|
|
|
 Re: من الخرطوم (الوسخانة جدا) حالة احباط شديد� (Re: النصرى أمين)
|
الخدمات فى المطار ما بطالة، موظفى الهجرة الذين صادفتهم يبدو عليهم المهنية و الذوق.
لكن اول ما تطلع من شارع المطار و تدخل فى اول شارع جانبى ، هاك يا الحفر وةالحجار و الزبالة..شي فظيع..
نزلت فى الخرطوم اتنين لمدة يومين تستاهل تكون ghetto العاصمة و عند السؤال قالوا دى من افضل الأحياء فى العاصمة.
وصلت أم درمان ، وعينك ما تشوف الا النور (على قولة عادل إمام) شء فظيع .
نواصل
واعتذر مقدما عن متابعة البوست بسبب (الكواسير) التى لا تنتهى، بكا فرح مرض حادث الخ
| |
  
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: Mutasim Idris)
|
اليوم التانى يا معتصم جانى ليك اسهال عمرى ما شفت مثله
لم يتوقف ال بعد ناس السودان ادونا وصفة ابليس ما فكر فيها .
ابليس ، ذات نفسه ما فكر فيها.
جابوا كسترد بودرة فى كبايه و كبو فيهو سيفن اب ؛ خلطوه .
شربته و بعد شوية الاسهال وقف .
ناس امريكا أوربا شغالين بحوث و مراكز لتصنيع الادوية و ناس السودان من دقنه فتلو
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
السلام عليكم
اصبر يا النصري ١٠ أيام
ح تقول ما راجع كندا
الأول نبدأ بوصفتهم ، المشروب فيهو أملاح
مماثلة لأملاح الأرواء تبع الصحة العالمية
ومرات الأطفال ال عندهم إسهال ويرفضوا
يشربوا أملاح الجفاف الأطباء ينصحون به.
سوق معاك في العربية زول وناس وحافظ الشوارع
ملاحظة كان لما نجي بشارع القيادة يبدأ التعليق بفرح
وينتهي بحسرة وألم .
البلد بي ناسها ولولاهم ما بتتقعد .
عضو مجلس السيادة الأستاذة عائشة موسي
ابتدرت حملة نظافة ، المشكلة كثيرين يتعاملوا مع
الخرطوم ك عدو ، اضافة لتهالك
الصرف الصحي ومخلفات البناء والمشكلة الأزلية
ما بعد الأمطار ونوعية التربة ( تربة زراعية لما تكون
مبتلة وتمر العربات تصير كأنها حرثت وتستعد لرمي
البذور ) .
أتمني لك اجازة سعيدة وسط أهلك وأحبابك
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: اخلاص عبدالرحمن المشرف)
|
| Quote: الخرطوم مدينة فاشلة. |
ابدا والله . فشلوها السجمانين والرمدانيين ديل .
قبل وصول ناس ( حوش بانقا ) . كانت الخرطوم من اجمل العواصم العربية .( سمعت بالخرطوم بالليل ؟ ) .
ياخ يكفيك فقط التجول في شارع الجمهورية ، او تناول قهوة في " اتني " ، او اصطحاب اسرتك او اصدقاءك للجلوس في صالات او بهو فندق الهيلون ، او تصحب اولادك ( ل منتزه المقرن العائلي ) . ووووو .
شوفها الان كيف اصبحت . اصبحت خرابه .
------
الزبالة والاوساخ المنتشرة في العاصمة الجريحة ، سببها الكيزان الاوغاد . حتي تنظيف المدن ونقل النفايات ، اصبح في زمانهم بالقوة ، ولازم تدفع في الفاضي . وفي نفس الوقت لايقوموا بواجبهم ، وعربات النفايات ، لاتتوقف في الاحياء ، ونص الزبالة تطير في الشوارع وبين البيوت .
هم حضروا ، واحضروا ذويهم ، وتبعهم اخرين من المخلوعين ، ومصابين بصدمة حضارية ، وتملكوا ، واصبحوا من سكان العاصمة . والحقيقة ليست كذلك . فهم احضروا معهم الريف الي المدينة ، وليس العكس .
لن يعودوا مرة اخري لقراهم .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
كانت الخرطوم من اجمل العواصم العربية .( سمعت بالخرطوم بالليل ؟ ) .
------------------------------------------------------------------------------------
دا كان زمان يا هاشم فى الخمسنات وبداية الستينات كان عدد سكان العاصمة اقل من300 الف وكان لسع فى خدمة مدنية محافظة على النظم والاساليب الادارية التى تركها الانجليز الان العاصمة فيها 6 مليون واكثر الريف كله انتقل للعاصمة بلد ما فيها انظمة مجارى صحية ولا نظام لتصريف مياه الامطار حيكون حالها كيف؟
بالمناسبة يا هاشم معانا كارورى هنا طالب ماجستير هل تعرفه؟
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: Hassan Farah)
|
الاخ / حسن فرح المحترم
| Quote: دا كان زمان يا هاشم فى الخمسنات وبداية الستينات كان عدد سكان العاصمة اقل من300 الف |
ابدا والله . هسي قريب ده . انا مواليد 1965 ، وشهدت هذا ، وانا في فترة الشباب ، وما بعدها ، حتي حضور هولاء الاوباش الله لاكسبهم .
| Quote: كارورى هنا طالب ماجستير هل تعرفه؟ |
ابدا ، يجوز اسم علي اسم ، بلغه تحياتي .
مع تقديري ،،،،
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: Hassan Farah)
|
| Quote: اظنه يعرفك سألته عنك قال لى هاشم من كسلا |
زي ماقلت لك ، يجوز اسم علي اسم ، فالكثير يعتقد اني الفنان هاشم كاروري ، الا ان ذلك غير صحيح .
فانا من مواليد امدرمان / شارع الفيل ، ولم اري كسلا ، الا في الطريق وانا ذاهب لبورتسودان مثلا.
---
بلغه تحياتي مره اخري ، ولك ايضا التحيه .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: Hasheem Karouri)
|
اهلا أختنا اخلاص
Quote: اصبر يا النصري ١٠ أيام
ح تقول ما راجع كندا |
غايتو اول خمسة ايام رهيبة فعلا ؛ برامج مع الاهل اربعة وعشرين ساعة(لسه بنوم و بصحى مع ناس كندا)
حسب توصية المجربين مع مرور الزمن تبدا تظهر حقائق الأشياء، طبعا قبح الشوارع يصدم الزول من قولة تيت .
المعيشة رخيصة جدا جدا بحساب الدولار ؛ يعنى... مثلا... اليوم ..عملنا كرامة بخروف و تحلية و حاجة باردة لعدد كبير جدا من الاسرة
التكلفة الكلية حوالى 12 مليون جنيه بالقديم (او 12 الف جنيه بالجديد )
التى تعادل 125 دولار .
هذا مبلغ بسيط جدا لعمل كبير زى ده .
فكرة الإستقرار فى السودان واردة لكن شروطها صعبة المنال ، على كل حال نحن على ابواب التقاعد، واذا ربنا كتب لينا عمر ، مصيرنا نرجع للسودان لقضاء جزء كبير من السنة (بعيدا عن الصيف)
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: ياسر السر)
|
الاعزاء هاشم و حسن شكرا على الون تو
لكن ما تشكروا لى الراكوبة فى الخريف.
ليس هناك سوى خيارين ، اما نردم العاصمة و تتبنى من جديد او نبنى مدينة جديدة.
----
و على مضض هناك خيار ثالث
هو اتخاذ خطوات حاسمة و شجاعة لوقف الانهيار الكبير الحاصل للعاصمة القومية.
والله العظيم دخلت اليوم المنطقة الصناعية امدرمان و كدت لا اصدق عيناى...
شي لا يوصف ...
فوضى لا يتخيلها اى انسان على وجه الارض (باستثناء سكان العاصمة)
كنت اتمنى ان يكون للبورد خاصية عرض الفيديوهات من الجوال حتى يرى البعيد المآسي التى يعيشها اهم قطاع صناعى (الصناعات الصغيرة و الخدمية)
رغم ان الشارع عريض الا ان تعدى اصحاب المحلات لم يترك سوى حوالى مترين لمرور السيارات ، المصيبة ان المترين ديل حفر و جخانين و خيران .
انا قضيت معظم طفولتى اتجول فى هذه المنطقة ، لم اتخيل ابدا ان يصل الخراب الى هذه الدرجة .
الغريبة انو لم الاحظ اى إستياء او ضيق فى وجوه اصحاب السيارات/المحلات/المارة . الوضع عادى جدا بالنسبة للجميع
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: اسامه العريفي)
|
Quote: دا كلام شنو دا يا النصري؟
تبيع الدولار في السوق الأسود عينك عينك كدا؟ |
ابيع ليك حنانه زاتو يا مولانا
غايتو المثالية و الحماس غير المنطقي بتوديكم التوج
السوق ده محكوم بعملية العرضو الطلب/ زيد انتاجك يقل هامش الربح مع زيادة المبيعات تكون ربحان.
نقص الإنتاج/ يزيد سعر البيع بالتالى يزيد هامش الربح مع قلة الإنتاج مصنعك يقفل.
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
اهلا ياسر
شكرا على الترحيب.
-----
اكتر سؤال واجهنى منذ وصولى هو :-
لقيت السودان كيف؟
افضل اجابة توصلت إليها :-
عند زيارة البلد (للزول البغيب فترة طويلة) يجد نفسه امام متناقضات ، السودان سمح و كعب فى نفس الوقت.
غنى و فقير
حزين و سعيد
خوف و امان.
احيانا ، المتناقضات دى تحدث فى نفس اليوم او اللحظة.
اضرب ليكم تمثال ؛
تمشيت داخل أزقة سوق امدرمان ، خالجتنى مشاعر متناقضة ؛ كنت اغضب من سايق الدرداقة عندما صدم سيدة فى رجلها حتى صرخت من الألم الشديد ؛ لكن بعد ثوانى كل واحد شق طريقه و كأن شء لم يحدث .
السوق عبارة عن فوضى خلاقة، تستغرب كيف تجد الحافلات طريقها وسط كل هذا الزحام العشوائي.
تنظر الى البضائع المعروضة تلاحظ انها كلها و بدون إستثناء متدنية الجودة (صناعة صينية او مصرية.
بعد الظهر ؛ و بعد ان ضربنا الاقاشى ؛ نواصل
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
هناك حالة سخط شديدة جدا تجاه حكومة حمدوك .
امس ، شاهدت عربة كارو صاحبها يهتف يسقط حمدوك.
وسط عامة الناس ، نادر تجد من (يشكر) اداء الحكومة.
البعض يتهمها بالضعف خاصة وزارة الصناعة و التجارة؛ و بالمهادنة و التردد.
البعض يتهم الحكومة بانها تهتم بالمناصب ولا يهمها معالجة القضايا التى تهم المواطن العادى.
سلسلة الاتهامات تكاد لا تنتهى .
من وجهة نظرى ؛ الشفافية، هى المخرج الوحيد لحكومة حمدوك ، قد تصنع الشفافية حالة من الخوف لكن من الافضل (كطبيب) ان تخبر المريض انه مصاب بالسرطان بدلا عن (الدس)
البلد حقيقة مصابة بسرطان انقاذى قاتل ، محاولة تجميل المرض او الاستهانة به يضر بالحكومة اكثر من ان ينفعها .
اشراك الناس فى (المصائب) التى تواجه الحكومة يساعد فى نشر ثقافة ان الهم واحد ، الحميع يشارك فى معالجته.
حمدوك يجب ان يتواجد اكثر فى الوسائط الاجتماعية خاصة و انه لديه حساب موثق فى تويتر بس عليه ان يبتعد من اللغة الضبابية .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
بكل أسف دا الحاصل أوساخ مبالغة شوارع محفرة زحمة وفوضى فى المرور إفتراش الباعة فى الطرقات بطريقة عشوائية لا تنظيم ولا يحزنون العام الماضى زرت السوق الشعبي أم درمان الموقف العام لبصات السفريات القادمة من وإلى الولايات أول مرة أجي السوق دا بعد غياب عشرون عام والله لم أصدق نفسي معقول مافى مسؤول من ناس المشروع الخنفشاري ( الحضاري ) زار السوق دا قذارة مابعدها قذارة وحركة البيع واشراء شغالة أكل وشرب الأغرب من كدة الحمامات العامة إضطررت لدخولها طبعا بعد دفع المعلوم كنت متخيلها على الأقل نظيفة طلعت منها سريع وجيت أتفاصح مع الولد البجمع القريشات وقلت له ياخوي مادام بتاخذوا قروش نظفوها عاين لي كدة بإستغراب قلت فى نفسى أتخارج أحسن الخرطوم بشكل عام وبشوية إهتمام يمكن أن تكون نظيفة ومرتبة بتضافر الجهود بين المواطنين والمسؤولين وقبل دا تغيير فى سلوكيات المواطن نفسه أما عن جكاية ترحيل الوافدين وأصحاب المهن الهامشية أيضاً بقليل من التنظيم يمكن ضبط النظام وتوعيتهم والله يكون فى العون
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: حسن محمد عمر)
|
اهلا وسهلا الاخ حسن محمد عمر
شكرا على الاضافة
-----
الحكومة الإنتقالية تعيش أسوأ أيامها، غلاء فاحش و سوق خارج عن السيطرة.
ازمات حادة تصيب المواطن فى مقتل (العيش و البنزين)
فوضى و عشوائية فى الشوارع و المناطق السكنية.
هل تصدق مشوار بالركشه من سوق امدرمان الى حى بيت المال امدرمان مئة الف جنيه سوداني (بالقديم)
بصراحة الجو العام بتاع انقلاب عسكري ، وقود الانقلاب ده هو السخط الشعبى من الحكومة الإنتقالية.
الحكومة محتاجة لقرارات شجاعة تعيد ثقة الشعب فيها .
طريقة حمدوك (الميتانه) دى ما بتاكل عيش ؛ لازم الحكومة تشهر انيابها و تخلى طريقة شغل مدنى عباس مدنى المترددة و الخائفه !
الروح بلغت الحلقوم و ليس هناك نفس لاى تسويف واضاعة زمن .
و يا حكومة اذا ماعندك المقدرة على معالجة الأزمات الطاحنة اتخارجى ،
البلد مليانة كفاءات ياكلوا النار .
برضه حكاية الشلليات فى التعيينات كترت و مسخت و بقت حديث الناس
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
ياخي انت ما سمعت بالفرج الجانا ؟!
اسرائيل
ما خلاص
بعد التطبيع حا تجي تنضف لينا الشوارع وتوزع براميل القمامة
ودا كلو ببركة مدينيااااااة التي ابتعلت حرية سلامة وعدالة وبناء وتعمير
لكن خلاص قالو اسرائيل جايا تنظفنا وتهشتكنا وتبشتكنا.
نعوذ بالله من غضب الله
| |
|
|
|
|
|
|
|
|
 Re: من الخرطوم (الوسخانة جدا) حالة احباط شديد� (Re: النصرى أمين)
|
| Quote: دخلت اليوم المنطقة الصناعية امدرمان و كدت لا اصدق عيناى... |
سلام عليكم
الخرطوم اتمددت
المناطق الصناعيه ومطار ووحدات الجيش تمرق بره المدينه (والمدن عموما) ووضع شروط تخطيط وعماره جديد زياده على دا حل المشكله الاساسيه هى حدوث تنميه فى جميع طراف السودان تصبح الخرطوم عاصمه حضاريه وخلاف كدا حتى لو اتعملت عاصمه جديده حيحصل نفس الحاصل لانو مافى تنميه فى الاقاليم وبالتالى الخدمات زى الصحه والتعليم مركزه فى العاصمه وبالتالى توفر فرص العمل الهامشى والطفيلى يجعل العاصمه قبله اغلب اهل السودان .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
نعم يا عاصم ...
مهما عملت من اصلاحات و هدم/بناء وعاصمة جديدة ما بينفع طالما لم يحدث
تنمية فى الاقاليم...
ياخ فى مناظر تفطر القلب فى الخرطوم ، شاب طويل عريض شايل
كيس مناديل يبيع لاصحاب السيارات ، رجال فى قمة عطاءهم فارشين اكياس ويكه صغيرة.
عشرات الالاف (احتمال مئات الآلاف) من الأطفال شغالين و عايشين فى الشوارع .
الغريبة سمعت قصص عجيبة عن كمية الخير فى الاقاليم من زراعة و تعدين و ثروة حيوانية وغيرها..
والله امس بحكى لى واحد قريبنا عن نجاح المشاريع الزراعية(الرى بالمياه الجوفية) فى الولاية الشمالية ...شي يجنن ..
خلى الاقاليم ..قضيت بضعة ساعات فى منطقة غرب امدرمان التى كنا نظن لسنين طويلة انها ارض حجرية مغطاة برمال ..برضه شء يجنن...
البلد دى قدر ما تهبش حته تلقى خير ..محل ما تقبل تلقى ثروة تحلم بيها باقى الشعوب...
المؤسف ...ان هناك رأى شائع جدا جدا انه المشكلة مافى حكومة او ثروات ..المشكلة فى الزول السودانى..
تحدثت مع اصحاب مصانع و مشاريع زراعية ، مشكلتهم الاولى هى العمالة السودانية ، سمعت بلاوى متلتله عن تقاعس و لا مبالاة العمالة السودانية.
طبعا حاولت ادافع عنهم (العمالة السودانية) بحجة ضعف الأجور و عوائد الخدمة ..
الجميع اكد المشكلة ما مشكلة اجور ؛:المشكلة العامل السودانى يضع المشاركة فى الالتزامات الاجتماعية فوق كل شء .يعنى عادى جدا العامل السودانى يغيب عن العمل بسبب وفاة بنت خالة ام حبوبته .
أظرف حاجة ..امس سمعت حوار بين مواطن حبشى و صاحب مصنع .
الوظيفة حارس للمبنى ...
الحبشى عنده شرط اساسى حتى يتم تعيينه ..
قال ، عايز خمسة رغيفات فى كل وجبة (يعنى 15 عيشة فى اليوم)
صاحب المصنع طبعا اعتذر لصعوبة تحقيق الطلب
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: Mohd Ibrahim)
|
والله امس بحكى لى واحد قريبنا عن نجاح المشاريع الزراعية(الرى بالمياه الجوفية) فى الولاية الشمالية ...شي يجنن ..
===============================
حبيبنا النصري يا جميل .. ما انتبهت للبوست إلا اليوم الصباح
يا سلام عليك يا النصري .. أكثر بوست مفيد في المنبر
كلامك مهم جداً بالنسبة لنا ..
والدليل كلامك عن الشمالية صاح 100% الزراعة في الشمالية التكلفة منخفضة جداً
هذا الموسم درجة الحرارة 3 وأقل عندي حواشة أرسلوا لي صورة قمح حاجة ما شاء الله
المشكلة المشكلة المشكلة العمالة العمالة .. رغم أن كل الزراعة بالماكينات .. وكمان الخوف فقط من الجازولين
منتظرين سعر شوال القمح من الوزير ( لكن الوزراء مرض عديل )
ملاحظتك قوية ورائعة وعندك نظرة عميقة للأمور ( شاب مفتول العضلات يبيع مناديل ورق ) تخيل
الكسل والاتكالية والسمسرة والدخل السهل Easy Money هو ده المضيع البلد مع ان بيع المناديل في الاشارات
إلا لناس الاحتياجات الخاصة والاطفال وربما الأرامل ..
أرجوك رجاء خاص لا تنقطع عن البوست .. لأنك تنقل لنا نبض الناس العاديين لا مؤدلجين لا سياسيين
عشان نعرف الحقائق .. من موضوع الشمالية والقمح مصداقية البوست عندي 100%
واصل الحبيب يومياً ننتظر مداخلاتك .. مع الشكر ..
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
حبيبنا على عبدالوهاب
السودان رهيب رهيب رهيب رغم الظروف الصعبة جدا التى
نعيشها هذه الايام فى الخرطوم .
صعوبة شديدة فى الحصول على الرغيف ، امس مشيت بقالة كبيرة اشتريت كيس رغيف بسعر خمسة جنيهات للرغيفة الواحدة، بالتأكيد بالنسبة لى برضه رغيف رخيص لانى احسب الامور بالدولار ، دولار كندى واحد يشترى 12 رغيفة ، مشيت تانى يوم اشترى نفس الرغيف ، لم اجده (احتمال يكون لسه ما وصل او احتمال يكون خلص)
صفوف البنزين لا يمكن وصفها ، اليوم شفت صف من صينية ودارو فى امدرمان لغاية شارع النيل .
معاناة حقيقية ...
لكن رغم ذلك السودان رهيب ؛ و لو ما كانت ازمة الرغيف و البنزين يكون ارهب كمان .
تلاتين سنة وانا اردد لكل من حولى (السودان منتهى؛ السودان ما نافع ؛ واحث الشباب للخروج والبحث عن مستقبل افضل ؛ الايام دى شغال عكس ، شايل ميكروفون و شغال يا ناس بره ارجعوا بلدكم و يا ناس جوه ما تطلعوا من بلدكم.
موش كده و بس ، انا لى ٣٠سنة ما عندى اوراق ثبوت شخصية سودانية .
لا جواز لا رخصة لا بطاقة nothing
امس مشيت السجل المدنى و استخرجت الأوراق الثبوتية ، موش كده وبس ، استخرجت بطاقة الدخول للأجانب ذوى الاصول السودانية التى تحق لاصحاب الجوازات الأجنبية دخول البلد بدون تاشيرة (التأشيرة فى اتاوا بالجواز الكندى تكلف حوالى 150 دولار)
بمناسبة السجل المدني (الكلام للناس الطولت من السودان) هو مبنى ضخم فى الخرطوم فيهو مئات مواقف مواقف السيارات، منظم جدا ...واسع و مكيف ، فيهو كل خدمات الرقم الوطنى (الذى يعادل social insurance number فى كندا و social security number فى أمريكا ... خدمة استخراج البطاقة القومية؛ الرخص ؛ جوازات السفر الجمارك و غيرها من الخدمات
مستوى الخدمة فى المركز ممتاز جدا (حسب تجربتى) مثلا ..كنت رايح بين ممرات المركز المتعددة وقفنى ضابط كبير (صقر و نجمتين) و سالنى هل احتاج مساعدة؟ كانت مفاجأة بالنسبة لم اتوقعها اطلاقا .
خليك قريب يا على ، دى المناظر ؛ الفلم قدام
| |
|
|
|
|
|
|
|
|
 Re: من الخرطوم (الوسخانة جدا) حالة احباط شديد� (Re: علي عبدالوهاب عثمان)
|
الأخ الفاضل / النصرى أمين
التحيات لكم وللإخوة المتداخلين
أنت ضيف عزيز علينا في بلدكم الأول ( السودان ) صاحب الصيت .. وأرى تجوالك دائماُ يتحدث عن أسواق وأحياء ( أم درمان ) .. وأم درمان بالنسبة للخرطوم وللخرطوم بحري تعتبر مدينة جافة مجحفة قاحلة .. بينما أن مدينة الخرطوم ومدينة الخرطوم بحري تعتبران ( مدن نهرية مثقلة بالأشجار والخضرة ) .. ولا أعرف السر : لماذا مدينة أم درمان تشتهر بالجبال رغم قلة جبالها وكذلك تشتهر بالجفاف رغم أنها تجاور النهر ؟؟ .. ولكن من العجب العجيب أن ذلك القحط والجدب والجفاف له ميزاته الخاصة .. حيث تجعل من مدينة أم درمان مدينة لا ترحب بزوار الليل ,, وإذا كنت محظوظاُ وبت ليلة واحدة ( بالمايقوما الحاج يوسف ) أو بمناطق ( الكلاكلات ) بجوار النهر أو في ( أبو آدم ) أو في ( العزوزاب ) أو في ( وود عجيب ) لسمعت بعد المغرب مباشرةُ تلك الطرقات العنيفة المعهودة على الأبواب .. وعندما تفتح الباب سوف تقف أمامك ( باعوضة ) بكامل جمالها ومحاسنها ،، وتقول لكم بكل ذوق وأدب : ( نحن في هذه المناطق نكرم الضيوف بطريقة فريدة ،، وسوف نكون في أحضانكم طوال الليل وحتى انفلاق الصباح !..) .. ونحن متأكدين بأنكم بعد تلك الليلة البهية في أحضان الباعوضة الجميلة سوف تفكرون للعودة إلى ( كندا ) فوراُ ولو كداري !!!
أخي الفاضل : نحن في العاصمة المثلثة السودانية حين نخرج في الصباح الباكر إذا لم تتعثر أقدامنا بأكوام النفايات نسأل في حيرة : ( ماذا حدث في البلاد ؟؟؟ ) .. أضحكنا زميلكم كثيراُ حين قال مستنكراُ : ( دا كلام شنو دا يا النصري؟ تبيع الدولار في السوق الأسود عينك عينك كدا؟ ) .. لأن ذلك السؤال يدل على أن صاحبك لم يتواجد في السودان في السنوات الأخيرة .. ولا يعرف بأن السيد عمر البشير بشخصه قد ذهب للسوق الأسود في يوم من الأيام ليبع الدولارات .. وكان يحتج كثيراُ بأن السعر المعروض غير مجدي .. وفي نفس الوقت كان يحذر الشعب السوداني بأن لا يبيع الدولار في السوق الأسود وأن لا يتعامل في فساد العملة المحلية .
وفي الختام لكم خالص التحيات
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: منتصر عبد الباسط)
|
اهلا عمر عيسى
سعدت كثيرا بمداخلتك خفيفة الظل .
اعتقد امدرمان (امدرمان القديمة تحديدا) تعيش حالة مأساوية، لا اعرف هل فعلا
كانت مقصودة من النظام البائد !! لكن درجة الإهمال والتهميش لإحياء المدينة لا يمكن تجاوزه بسهولة ،
اما الباعوض ؛؛فدى قصة براها. عادة اسافر فى الشتاء لانى بقيت سنه ناعمة لا اقوى على
الحر الذى يكتم الانفاس ، و ليس بينى وبين البعوض غرام متبادل، طبعا البعوض يكاد يختفى فى الشتاء (او هكذا كنت اظن) ، لكن و لاول مره اشاهد بعوض فى حجم الضبان الاخدر ، حاجة مذعجة جدا.
طبعا مشكلة البعوض تعتبر ثانوية جدا مقارنة بمشكلة الرغيف و البنزين ، قصص عجيبة عن صف الرغبف ؛ قريب لى حكى انه كان يذهب للفرن الواحدة و النصف صباحا ؛ اضطر بعد ايام الذهاب مبكرا حوالى منتصف الليل ؛ الايام الاخيرة قال انه يذهب العاشرة مساء حتى يضمن حصته من الرغيف لكن لاحظت اخر يومين لى 18و 19 فبراير ان الزحام بدأ يخف تدريجيا و ربك يستر من الانتكاسة.
اول يوم من بداية بيع البنزين التجارى (128جنيه للجالون) مشيت المحطة و كانت المفاجأة! صفوف طويلة جدا.
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
والله يا مهيب لن تعرف مدى سعادتى وانا استلم بطاقة دخول الأجانب ذو الأصول السودانية؛ والله فرحة حقيقية من القلب.
دلوقت ممكن اسافر السودان فى اى لحظة ، امشى المطار و اشترى تذكرة بالكرديت كارد؛ اقيف فى مصر يوم ، اشترى هدوم و هدايا و امشى السودان.
البطاقة فكرة عبقرية تخدم قطاع واسع من السودانيين فى الخارج؛ تشجعهم على زيارة البلد more often و طبعا اى زيارة فيها دولارات داخلة البلد.
إجراءات استخراج البطاقة بسيطة جدا بس يشترط يكون عندك رقم وطنى سودانى(جنسية يعنى) او شهادة ميلاد او رخصة سودانية ؛ لو ما عندك اى مستند يثبت سودانيتك ؛ يمكنك الذهاب الى مركز خدمات السجل المدنى و معك اثنين من اخوانك و معهم اثبات شخصية و يتم التحرى للتأكد من صحة شهادتهم ، بمجرد حصولك على الرقم الوطنى ؛ يمكنك بعدها التقديم لبطاقة الأجانب .
رسوم البطاقة بسيطة جدا ؛ الفين و خمسمائة جنيه سودانى يعنى اقل من 25 دولار .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
فى مداخلة سابقة ذكرت ان السودان بلد المتناقضات،
احدى هذه المتناقضات الشعور بالأمان والخوف فى نفس الوقت ،
مرت كنت راكب فى سيارة مع احد الأصدقاء، فاتح شباك العربية و براجع فى الجوال ؛ صاحبى قال لى اعمل حسابك ممكن زول يخطف الجوال منك و يجرى و خيرنى بين قفل شباك العربية او الحرص على الجوال بعيد عن جهة الشباك.
كاميرات ال security بقت منتشرة جدا ؛ الشرطة ليس لها دور فى حماية المواطنين ؛ يعنى لو تعرضت لسرقة ، ابلعا فى حنانك و ربنا يعوضك ، انسى انك تفتح بلاغ لانه ليس هناك أمل إسترجاع المفقودات.
الشرطة نفسها تؤجر عامليها (من العسكر) للمواطنين و كأنها شركة security خاصة .
من المخاطر التى يواجهها المواطن العادى ، ظاهرة الكلاب الضالة المنتشرة فى كل الأحياء.
ابن اختى حكى لى قبل سفرى بيومين انه كان سايق سيارته عائد الى البيت حيث شاهد (ترابه قايمة) و بنت تجرى بعد ان رمت كل ما تحمل من اكياس و خلفها كلب ، البنت تصرخ و الكلب خلفها ؛ لم ينقذ الموقف سوى ابن اختى الذى قام بمحاولة صدم الكلب بسيارته الذى نجح من تفاديها و جرى الى إحدى الشوارع الجانبية. البنت كانت ترتعد من الخوف من التجربة القاسية ، اكيد دخلت فيها خوفة من الكلاب لا تروح ابدا .
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
اثناء الزيارة ، كنت كثير السؤال لدرجة الملل ؛ كنت أسأل أسئلة تبدو كانها ساذجة او عبيطة و احاول وبكل جدية فهم تحليل الإجابة.
واحدة من المسائل المعقدة التى حاولت فهمها ؛ ليه تنتشر ظواهر سالبة فى المجتمع السودانى مثل الكسل عدم الاهتمام واللامبالاة عدم الجدية .
فى مطار الخرطوم ؛ كنت واقف فى الصف فى كاونتر الخطوط الإثيوبية ؛ جاء احد عمال صيانه الصالة و معاه سلم طويل ؛ بدا فى تغيير لمبة فى سقف الصالة يبدو انها احترقت، لغاية هنا ، جميل جدا ، طلع السلم ؛ وانا بعاين ؛ فك (الاباجورة) التى بداخلها اللمبة المحروقة ؛ تمام ججدا طلع اللمبة المحروقة ووضع محلها اللمبة الجديدة ؛ لغاية هنا تمام ، الاباجورة مليانه تراب و وعجاج ، بدلا من نفض التراب منها او حتى غسلها ؛ رجعها مكانا برتابا و عجاجا .
الاحتمالات انه العامل ده ينفذ تعليمات محددة.
او انه عامل قلبه ميت
او انه عامل لا يجود عمله
او انه يكره عمله
او ان مديره المباشر لايعرف كيف يحافظ على الصالة بصورة مقبولة .
ممكن نطبق الحادثة دى على كل شي فى السودان.
مرة صورت عربية النفايات نحن خلفها لقرابة العشرة دقائق ؛ العربية مليانه زبالة لكن الباب الخلفى شبه قافل ، او شبه فاتح؛ كلما العربية تطلع فى دقداق ( وما أكثر الدقداقات فى شوارع الخرطوم) كلما تطلع فى دقداق او حفرة ، كوم من الوساخة تسقط فى الشارع ؛ والله العظيم شاهدت كيس وساخة كبيرة وقع من العربية دى و نحن خلفها ؛ قريبى قال لى لمن تصل عربية الزبالة مقصدها تكون فاضية لانها تخلصت من كل الاوساخ اثناء الطريق.
كان ممكن ببساطة ، سواق لورى الاوساخ يراجع الباب الخلفى و يتاكد انه مقفول تماما .
الاحتمالات :
سواق عربية الوساخة قصد الباب الخلفى يكون فاتح.
او لا يهتم انه فاتح او قافل
او ليس هناك محاسبة من مدراءه
او انه يكره عمله
او الباب الخلفى مكسور ولا يمكن إصلاحه.
برضه واضح انه الجمهور يقبل هذا الوضع الشاذ ؛ لا احد يشتكى او لا احد يهتم بشكوى المواطنين
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
فرق تانى بين البائع السودانى و المصرى (على سبيل المثال)
طلعت من مطعم مشهور فى الخرطوم. فى واجهة المطعم هناك كشك صغير يبيع العاب اطفال، طبعا البضاعة كلها صينية اغلى لعبة تلاته او اربع دولارات، كنت ابحث عن مسدس موية لان وعدت شفع البيع بشراءه لهم ؛ مشيت على الكشك بنية اشترى عدد من اللعبات ؛ سالت البائع وهو شاب دون العشرين ؛ عن مسدس الموية ؛ ادانى مسدس صينى شكله تعبان شديد؛ بكل براءة علقت بأنه (منتهى) وهذه كلمة اكررها فى اليوم مئات المرة لوصف اى شي دون المستوى ، المهم البائع لمن سمع الكلمة دى اتهيج وقال لى دايرا اشترى ما دايرا اتخارج ، بصراحة اتخلعت ؛ قلت ليه ياخ طول بالك انت زول بتبيع للناس مفروض تحاول تضبط نفسك ، انا لم اقصدك و معذرة اذا الكلمة ما كانت فى محلا ؛ بدلا عن التراجع فى الحدة حتى تكتمل البيعة بدا يدافع عن موقفه و اتهمنى انه رميت المسدس على الارض .
اتخيل معاى ، انه البائع ده مصرى او تركى او اثيوبى او سورى والكشك ده فى بلده ، هل تتوقع هذه الحدة منه ؟
شعوب العالم كلها عندها تحكم فى عواطفها عندما يكون الامر متعلق بارزاقا و مصدر دخلها ؛ السودانى نفسه ضيق جدا و الغريبة يقول ليك الأرزاق بيد الله، طيب ياخ اعمل العليك و اضبط نفسك و اعمل اقصى ما تستطيع لأداء وظيفتك بعدها اترك امرك لله.
ما ممكن تشاكل زبائنك بدعوى الأرزاق من عند الله
| |
|
|
|
|
|
|
|
|
|
Re: من الخرطوم (الوسخانة جدا) حالة احباط شديد� (Re: النصرى أمين)
|
مرحباً النصري وموضوعك شيق وجذاب..
عندما يتعلق الأمر بالسودان والسودانيين لا تسأل عن مقارنة أو مقاربة أو توصيف دقيق..
الكل يعمل على هواه.. ووفق مزاجه الشخصي، وكل محل له اسعاره الخاصة التي تختلف عن جاره..
حتى لو كان المورد واحد وسعر الشراء واحد..
موضوع مهم ايضاً موضوع (عدم وجود العمالة المدربة الماهرة التي تتقن عملها بصورة ممتازة)..
لي عودة
| |
|
|
|
|
|
|
| |
Mutasim Idris
بكرى ابوبكر
Hasheem Karouri
Hassan Farah
Hafiz Bashir
ياسر السر
اسامه العريفي
حسن محمد عمر
منتصر عبد الباسط
Asim Ali
Mohd Ibrahim
علي عبدالوهاب عثمان
عمر عيسى محمد أحمد
Muhib
Ali Alkanzi
فيس بوك
تويتر
انستقرام
يوتيوب
بنتيريست