(adsbygoogle = window.adsbygoogle || []).push({}); تعرفوا نحن ناس الليل ملوك البهجة وأصحاب اللمة الحلوة والرصة المأسسه بالجكس الحلو ورقاص وبنموت في رقيص الرقبه مع العلم بنعرف نرقص التانجو زي أولاد جون وناس الارجنتين بنحب ال seemed to be twisting أو زي ما بقولو ا ناس الحقيبة (زاحم كتفو كفلو ماج ديسو الوفرعمعم ديسو درعو وفى بعضه انضفرحاكى الغيم تنقل ياغالى النفروقول للوزه غورى وفى عينيك ضفر) دا كلام الراحل ود الضي طيب الله ثراها تعرفوا زمان حبوبتي روزفين بتقول عن اللي ما بعرفوا يرقصوا كان البت ما اللي ما بتعرف ترقص دي ما ح تستمتع بأنوثتتا وكان راجل أخرق ساي أخير منو حمار اللبن من هنا جاني خوف وعشان ما أبقي حمار لبن أتعلمت الرقيص بكل أنواع الموسيقي من الجاز الي البريك دانس المهم الليله في زول قديم عمنا سوداني نعشق السهر معهو ونحن ننادي عليهو باسم سيدا وهو من الناس اللي جاوا الدنيا في بداية الاربعنييات غرق في قارة أسيا المسحورة دي قاعد بعد خدم جهاز البريد الاسترالي أكثر ربع قرن من الزمان بعدها مشي المعاش قعد شوية في مانيلا وبعدها بانكوك عاصمة أنعتاق الجسد ومنها جا هنا كولالمبور جنة الملايو وخضرة أسيا الاستوائية المهم كمان في جيل من الملايوسودانيين عايشين معنا هناحكاية كدا زي الشكولاته باللبن لا سمرة طاغية ولا صفار فاتح وكمان تقاطيع دقيقة كدا حاجة تفرح بيها رقيقيين جدا لدرجة الواحدة دموعا قريبه طبعا دوما صراع الثقافتين بكون حاضر وسيدا زول صياد قدير عارف وجعنا وين قام عزم لينا مجموعة الهجين السوداني الملاوي يا ربي من لغتنا الدارجية عندهن قريب عربي جوبا بس بي هنه تدهشك وكمان أستدرك لذيذ لبعض رقيق القول لنساء السودان متعهن ربي بكل خير تعرفوا في هنا حاجة بالجد منتهي الروعة هي أنو البنات ديل عندهن أعتقاد في رقيص الرقبه دا رقيص مميز جدا وكمان فصلن لهين فستاتين حقت رقيص و خاصة بالرقص القديم داك يا أبوحسين بتاع قطع الرحط أو كما يحلو لي تسميته جكسا في خط سته وكمان من القرمصيص الاصلي يا ربي هنا كانت دهشتي وأنبهاري وكمان لما يرقص في أغاني البنات خاصة أغنية عاشة الجبل (واي أنا وتعالي أنا ) بتحصل ليك حاجة من البهجة الخرافية والاستسلام الكامل لمباهج السهرة والله يا جماعة كان سمعتو البنات ديل بغنوا يا قسيم ريدي تعالي ما قلبك بيقيف وبتبقي زي درويش بترجم تعرفوا الناس القلوب الضعيفة ما تمشي سهرات زي دي ربي عالم أنو أنا بعد السهرة دي راقد يومين كاملات في البيت لكين ما كانت بهجة سنين وعمر جديد لي ! يا طرب اللحظة يا عصارة الابتهاج ياميلاد الفرح الرهيب عسي أن تكون كل الليالي زيها امين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة