النيل طير سماوي جميل ويمكن يكون دمعة فرحة سالت من عين إله ساعة الاصيل لامن نوى يخلق بلد اخدر نبيل وقعد يعاين ليهو لامن اتمد في كل النفوس ولما ناسو واستوى ملا البراحات والصباحات والكؤوس ويمكن يكون ضحكة طفلة شالت من القلب هم الرحيل ويمكن يكون زعلان علي حال العباد ممغوس من الهم التقيل دخل البيوت ووقف يكورك لي البنيات والولاد شدو حيل الغنيه خلوهو السكوت مدو حبل المنيه شان الحزن يرحل يفوت املو روح الدنيا دوباي يفج صمت السكون ويمكن يكون حزنان على البلد البموت العبرة في باب الحلق والدمعة غتغتت العيون الجمرة في كفوف الخلق ومرارة الأسى والشجون يمكن يكون ويمكن يكون أزرق مرق من الشرق ابيض وقور ما منطلق مقرن موهط في القلب وتالا الشمال يبدا الدرب يمكن يكون أو ما يكون
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست