|
|
|
 Re: مبروك للاشقاء في اثيوبيا تعبئة سد النهضة (Re: Gafar Bashir)
|
سد الأحباش يدينا خيره الله ويكفينا شره .
غايتو المرحلة الاولى دي بسيطة
هل ستتحمل الهضبة الاثيوبية
أن تكون خزان ضخم للموية
أم ستبحث المياه عن مسالك أخرى
منحدرة أسفل نحن السودان ؟!! ...
هل ممكن النيل ده يغير مساره ويبحث عن متنفس
يمرق بيهو كان البحيرة دي انشرت ؟
ده اذا السد قدر يتحمل ضغط مياه البحيرة
الحيكون خرافي في أشهر الخريف
الله يكضب الشينة غايتو ....
| |
 
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
تحياتي لكما وكل عام وأنتم بخير
تعرف السعوديين مطلعين فينا نكات عن أننا كسلانين
قالو في سوداني شاف قشر موز قدامو فجأة
وعرف إنو لا محالة سيطأه فقال (الله يعنيا على دي الطيحة)
ههههههه
يعني كسلان من إنو يغير الطريق ههههه
كنت بزعل من الكلام دا
لكن يبدو نحن كدا فعلا!
البمنع شنو يتم عمل سدود وأنهار وقنوات صناعية
احتياطية لاستيعاب أي مياه غير متوقعة وفيضانات
لتستغل للري والشرب
أي مشكلة محتملة هي في الحقيقة غنيمة محتملة
لمن يريد الحقيقة ويعرف لكل مشكلة حل.
يعني انهيار السد لو هو شيء محتمل ممكن استثماره لصالح السودان
خصوصا هو سيحدث لو حدث بعد أعوام
فهل نحن عاجزون لتجهيز مخازن لاستيعاب ماء
وليس حمم بركانية!
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: منتصر عبد الباسط)
|
Quote: وما استغربت له جدا هو كم الحبر اللي تمت في توضيح كيفية انهيار السد من خبراءنا ومهندسينا والمعادلات والبحوث وبقية الهستيريا التي صاحبته
وتم ملء السد ولم ينهار ولاهم يحزنون ... |
يا هندسة لا قدر الله الخوف من انهيار السد ابدا ما كان من المرحلة الاولى اليادوب التخزين فيها اقل من 5 مليار ولا حتى للسعة الاصلية الـ 11 مليار
الخوف من الـ 74 كلها
عموما المخاوف مشروعة فحتى المشاريع التي تتبع فيها كل اشتراطات السلامة و تجري الدراسات و النماذج حسب الاصول الهندسية يبقى الخطر قائما طالما هناك عناصر بشرية في الموضوع وكذلك الطبيعة
فما بالك والهمس يدور عن عدم اجراء الاثيوبيين و تقديم دراسات أمان السد كما ينبغي - اتمنى ان لا يكون صحيحا
الشي التاني مخاوفنا في السودان ليست حصرا على الانهيار فقط بكن هناك عامل التشغيل و اتفاقيات الاخطار المبكر طالما في الداون ستريم توجد سدود سودانية و المسافة قصيرة جدا
ودا كان محور استراتيجية لسودان في التفاوض مؤخرا الوصول لاتفاق قانوني يلزم و يدعم الاتفاق الفني, لكن الجانب الاثيوبي رافض تماما للالزام القانوني رغم تجاوبه مع الاتفاقات الفنية, و خطوة ملئهم السد أحاديا بدون توقيع اتفاقية خطورتها ليست في الملئ نفسه فهذه الكمية الاولى قليلة نسبيا لكن في مبدأ ان تتصرف اثيوبيا بدون اخطار او اتفاق فا توقع ما الذي سيجري في السنوات القادمة من ملئ و تصريف و قفل و فتح دون الاهتمام بشركاء النهر, دي الخطورة الحقيقية
| |
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: محمد البشرى الخضر)
|
سلام يا جعفر
| Quote: كنت اتمني ان يكون موقف السودان مختلف |
ما عرفتك قاصد موقف مختلف في ياتو إتجاه
لكن عن نفسي لو كنت أتمنى أن يبحث السودان في الآثار السالبة لسد النهضة بصورة مكثفة أكثر من البحث عن فوائد السد للسودان
وذلك لعدة أسباب أولها أن الأثار السالبة لو وجدت لا يمكن تلافيها مستقبلاً بدون تكاليف أما الأثار الإيجابية للسد، إن وجدت، فهي آثار ثانوية وليست من أهداف بناء السد.
فإثيوبيا لم تبني السد بغرض أن يستفيد منه السودان.
وثانيا كان على السودان أن يتفاوض في هذه الآثار السالبة مقابل مكتسبات (مشاركة في الإدارة، كهرباء بسعر قليل، تصميم يمكن من إنشاء مشاريع زراعية في السودان، تحمل أثيوبيا لتكاليف تأمين السودان من إنهيار السد ... الخ).
ولكن مسألة التهليل للسد نكاية في المصريين فهي إضاعة للفرصة التي كان من الممكن أن يستفيد منها السودان.
| Quote: وتم ملء السد ولم ينهار ولاهم يحزنون ... |
هذه هي المرحلة الأولى فقط من ملء السد، بحيرة السد سعتها 74 مليار متر مكعب
معدل سريان مياه النيل الأزرق حوالي 46 مليار متر مكعب سنوياً عند محطة الديم.
بمعنى أنه لو أغلقت أثيوبيا بوابات السد كلها ومنعت تدفق المياه تماما بعد السد فإنها تحتاج لعامين تقريباً لملء البحيرة.
أثيوبيا قالت أنها ستكمل ملء بحيرة السد خلال 7 سنوات.
لا توجد إحتمالات كبيرة لإنهيار السد عقب ملئه مباشرة.
ولكن يظل الإحتمال نوجود في أي وقت مستقبلي.
مخاطر الإنهيار وأثرها على السودان غير معروفة وهنالك إختلافات كبيرة جداً في تقديرها.
وقد يكون السد مهدد أمني للسودان.
الفكرة التي ذكرها منتصر قد تكون فكرة جيدة في تلافي مخاطر إنهيار السد وقد تكون هنالك أفكار أخرى ولكن من يتحمل تكاليف هذه الإحتياطات.
كان على السودان مفاوضة إثيوبيا في تحمل هذه التكاليف.
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Hafiz Bashir)
|
Quote: وثانيا كان على السودان أن يتفاوض في هذه الآثار السالبة مقابل مكتسبات (مشاركة في الإدارة، كهرباء بسعر قليل، تصميم يمكن من إنشاء مشاريع زراعية في السودان، تحمل أثيوبيا لتكاليف تأمين السودان من إنهيار السد ... الخ).
ولكن مسألة التهليل للسد نكاية في المصريين فهي إضاعة للفرصة التي كان من الممكن أن يستفيد منها السودان. |
يا مولانا حافظ ده مختصر الكلام الانا بقول فيهو
ومتفق معاك تماما في موضوع الاحتياطات للأسوا لكن زي ما انت شايف لا مشاريع قامت ولا خطط معلنة
خاتي نفسو درق ستو مصر
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: محمد البشرى الخضر)
|
Quote: يا هندسة لا قدر الله الخوف من انهيار السد ابدا ما كان من المرحلة الاولى اليادوب التخزين فيها اقل من 5 مليار ولا حتى للسعة الاصلية الـ 11 مليار
الخوف من الـ 74 كلها |
طيعا يا دفعة اي مبني في النهاية المخاوف موجودة ومشروعة
لكن طوال الفترة السابقة المماحكات السودانية والمصرية كان الموضوع هو المرحلة الاولي فقط
واثيوبيا ما اتكلمت عن 74
كان ممكن مصر والسودان يوافقوا علي المرحلة الاولي وتواصل مفاوضات في بقية المراحل ... في النهاية السد حيقوم وكل المتطلبات حايتم استيفاءها ...
ده سد تمويله 8 مليار دولار بناء وتشغيل ومساهمة فيهو الصين وايطاليا وقطر والسعودية وغيره من الدول بعضها معلن والبقية غير معلن لكن علي حسب كلم ممثلهم 27 بنك
رغم انو المصرين عملوا المستحيل مع مصادر التمويل عشان ما يتم تمويل السد
معقولة ياخ سد تكلفته 8 مليار دولار بناء وتشغيل وشغال ليهو قريب 10 سنوات لحد الان وشغالة فيهو شركات صينية وايطالية وفرنسية
لسة السودانيين ما عارفنو بينهار من المرحلة الاولي ولا ما بينهار
وين كانوا السنوات العشرة الفاتت
النتيجة الفعلية الاثيوبيين قالوا ليهم اضربوا راسكم بالحيط انتيهنا المرحلة الاولي
تعالوا نشوف عندكم شنو تاني
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: منتصر عبد الباسط)
|
Quote: قالو في سوداني شاف قشر موز قدامو فجأة
وعرف إنو لا محالة سيطأه فقال (الله يعنيا على دي الطيحة) |
طبعا هسي يا منتصر اصلا ما عندهم حل غير الطيحة
المشروع شغال ليهو 10 سنوات
الحاجة الوحيدة الحصلت خلال السنوات العشرة دي هي
سد بوووووط وما ادراك ما سد بوط دي قصة تانية
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
تحياتي ود القوز
الحقيقة تابعت كتاباتك كلها حول سد النهضة ... وما قدرت اصل لي طبيعة اعتراضك عليهو
التخوفات الانت بتتكلم عنها مفروض انها اصلا تم الاجابة عليها من الدراسات الاولية للسد واللي كلها مراحل وافق عليها السودان ومصر ولا ما تم التمويل ولا بدا البناء
السد ما بنوهو اثيوبيين ... دي شركات متخصصة من كل العالم بنت سد النهضة وغيره
الله يكضب الشينة لكن في ننفس الوقت مفروض ندعم الموضوع بيحلنا من اكبر مشكلتين عندنا الكهرباء والفيضان مع الطمي
ياخي نحن هسي المطرتين الفاتو ديل البلد غرقانة في شبر موية
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Gafar Bashir)
|
| Quote: لسة السودانيين ما عارفنو بينهار من المرحلة الاولي ولا ما بينهار |
ما حد ابدا اتكلم عن مخاوف انهيار السد من المرحلة الأولى, المخاوف موجودة طبعا لكن بعد اكتمال التبناء و التخزين الكامل
مشكلتنا زي ما قلت ليك في المرحلة الاولى دي هي انفراد اثيوبيا بالقرار دون توقيع اتفاق قانوني ملزم لها بأي شي, المرة دي عبوا الاربعة مليار و تلتمية براهم كدا دون اخطار للسودان, بكرة ح يقول ليك ليه نستنى سبعة سنة, نقفله و نعبيه في السنتين بتاعات مولانا , لا في اتفاقية ملزمة ليهم ولا حاجة
دا البخوف السودان فعليا أكثر من موضوع الانهيار, وزير الري قال مطمئن لسلامة السد رغم تحفظات بعض الجهات الهندسية على الموضوع, لكن الكل مجمع على خطورة انفراد اثيوبيا بالتشغيل دون حتى اخطار ودون اتفاق قانوني
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Hafiz Bashir)
|
كيف حالك يا مولانا حافظ
موضع انهيار السد دا موضوع ثانوي جداً ... لكن كل ما كان محيرني هو موقف السودان منذ البداية وحتى الآن. السودان بقى وسيط في مسألة بتهمه هو أكتر من الحبشة.
والله أنا كنت وما زلت محتار في ما يكتب خبراء السودان في شأن سد النهضة. والآن بدأ الجد ... وحنعرف بعد فوات الأوان ماذا يعني سد النهضة.
الواضح الواضح أن حرب المياه في منطقة النيل الشرقي هي بين الحبشة ومصر ونحن فرّاجة لأننا أصلاً ما عارفين دايرين شنو وماذا يمثل العاديك (النيل الأزرق) ولا أصلا مستفيدين من المياه دي ولا كان الحبش مستفيدين منها.
الحبوش جاتهم صحوة فجائية أو بإيعاز من فاعل خير... والمصريين صاحيين من زمن الفراعنة ... ولا أستبعد أن نضيع بين الحبوش والمصاروة. نحن راح لينا الدرب في الموية.
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Shinteer)
|
يا أبو الجعافر كل سنة وانت طيب وأضحى مبارك ..
عارف موضوع السد ده ذو شجون لأسباب كثيرة
قد يطول شرحها لكن الخطوط الرئيسية
إنه افتقد تماما للشفافية واتبني باللف والدوران
لجنة تنعقد وتنفرط ووراها لجنة دون التوصل لحلول
الحبش حتى الآن مانعنك انت كدولة بتتأثر بالسد
إنك تشارك في تشغيله وتتلقى معلومات مهمة
تخص فتح وغلق البوبات وكمية المياه الجاية
وهم المصدر الأساس لمعلومات مهمة زي دي ..
المانع شنو تتم الموافقة على وجود مناديب من دول المصب ..
انت لحدي هسه تحت رحمتهم يفتحوا وقت عايزين
ويغلقوا وقت عايزين يملكوك المعلومات وقت عايزين ..
في غياب تام للشفافية لاحظ سد الروصيرص ممكن يتأثر جدا
بعدم توفر معلومات تخص كمية المياه القادمة
وأوان فتح البوابات صيفا وشتاء ..
الآن سد بوط الترابي إنهار هل ده ما عنده علاقة
بسد النهضة ولو بصورة غير مباشرة ؟ ...
تابع سد بوط ده بيتعذى بالمياه من وين
وشوف لو زادت المياه خلف بحيرة سد الروصيرص
المحكومة بسعة محددة لو تم فتح بوابات سد النهضة ..
دون التزامن مع فتح بوابات سد الروصيرص
المياه الفائضة في بحيرة الروصيرص حتمش وين ؟ ..
هل حتقيف في الاعلى وما تنزل منحدرة بطرق أخرى ؟ ..
هل في امكانية ان تزيد المياه عن سعة بحيرة
سد الروصيرص وتنحدار مع الرافد البيعزي سد بوط
بزيادة تفوق سعة سد بوط الترابي فينهار أمامها
تابع الفرع الجاي من الهضبة الاثيوبية وبيغزي سد بوط ..
شوف ربما تصل لتحليلي انه بصورة غير مباشرة لسد النهضة دور ..
وربما انا مخطيء .......
سلمت يا حبيبنا
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
موافقة السودانيين فيها كثير من الخطل
والارتبط بشخصيات متحكمة في قرار الموافقة
رأيهم ما حكم سماوي ولا قرآن ربما كان خاطيء
البيدفع الثمن للأحكام العاطفية منو وقتها ؟ ..
المصريين حكومتهم وقعت بضغوط بعضها مرئيء
والآخر غامض لكن الايام حتكشف كل شيء
لامن السد ده يبقى للموطنين في تولاهم ..
للآن ولي بكره أنا شايف السودان حيتضرر جدا
وأكثر من مصر وبمراحل لانه الضرر المصري مؤقت
لكن ضررنا حيكون دائم والايام بيننا
وبجي هنا وبذكرك ..
مافي شيء يتعمل بالكذب واللف والدوران والتسويف
وعدم الشفافية ويكون في النهاية فيهو مصلحة ليك ..
السيسي بيبع لشعب مصر الوهم وأحلام زلوط
شنو يعني يجي يحلّف أبي أحمد بالصورة الغبية دي ..
وين الاتفاقات الملزمة للحبش بعدم الاضرار بدول المصب ..
ثم وين الاتفاقات التي تضمن لك امداد كهربائي رخيص
وقت الشتاء لان مياه النيل وقتها لن تكفي للتوربينات
الروصيرص سد بنعتمد عليهو بصورة جوهرية في الكهرباء
البديل شنو ؟ سد لا نملك حتى معلومات عنه
ناهيك عن المشاركة بلجان سودانية في تشغيله وإدارته
نقدر نتعتمد على صحة المعلومات منها ونثق فيها ..
البياكل بي يد غيره ما بشبع يا أبو الجعافر يا أخوي
والمالكه ما متل المُعار قالوا كده أهلنا زمان
ــــــــــــــــــــــــــــــــــــــــــــــــــــــــ
هذا مع تقديري واحترامي لآراء الجميع بالبوست
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Shinteer)
|
| Quote: الواضح الواضح أن حرب المياه في منطقة النيل الشرقي هي بين الحبشة ومصر ونحن فرّاجة لأننا أصلاً ما عارفين دايرين شنو وماذا يمثل العاديك (النيل الأزرق) ولا أصلا مستفيدين من المياه دي ولا كان الحبش مستفيدين منها. |
بالضبط يا شنتير
الموقف السوداني سياسي بامتياز
لكن حتي ده موقف ضبابي
مصر الان وعلي جميع القنوات الاعلامية
بتحارب اثيوبيا مستخدمة السودان
لانو كل الحجج الموضوعية بتاعتها كملت
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Gafar Bashir)
|
| Quote: وربما انا مخطيء ....... |
مش ربما بل مخطئ فعلا يا ود القوز لا علاقة بأي شكل من الاشكال لما حدث في انهيار سد بوط بسد النهضة سوى ما حاول و يحاول المصريون و قنواتهم و القنوات الداعمة ليهم الايحاء به
يمكن الرجوع لما كتبه الاستشاري المقيم في مشروع زيادة سعة سد بوط عن الاسباب المحتملة لما حدث
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
سلام يا شنتير
| Quote: ولا أستبعد أن نضيع بين الحبوش والمصاروة. نحن راح لينا الدرب في الموية. |
نحن رايح لينا الدرب من زمان
مشكلتنا إنو نحن فيما يتعلق بالنيل ما عندنا موقف مستقل
موقفنا بيعتمد على موقف مصر وموقفنا نحن من مصر
زمان مصر بنت السد العالي وقلنا مبروك للشقيقة مصر
وبعد سنين عرفنا إننا شربنا المقلب بدون مقابل.
هسه كمان جابت ليها مباركة للشقيقة أثيوبية
متين حنكتشف إننا شربنا مقلب تاني.
زمان أيام حرب الصرب مع البوسنة والهرسك
أحد الموظفين مشى يصرف المرتب لقاهو ناقص وسأل قالوا ليهو الحكومة خصمت من مرتبات العاملين في الدولة 10% كتبرع لليوسنة.
زعل شديد، فال للصراف أخصم 90% كتبرع مني للصرب عشان يطلع ميتين البوسنة.
نحن قاعدين نتعامل مع النيل بنفس طريقة تعامل الموظف دا مع الراتب.
حكومة عبود تبرعت بجزء من مصالحنا في النيل لحكومة لمصر
والأن نحن نتبرع ببقية مصالحنا في النيل لصالح أثيوبيا عشان يطلعوا ميتين المصريين.
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
طيب يا ود القوز الصور دي من قوقل زي ما قلت
دي بتوضح موقع بوط و موقع سد الروصيرص, تلاحظ المدينة اقرب للنيل الابيض من النيل الازرق, لكن المهم الجبل الفي النص المحاط بالمربع الاخضر, دا لو لاحظت للخط الازرق المحاذي للخور أو الوادي البغذ السد ح تلقاه جاي من الجبل فهو لا يتغذى بفرع من نهر النيل الازرق بل من مياه الامطار البتتجمع سنويا وتنحدر نحو النيل الابيض
من الجهة التانية و حسب ميلان و طبوغرافية الارض ينحدر من الجبل خيران أو وديان أخرى نحو النيل الأزرق
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: محمد البشرى الخضر)
|
يعني مهما فاضت بحيرة الروصيرص فالمياه لن تسيل عكس ميلان الارض الطبيعي نحو النيلين
فا تأثر بحيرة سد النهضة - وليس سد النهضة - على المنطقة ينحصر في زيادة متوسط الامطار السنوي بسبب التبخر من البحيرة ودا تأثير بعيد المدى, على الاقل حتى الآن لم تمتلئ البحيرة والزيادة في امطار السنة دي لا علاقة لها بها
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: جمال ود القوز)
|
حبيبنا جعفر .. اليوم تقرير محبط من وزارة الري
طبعا بالنسبة للناس خارج دائرة الخطر لا يمثل شيء
ولكن نحن سكان الجزر في الشمالية ولدينا مصالح داخل هذه الجزر
من نخيل وفواكه دعك من السكن وغيره
المهم عندنا يا الحبيب جعفر وقف الفيضان أنا من دواخلي احتفل وكأنني اثيوبي
وأنتظر اليوم الذي يتم فيه السيطرة على النيل .. لتعيش هانيء البال ويكون أهلك في أمان
كفانا أننا نعيش في المجهول كل ولا نعلم ماذا سيحدث في العام المقبل .. أخطر شيء بالنسبة للانسان ً
نفسيا عندنا لا يستطيع معرفة المعطيات التي سوف تحدث غداً
يؤثر نفسيا ومادياً واقتصادياً واجتماعيا .. ( ان يغرق منزلك وتاريخك وكل ذكرياتك )
==================================
حبيبنا جعفر ارجوك الحبيب قراءة هذا التقرير الصادر من وزارة الري اليوم
كيف يشعر أهلنا سكان الجزر ومن هم في الضفاف خاصة بعد عطبرة ( العطبراوي )
كيف ينام الشخص في البلد او في الغربة وأهل تحت التهديد
التقـــــــــــــــــــــــــــــــــرير :
((( أعلنت وزارة الري والموارد المائية في البيان اليومي للجنة الفيضان الجمعة ٧ اغسطس ارتفاع مناسيب المياه في جميع القطاعات عدا قطاع سنار الخرطوم الذي سيشهد استقراراً، حيث تجاوز منسوب المياه في الخرطوم منسوب الفيضان ب ٤ سنتميترات فيما سجلت محطة القياس في عطبرة ١٥.٧٨ سم وهو تجاوز لمنسوب الفيضان ب١٠ سنتميترات وهو المنسوب الذي تبدأ فيه المياه بالخروج من مجري النيل وتملأ المناطق المنخفضة حول النيل.
ودعت وزارة الري الجهات المختصة و المواطنين إتخاذ الحيطة والحذر حفاظاً على أرواحهم وممتلكاتهم وسوف تواصل الإدارة العامة متابعة موقف الفيضان.)))
===================
أؤيد اثيوبيا بكل قوة ..
شكرا الحبيب جعفر آسف للاطالة ..
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: علي عبدالوهاب عثمان)
|
الموقف القانوني معني به جميع اطراف السد وهي الدول الثلاث اضافة الي الممولين والشركات العاملة والهيئات الدولية ، ولم نري اي من هذه الاطراف تدخل الصراع في ان هنالك مشكلة قانونية لان السد اصلا اكتمل بناءه ، ولو في اي مشكلة قانونية مفروض انها وقفت بناء السد خلال السنوات العشر الماضية
الموقف الفني الهندسي ينطبق عليه ما ينطبق علي الموقف القانوني ان اثيوبيا والشركات العاملة قدمت كل ما لديها من مخططات فنية لجميع الاطراف وتمت الموافقة عليها.
يبقي الموضوع الاخير وهو الموضوع المطلبي متضمن
احتياطات انهيار السد (جمال )
مشاركة اثيوبيا في ادارة تشغيل السد والانذار المبكر (محمد البشري)
مشاريع السودان المبنية علي السد (مولانا حافظ وشنتير ومنتصر)
تقدير منافع السد ( علي عبدالوهاب)
دي تقريبا الصورة فيما يخص سد النهضة.
اذا افترضنا جدلاً ان حديث الاخ محمد البشري صحيح والمشكلة هي في مشاركة اثيوبيا في ادارة السد،
حيكون من جهة تانية هو مسعي مصري وليس سوداني وهو يعني ببساطة عودة تحكم مصر في ادارة جميع السدود علي النيل واحكام سيطرتها من المنبع الي المصب،
وده يا دفعة كلام مرفوض ومفروض يكون مرفوض من السودان قبل اثيوبيا عشان كدة بقول في النهاية الموضوع سياسي وليس حقوقي، والدليل انو الان شنو علاقة اثيوبيا والسودام بادارة السد العالي؟
عشان هي تطالب بادارة سد النهضة؟ بل وتدير اصلا السدود السودانية من الري المصري ... باي حق
موضوع علاقتنا مع اثيوبيا مفروض يكون منفصل وغير مرتبط بالموقف المصري لانو نحن قضيتنا عادلة اذا دي مطالبنا نحن في الداون ستريم ما مفروض نضيعها مع مصر
بالنسبة لاحتياطات انهيار السد والمشاريع السودانية القائمة علي السد ده كلو خلل سوداني ، يعني انا في رايي كان مفروض الحبر الاريق كلو علي احتمالات انهيار السد كان يكون في احتياطات السودان لانهيار السد ، والاحتياطات مفروض تكون مشاريع تنموية كمثال اللي ذكره اخونا منتصر
الكلام ده كان ممكن يكون اكتمل اذا مافي طور الاكمال حالياً
لكن المحصلة صفر ... قد تكون في مشاريع موجودة عند الوزارة لكن علي ارض الواقع مافي غير سد بوط المنهار
ناسنا شغالين بيدرسوا في السد عشرة سنوات اللي هو ده اصلا عملتو وقدمتو اثيوبيا وشركاتها
المنافع هي اثنين الكهرباء والسيطرة علي الفيضانات
دي كان مفروض منها يتحرك الجانب السوداني في الوقوف مع السد ويقدر يحصل علي العايزو من البداية
في النهاية محصلة الانا شايفو
ضيعنا فرص كان ممكن نحصل فيها علي شروط كتيرة افضل
وونجز مشاريع ضخمة مبنية علي السد
بتارجح موقفنا وموازنات المحور ومصر
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: علي عبدالوهاب عثمان)
|
Quote: أؤيد اثيوبيا بكل قوة ..
|
حبيبنا علي
نحن بنغرق في شبر موية
مافي فيضان الا وكان هلاك في الارواح والممتلكات
وكهربتنا قاطعة من ولدونا لحد الان ما انصلح حالها
ياخ هسي لو اتبني السد وقالوا لينا هاكم دي كهرباء للسودان كلو
تجي تلقي مافي اعمة زاتو عشان توصل الكهرباء
والكيابل اتسرقت
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: Gafar Bashir)
|
حبيبنا جعفر .. تحياتي
خبر محبط جداً اليوم منسوب النيل بعد عطبرة اعلى من فيضان عام 1988 بـ 12 سم
واكبر فيضان في تاريخ النيل الحديث كان عام 88
نحن بعد النيل الأزرق ( العطبراوي )
كمان الجزيرة التي اتحدث عنها ( ارتقاشا) هي بلد الوالي بروف آمال
في ابراء الذمة كتبت ( ورثة الوالد ساقية 28 في جزيرة ارتقاشا )
يعني الموضوع كارثة ..
الله يهون ..
=======================
الخبر كما ورد :
ارتفاع في مناسيب النيل الأزرق تبعاً
لوجود سحب ماطرة ونزول امطار في الهضبة الإثيوبية خلال اليومين الماضيين،
واكدت في بيانها اليومي، اليوم “السبت”، ان محطة الخرطوم ظلت
مستقرة فوق منسوب الفيضان (16.50متر) بـ 4 سنتيمترات لمدة يومين على التوالي،
بينما سجلت محطة عطبرة 16.02 متر،
وهو أعلى من منسوب الفيضان (15.78م) ب 24 سم، ومن منسوب 1988 ب 12 سم.
============
تحياتي الحبيب جعفر .. جميل البوست نعبر عن مخاوفنا
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: علي عبدالوهاب عثمان)
|
Quote: اذا افترضنا جدلاً ان حديث الاخ محمد البشري صحيح والمشكلة هي في مشاركة اثيوبيا في ادارة السد،
حيكون من جهة تانية هو مسعي مصري وليس سوداني وهو يعني ببساطة عودة تحكم مصر في ادارة جميع السدود علي النيل واحكام سيطرتها من المنبع الي المصب،
وده يا دفعة كلام مرفوض ومفروض يكون مرفوض من السودان قبل اثيوبيا عشان كدة بقول في النهاية الموضوع سياسي وليس حقوقي، والدليل انو الان شنو علاقة اثيوبيا والسودام بادارة السد العالي؟
عشان هي تطالب بادارة سد النهضة؟ بل وتدير اصلا السدود السودانية من الري المصري ... باي حق |
يا جعفر ما قصدت المشاركة في ادارة و تشغيل السد بالمعنى الحرفي - مع انه في اقاويل انه اثيوبيا في بداية الفكرة عرضت مشاركة الدولتين في التمويل و الاسثمار في السد!
عموما كلامك سليم ليس من حق احد فرض المشاركة في ادارة مشروع خاص باثيوبيا ما قصدته التنسيق ودا حق يكفله القانون دولي للدول المتشاركة في الأنهار, وبما ان دولتي الداون ستريم يتأثران بتشغيل سدود اعلى النهر يبقى لابد من التنسيق على الاقل, والتنسيق دا اثيوبيا ما رافضاه فنيا رافضة ان تصاحبه اتفاقية قانونية ملزمة يستند عليها الدولتان لو نشأ نزاع مستقبلي او تكون مبرر لعمل بالقوة حال خرق اثيوبيا لها
وفي دي لاثيوبيا نظرة بعيدة, السد بالنسبة ليهم بداية مشروع سلسلة سدود لتوليد الطاقة على النهر وما يحدث فيه ممكن تقول زي بايلوت لبقية المشاريع لذا اثيوبيا لا تريد ان ينتج عنه اي تقييد قانوني لها خاصة وانها تدرك ان الدولتين ح يستفيدوا من خطأ اعلان المبادئ 2015 ولن يكرروه بتوقيع اتفاق شبيه يعطي اثيوبيا المشروعية.
ارجو يا هندسة تغليب الراي الفني في تقييمك للمشروع لا السياسي و خاصة السياسي المعادي لمصر, فنحن في السودان مصلحتنا هي الاعلى حتى على الاحن التاريخية
| |
|
|
|
|
|
|
|
|
|
Re: مبروك للاشقاء في اثيوبيا تعبئة سد النهضة (Re: محمد البشرى الخضر)
|
أرجع لما هو مخزون في صنقوري دا من سنين: "ليس السوادِنُ عند اللهِ من أحدِ" (السوادن وليس السودان). لا يد لنا في أي شيء وفرحانين أن مصر هزمت الحبشة وأن الحبشة هزمت مصر في لُعبة نحن أكبر المتأثرين بها، وهي من صميم
حياتنا ومماتنا، وليس لنا حتى صفة اعتبارية في هذا المسألة المصيرية. وكل خبرائنا المعتبرين عارفين أن هذا السد قائم على أرض سودانية ... ولن تتضرر منه الحبشة نهائياً، وحتى لو انكسر السد حيكونوا ضحاياه سودانيين فقط.
شيء محيّر أن السودان يكون وسيط طيلة سنوات المفاوضات وما بعدها، ودكاترة وخبراء سودانيين يتكلمون كأنهم حبوش أو مصاروة. السودان ما في.
هل توجد دولة a state اسمها السودان؟ دولة تحمل معاني الدولة المتعارف عليها. لا توجد إطلاقاً ... وهذا رأيي منذ أن غادرت السودان وكل يوم يظهر أننا منزلقين بسرعة إلى مستنقع اللادولة، وهو المستنقع الخليق بنا.
خلونا ننقسم لفريقين؛ فريق حبشي (لأحباب الحبش) وفريق مصري (لأحباب "الشغيغة" الأزلية مصر المحروسة والمؤمّنة بأهل الله). وهو دا الحاصل الآن. لكن ما كل الناس منتمين لأي من الفريقين.
يلّا نعمل فريقين ونشجّع اللعبة الحلوة، مصر عملت والحبشة عملت، ومبروك للحبشة ومبروك لمصر ... وشوتي يا مصر وشوتي يا الحبشة. وكل أهدافهم داخلة في مرمى السودان المفتوح أربعة وعشرين ضلفة.
شخصياً لا أنتمي لأيٍّ من الفريقين لكن بتفرّج. وبلا سودان بلا أبو القدح. خليهم يلعبوا بينا رَمُل، وشوف الخيْرة يا رمّالي ... سودان كاتبنّو عند عمّالي.
| |
|
|
|
|
|
|
| |
جمال ود القوز
منتصر عبد الباسط
محمد البشرى الخضر
Hafiz Bashir
Shinteer
علي عبدالوهاب عثمان
فيس بوك
تويتر
انستقرام
يوتيوب
بنتيريست