بالتاكيد شاكوش مؤلم ألم الغبش لما ما يلقي قبة يقبل عليها تعرفوا أنا ما فوضوي لا زول كعب شديد كدا لكين بحب الدنيا وعامل للبهجة في حياتي طقوس زي أجدادي الكوشين هم يعلفون ويقدمون اللحمه والعسل والتاكي وعرقي البلح الرهيب وكمان كريم كرم الجهابذة من بني جلدتي وخاصة في عهود الرخا والنعمة التي كانت بالوطن الحبيب أضبح الضبايح واكعب بول الاسد الجهني والمزه الما خمج وأولع البخور من صندل الجميل يا ربي أجعل أيامنا كلها فرح وبهجة وأبعدنا عنا الحزن الكأبة وحروب الساسية ودجل المثقفاتية زي ناس ود الامير وقبه و ودالشريف وكل الطلاسين أمثال خضر العروب وتعسف المتأسلمين زي عمر التاج وأرحمنا من أغتيال الشيوعيين شخوصنا الجميلة ومن كل متسلط ملعون أمكن تسالوا هو الحاصل شنو وهي القصة كلها كلام ساي بقولكم كدي أصبر شويةيا الملهوف ! تعرفوا أنا رجافة وريقي بنشف لما أشوف زولة جميلة بمواصفات نسوان زمنا الجميلات وحسناوات السينما مغينات شمال أفريقيه انا بموت في السماحة والرقة والانوثة العصرية بقلبي شدة مارياد حتي البت اللي بتبيع لينا الغدا انا بكون مركز في تقاطيع وشها والله دي كان بلد الغبش كانت زمان الجلابه أتزوجها وبقت ست بيت المهم انا عايز أعيش بعمق الحياة والتجريب الانساني لا بعرف قشه مره ولا عندو قرف من اي مواصفة أنسانية عايشة في كوكبنا العامرة عايز أمتع نفسي كدا لحد التلاشي وبعدا ربك رحيم بعدين الزي ديل ناس جنة ساي لانو نحن بسوقنا أحاسيس كدا بتحب الحياة والانصهار في الاخر المهم مرة مشيت لحفل في جامعة في العاصمة كولالمبور هنا ولقيت أسراب الحسان من كل صوب وحدب ياربي صغيرات جميلات مقبلات للحياة مفيدات لعمري الهالك دا بتحس مع الواحدة فيهم بأنك أنسان حقيقي وعايش مش يا التعيسة ديك اللي قالت (ود الخواجية يدخل علي الكافر) وهنا بدات في أختيار موقعي عشان أقعد في حته أقدر أشوف كل الحاضرات وراسي يدور زي المروحة ما مرهق لكين عاشق للجمال يا أبوحسين بالجد كدا وفجاءة لقيت روحي قاعد جنب ظبيه من بلدنا طويلة بس سيف عربي والوش تبارك الخلاق قمر والابتسامة تخليك تقاتل قبيلة من الرجال من اجلها والعيون عسلية اموت أن بس في العيون دي سالت بكل عفوية الاخت من اي دولة عربية وردت بادب شديد انت مالك ما بتشوف اناسودانية ومن دامر المجذوب كمان مدد يا أهلي الصالحين والله فيها سمرة ارضنا ورقة بناتنا ولطف أهلنا الذي لا يعرف التكليف بساطة كدا لدرجة الدراوشه زاهده لا تملك من الدنيا غير لحظة حضورها البهيج أخوكم مكسر شديد جدا المهم أتوثقت العلاقة من معرفة لصداقة ومن صداقة لريده والامور ماشه باسطه معاي وأخوكم أثبت جدارة كل أبناء جيلنا في تعظيم العلاقات الانسانية الي هنا قررنا خلاص نتزوج وهي كانت متوقعة أمها تزورها من دولة خليجية واناقمت بالواجب تجاه النسيبه من أستقبال وحفاوة ضيافة وكل ما هو متعارف عليه في اعلاء قيمة أم العروس في دستور العلاقات الانسانية في السودان والاسلام لكين بس أنا ابكي بس كان ليها راي حاسم وعنيف بكل أسف في شخصي الضعيف وكلاما هو (انت متشرد في الدنيا بلا هدف ولا املك من الدنيا لا ثروة ولا سلطة ولا حتي كمان باقي لي في العمر سنين عشان ارتبط واكون أسرة بشنو يل ولدي انت ممكن تقضي أخر أيام مع الاحلام السماحة بس لكين بتي العمر قداما عليك ما تلخبت عليهاساي ) ولقد حاولنا بكل ما نملك من قوة أقناع ولكن هذه الام رفضت كل الاوجاويد والاطروحات الانسانية في أكون زوج لأبنتها الجميلة أنه يا أصدقائي الشكوش الاخير وبقت أغني منعوني الحب الحلال حرموني الجميل الغزال والدموع شلال .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست