العيش القالوا بالصف دا يكوركوا ليهو بالاكياس زول دايرو ما في .. مشيت خرطوم الزفت القذرة دي مرتين لقيتا كما خلوها الحرامية أكلى أموال الشعب .. نفس القذارة والوساخة وكتمة النفس .. دايرة شغل كتير عاصمة القمامة والزحمة والحديد الرخيص دي . في بلدنا المطرة تصب أربع ساعات بغزارة مهولة ومع ذلك لما تقيف بعد خمس دقائق الشوارع كلها عبارة عن رمال رطبة بس ولا نقطة موية... والساحات خضرااااااااااء ترد الروح والطيور البيضاء تلقط .. والغنم ياكلن .. ومجموعات الاولاد والبنات قاعدين كيمان كيمان .. والدعاش وريحة المطر يحيط بالمكان وكذلك الجمال وإبداع الخالق . خلال 45 يوم مدة اجازتي نمت برة في الحوش خمس مرات بس .. لأنو البرد شديد . كمية القراصة الأكلتها في الاجازة دي ما أكلتها طول عمري دا غير القهاوي والشواهي والمشاوي . الناس عندنا شبعانين شديد والله على ما أقول شهيد بياكلوا أربع وجبات تقريبا .. بتكلم عن ناس المعدة السنينة أما نحن ناس البطون المعطوبة قراصة الفطور بتقعد معانا لليوم التاني .. الناس مستغربين فيني كيف اكل وجبة واحدة وما تجيني سوء تغذية ؟ أنا من آكلي العصيدة .. بتنفع معاي جدا. حضرت في الحلة سبع حفلات منهم اتنين بالبعيو والباقي لفنانين شباب بنات وأولاد .. وكلهن مبدعين والله .. اقل حفلة ب120 ألف بدفعا أصغر شافع .. الناس دي بتجيب القروش دي من وين ؟؟ خخخ مشيت البحر ( النيل الأزرق ) عشر مرات أصطدت جميع الأسماك بالصنارة .. بلطي بياض قرقور الخ الخ الخ .. حظي كارب في السمك .. دائما برجع ومعاي خمستاشر عشرين سمكة كبيرة لأنو الصغير برجعو البحر تاني لما أقبضو .. وفي الطريق للبيت بمر بالمزارع المنتشرة على الضفاف بشيل ليمون وبرتكان وموز .. وبصل أبيض وشطة خدرا وجرجير وفلفلية .. الأسود والبامية موجودات برضو لكن الشيل بكون كتير علي .. أها المعاي بعاينوا للحاجات الشلتها دي باستغراب واحتمال كبير يكونوا بتغامزوا علي باعتباري مغترب جيعان خخخخخ عشان شبعانين فيهو .. خير الله كتير شديد هناك .. والله قربت أركلس وأدك الاغتراب عشان اقعد مع الجماعة البياكلوا أربع وجبات وبشربوا القهوة في اليوم سبع مرات .. ما في قعدة كوتشينة في الحلة ما فيها شعيرية أو قراصة بالسمن والسكر أو العسل بالإضافة للشاي والقهوة .. لا وجمبهم البحر ملان سمك والمزارع حبلى بالطيبات من كل نوع ولون .. الله يديهم العافية مرتاحين. بالمناسبة الكهرباء نادر ما تقطع والله وسبب القطع المطرة الكل يوم دي .. ونحن ذاتو ما شغالين بيها كتير لانو الأجواء باردة والموية أبرد .. بس عشان التلاجات وبعض الضروريات. في المرتين المشيت فيهن الخرطوم .. في الشارع بلفى زي عشرة محطات بنزين ما لا قين زول يكب منهم جالون .. محطات فاضياااااااا والبنزين كتير والله. افتقدت شفع الكيزان وبعض صعاليقهم من الفاقد التربوي في مجمع الجمهور بالسجانة .. عينة التلقاهو قادي أي حاجة وربما جابوه من الشارع ساي ومع ذلك يتعامل معاك وكانو رئيس جمهورية أو البلد دي وارثا.. غايتو أنا كل ما أمش بضرب وبشلت واحد أو اتنين عشان ما عندي اخلاق للكائنات دي .. لكن المرة دي رجعت ساي يدي منملة .. خخخخخخخخخ يتبع إن الله هون ......... سلام للجميع
08-18-2021, 06:46 PM
Asim Ali Asim Ali
تاريخ التسجيل: 01-25-2017
مجموع المشاركات: 13492
Quote: العيش القالوا بالصف دا يكوركوا ليهو بالاكياس زول دايرو ما في ..
دا العيش التجارى ابو عشرين وخمسه وعشرين جنيه مش المدعوم ابو خمسه
Quote: المناسبة الكهرباء نادر ما تقطع والله وسبب القطع المطرة الكل يوم دي .. ونحن ذاتو ما شغالين بيها كتير لانو الأجواء باردة والموية أبرد .. بس عشان التلاجات وبعض الضروريات. في المرتين المشيت فيهن الخرطوم .. في الشارع بلفى زي عشرة محطات بنزين ما لا قين زول يكب منهم جالون .. محطات فاضياااااااا والبنزين كتير والله.
محطات البنزين ماشاءالله اديتا عين صفوف اليومين ديل ماشاء الله ظاهر جيت ايام عيد الضحيه قبل عوده البرمجه مجمعات الجمهور در خبرها مالى البلد
08-18-2021, 07:27 PM
بسمات الشيخ بسمات الشيخ
تاريخ التسجيل: 05-22-2021
مجموع المشاركات: 833
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلحة عبدالله
Asim Ali
فيس بوك
تويتر
انستقرام
يوتيوب
بنتيريست