شماسه ولكن المكان : موقف مواصلات الاستادالخرطوم الزمان : قبل كم يوم كدا التوقيت : وقت الذروة عصرا #المشهد : زحمه مبالغه و مواصلات مافي و كل ما تجي حافله الناس تجري عليها و تملاها قبل ما تقيف في شماشه بياكلو بقايا طعام في كيس نايلون خاتنو في الواطه جنب الطين و بتقاسموا مع الذباب بكل سرور و هم بضحكو .. جات حافله الناس جرت عليها الكمساري حدد الخط الراجع بيهو فجأة واحد من الشماشة ديل قام جاري و دخل بشباك الحافله و قعد في مقعد الناس استغربوا في #مواطن قال دي حركه يلفتنا بيها عشان زميلو ينشل امسكو امسكو .. #السواق شاف المنظر بالمرايا بغضب قال للكمساري امسك الكلب دا نزلوا بسرعة مابمشى معاى خطوة .. #الكمساري جا بالشباك و مسك #الشماشي من رقبتو و الناس بتشجع 💪💪 فيهو تسمع واحد بقول #كفتو كفتو 😁 و واحد بقول فتشو فتشو .. ما يكون سرق حاجه و عايز يزوغ نص #الركاب #الشماشي بقي يدافع عن نفسوا عضه #الكمساري في يدو #والمشكله كبرت جيت و معاي كم نفر كدا فكينا #الاشتباك بينهم في شاب سأل الشماشي انت ماشي وين ؟ #الشماشي قال ليهو : انا ما ماشي #انا حجزته للبت ديك #عميانه ما قادره تركب و واقفه من قبيل .. دا كلامو زي ما هو قالو و اشر لفتاه في مقتبل العمر تقف في الظل ممسكه #بعصاه مخططه بالاحمر و الابيض و ساد صمت رهيب ..للحظات مافي زول اتكلم #حسينا نحن المثقفاتية كلنا الفى الموقف بالحرج .. #تافهين حقيقي و العظم احساسنا بالتفاهة انو في #شماشي تاني مشي للبت و قال ليها حجزنا ليك مسك يدها و مشي بيها علي الحافله البت الكفيفه كانت مبتسمه و تبدو سعيده بالنسبة لي كانت تبدو كاي بت مبهورة بمساعدة راقية .. الحصل انو نحن كلنا المفتحين شفنا الشماشي بعيونا و اعتبرناهو مجرم وعميت بصايرنا عن شوف الانسان الجواهو .. وهي لانها كفيفه شافتو بقلبها لذلك كانت قادرة تشوف الإنسان الجواهو .. كنا في موقف المواصلات مئات البشر و كان هناك انسان واحد هو الشماشي.💚. (القصة دى بالمناسبة بتعكس حال عامة الشعب وموقفهم من الانسانية المجرده والحق .. اكتر من ماهى بتعكس قلب الشماشى العطوف) ..
08-19-2020, 09:15 AM
Hani Arabi Mohamed Hani Arabi Mohamed
تاريخ التسجيل: 06-25-2005
مجموع المشاركات: 3515
يوم كنت ماشي في وسط الخرطوم فجأة لقيت طفل من هؤلاء جاري باتجاهي من مسافة قريبة وهو خارج وعيه بسبب "السلسيون" وما فهمته مالو ... الطفل زحاني من الشارع وقال لي : يا عمو العربية دي كانت هتضربك وفعلاً لاحظت للسيارة بعد كلام الطفل وفعلاً ربنا نجاني من حادث مؤكد واختفى الطفل فجأة كما ظهر قبل أن اتكلم معه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
Hani Arabi Mohamed
فيس بوك
تويتر
انستقرام
يوتيوب
بنتيريست