولاحظت فى بعض الحلقات القليلة التى شاهدتها توكل لها أغانى شوية صعبة أو ما شايعة، مقارنة بما يوكل لزميلاتهأز
أرى العيب فى البرنامج أن المطربات والمطربين المشاركين، مطلوب منهم يغنوا أغنيات قد يصادف أنهم لم يتعودوا على غنائها أو لا يحسونها. ومع إحترامى لهم ولكن إمكانياتهم التطريبية أو الدربة التطريبية لم تصل درجة الإحترافية مثل فناني كبار مضوا، يمكنهم توش ويغنوا أى أغنية ويبدعوا فيها، وحتى الكبار قد تغلبهم بعض أغانى غيرهم.
ويا عثمان مافى طريقة تشوف لينا حل فى المايكرفون البتسوكو بيهو دا قربوا يبلعوه، بيغطى وجه الفنان وخاصة فمه (زى الحجاب، غايتو ماشى مع الكورونا).
05-12-2020, 05:53 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Osman Musa
علي عبدالوهاب عثمان
Hafiz Bashir
محمد محمد قاضي
Mohammed Abuzaid
محمد الأمين موسى
Moawia Mohammed
جمال ود القوز
محمد مختار جعفر
بدر الدين الأمير
Fatima Alhaj
محمد عبد الله الحسين
نادر الفضلى
فيس بوك
تويتر
انستقرام
يوتيوب
بنتيريست