هل نقد للذات .. جلد للذات .. أحلام زلوط ومقالات واخرى.. ما الهدف؟؟

Quote: كلام الدكتور ده حيريّحنا كلنا ، مقال غير سياسي ولا علاقة له بقحت و لا بالعسكر ولا بالكيزان.. مقال واقعي، حروفه تساوي وزنها ذهبا (((احلام ظلوط ))) ✍🏽 د احمد الطيب ابراهيم استشاري جراحة الكلى —————————————— __ ظلوووط منو ؟ __ وقصتو شنو ؟؟ __ والبلد دي فيها كم ظلوووط و للا منو الفيها ما ظلوووط ؟؟؟؟ __ يحكي والعهدة علي الراوي انه في مرأة اسمها (ام الحسن ) زولة صعبة واخلاقها في رأس نخرتها و عندها ديك سجمان وفتران و كحيان...وهي كلما تزهج وتلقي الديك الكحيان ده تزعط ليها منو ريشتين تلاتة لما معطت معظم ريشو.. و بقي ممعوط وجسمه بقي زلطة و ما باقي ليهو غير ريش الذنب ليوارئ سوئته .... و الناس بقت تسميه ظلووووط ديك ام الحسن... __ ظلوووط يا اخوانا محبط ذي المواطن السوداني وقاعد مرخم في الحبل و بدأ يحلم انه بقي ديك كبير وعنده ريش جميل و مكسر الجداد البلدي والجداد الكويتي و حتي جداد كنتاكي و ماكدونالدز ...و اتخيل وهو نائم انه عنده جدادة فيّوميّة حلوة وساقيها حلوات وسايقة كتاكيتو و ماشة تكوكي وهو مراقب كتاكيته فجأة ظهر صقر ....داير يخطف الكتكوت الصغير الازرقاني و انفعل ظلوووط وهو نائم و طار لي فوق عشان يصد الصقر وطااااخ راح واقع في رأس ام الحسن ...و صحت مخلوعة ام الحسن وشواطينها قامت لي فوق ... قرن قرن ومسكت ظلوووط بعدما دقتو و نتفت باقي ريشه الفي الضنب...وبقي ظلوط ذي ابريق النحاس لا ريش لا كتاكيت ولا جدادة فيّوميّة....و منذ ذلك اليوم أصبح ظلوط مثالا لكل إنسان ينتظر أن تتحقق أحلامه وهو راقد مدلدل رقبته و مرخم ذي الديك في الحبل... نشرت هذه القصة في احدي الجرائد السودانية عام 1957 مرفق مع هذا المقال صورة من الغلاف هذا الكتاب ..... __ ظلوووط يا اخوانا ممكن يكون ذي اي مواطن سوداني بيتهرّب من دفع الضائب ومنتظر الحكومة تجيب ليه الخدمات... __ ظلوووط ممكن يكون مغترب سوداني برسل عملته الصعبة عن طريق سمسار في السوق العربي وللا سوق ليبيا وهو فرحان عشان سعر الدولار والريال ارتفع و منتظر البلد تتصلح عشان يترك الغربة ويجي راجع السودان مع انه سمح لهم بقبض عملته بنفس سعر السوق الموازي.... __ ظلوووط ممكن يكون اي مواطن بيحلم انه حمدوك بعدما اتسلم الدولار يبقي بي جنيه و الرغيفة عشرة بي جنيه و ناسي انه سيدنا موسي نبي و عنده عشرة معجزات واخوه هارون نبي ومع ذلك ربنا ما نصر بني إسرائيل في زمنه لانهم منتظرين موس براهو ومعاهو ربنا يفتح ليهم القدس (( .قَالُواْ يَٰمُوسَىٰٓ إِنَّا لَن نَّدْخُلَهَآ أَبَدًا مَّا دَامُواْ فِيهَا ۖ فَٱذْهَبْ أَنتَ وَرَبُّكَ فَقَٰتِلَآ إِنَّا هَٰهُنَا قَٰعِدُونَ )))... __ ظلوووط ممكن يكون ذي اي شاب أو شابة بيلوّم اوبوه لانه ما ووفر ليهم بيت ذي اصحابه وما ركّبه عربية زيهم وهو قاعد يحلم و لما يصحي بدل يشتغل و ينتج يقعد يلعن في الظروف و اقصي ما يستطيع عمله يترس ط الشارع قدام بيتهم ويهتف حنبنيهوووووا.... تبني شنو انت يا رمّة اذا بتقلع الانترلوك في شارع بيتكم عشان تترس.... تبني شنو اذا بتكسر عامود النور عشان تقفل بيهو الشارع ....

Quote: __ ظلوووط ده ممكن يكون شعب بي حاله بيحلم بالنهوض الصناعي وهو بستورد لباسات و فنائل داخلية من آخر الدنيا من الصين والهند ..... بستورد الزي المدرسي مع انه اي ست بيت ممكن تفصل قميص و بنطلون....بستورد ألعاب أطفال بملايين الدولارات بعدما كان الطفل بصنع لعبته براهو علي مر تاريخ السودان.... __ ظلوووط ممكن يكون شعب تعداده 35 مليون منهم خمسة مليون مغترب و كل واحد من الخمسة مليون ديل فقط بيفكر عشان يرجع يعمل ليه بيت و سيارة و لا يفكر كيف يجعل وطنه ذي المكان الهو مغترب فيهو عشان يرجع ويبقي مواطن درجة اولي في بلده... __ ظلوط ممكن يكون شعب تعداده 35 مليون و في كل استوب يوجد مية وخمسين شحاد من كافة الأعمار غير ناس رسل لي رصيد في حين أنه مليار ونص نسمة في الصين لا يوجد بينهم شحاد واحد.... __ ظلوووط ممكن يكون زول سياسي كل أحلامه يبقي وزير أو مدير كبير عشان يحقق أحلامه الشخصية وليس تحقيق برنامج لخدمة الشعب ويومه اليستوزر تنتهي خطته ويقع ويوقع معاهو الوازارة .. (( عليك الله امسك اي زول تم ترشيحه لمنصب سياسي وقول ليه سلمني برنامجك الداير تخدم بيهو الشعب ))...ح يتلعثم و يقعد ينظر ليك لانه برنامجه فقط هو الوصول للمنصب.... __اسال الوزراء الهسا ماسكين وقول ليهم سلموني برنامجكم لو لقيت واحد كاتب ليه صفحتين تعال سفرني لاهاي..... __ ظلوط سوداني 💯% بس حظه كعب رماهو في ام الحسن فهل يكون الشعب السوداني اوفر حظا من زلوووط؟؟؟؟ 2/2/2021 ودمتم سالمين د احمد الطيب ابراهيم استشاري جراحة الكلي والمسالك

Quote: فعلا دا واقع السودانى مافى امل فى بكره ومافى حل الا الهروب ووحياه وهويه وانتماء جديد ويصبح السودان مجرد ذكريات واطلال فى ذاكره زلوط الهارب قبل ان يسلخ جلدو