|
كتب الكاتب الفاتح جبرا المتوفرة بمعرض الدوحة
|
|
 Re: عصابات النيقرز…. اسرار وخطط… (Re: زهير عثمان حمد)
|
بس السجم ديل يفكو الحظر
دا كلو افرازات لتدني الحالة الإقتصادية التي تفاقمت بسبب الحظر
الوزير الزفت داك فات بس ما يكون ساب ليهو ناس بفكرو بذات الأسلوب التعيس
في وزارة الصحة
حكومة نظرتها دائما للأمور قاصرة وبليدة
مافي أي مبررات للحظر الذي في كل يوم يضاعف من سوء الحال إقتصادياً وأمنياً وإجتماعياً
مع إنو المرض دا ما خلى بيت ما دخلو
تاني زفت الطين الحظر دا فوق شنو؟؟؟!!!! .
| |
 
|
|
|
|
|
|
|
|
Re: عصابات النيقرز…. اسرار وخطط… (Re: منتصر عبد الباسط)
|
| Quote: خبير إدارة الأزمات اللواء شرطة معاش د. أمين إسماعيل أوضح أن جماعات (النيقرز) نتاج لإفرازات مجتمعية من فئات تعاني من الفقر وتوجد في أماكن وإحياء معينة وفئات أخرى تعاني من مشكلات النزوح الداخلي والخارجي، مشيراً إلى أن هذه المجموعات تلتقي بكراهيتها للمجتمع الذي لم تستطع الاندماج معه. |
ده كلام فارغ
شوفو منو وراها منو مخطط وانهوا الموضوع دي جريمة منظمة ومخططة ومرتبطة بجهات اعرفوها
شابكننا افرازات مجتمعية مفروض كل السودان يشيل سواطير لو افرازات مجتمعية
| |
|
|
|
|
|
|
|
|
Re: عصابات النيقرز…. اسرار وخطط… (Re: طارق محمد الطيب)
|
عصابات النيقرز* وكثرة المتسولين ظهروا في الخرطوم ربما في العام 2012 او قبل ذلك بقليل
وسبب هذه الظاهرة هو الفقر وغياب العدالة الإجتماعية.
ربما أن هنالك جهات لها مصلحة في زيادة نشاطهم هذه الأيام وربما أن الشرطة نفسها تتغاضى عن ملاحقتهم ومحاربتهم بغرض سياسي.
ولكن يظل السبب الأسسي لنشأتهم هو الفقر وغياب العدالة الإجتماعية.
_____________
*عصابات النيقرز: هذه التسمية فيها تنميط عنصري وهو أحد العوامل المجتمعية التي تساهم في وجود مثل هذه الظواهر.
| |
|
|
|
|
|
|
|
|
|
Re: عصابات النيقرز…. اسرار وخطط… (Re: Hafiz Bashir)
|
| Quote: عصابات النيقرز* وكثرة المتسولين ظهروا في الخرطوم ربما في العام 2012 او قبل ذلك بقليل |
كمتسولين صحيح والتسول في كل العالم اسبابو معروفة ... لكن حتي التسول الظهر قبل 2012 فجاة كمية منهم بصورة غريبة
لكن كعصابات عندها اهداف تاريخها قريب والله اعلم
لكن شنو الرابط بين المتسولين والعصابات البتقتل وتشيل سواطير
هل نفس المتسولين الصغار البمسكوك من بطلونك ولا جلابيتك يزهجوك المشي في الشارع تحولوا نتيحة لتجاهل المجتمع ليهم الي عصابات شايلة سواطير؟
| |
|
|
|
|
|
|
|
|
|
Re: عصابات النيقرز…. اسرار وخطط… (Re: Gafar Bashir)
|
جهات سياسية بتحاول تتكسب من نشر حالة الفوضى
وهي البتجمع المجموعات دي وتدفع ليها وتنشرها
للاعتداء على المواطنين تقاعس الشرطة مقصود بعدم
مواجهة هذه الظواهر لانه الشرطة اصلا متواظئة
لو اتحركت العصابات في أحياء أخرى في العاصمة
حيتم التعامل معاهم بنفس طريقة لجان شباب البراري
وربما بطريقة أقسى عشان كده تحريكهم محسوب
الشرطة ما شايفه شغلها شباب الأحياء يشوفوا شغلهم
ويتم ابادة العصابات دي بإرهابهم بنفس أسلوبهم
صحيح الفقر انتشر لكنه مش هو السبب في الحاصل
دي ظاهرة مفتعلة ليس الا
التسول ده ظاهرة براها ما عندها ارتباط بالعصابات
| |
|
|
|
|
|
|
|
|
|
Re: عصابات النيقرز…. اسرار وخطط… (Re: جمال ود القوز)
|
♤سلامات لصاحبي زهير . و بصراحة بتدهشني دخلات
جمال ود القوز دا. لكن سؤال إتا ليه ما بتفتح بوستات؟!
نصيحتي غايتو جرب، بتلقى شباك تذاكرك ما يدي الدرب.
●》سمح كدي هاكم دي: بتتذكرو النقرزاوي داك الكبو
ليو شطيطة القبانيت ، زرقوها ليو وين زاتو ماني عارف
المهم بنطمَّن ، ما عارفين تاني الحصل عليهو شنو ..!؟
لكن عجبوني أولاد الأهالي
عجبوني بلحيل و سروا بالي
ديل طول الليل واقفين سواري
شَلَّتو زول ( تُلُّب ) بالضفاري
وقام جدعوه في الدفااري
******
عجبوني أولادنا الفرسان
ملصوا البدل والقمصان
و كبولو الشطة بال(الجركان)
من نخرينو و ليييي المصران
عجبوني الليلة جوووووووو
الحرسو البلد أطمنووووووة
******
الجنيات يا بغارااااااااااا
ضرب الزاقر فى (البقالة)
مرقولو أولاد السراااارة
المركز جاااااااب الإشارة
ما شالونا بى الطيااااارة
ولا بياكلونا بالحقاااااارة
******
عجبونى أولاد السرور
الخووا ليك متل الصقور
و الفارو اليك متل القدور
ترسوا البحر بالسدوووور
ما شالونا بى البابووووور
و لا بخوفونا بي (الجقوور)
******
أنحنا فوق عزنا
{ نقارز } ما بتهدنا
الليلة هوي يا جنى
اسمو الخير ضوَّونا
ود (البرياب) يا جنا
-----------------
[} و دي كمان مناحة مجازفنها كطعن أخدر
لكي تليق ( بالموغف) و حالة البلد الراهنة:
عجبوني أوباش الحمدان ترسو
البحر جثة فوق جثمااااااااااااان
لكن بهناك ملصو البدل و القمصان
و كبــو الجرســـة في ( نجـــران )
الكرواك في العدارة.. مرقو أخوان السرارة
المركز جاب الإشارة.. ما خمونا بي الدفاارة
عجبوني أولاد السرور( الفرو) متل الصقور
و اندسو جوة الجحور..و ما خمونا بالحنطور.
ود ال ح ي ش ا ن ال ت ل ا ت ة
مؤذنْ محجورٌ منزلياً بجزب ة مالطا
(عدل بواسطة دفع الله ود الأصيل on 07-25-2020, 09:43 PM)
| |
|
|
|
|
|
|
|
|
|
Re: عصابات النيقرز…. اسرار وخطط… (Re: دفع الله ود الأصيل)
|
Quote: بصراحة بتدهشني دخلات
جمال ود القوز دا. لكن سؤال إتا ليه ما بتفتح بوستات؟!
نصيحتي غايتو جرب، بتلقى شباك تذاكرك ما يدي الدرب. |
انت المدهش يا ود الأصيل ..
كان زيك في زول مليء بالإدهاش
وهو حبيبنا وأخونا عليش الريدة ..
لكن ليهو فترة طويلة بارح المنبر العام ..
ومرات بلقى ليهو مشاركات في آراء ومقالات
لكنه ضنين جدا وربما عنده موقف ما منعه
لكنه كان رقم رغم قلة مشاركاته وتواجده
عني بكتب ما يعنّ له على منوال
سأقول رأيي ثم أمضي ..
وتجدني قنوع جدا ببعض القبول البلقاهو لبعض مشاركاتي
بالنسبة لافتراع البوستات الأخوان ما مقصرين ..
وبيتطرقوا للمواضيع ذات الأهمية
والأمور ماشه عال العال ..
عصابات النقرز بتنتشر في أحياء بعينها من العاصمة ..
لأنه دائما بتكون طريقة الهرب السريع والتخفي متوفرة ..
والنوع ده كان ما وفر طريقة مخارجته
بيكون غامر بي روحه لذا لا أعتقد بتعميم شغلانية
النهب والقلع وترويع المواطنين في أحياء كثيرة
من العاصمة لأسباب يطول شرحها ...
غايتو حقارة ما بعدها حقارة إنه شباب هذه الأحياء
يسمحوا لهذه الفئة بالتعدي عليهم وعلى أمنهم
دون أي ردة فعل وتحرك مضاد منهم ..
أما جهاز الشرطة فده متواطيء ومكري ومرتشي
كونه يسمح أن تصل الحالة الأمنية بالعاصمة لهذا الدرك
مع إنهم بيقيضوا رواتبهم ومخصصاتهم من دم المواطن
مش كان بيرددوا وعلى مستوى ضباط ..
دي المدنية الانتو دايرنها .. !! .. تبا لهم -
| |
|
|
|
|
|
|
|
|
|
Re: عصابات النيقرز…. اسرار وخطط… (Re: جمال ود القوز)
|
سلام للجميع. قرأت البوست وكل المداخلات وما لقيت أسرار ولا خطط.
في رأيي المتواضع أن عصابات النقرز هي ذاتها ما عارفة نفسها شنو، لأن ثقافة العصابات دي السودان ما بيعرفها وما حصلت في تاريخو. أبحثوا عن أتباع إبليس وأتباع دين الأبالسة وحتعرفوا ليه الأولاد ديل بيتصرفوا وكأنهم في غابة؛ قتل نص النهار ونهب نص النهار والعالم كله يشاهد.
الأولاد ديل ضايعين وأي صبي ضايع ممكن عادي تستغلو جهة خبيثة عندها أجندة هو حتى لو شرحوها ليه بالكلمة ما حيعرفها.
نقرز شنو يا عالم!!! لو شباب الثورة عايزين يقرضوهم ممكن يقرضوهم في أي وقت، لكن ما حيقدروا ولا حيعرفوا هم أصلاَ مقرهم الأساسي وين.
| |
|
|
|
|
|
|
| |
زهير عثمان حمد
منتصر عبد الباسط
طارق محمد الطيب
Hafiz Bashir
جمال ود القوز
دفع الله ود الأصيل
Shinteer
فيس بوك
تويتر
انستقرام
يوتيوب
بنتيريست