وقد رشقت بالبيض الفاسد ومن معى من اطفال البص الذى به محمود محمد طه ومن معه وهو يدخل اربحى لقد اخبرنا المتطرفين ان هناك كافر حا يدخل اربجي لذا علينا كاطفال رشقه باليض لان الكبار امتنعو لانو من أتى بعلى لطفى مدير لمدرسة عبدالحمن على طه المتوسطه هو عبدالرحمن على طه موحد اربجى ومخططتها كمدينة في جلباب قرية
08-11-2020, 03:14 AM
Abureesh
Abureesh
تاريخ التسجيل: 09-22-2003
مجموع المشاركات: 30182
ابو الريش ياخى ماقعدتنى فى علبى انت فى ذلك الزمن كنت جمهورى وبتركب البص مع محمود محمد طه ولاخوان الجمهوريين وجيت معاهم اربجي ووقتها انا كنت شافع جارى بلباسى ياخى احترامات احترامات ....
08-11-2020, 03:22 AM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
وقبل ان اعود لتفاصيل ماحدث وبعده ماحدث على لطفى حين قدم لاربجى مدير لمدرسة عبدالرحمن على طه المتوسطة كان برفقته اتنين من الابناء لطفى وخالد وكنت اشوفهم بحكم الجوار حلب غير الحلب البجو اربجى ويصلحو الكوانين وباقى المعدات المتزلية بالنسبة لى لانو لونهم فاتح ديل حلب بس ابوهم مدير
08-11-2020, 07:41 AM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
حين دخلت اولى ابتدائي في العام ١٩٧١م بمدرسة اربجى الغربية كان مديرها اسمه قاسم من القطينة كوز اوجبهة ميثاق وقتها وتلك الاسماء الاسلمجية كان شخص قاسى ومنفر وضم له اوعين معه مدرس اكثر قسوى واكثر تطرف اسلمجية اى الوليد محمود على طه كان ضرب ابانا لنا ونحن اطفال حين نخطىء كان ارحم واحن من ضرب الوليد محمود لنا الوليد كان بقولنا النقطة بجلدة النقطة دى فى الأحرف العربية شخصيا وانا فى الخامسة بتدائى قررت ترك المدرسة لان ضرب ابى احن من ضرب الوليد وقررت اعلم نفسى بنفسى بدون ضرب وتلك قصة اخرى
08-11-2020, 05:19 PM
Abureesh
Abureesh
تاريخ التسجيل: 09-22-2003
مجموع المشاركات: 30182
ولك من الإحترامات أكثر وأكثر يا بدرالدين الأمير. موش بص.. ركبنا لورى سفنجة مع الأستاذ، إن لم تخنى الذاكرة من كسلا للقضارف.. طبعا اللورى فيه المقدمة تشيل نفر إضافة للسواق (فى الأحوال العادية) والاستاذ كان راكب قدام. ونحن ورا .. اللورى كاشف طبعا و قاعدين فوق البضاعة.. معانا رجل كبير فى السن.. بس دقت مطرة.. و ما نشوف إلا اللورى وقف والاستاذ نزل وطلع اللورى معانا و كلم الرجل الكبير يركب قدام.. نحن تانى تممممم سكتة واحدة لحد ما وصلنا القضارف.. عم وجوم ما عرفنا نقول شنو. (الوفد الطائف)
منتصر ياشايقى ام درمان الوالد له الرحمة كان صديق لعلى لطفى بحكم الجيرة وبرضو ابى كان عندو توكيل بريد اربجى وكان فى اربجى تلاتة خطوط تلفونات واحد مباشر بمنزل عبدالرحمن على وخط تجارى بدكان الوالد وثالث بمدرسة عبدالرحمن الاخير ماكان خط مباشر كان بتحول له المكالامات من البدالة الفى دكان الوالد فى عصر اليوم التانى من وصول الاستاذ محمود لاربجى ذهب الوالد برفقة عمنا الريح امد الله فى عمره للسلام على نسيب على لطفى اى الاستاذ محمود وعند دخولهم منزل على لطفى كان الاستاذ بيملىء على ابنته اسماء كتابه الرسالة التانية من الاسلام فقام الوالد وبحكم انه وكيل البريد افتكرها رسائل بريدية قام قال للاستاذ محمود وصلتو الرسالة الكم هنا الاستاذ محمود وقف الإملاء ونبرى يشرح لابى وعمنا الريح الرسالة التانية بعتبار انهم جمهوريين واصدقاء لعلى لطفى وحين مغادرتهم منزل على لطفى وجدو عمنا على ود اللباب جمع كل رجالات الحى وبوزع لهم في التمر وأخبرهم ان الحاج الأمير وحاج الريح مشو لمحمود محمد طه وبقو جمهوريين ومن بعدها لم يقربو بيت على لطفى لحين مغادرة محمود الوفد المرافق له اربجي وبجيك لقصة الطقيع بالبيض والعشوة الكاربة
08-12-2020, 00:42 AM
عبدالله عثمان
عبدالله عثمان
تاريخ التسجيل: 03-14-2004
مجموع المشاركات: 19192
كتاب الثورة الثقافية في واحد من طبعاتو مكتوب في الغلاف العنوان اربجي ١٩٧٢ واحد في حملة الكتاب قال والله انتو الجمهوريين كل شي عندكم غريب هسي اربجي دا ياتو شهر
08-12-2020, 00:44 AM
عبدالله عثمان
عبدالله عثمان
تاريخ التسجيل: 03-14-2004
مجموع المشاركات: 19192
وبمتلسبة التلفون والفالح صالح القصة حكاها لي الاستاذ سعيد الطيب شايب والمناسبة قال لي في أسرة في ود مدني توفي لهم عزيز بالحرطوم كان في مطر غزير والتلفونات بين ود مدني والخرطوم تعطلت فال الأسرة اتصلت بالأستاذ عبدالرحمن علي طه في اربجي بالتلفون وبلغوه قال انو السيد عبدالرحمن رغم طروف المطر بي ليلو داك ركب مشي ود مدني بلغ اهل المتوفي —- جدير بالذكر كما تعلم أنه جد عديلي الجمهوري الأستاذ فايز عبدالرحمن عبدالمجيد حسن التوم وأمه علوى عبدالمجيد علي طه
—- د. النور حمد كتب سلسلة مقالات منشورة عن السيد عبدالرحمن علي طه
—- شاركت بروف فدوى في تدوة اسفيرية عالمية عن الأستاذ محمود محمد طه وكانت مشاركتها متميزة
08-12-2020, 01:19 AM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
عبدالله عثمان تسلم ياغوث فعلا الكتاب الذى املىء على اسماء محمود محمد طه هو الثورة الثقافية واليس الرسالة التانية وكما تعلم عديلك فايز هو ابن عمى ودفعة شقيقى الاكبر دكتور حافظ وعبدالرحمن عبدالمجيد والد فايز والطيب على طه لهما الرحمة هاجرو مبكرا لكوستى والدى له الرحمة عمل لفترة فى مشاريع الليا وبدت التور وكنا نسافر من الحصاحيصا لكوستى بالقطار او العكس برفقة الوالدة لها الحرمة الحرم بت على وهى مسمنها على ام عبدالرحمن على طه ومايعلق فى ذاكرتى من ذكريات جميلة زواج الوجيه مرتضى شقيق فايز كان زواج له شنا ورنا تزوج من حفية الخير وحفية كانت جميلة جميلات اربجي وياماصببنا عليه اللعنات وهناك من جن حين اتاهو خبر السمحة قالوا مرحلة لكوستى ههههه
08-12-2020, 01:31 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
وقوفا من اليمين ابراهيم جبارة عبدالرحمن حسن عبدالمجيد.المرحوم قاسم ابراهيم حمد مدير مدرسة اربجى الابتدائية الغربية الجلوس من اليمين عبدالمنعم عثمان. تقي الدين. بدرالدين محمد الأمير
الزمان (دي مني انا ) : سنة حفرو البحر ...
08-12-2020, 07:19 AM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
ونحن الاطفال الحرضونا على ان نطقع البص الذى يقل الاستاذ محمود ومن معه بالبيض قمنا جرينا وراء البص البص وقف امام منزل على لطفى مدير المدرسة المتوسطة من فى البص دخلو المنزل ونحن وصلنا ووقفنا فى الشارع عشان نعرف الكافر دا حايعمل شنو جانا شخص من داخل منزل على لطفى وبمودة ونحن الحفاء العراء طلب مننا نجلس فى دوائر وبعد شوى تنهال علينا صوانى الاكل محملة بكل ماتشتهى نحن بناكل ومندهشين دا شنو نحن البناكل الكرتة اي مافضل من اكل الاباء الكفار ديل ياكلونا قبل الكبار.... وظلت حقيقة تؤرقنى كطفل وليس لدى من اساله إلى ان اغتربت هنا لدولة قطر وكان بها والدى ووالدتى وقرأت كتب الاستاذ محمود ودى زاتها اي ان قراء مؤلفات محمود كان بسبب الاستاذ مسعود محمد على ووقتها كان استاذ اللغة الانجليزية بجامعة قطر الكلام دا نواحى العام 1992م وبجيكم راجع لباقى الحكى وقصة تعرفى على مسعود محمد على الرزيقى المتلاف كما كان يكنيه خالد الكد
08-12-2020, 09:16 AM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
وصل مصطفى سيد احمد الدوحة وقبله كان وقد وصلها مسعود محمد على استاذ للغنة الانجليزية بجامعة قطر وبعد عام من وصول مصطفى للدوحة وصلها برضو الاستاذ محمد الحسن البكرى الروائي المعروف بالحسن البكرى وبرضو اتى للدوحة مدرس للغة الانجليزية بجامعة قطر والبكرى بمجرد وصوله للدوحة كان همة الوحيد ان يلتقى قريبه وصديقه وود حلته مصطفى سيد احمد هاتفنى الاخ الصديق عبدالرحمن نجدى الناقد والمخرج السنمائى ووقتها نجدى كان يعمل بقسم الاعلام بجامعة قطر ونجدى كان قد وصل لدولة قطر فى منتصف العام ١٩٨٩م اي بعد انقلاب الترابى البشير واخبرنى ان هناك استاذ اسمه محمد الحسن البكرى من اقرباء مصطفى سيد احمد وصل الدوحة دايرين نعمل لمصطفى مفاجأة تمرنى المساء عشان نمش ناخد البكرى ونوديه لمصطفى وقد كان اتصلت بمصطفى وقلت له المساء ماتطلع من البيت جاينك انا و نجدى ومعنا واحد قريبك قال قريبى دا منو قلت لمن نجيك بتعرفه وكانت المفاجاة السارة لمصطفى ان يرى قريبو وفردتو محمد الحسن البكرى امام عيونه
نواصل
08-12-2020, 12:46 PM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48887
ونسأل الله أن ينفعنا ببركة أستاذنا علي لطفي الذي رحل عن دنيانا في يوم الجمعة الماضية 7 أغسطس 2020 في مدينة فورت وورث الأمريكية بتكساس
يطيب لي تعطير البوست بصوت الأستاذ علي يقرأ قصيدته "أرحكا معاي" ثم بأداء الدكتور خالد محمد الحسن لها في جلسة بمنزل الراحل المقيم أستاذنا عبد اللطيف عمر حسب الله
08-12-2020, 07:52 PM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
ياسلام تسلم ود الشريف انعشت الذاكرة وحا احكى عن زياراتى لانسان الخصال السمحة الاستاذ سعيد الشايب له الرحمة والمغفرة بنزله بحى المدنيين بودمدنى فى العام 1996م
08-12-2020, 09:31 PM
بدر الدين الأمير
بدر الدين الأمير
تاريخ التسجيل: 09-28-2005
مجموع المشاركات: 23001
فى العام الاخير من الثلاثة اعوام التى قضاها الفنان مصطفى سيد احمد بدولة قطر كان عندنا حولية شبه ثابتة وهى ان الغدا يوم الخميس بمنزل مسعود محمد على وزوجته طاهرة عبدالحميد يحى الخليفة وكان مسعود دائم الحديث عن الاستاذ سعيد الشايب وبركاته منها يوم وقف سعيد الشايب القطار.... غادرت الدوحة الى السودان بعد غياب عشرين سنة مرافق لجسان مصطفى سيد احمد حيث غرسناهو بود سلفاب وبعد انتهاء ايام العزاء غادرت ود سلفاب الى اربجى وكنت حريص ان ازور سعيد الشايب وفي ذهنى حكاوى مسعود عنه اخبرت الاخ والصديق الشاعر ازهرى محمد على انى انوى زيارة الاستاذ سعيد الشايب فرح ازهرى بهذا الطلب وقال خلاص بكره بعد الفطور لاننا كنا في شهر رمضان اتانى ازهرى من الحصاحيصا وتحركنا من اربجى الى ود مدنى وصلنا منزل سعيد الشايب بحى المدنيين بود مدنى وكان بمجلس سعيد مجموعة من الاخوات والإخوان الجمهوريين وكانو في حالة انشاد جلسنا على الطرف وبعد انتهاء الانشاد رحب سعيد الشايب بازهرى وظهر لى ان ازهرى له علاقة صداقة اصيلة بسعيد الشايب قام ازهرى عرف سعيد الشايب بشخصى الضعيف وانى عدت للسودان بعد غياب طويل مرافق لجسمان الفنان مصطفى سيد احمد ترحم الجميع على روح مصطفى ثم انبرى سعيد الشايب يحدثنا عن مصطفى وصوت مصطفى بتفاصيل مدهشة ونحن في طريق عودانا قلت لازهرى دا اكتر زول بعرف مصطفى معرفة حقيقية ضحك ازهرى ولم يعلق ... وصرت بعدها وطوال الشهر القضيتو فى السودان مجرد ما اجد فرصة امشى مدنى لسعيد الشايب واستمع بكلامه وروحة الجميلة وتواضعه وقبل عودتى للدوحة ذهبت لوداعه .... ودى قصة اخرى ربما ارجع لها
08-12-2020, 11:01 PM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48887
صالون طاهرة ومسعود اومسعود وطهارة ظل مفتوح بعد رحيل مصطفى سيد احمد زى ماكان قبل رحيل مصطفى لكل من اتى للدوحة سياسى او فنان أو اكاديمى اذكر منهم على سبيل ذاكرتى
زيادان ابراهيم محمد الامين محمد الحسن حميد ياسر عرمان الخاتم عدلان الباقر العفيفى ولقاء حميد مع الخاتم فى الدوحة اشبه بنسبة لى بلقاء ابن عربى مع ابن رشد وبجيكم لتفاصيل ماكان يحدث وحدث ماحدث...
08-16-2020, 05:53 PM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48887
جميل جدا ياود الشريف يا ياسر وبجيك لقصة الباقر العفيفى البقى جمهورى على يد أستاذه فى الثانوى الماجمهورى مسعود محمد على وبرضو التقينا فى صالون طاهرة ومسعود
01-21-2021, 07:25 PM
عبدالله عثمان
عبدالله عثمان
تاريخ التسجيل: 03-14-2004
مجموع المشاركات: 19192
اهلين عبدالله عثمان العديل العديل حين تخرج صديقنا واستاذنا مسعود محمد على من كلية التربية جامعة الخرطوم عمل مدرس فى مدرسة الحوش الثانوية ولاحظ احد تلاميذة وهو الباقر العفيفى مهتم بالقراءة والاطلاع قام اهداهو احد مؤلفات الشهيد المفكر وبقى التلميذ مهتم بمؤلفات المفكر والفكرة وحين دخل الباقر جامعة الخرطوم كان جمهورى غرقان ومن دله على هذا الطريق استاذه الغير جمهورى يعنى الباقر بقى جمهورى بالقراءة والاطلاع فعلا كاد المعلم ان يكون رسولا وحين زار الباقر الدوحة لاول مرة مشارك في برامج قناة الجزيرة التقيته لاول مرة بمنزل مسعود محمد على حينها كان مسعود استاذة اللغة الانجليزية بجامعة قطر وبعد سنوات برضو التقيت ابن عمى عديلك الجمهورى فايز عبدالرحمن عبدالمجيد وانت وزواجاتكم بمنزل مسعود في صالون طاهرة عبدالحميد زوجة مسعود الذى اكنيها بالام تريزا ياما عقدنا جلسات تفاكرية وحين غادرت مرافق لجثمان الفنان مصطفى سيد احمد اوصانى مسعود ان ازور الاستاذ سعيد الشايب بحى المدنين بمدنى ومن اول لقاء بسعيد الشايب صرت مداوم على صالون سعيد الشايب كان رجل يسحرك بكلامه وفى استماعه لك وعلى فكرة لمن حكيت لمسعود القصة عنوان البوست صار في نهاية كل اسبوع يهدينى احد مؤلفات الاستاذ وكانت نادرة مصورة فتوكوبى ولمن التقيت الاستاذ سعيد اناشبه مطلع على معظم مؤلفات الشهيد وقام مسعود قالى وانت هناك اسال الاستاذ سعيد ممكن تلقى عنده كتاب الاسلام والفنون وانا في زيارة لسعيد الشايب كان برفقتى الشاعر الصديق نسيبكم ازهرى محمد على قلت له ونحن في الطريق من اربجى لمدنى هل ممكن اطلب من سعيد الشايب كتاب الاسلام والفنون ازهرى قال عندى نسخة بهديك لها ومن وقتها وطوال ما انا في السودان بمش احج لصالون سعيد الشايب وممكن لان شيطانى اكبر من شيطان الباقر العفيفى لذا مابقيت جمهورى ههههه
01-23-2021, 09:55 AM
عبدالله عثمان
عبدالله عثمان
تاريخ التسجيل: 03-14-2004
مجموع المشاركات: 19192
على فكرة ياعبدالله عثمان ايضا التقيت لاول مرة في الدوحة بمنزل طاهرة ومسعود اسماء محمود محمد طه وزوجها النور حمد حينها النور كان استاذ بجامعة قطر ولمن اكتشفت في ذالك الغدا ان اولادهم امنة ومحمود مابتكلمو عربى جط ليك فى النور عيال جدهم المفكر محمود مابعرفو عربى يعنى حايقرو ارث وتاريخ جدهم استشهاد جدهم بالانجليزى ضحك النور وقال يابدرالدين انت فاكرنا مشينا امريكا منحة دراسية زى الكيزان مشينا ناكابس لهم ولنا في لقمة العيش بعد انقلاب الكيزان اشتغلنا سواقين وغسلنا الصحون وقرينا بس كونك تدخل أطفالك مدارس خاصة وبدرس العربية دى مابتقدر عليها مالم يكن عندك تمويل من جهة سعودية..... افتكر امنة ومحمود دلوقتى بكونو تخرجو من الجامعة
عفوا ياعبدالله انا بكتب من ذاكرتى وعن زكرياتى لذا يجب تصويبى حين يكون الكلام مكتوب المسؤلية صعبة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة