كيف يمكن ان يتحول المغترب الى مُستذئب في فد مؤتمر

مرحبا Guest
اخر زيارك لك: 04-19-2024, 08:40 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2020-2023م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
03-03-2021, 12:32 PM

DKEEN
<aDKEEN
تاريخ التسجيل: 11-30-2002
مجموع المشاركات: 6772

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
كيف يمكن ان يتحول المغترب الى مُستذئب في فد مؤتمر

    11:32 AM March, 03 2021

    سودانيز اون لاين
    DKEEN-
    مكتبتى
    رابط مختصر



    "اصلا لاينبغي لجهاز شؤون المغتربين ان يتملك أو يؤسس شركات او مشاريع أو اي بنوك أو غيرو لانو دي ماشغلتو..هنالك جهات في الدولة مناط بها هذه الاعمال، وعلى الجهاز اذا اراد خدمة المغترب في إحتياجاته المتعددة، ان يبذل المساعي الحميدة لدى تلك الجهات عشان تتعمل للمغترب، واذا كان ماسبق ذكره من ضمن اهداف جهاز شؤون المغتربين في نظامه الاساسي او قرار تكوين الجهاز ، فيجب ان يُعدل."
    نور الهدى الجيلاني- محامي واستاذ مدراس ابتدائية- دوكة

    ماقدرتا افهم كيف تسنى للاستاذ المحترم مكين حامد تيراب ان يعلن ان قرارات مؤتمره الصحفي الاخير 2 مارس 2021 على انها حوافز؟! لانو انا ماقدرتا افهم وين الحافز فيما ذُكر..
    كلمة حافز دي حسب التعريف اللغوي حافِزٍ : الباعِثُ، الدَّافِعُ الَّذِي يَدْفَعُ الإِنْسانَ وَيَحُثُّهُ على القِيامِ بِعَمَلٍ مَّا
    • حفَز الشَّيءَ :دفعه من خلفه بالسَّوق أو غيره
    بعد سماع مؤتمر تحفيز المغترب والمبذول الان في اليوتيوب، شعرت بي قلق في الحقيقة اكتر من ان اشعر بدافع يحثنى على القيام بعمل ما (حسب التعريف اللغوي بتاع كلمة "حافز")..
    قلق اصلا ما كان موجود تجاه جهاز المغتربين ( الجهاز) قبل المؤتمر الاخير، لانو افعال الجهاز في الفترة التي تلت تولي الاستاذ مكين تيراب كانت جيدة في اعتقادي، لانو ازاح عن كاهل المغترب هم كبير، وهو حرية الحركة والسفر المكفولة بموجب الدستور والتي كانت منتهكة ايام الانقاذ ومقيدة بما يُسمى "الاستيفاء" وهى ان تستوفي امور محددة، اهمها دفع ضرائب، ورسوم زكاة لـ راتبك الذي لم يحل عليه نص الشهر خليك من يحل عليه الحول، ورسوم تسمى رسوم خدمات، تحديداً رسوم الخدمات دي انا كنت بحس بيها ( ولا ازال) مجرد منهبة، لانو ما قدرتا القى تبرير كيف نقوم بدفع الضرائب التي هى في الاصل و حسب العلوم المالية هى رسوم لخدمات تقدمها الدولة ( طرق، كباري، مرافق خدمية وتعليمية وصحية وغيرو) وتاني نجي ندفع رسوم خدمات تحت مسمى خدمات ؟!!
    المهم اراحنا الاستاذ/ مكين حامد تيراب من مناهب الانقاذ (وكتر الله خيروا ) على قول اغنية الفنان ابو بكر سالم.
    اها بعد المؤتمر ده والمفروض انو مؤتمر عشان يحفزني كمغترب، عشان اقوم مُحفزاً واحول عبر القنوات الرسمية، اصابني القلق...لانو استشعرت انو الجهاز بدا يفكر بي طريقة موظفي جهاز شؤون المغتربين زمن الانقاذ.. استشعاري هذا لانو عنوان المؤتمر هو حوافز المغتربين، وتوقعت حوافز واضحة ومباشرة، يفهمها المغترب البسيط، والمغترب المُعقد، والمغترب الذي لاتهمه اصلا حوافز ،لانه لن يعود الا بداخل تابوت ..بينما انا اتوقع ذلك وفرحان، اذا بالحاجات االقالا استاذ مكين دي ليست حوافز كما توقعتها مع كثيرين وانما اشياء مُعقدة ومعادلات محسابية طردية وشركات وبنوك وخدمات مبنية على اتفاقات مستقبليه مع جهات ذات علاقة وجهات ذات صلة وجهات الدنيا الاربعة.
    في الحقيقة نحنا كمغتربين، لم نكن نحتاج الى حوافز من اي جهة لكي نحول..واصلا التحويلات بتاعة المغتربين كانت قد بلغت مبلغاً مقدرا حتى قبل اعلان حوافز الاستاذ مكين.. وكانت ماشة، مُحفزها الوحيد الوطنية، وانو السعر في الاسود والابيض بقى واحد..
    يعني جهاز شؤون المغتربين اصلا تأخر عن الحدث، جاء يحث ناس اصلاً تم حثهم سلفاً. ناس محثوثين وفي حالة نفرة و ليهم خمسة يوم مدورين في التحويلات الرسمية وبلا حوافز..
    يعني جاي متاخر و ما قدمتا لينا شي ممكن انا شخصيا اعتبرو حافز، وفي نفس الوكت اصبتنا بالقلق لانو قصة تعمل بنك دي ذكرتني حركات نعمل شركة المهاجر وشركة المهاجز لموزين وشركة المهاجر للصرافة ونعمل جامعة المغترب والامين العام يكون رئيس مجلس ادارتها؟!!
    ده قلق جديد لانو اخشى من دمغة بنك المغترب، الدمغات التي سلفت ابتداءا من شريان الشمال والجريح والمجهود الحربي والقناة الفضائية ..الخ ...كتيرة وكانت مثيرة للقلق ومزعجة..
    تحديدا الحوافز ادناه عندي عليها تعليقات غير مريحة:
    البند (1) الغاء كل المساهمات والرسوم المفروض على المغتربين وايجاد تسوية للمتاخرات والبند (2) الاستعاضة عنها برسم موحد (100 دولار و50 دولار) يدفع مرة كل سنة:
    ماقدرت افهم وين الجديد في (1) و(2) اعلاه، لانو التسويات حقت المتاخرات دي اصلا هو القاعد يحصل كل سنة للمغترب، بيأجل جزء ويدفع جزء ودي تعتبر تسوية... كما ان السيد مكين لم يحدد طريقة التسوية في لائحة واضحة او عبر آلية مكتوبة تكون مرجعية، مما قد يجعلها رهن مزاج الموظف المعني. والمغتربين اصلا مشكلتهم انو بكونوا عرضة لعسف موظفي جهاز شؤون المغتربين وحسب رحمة الموظف ودرجة قرابته وقوة الواسطة.
    في (2) الاستعاضة عنها برسم موحد القالا الاستاذ مكين، دي ياها ذاتا الكانت اصلا حاصلة زمن الانقاذ، بعدين كلمة "الاستعاضة" دي تلغي مسالة "الغاء كل المساهمات والرسوم.." المذكورة في البند (1). اذا انت الغيت رسوم واستعضا عنها برسوم اخرى، فماعارف اين الالغاء هنا؟!! لغيت رسوم وجبت رسوم؟؟ كان تقول تعديل رسوم المساهمة لتصبح كذا وكذا..كلمة "الغاء" دي مُربكة وحتخلي كثير من الناس يتمسكو بي العبارة وانو رسموهم ملغية..
    1- اقرار حوافز تشجيعية للتحويل المصرفي :
    أ‌- اعفاء جمركي للامتعة الشخصية للمغترب عند العودة النهائية
    ده اصلا كان الحاصل زمن الانقاذ. فما في شي جديد، بعدين لم يتم تعريف كلمة "الامتعة الشخصية" مما يجعل ايضا المسالة دي محل خلاف بين المغترب وبين موظفي الجمارك. يعني قرار غير انو اصلا موجود فهو غير محفز.
    ب‌- اعفاء جمركي لمعدات المهنة يتناسب طرديا مع حجم التحويل.
    ماقدرتا افهم ماذا تعني معدات المهنة دي، يعني لو شغال سواق تركتر او بص فهل دي معدة مهنة؟ لو شغال راعي هل ممكن ادخل تنكر الموية او الابل ؟؟
    عموما وباي شكل تم فيه تعريف معدات المهنة، هل ده شي ممكن نعتبرو محفز؟؟ اغلب العندهم معدات مهنة ما برجعوا السودان نهائي لانهم مرغوبين في الخارج والبزنس ماشي ..وفي النوع التاني المابرجع نهائي الا بعد اولادوا يشيلوه ويصرفو عليهو..فبرجع عادي بدون معدات ( اطباء الاسنان مثلا).
    البند (كم كده ما متذكر) إنشاء بنك المغترب:
    هل ده حافز بالنسبة للمغترب مثلا؟؟
    نسوي بيهو شنو البنك..لو عايزين نبني بنحول قروش عبر البنوك الاخرى وبنبي..لو عايزين نزرع عندنا البنك الزراعي ..البنوك ماشوية .. وكلها تقدم خدمات مالية لاغراض تمويل وتربُح .. والمغتربين ماحكيون عندهم وظائف في بنك المغترب ده راجياهم.. وماعازين بعد شوية تدخلو لينا دمغة بنك المغترب مع الرسوم..وماعارف قرار بالزام المغتربين بالتحويل عبر بنك المغترب..
    فكرة البنك دي فكرة بصراحة فكرة لئيمة وحافز ليكم مالينا ..ومابلزمني انا شخصياً..
    وذكرتني بي الشركات العملا الجهاز ايام الانقاذ شركة المهاجر والتي احتكرت التربتك واشياء اخرى..وجامعة المغتربين وكل تلك الشركات كان رئيس مجلس ادارتها مدير جهاز المغتربين..
    كل الخدمات المفروض يقدما بنك المغترب دي الاولى انو يتم توجيه البنوك الحالية بالقيام بها..شنو يعني حشر اسم المغتربين في كل شي ..بنك المغترب، جامعة المغترب، شركة المهاجر المغترب، بعد شوية بوليس المغتربين، جمارك المغتربين، ونيابة المغتربين، ومحاكم المغتربين، واعتصام المغتربين، وجيش المغتربين، ودعم سريع المغتربين، وحركات كفاح المغتربين المسلح، ومسار وسط المغتربين، ومقابر المغتربين الجماعية؟!!
    ومن هسي انا لن اودع ولا ريال في هذا البنك ان قُدر له وقام... وماتعملوا لينا عبء إداري ساي ..امسح وحلحل واكنس الشركات الموجودة اصلا ...الاولى ان يتم حل الشركات والاجهزة التي قامت باسم الجهاز وتؤول اصولها للمالية وان يتم تقديم حوافز جادة موش حوافز يستفيد منها موظفي الجهاز في السودان.
    البند (7) تُمنح ميزات تفضيليلة للمهاجرين في قانون الاستثمار:
    ماهى هذه الميزات؟؟ ماتقدر تعرف..
    غالبا هذه الميزات نرجاها في موتمر تاني اسمو مؤتمر الاعلان عن الميزات التفضيلية للمهاجرين .. (ده ياهو البسموهو الفقهاء بيع السمك في الماء والطير في الهواء)
    البند (8) معالجة بعض مشروعات متعثرة الاستثمارية والسكنية التي طرحت سابقا للمغتربين و البند رقم (9) العمل على وجود سياسات ثابتة لقضايا الطلاب الشهادات الاجنبية في الجامعات السودانية:
    انا بس عايز اعرف كيف يتحول الواجب الى حافز؟؟
    اذا كان الجهاز عرض مشاريع للمغتربين وتعثرت، فعلى الجهاز حلحلة هذه المشاكل..لانو ده شغل الجهاز ولانو دي مشاريع الجهاز ..الجهاز من اعلن عنها وطرحها ..
    كذلك مشاكل الطلاب .. شنو يعني " وجود سياسات " التي وردت في البند، هل السياسات المتذبذبة الغير ثابتة هى الاصل والسياسات الثابتة هى التحفيز؟؟
    بتحسنو لي المغترب مثلا لامن تقدموا ليهو سياسة ثابتة تجاه قضايا الشهادات العربية والاجنبية في الجامعات السودانية؟؟
    بعدين قبول ابناءنا في الجامعات السودانية بنفس رسوم ابناءنا السودانين في الداخل ده حق قديم ومطالب قديمة فلاتحفزونا بي حقوقنا..
    التحفيز بكون بي شي غير الحقوق..
    اعتقد انو دي من اساسيات انشطة الجهاز وسبب قيام الجهاز و لايمكن ان تُقدم لينا كحوافز..
    يعني فرضا ما كانت في حوافز، فهل البندين دي ماكانوا مثلا حيكونوا من ضمن مهام الجهاز؟؟
    طيب مافائدة هذا الجهاز ؟؟ جباية بس يعني؟؟
    الاخ مكين... ماممكن تقوم تقدم لينا واجب الجهاز في شكل حافز.. ده ما كلام مقبول..
    رواتب ناس الجهاز دي عشان يحلحلو اشكالات المغتربين..لانها من ضمن شؤون المغتربين والجهاز اسمو جهاز شؤون المغتربين
    شي مُقلق لامن نفهم من المؤتمر ده انو انتو ياداب حتبدو تحللو مشاكل مشاريعكم ضمن هذه الحزمة التحفيزية ؟؟
    البند (15) اصدار قانون خاص جهاز ضمان اجتماعي ندفع فيهو بالعملة الحرة..
    بلاي عليك النبي دي ده هسي تحفيز...ليه يعني ندفع فيهو بالعملة الحرة؟؟
    القاعدين في السودان ديل بدفعوا الضمان بالعملة الحرة؟؟
    انتا تدعوني لتحويل اموالي بالعملة الحرة وتسلمني ليها سوداني في السودان..ولامن اجي ادفع اشتراكات الضمان الاجتماعي الفي السودان ادفع الاشتراكات بالعملة الحرة؟؟
    انا الزول البحول ليك عملة حرة تجبرني على استلام مقابل عملتي الحرة بالعملة المحلية بينما تحرمني من ان اشترك في جهاز الضمان بي العملة المحلية والسوداني القاعد في السودان الما قاعد يورد ليك عملة حرة تقبل منو بالعملة المحلية؟؟
    تخيلو بس جهاز ضمان للمغتربين..الموظفين فيهو ليسوا من المغتربين..يورد فيهو المغتربين اشتراكاتهم بالعملة الحرة ..ورئيس مجلس ادراتو جهاز المغتربين..مامعروف رواتب الموظفين والحوافز فيهو بالعملة الحرة ولا السوداني...
    عايز تخدمهم اوجد ليهم صيغة في جهاز التامين والضمان الاجتماعي الموجود حالياً بتحويلات رسمية وباشتراكات تدفع بالسوداني زيهم وذي اي سوداني..لان المغتربين اولا سودانيين ذي ناس الداخل وتانيا لانهم بساهموا في اقتصاد البلد بصورة فعاله برفدها بالعملة الحرة عبر التحويلات..
    الانتا قتو في البند (15) ده ماتحفيز..ده اسمو استغلال..وانا شخصيا ده طرفي من اي جهاز ضمان بهذه الالية المعيبة التي تفرق بين سوداني واخر...
    ماتعملوا لينا شركات جديدة وعبء اداري وموظفين و مجلس ادارة ودمغات واشتراكات وقصص على حساب المغترب..
    ده ماحافز ده واجب يامكين.
    البند (21) بتاع الوحدات الزراعية وهو مهم في اعتقادي، لانو ممكن يكون بداية مفسدة كبيرة..
    بالذات لانو جا غامض بدون اسعار هذ الوحدات وهل بالسوداني ولا بالعملة الحرة وهل اجهزة الطاقة الشمسية دي حتجي من عندنا ولا حتوفرا الدولة؟!
    اصلا الاراضي الزراعية متاحة لكل السودانيين جوا وبره السودان... فاذا لم تكن الوحدات مجانية ..فبلاي ما تتجارو بينا...
    اي شي ما مجاني ياهو داك السوق الحر ..سوق الله اكبر وسوق الاقتصاد المفتوح..لا نرضى ان يتم احتكار اراضي زراعية بي اسم المغتربين، عشان الجهاز ده مايقعد يكاوش بي اسم المغترب المساحات الزراعية المتوفرة..بعداك ياجا مغترب ياما جا ..وبعد شوية ولاغراض عدم ترك الوحدة بدون منفعة يقوموا يفكوها لي زول تاني او موظف او شركة ..وتبقة ذي قصص الاموال والمناهب التي اكلتها المسميات الوهمية للشركات والمنظمات زمن الانقاذ..
    خدمة المغترب في الجانب الزراعي ده بكون اما :
    1- بتخصيص وحدة زراعية له مجاناً مقابل مبالغ تحويل محددة خلال العام او خلال اعوام اغترابه ( وده الاصح والمحفزات الحقيقية البتنفع المغترب وبتنفع اقتصاد السودان)
    2- او باعفاء جمركي لمعدات الطاقة الشمسية او طاقة الرياح ( ودي برضو بتقلل الضغط على الكهرباء وبتشجع استخدام طاقة بديلة نضيفة)
    3- او انو الجهاز يخاطب وزارة المالية ويوفر معدات الطاقة الشمسية او طاقة الرياح عشان تتسلم للمغترب مجانا مقابل مبالغ تحويل محددة خلال العام او خلال اعوام اغترابه.
    اصلا لاينبغي لجهاز شؤون المغتربين ان يتملك او يؤسس شركات او مشاريع او اي بنوك او غيرو لانو دي ماشغلتو..هنالك جهات فيالدولة مناط بها هذه الاعمال وعلى الجهاز اذا اراد خدمة المغترب ان يبذل المساعي الحميدة عشان تتعمل للمغترب.
    ا






                  

03-03-2021, 12:34 PM

muntasir

تاريخ التسجيل: 11-07-2003
مجموع المشاركات: 7538

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: كيف يمكن ان يتحول المغترب الى مُستذئب في ف (Re: DKEEN)

    حمدلله على السلامة يا دكين
                  

03-03-2021, 01:33 PM

محمد محمد قاضي
<aمحمد محمد قاضي
تاريخ التسجيل: 12-23-2014
مجموع المشاركات: 1603

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: كيف يمكن ان يتحول المغترب الى مُستذئب في ف (Re: DKEEN)

    سلامات آبادول حمدا لله علي السلامة
    Quote: اصلا لاينبغي لجهاز شؤون المغتربين ان يتملك او يؤسس
    شركات او مشاريع او اي بنوك او غيرو لانو دي ماشغلتو..هنالك جهات
    فيالدولة مناط بها هذه الاعمال وعلى الجهاز اذا اراد خدمة المغترب ان
    يبذل المساعي الحميدة عشان تتعمل للمغترب.

    أعمال ومهام الجهاز أصلا بتقوم بيها جهات خدمية تانية
    فالأولي هي المطالبة بإلغاء هذا الجهاز جملة وتفصيل
    جهاز المغتربين جهاز سيئ السمعة ووكر فساد مقنن.
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de