تابعت بيان وزارة الخارجية السعودي وركزت علي وفد التفاوض من الجيش السوداني ووفد مرتزقة الدعم السريع !
حقيقة حسيت بالمهزلة الحقيقة الحاصلة دي ::—— كدي بالمنطق يالبرهان كيف تقبل للجيش السوداني أصالة وعراقة وسنين كلية حربية وكلو أن يجلس جنرال برتبة لواء مع مرتزق أشتري المجرم حميدتي بالقروش كانت في ( شكل موية وسنتدوتشات بميدان الإعتصام كتغطية لمجازر الجنجويد ) ..
كيف تقبل أن يتساوي كتف الجنرال مع كتف المرتزق فارس النور !!!
@ كيف تقبل يالبرهان أن يجلس جنرال برتبة لواء مع محمد المختار ( كل إمكانياته الجلوس في مطعم أمواج وبعد الوجبة الذهاب لكافي غرب شارع المطار ) !!!
@كيف تقبل يالبرهان أن يتساوي السفير الدبلوماسي صاحب الخبرة المحترمة عمر صديق بكتف المحرر الصحفي نزار سيد أحمد !!! الغريبة نزار ذاتو ما ح يحترم السفير دا تاني وانا بعرف طريقة نزار في التعامل !!!
@السؤال الحقيقي —- أنت يالبرهان عايز توصل الجيش دا لياتو مرحلة وياتو منحدر وياتو مهزلة !! عايز شنو أنت من الجيش دا يا سعادتك ؟
ما كفاك مهازل ياخ ما كفاك إحراج أن تقبل أن يجلس اللواء ركن محجوب قائد البحرية مع فارس سندوتشات !!
@ مفروض تعرف بالسيد البرهان انو نحن خلاص صبرنا معاك كمل وأنا شخصيًا ما عندي تمجيد للشخصيات أنت ولا غيرك تهمني مصلحة القوات المسلحة السودانية ( تهمني مصلحة الأولاد العساكر والضباط البموتوا كل صباح في الميدان من أجل تراب السودان دا ) عشان كدا ما تتوقع يالفريق البرهان نحن نسندك في الضلال والمهزلة البتعمل فيها دي بعد كدا !!!
@ هو ذاتو يالفريق البرهان التفاوض ليك شنو ! وأنت المقعدك في بورتسودان شنو تعال محل أولادنا ديل بموتوا في الخرطوم ومحل الدواس ؟؟ اذا كان وجودك في بورتسودان عشان المسخرة بتاعت وفد التفاوض دي فبلاش ياخ !!
معقول تقبل عساكر يفاوضوا ملكية في شأن عسكري !!!
-@أخيرًا ———' الى المرتزق عرمان المريض نفسيًا صاحب عقدة الجيش الأبدية أمس كتبت تغريدة معترض علي وجود السفير المحترم عمر صديق علي أساس انو مدني !! الليلة مالك ما أتكلمت في الجنجويد فارس النور !! مش ( فارس زول مدني ) ولا إنتوا كمدنييين رمم الجنجويد بدوكم رتب خفية ولا أنت يا عرمان ياسر خائف من عبدالرحيم دقلووو وشغلتك دي شغلة خوف عديل أنت خائف من عبدالرحيم ولا فهمك شنو ؟ أنا بسألك يا عرمان رد ؟؟؟ الفوق دا سؤال ليك !!
— الأيام القادمة نواصل حكاية البرهان والجيش دي وقطع شك أنا وقفتي ح تكون مع أولادنا العساكر في الجيش ومع إختيار عساكر الميدان وح ندعمهم في أي توجه عايزنو !
الفريق الكباشي لسه عندنا فيك أمل نحن فك قيدك دا وأرجع كباشي البنعرفوا !!
وخلاص
10-29-2023, 09:50 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 11018
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
صديق مهدى على
فيس بوك
تويتر
انستقرام
يوتيوب
بنتيريست