حواء والده ( 1 ) # كلنا بنسمع بالهمباته ،،، وهم لصوص قطاعين طرق ،، يسلبون كل غالي لدى ضحاياهم .البطاحين كان عندهم همباتي اسمو طه ،،، حكى قال : كنا مرة جنوب القضارف كامنين للتجار البجو من الحبشة ،،، كنا منيخين البلنا ومعاي اتنين من رفاقتي . قاعدين تلاتة يوم ما جانا رزق ،، في اليوم الرابع الصباح دقش نسمع عر عر ،، قمنا علي حيلنا واتجهزنا للكتال . فجاة جا ماري فينا زوﻻً ازرق رقيق ،،، زي الدابي قال : السلام عليكم !! وزول رده ليهو سلامو مافي . عر عر فات فينا ما اشتغل بينا .قمت انا كوركت ليهو : هوي يا اﻻضينة !! خرجك ده ماليهو شنو ؟؟ رد لي قالي : دهب بني شنقول ... وﻻ اتلفت علينا . صحت فيهو يا اﻻضينة ؟؟ انزل من حمارك وارمي الخرج وامش !! ،،، واحفظ دمك . وقف حمارو وقال : انتو رجاﻻ دايرين تشيلو دهبي !!! من فضلي !! او بي رجالتكم ؟؟ قال : ضحكت وقت ليهو : مالك ومال الرجالة يا اﻻضينة .. دايرنو حمرة عين ؛؛؛ والليلة يا اﻻضينة الطير بفطر بيك . قال : التلاتة سلينا سيوفنا ومشينا عليهو ؛؛؛ قال لينا : دايرين تكاتلو كتال الرجال ؟؟ او كتال العوين .!! طه قال : انا فهمت قصدو قلت ليه : اصحابي دخلو سيوفكم في جفايرها ،، وخلو لي اﻻضينة الليلة بقطعوا حتت حتت ،، النوريهو كتال الرجال .. قال : رفاقتي دخلو سيوفم ورجعوا قعدوا تحت الشجرة .. قال : طلع سيفو من جفيرو وشال درقتو ومشى ليهو على شجرة ،،، انا قلت : خاف داير اتجمر قال : قطع ليهو فرع وبربحو نضيف من الشوك وخته سيفو فوق سرج الحمار وجا ماشي علي !! بالدرقة والعصاية البربحها .. قال انا قلت : الزول ده مجنون داير اكاتلني بي عصاية !! وانا بي سيفي الليلة بشلخوا شليخ العوين .. قال : جيت خاشي عليهو والجنا اتصر زي الدابي ،، واصرف بي درقتو وعصايتو بي ضهرو ﻻميها مني عشان ما اقطعها ليو بي سيفي !!! الجنا اتفر وانصر !! ﻻمن قطع نفسي تب ؛؛ ما لقيت طريقة فيو صراف بي درقتو ما ﻻقاني زوﻻً متلو . اها بعد شاف نفسي انقطع ،، الساعة اﻻطير فوق زي الصقر واخرت فيني خراته في صفاحي الشمال ضهري ﻻمن الدم وقف منو ،، ويدي اتشلت والدرقة وقعت من يدي !! وتاني طار وقشطني في صفاحي اليمين ﻻمن يدي انشلت والسيف قرب اقع من يدي ،، قال قلت : يا طه ارجل الزول ده اﻻ تضبحو قال قلت ليهو : ورح نتصارع ونويت اغمتو في ضراعي الشمال واضبحو بي سكيني ..قال : ختيت سيفي فوق درقتي وهو خت عصايتو فوق درقتو وخشيت عليهو والساعة اﻻغمتني واتلفه فوقي وخمشني وصقع بي الواطة ﻻمن راسي لفه ومصارين بطني جن في حلقي .. رفاقتي سلو سيوفم وجو ماشين عليهو بي سرعة !! فتح خرج حمارو وطلع ليو طبنجة وضرب طلقة قصاد ريسينم وقال ليهم : حرَّم ما ترمو سيوفكم كل واحد احشر ليو طلقة فرق عينيو .. جماعتي رموا سيوفم ..شال سيفي ودرقتي وسيوفم ودرقم ،، وركب فوق حمارو وختاهن فوق كرعينو !! وانا الساعة ديك قمت من الواطة اترتع. .قال لينا : قودو جمالكم وامشوا قدامي والبتلفت بحشر ليو طلقة في راسو .. مشينا قدامو لي قريب ألمغرب وصلنا حلة قطاطي صغيرة ،، والكلاب اقولن : هو هو ومرقوا رجال الحلة وأحد كورك منهم حمد اخوي جا !! ؟ وجرى دخل البيوت ،، ونسمع ليك نسوان الحلة قجن بالزغاريت ،،، والناس اتلمت فينا !! سلام يا حمد ،، حمد لله على السلامة يا حمد ،، تلاتة سنين يا حمد .بعد كمل سلامو قاليهم : ضيوفي ديل ودوهم الديوان ودخلو جمالم الزريبة واعلفوهن ليهم . دخلونا قطية كبيرة فوقها كم عنقريب كل واحد فينا لزم ليهو واحد . جابو لينا عصيدة حارة بي لبن وعملو لينا قهوة ،، وبعد شوية جابو لينا مرارة وشية حارة اطعم منهن ما ﻻقاني..الصباح جا صبح علينا قلت ليهو : اسمح لينا نمش قالي : تمشوا وين حرم ضيفنا كان ما عدى تلاتة يوم ما بمش مننا !! قعدنا تﻻتة يوم اكلنا كلو مرارة وشية ،، وصلحوها لينا بي مريسة لزوم الهضم طلق اطعم منها ما ضقت عمري كلو . اليوم الرابع قال : بعد تفطروا ان شاء الله بنسمح ليكم . وظنيتو عاملنا احتفال ناس الحلة كلهم اتلمو كبار وصغار ،، نسوان ورجال ،، وجابو الدلوكة وعندهم بنية الساعة المسكت ليك الدلوكة ودقتها ليك وغنت جنس غناين !! طير السماء ارقص معاها والساعة ديك زولنا حمد جا شايل ليهو سوط عنجن مليان قطران !! انقط منو نقيط والشباب ديل جدعو عراريقم وركزو في نص الدارة ،، وركزو ليه متل كانو عريس والساعة الحمد اقشط اﻻول ﻻمن اغرز ليهو السوط في ضهرو ،، وانتلو من نص ضهرو نتل والدم اكب جووو زي النازل ليهو من مجري ،، وحمد باره الشباب واحد واحد فرد سوط ما بزيدو والنسوان اسون قج بالزغاريت ،، والشباب واقفين قنا وﻻ رمشوا وﻻ اتزحزحوا ناسن فراس بالحيل !! وانا ورفاقي نزح لي وراء !! خايفنو انادينا للبطان ،، لكن الحمد لله ما نادانا الزول الداهي ده الرقيق التقول شيطان جنس قوتو ما ﻻقتني في بشر ،، وﻻ حتلاقيني وقبيلتو كلها فراسن عينم حمراء . بعد اطامنا قمنا انا ورفاقتي عملنا لينا كم صقرية وعرضنا زين ،، واتكتحنا هله هله وبشرنا في النسوان ونسوانم ضامرات تقول صيد !! والعيون قدر الفنجان ،، والشعر ﻻ نص الضهر يا لطيف !! تقول حور !! وحمد اعاين لينا واضحك من البشتنه الحصلت لنا . بعد العرضة انتهت ،، جابو لينا جمالنا وقدمنا ﻻ طرف الحلة وكان شايل ليهو قطعة دهب اداني ليها قالي : اتقسموها وقالي الزول البتلقوهو ماشي براهو في الخلاء اختوهو ﻻنو واثق من نفسو !! وتب ما تستحقروا ليكم راجل ﻻنو الرجالة قلب ما جسم . ودعنا وودعناهو ونهرنا جمالنا ،، وصلنا القضارف بعنا الدهبه عشتنا تب . وانا من دربي داك ودعت رفاقتي ،، وقلت ليهم : ماش اهلي ارعى بي سعية ابوي وتبت من السرقة وعرفت الرجالة والقوة خشم بيوت ،، وغير الحلال ما في شيتن بملأ العين ،، وغير حمد ما خفت وعرفت حواء والدة/ دمتم...منقووووووول
ولكم ودي... إتگاءة ،، قلنا نغير من روتين الكورونا و السياسية شويه..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الطيب عباس
فيس بوك
تويتر
انستقرام
يوتيوب
بنتيريست