|
|
|
 Re: تصنيف الجامعات العربية ومكانة جامعاتنا (Re: احمد عمر محمد)
|
من المواقع بس يا عمك .. والمواقع الانجليزية فقط كمان .. ونحن مواقع جامعاتنا فوقها النبي
حصل لقيت ليك أيقونة Apply now في موقع جامعة سودانية !
حصل شفت سجلات خريجين؟
مواقع الجامعات مفروض تكون سجل لكل أنشطة الجامعة منذ إنشاءها
طبعاً في معايير تانية ما شايفها مذكورة فوق زي عدد الاستشهادات بالأوراق البحثية وعدد الخريجين الشغالية في مواقع كويسة وهكذا
مواقع الجامعات في كل العالم عندها استاندرد ثابت .. وانت مغمض بكلكين بتصل للعاوزه لكن جامعاتنا كطائراتنا .. زي ما قال المصري لما سألوهو عن مواعيد طيارة سودانير: دي ستهم كلهم تيجي وقت ما تيجي وتروح وقت ما تروح 
تدخل موقع الجامعة تلقى كمية هردبيس ما عندها أي علاقة بالحاجة البتفتش ليها .. يمكن أكتر موقع مهتمين بيه جامعة افريقيا لكن مع الأسف مهتمين بالموقع العربي فقط
| |
 
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
رغم اني ما عارف سيد البوست هو أحمد عمر الكبير ولا الصغير بس عايز اخت انطباع شخصي عن موضوع التصنيفات العالمية ومعاييرها بعد التحية..
بنسبة لا تقل عن ٥٠٪ أكاد أجزم ان اي تصنيف عالمي في زمننا هذا متحيز وغير موضوعي حتى ولو كانت الجهة التي تقييمه الأمم المتحدة ومنظوماتها المختصة.. اغلب التقييمات بتدخل فيها علاقات شخصية ودولية وحاجات تحت الطاولة.. بعض المؤسسات تهتم بالسمعة فجأة فتقوم ببذل مزيد من الجهود عن طريق الاتصال بالجهات صاحبة التقييم فتقفز بمعدلاتها فجأة، وبعض المؤسسات (كجامعاتنا المسكينة) لا تولي اي اهتمام بموضوع التصنيف فيهبط بها أسفل سافلين رغم أنها أكثر مهنية واجود إنتاجها من كثير من الجامعات ذات المستوي العالي، معايير التقييم ذات نفسها واوزانها الترجيحية فيها كلام وخلاف ولكن في النهاية تبقى أهمية الارتقاء بالتصنيع الوهمي هذا مهمة كاهمية الارتقاء بصداقة الدول مع امريكا وخروجها من قائمة حظرها..
مثال بسيط عن الممارسات التي تقوم بتصنيف المصارف العالمية يمكن سحبه على بقية المعايير.. الجهات التي تقوم بالتصنيف العالمي ترسل للمصارف قاطبة بانها بصدد تصنيفها وادراجها في صدر قوائمها، وكل ما عليها هو ارسال بيانات مالية قوية ودفع مبلغ من المال حتى تمنحها جائزة البنك الأول في دولة كذا.. وعند استجابة البنك يقومون بتقديم إرشادات لتعديل البيانات لكذا وكذا حتى.. ايواا كده ظبط.. والله صحي.
بعد أيام يخرج التصنيف العالمي بأن البنك الأول هو كذا.. وبقية البنوك نايمة في العسل والبصل فقط لأنها ما اهتمت بتلك الجهة السيادية، وبعض البنوك المغضوب عليها يعطونها تصنيفا أقل من الحد الأدنى مما يرفع مخاطره الي ١٥٠٪ بينما تعطي بنوك غير مصنفا اطلاقا مخاطر ١٠٠٪؛ وعلى ذلك قس بقية التصنيفات والمعايير.
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
عاطف ده منو كمان
ما يكون شغال في
ويب ماتريكس ولا شنغهاي
عموما على قول اخونا احمد محمد عمر
بركة انك فرزت اتنين واحد مفتتح والآخر
متداخل
يا احمد اكتر حاجة تزعل تلاقي الجامعات
عاملة قسم خاصة للموضوع ده ونثريات
والمشكلة البيشتغلوه كله شو وارضاء
رغبات مدير القسم الخاص بإدارة صفحة
الجامعة
عموما في احدى الجامعات حيث عملت
صدعوا راسنا فوق العشرة أعوام بفعاليات
الصفحة ولكن إلى الآن بعد مرور عقدين
صفحة الجامعة اكتر حاجة تتغير فيها كلمة
مدير الجامعة كل أربعة سنوات والباقي
هردبيسة هردبيسة
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
مرة عملت لي برزنتيشن ظابط ووديتو لعميد جامعة اشتغلت فيها قبل كدة
عن نظام ERP و LMS اللي هم نظام إدارة تعلم أكاديمي ونظام إدارة مؤسسة من القبول وشؤون العاملين وشؤون الطلاب لحدي الحسابات والدورة المستندية الأونلاين بالكامل لحدي التوقيعات اليكترونية .. البرزنتيشن أدهشه شديد وأرسله لمدير الجامعة قدامي وبعديها اتواصل معانا المدير بالتلفون
سألني التكلفة كم؟ قلت ليه zero انتو كجامعة حكومية عندكم سيرفر مجاني في المركز القومي للمعلومات والأنظمة الشغال عليها كلها مجانية وشغل يدي برضو مجاني تبرع مني ساي
شكرني وقال لي إن شاء الله حندرس الموضوع ونعرضه على قسم تقنية المعلومات ونتواصل معاك
لحدي ما انتهت إجازتي وغادرت السودان مافي زول اتصل بي .. لاحقاً العميد كلمني إنهم أصلاً كانوا طارحين المشروع وفي شركة مقدمة عرض ملياري في النهاية أدوها المشروع
قلت ليه ما عارف معيار قبول مشروع غالي كدة في مقابل مشروع مجاني شنو لكن مبروك عليهم بس على الله يكون شغلهم ظابط
دخلت الموقع لقيته عبارة عن موقع شبه ساكن معمول بي كود php خاص فقير جداً ولا يوجد فيه أي نظام اليكتروني .. مجرد نبذة تعريفية عن الجامعة فقط
قلت للعميد الشغل الانت شايفه دة أنا ممكن أظبطه ليك في ساعتين فقط باستخدام ووردبريس وبجيك أفضل من دة بسنين ضوئية من ناحية الأمان على الأقل
بعديها بشهرين اتصل علي وقال لي الموقع اتهكر .. دخلت لقيت الهكر مستمخين ومشغلين أغاني يشربوا في القهوة والشاي وزول واحد قادر يقفل الموقع مافي
جدير بالذكر إنه الموقع ظل مختفي من على النت قرابة الشهرين بحجة إنه مدخلينو الصيانة .. والأكيد إنه الصيانة دي أخدوا عليها قروش بدل يدفعوا شرط جزائي
بصراحة مصيبتنا الإدارية كبيرة شديد
__________
يا عمر التاج ما بعرف عن البنوك لكن في حالة الجامعات المعايير منشورة ويمكن التأكد منها مباشرة من مواقع الجامعات
التلاعب ما بيتم بإنك تدفع قروش للمؤسسة صاحب التصنيف وإنما بإنك تدفع قروش لبروفيسور حامل جائزة نوبل مثلاً كما تفعل بعض الجامعات الخليجية وتصوره ضمن أعضاء هيئة تدريس الجامعة في حين إنه علاقته بالجامعة تكون اشراف على مشاريع تخرج فقط وعن بعد كمان .. بالضبط كدة زي الصيدلي البسجلو الصيدلية بي اسمه بدون ما يكون شغال فيها مقابل مبلغ مالي
| |
|
|
|
|
|
|
|
|
 Re: تصنيف الجامعات العربية ومكانة جامعاتنا (Re: أحمد محمد عمر)
|
سلام عليكم احمد عمر وضيوفو
خلاف الفكره العامه عن مواقع التصنيف ماحاولت اتابع مولد التصنيف والجوطه حوالينو لانى مقتنع مهما كان نحنا فى عهد الانقاذ تحت الصفر ومحتاجين شغل حقيقى عشان نقول وصلنا مرحله الصفر .
طبعا دا مابينقص من جهود علماء قلائل ربما لو وجدو الامكانات والتقدير كان قدمو ابداع اكثر فى البحث العلمى لكن للاسف همضلع من اضلاع العمليه الاكاديميه والواحد فيهم ريما مايلقى تقدير لعلمو وجهودو الا تحت لواء مؤسسات علميه برا البلد
موضوع الموقع الالكترونى دا فلم براهو رغم انو مفروض يكون من جهه واجهه المؤسسه داخليا وخارجيا اضافه للعمل اليومى فى المؤسسه ومعلومات عن اعضاء هيئه التدريس واعمالهم مما يمكن من التفاعل مهم ...الخ لكن للاسف مواقع لايتم تحديثها احيانا لسنوات وتتعرض للتهكير ....
ايام كورونا الناس كانت تتساءل فى مجموعات الواتس عن المرتبات كاش ولا فى البنك وموقع الجامعه وصفحه الفيس وحساب تويتر غير محدثات وواحدين ينزلو اعلانات عن مواعيد صرف المرتبات -هى اصلا صادره فى جامعات تانيه باسم العلاقات العامه او صوره خطاب رسمى موجه لمنسوبى الجاممعه المهنيه وفى واحد تنزل اعلانات من غير توضيح انها بتنزلها باعتباره من العلاقات العامه والاعلام ولما انا كنت بعلق على فوضى الاعلاات انو مفروض اقل شىء يكون الاعلان فى صفحه الفيس بواسطه العلاقات العامه قام واحد نبهنى انو فلانه دى من العلاقات العامه ودى اعلانات العامه العامه .ردت هى وعامله زعلانه انها من قبيل شايفه كلامى وساكته .ودا دلاله على انو فى موضوع استخدام الشبكه العنكبوتيه ماقادرين حتى نوظفها كويس على سجمنا ورمادنا وامكانناتنا المتواضعه
خليك من نسبه الاساتذه للطلاب -كعدد كلى -دى مافى زول شغال بيها -على الاقل خلال العمليه التعليميه فى قاعه او معمل - لتسهيل التفاعل والتواصل تلقى الطلبه محشورين فى القاعه او المعمل ليه عشان توفير القروش لانو لو قسمت الطلبه لمجموعات وبدل ماتدرس فى المحاضره 300 او 400 كان ممكن تتقسم الدفعه لى تلاته مجموعات مثلا لكن دا معناه عب ء نالى للمؤسسه (ساعات اضافيه) ودا اولويه عندهم على مصلحه الطالب . طبعا موضوع النسبه -كعدد كلى- جوء منها انو الناس متخارجه من البلد بشكل مستمر وكثير من الجامعات فيها كليات تعتمد على الاساتذه المتعاونين تلقى الواحد جدولو يومين فى مؤسستة الام وبوم او يومبن فى كليه خاصه ومثلها فى جامعه ولائيه -لو كانت قريبه - او يسرق اسبوعين تلاته للسفر ويخلص الكورس بتاعو -كراش كورس -ويلحقوهو ورق الامتحانات بعدها
من الامور المهمه انو يكون عندنا دوريات -ورقيه او الكترونيه - عندها حضور وسمعه فى المحافل العالميه .
طبعا البحث العلمى اغلبو تدوير لبحوث من برا .مره بجمع اوراق علميه فى موضوع معين لقيت ورقه علميه -فى مجال مرتبط بالغلوم الطبيه -فى جامعه اوروبيه وفى نفس الوقت لقيت ورقه علميه لاستاذ سودانى والغربيه حاصل على جوائز وعضويه جمعيات عربيه وافريقيه وورقتو تشبه تشبه الورقه الاوروبيه فى العنوان والرسوم التوضيحيه والبيانيه (بضبانتها) حتى البيانات لااعتبر انها مجهود من الاستاذ لانها بينات تتجمع من مرضى مترددين على على مؤسسه علاجيه قوميه يعنى حتى موضوع الورقه ماحاول يلتمس فيهو جانب ليهو خصوصيه بطبيعه الوضع السودانى وقد يكون لو ركز كان ممكن يقدم اوراق مش ورقه ورقه واحده تخدم فعليا الوضع الصحى فى السودان .
الكلام يطول لكن لسه عايزين زمن عشان على الاقل بدينا يكون عندنا تقدم ملموس فى المتطلبات الاساسيه حتى تنافس مؤسساتنا فى التصنيف مش العالمى بل الاقليمى افريقيا وعربيا
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: Asim Ali)
|
| Quote: من المواقع بس يا عمك .. والمواقع الانجليزية فقط كمان |
ما فهمتك يا أحمد محمد عمر
هل إنت قاصد إنو التقييم هو تقييم مواقع الجامعات؟
أم إنك قاصد أن مواقع الجامعات هي مصدر البيانات للتقييم؟
تصنيف الجامعات العالمي QS قد يعتمد على مواقع الجامعات لأخذ بعض البيانات إلا أن جودة موقع الجامعة على الإنترنت في ذاته لا يدخل في التقييم.
والمعايير الستة التي ذكرها الأخ أحمد عمر محمد لا تتضمن جودة موقع الجامعة ضمن المعايير.
هنالك مؤسسات تقييم أخرى غير QS تعتمد في تقييمها للجامعات على جودة وفاعلية موقع الجامعة فقط
مثل تقييم ويبوميتركس العالمي للجامعات الذي معاييره هي الروابط التشعبية لموقع الجامعة وظهور موقع الجامعة على محركات البحث وحجم الموقع وعدد الملفات وظهورها في قوقل إسكولار.
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: Hafiz Bashir)
|
Quote: الى اي مدى تلتزم هذه الجهات على الحياد
والمعيارية التي تطبقها الجامعات هل يتم
ذلك من خلال مواقع الجامعات الإلكترونية
أم أن هذه المؤسسات تعتمد طرق أخرى |
أنا في رأيي أن التصنيف ذاته عملية غير مجدية إذا أنها لا تراعي السياق المجتمعي الذي تعمل فيه الجامعة.
كما أن التقييمات دائما تستخدم مجموعة محدودة من المعايير على كل جامعات العالم مما يجعل هذه الجامعات أقل استجابة وأقل صلة بإحتياجات مجتمعها المباشر.
أيضاً هذه التقييمات تصرف الجامعات عن مسؤولياتها الإجتماعية وتجعلها مهتمة فقط بالأنشطة المتعلقة بالتصنيف دون مراعاة ملاءمتها لرسالة الجامعة.
من ناحية صحة وموثوقية التقييم فهي تعتمد على إختيار المؤشرات وطريقة قياسها
تقييم QS مثلاً يعطي 40% من النقاط لسمعة الجامعة. طريقته في قياس سمعة الجامعة هي عن طريق توزيع إستبانات لمجموعة من الأكاديميين ليقوموا بترشيح الجامعات المتنافسة (20 جامعة من كل أكاديمي تقريباً ليس من بينها الجامعة التي يعمل بها).
تحسب النقاط حسبب عدد الأصوات التي حصلت عليها كل جامعة.
طبعاً هذه الطريقة تحصر التقييم من عند الأكاديميين فقط وتتجاهل بقية فئات المجتمع المستفيدة من الجامعة مثل أرباب العمل مثلاً.
كما أن حجم العينة وطريقة إختيارها فيها عدة إشكاليات. في آخر تصنيف إعتمد QS على آراء 100000 أكاديمي.
رغم أن حجم العينة يبدو كبيراً إلا أنه صغير مقارنة بعدد الأكاديميين وعدد كل الجامعات في العالم.
ثم أن أي أكاديمي ليست له دراية كافية بكل جامعات العالم ومعرفته بالجامعات في العالم ذاتها فيها عدم حيادية، وبالتالي سيكون هنالك دائما عدم حيادية في الإختيار.
فمثلاً عدد الأصوات التي حصلت عليها جامعة الخرطوم يعتمد إلى درجة كبيرة على عدد الأكاديميين السودانيين الذين تم إختيارهم في العينة،
وبالتالي عدد الأصوات التي حصلت عليها جامعة الخرطوم لا تعبر عن سمعة الجامعة بقدر ما أنها تعبر عن الطريقة التي تمت بها إختيار العينة.
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: Hafiz Bashir)
|
Quote:
أنا في رأيي أن التصنيف ذاته عملية غير مجدية إذا أنها لا تراعي السياق المجتمعي الذي تعمل فيه الجامعة.
كما أن التقييمات دائما تستخدم مجموعة محدودة من المعايير على كل جامعات العالم مما يجعل هذه الجامعات أقل استجابة وأقل صلة بإحتياجات مجتمعها المباشر.
أيضاً هذه التقييمات تصرف الجامعات عن مسؤولياتها الإجتماعية وتجعلها مهتمة فقط بالأنشطة المتعلقة بالتصنيف دون مراعاة ملاءمتها لرسالة الجامعة.
|
راى وافعى
اعتقد انو هعمليه التصنيف ممكن تتضمن ضبط المعايير وترتيبها ومن الافضل ان كان لابد من تصنيف عالمى انو يتكم محليا واقليميا وفق المعايير المتفق عليها مع وضع مساحه خصوصيه فى التغييم لاختلاف المجتمعات والتنوع الجغرافى والامكانات المتاحه ماديا لتمويل واداره البحث العلمى ...الخ ويكون التصنيف الافليمى(اتحاد الجامعات الافريقى مثلا) معتمد ومسترشد بالتصنبف المحلى (السودان مثلا) ثم الانتقال للتصنيف العالمى اللى ممكن يكون فى معيار او معايير للمفاضله تضع فى الحسبان التباينات فجامعات افريقيا اوضاعها تحتلف عن امريكا الجنوبيه وعن اوروبا ...الخ
من اهم المعايير المفروض تكون موجوده لغه نشر البحوث - صادفت احيانا اوراق منشوره فى مجالى (علم تطبيقى ) بلفات امريكا الحنوبيه جعلتنى استبعد الاوراق لمشكله الترجمه المباشره اذاكانت متاحه بصيغه PDF- مع ماللى بتحدد سعه انتشارها فالدول اللاتينيه تصدر بحوثها بالاسبانيه او البرتغاليه وهناك اللغه الفرنسيه ناهيك عن لغات زى لغات اوروبا الشرقيه
لذلك عمليه التصنيف العالمى عمليه معقده مالم تدار على مستويات كما ذكرت سابقا
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: Asim Ali)
|
Quote: هل إنت قاصد إنو التقييم هو تقييم مواقع الجامعات؟
أم إنك قاصد أن مواقع الجامعات هي مصدر البيانات للتقييم؟ |
تقييم المواقع كيف يا عمك! دة إلا يكون تصنيف W3C :)
مصادر البيانات هي الموقع الرسمي للجامعة
رغم إنه لاقاني في واحد من التصنيفات زمان 5 درجات للأنظمة الالكترونية بالجامعة
_______
تصنيفات الجامعات بشكل عام ما عندها جهة معتمدة زي ولا معايير محكمة زي تصنيفات اتحاد كرة القدم مثلاً ، لكن برضو الاهتمام بيها يدفع الجامعة نحو الأفضل. في النهاية هو مجهود إضافي إذا ما نفع ما بضر
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
اذكر قبل مضي عشرة كان في تيم
من جامعة الدول العربية في جولة
ربما لتقييم المكتبات وقبل زيارته
باسبوع كانت إدارة الكلية التي تم
اخذها معينة قد انخرطت فجأة في
اعمل بوهية وستائر ودولايب جديدة
وترابيز خلال ثلاثة أيام
المهم لمن جاء الوفد طبعا مجهزين ليه
مأدبة كارلو ممكن نظام اذا اكلت البطن
استحت العين وللأسف سمعت رئيس اللجنة
يقول للعميد نحن ما جايين ناكل ورانا شغل
فقط سوقونا على المكتبة وطبعا للاسف كان
بيقول ليهم دي كتب عفا عليها الزمن
يعني في الارفف كان بيطالعوا كتب
فورترون وداتابيز فوكس برو وعند السؤال
انكم الان بتقروا الحاجات دي وبالاجابة
بلا بيقول لهم ده حشو الارفف ولا منظر
ويقول لهم يبدوا أن المكتبة خالية من أي
تحديثات تتوافق مع المقررات
عموما تجد الجامعات في السودان عايش
على الماضي وكون التصنيف ليس فيه
حيادية فهذا لايعني أن الجامعات السودانية
بخير فغياب الإمكانيات حتما ينعكس على العملية
التعلمية وغناءها أو فقرها
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
يا احمد عمر البلد دى الله اعلم يحصل فيها تقدم حقيقى قريب وحنعيش عصور ظلام علمى ومعرفى بعيد عناستهلاك التكنولوجيا والانترنت فى امور هامشيه.
كليتنا كانت كليه جديده ومفروض لجنه من التعليم العالى تمر على الكليه وامكانتها وحسب طبيعه تخصصات الكليه بشكل اساسى المعامل. برضو قبل فتره لالخبر وصلنا واجهزو من ضمنها تجهيز (lab manuals) المهم مشرف عملى كل مستوى دراسى جهز الكتيب بتاعو واغلبو مصور من مراجع وكتيبات عملى وبتذكر انا كنت مشرف على السنه وكنت اصلا بديت تجهيز كتيب عملى حسب امكانات وتجهيزات المعمل عندنا .المهم الفنيين جهزو المعامل شكل معرض وفى معمل ختينا نسخ الكتيبات الاربعه ومنتظرين من الصباح ترتيب وتجهيز .والجماعه وصلو ودخلو مكتب العميد وبرضو برنامج فطور مظيوط وبارد وشاى ..الخ وقريب الضهر الجماعه جو مارين ومن البنش الاول جنب الباب قلبو سريع الكتيبات وتعليقات استحلن واتخارجو الوقفه كلها ماتمت خمسه دقائق وقسمنا ببيوم بعد سنوات معمل اولى امكاناتو ناقصه وسنوات التخصص يتم تلتيق برنامج ماعندو علاقه بالمنهج البيدرس فى المستوى / السنه الدرسيه المعنى والكارثه اهم برامج العملى يستبدل العملى بزياره (خلال يوم دراسى) لمركز بحثى وكدا خلاص يقولو برنامج العملى تم وحتى الممتحن الخارجى اصبح وجود شكلى زى ناس اللجنه الذكرتهم فوق المهم كل مره واحد يجيب استاذ من اصحابو عشان المقابل المادى لقصه ممتحن خارجى
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: Asim Ali)
|
يا عاطف نعم الإمكانيات مشكلة
وممكن اديك أمثلة بسيط من واقع
ما عايشت مثلا طلاب في السنة الرابعة
أو الخامسة خريجين يجو زيارات علمية
في الحقيقة هي ترفيهية تدعوا لها أو يدعوا
القسم المعني وتكون الرحلة أو الزيارة من
الاقاليم لطلاب يدرسون أحد فروع الحاسوب
كان تقنية ولا نظم أو شبكا ظلت للاسف تجد
الطالب اللي جاي من الأقاليم وهو على أبواب
التخرج ليبحث عن حظهن أو حقه في سوق العمل
تجده لا يفقه شئ لانه للاسف وانا احكي لك عن أشياء
مر عليه أكثر عشرة أعوام فكان الطالب القادم في رحلة
علمية يتفاجأ أن طلاب الخرطوم بحوث تخرجهم على أجهزة
حديثة وتعمل بنظامي الويندوز واللينوكس وحتى طالب
الخرطوم تطبيقاته على أنظمة اللينوكس وطالب الأقاليم
يقول لك أن اللينوكس فقط ذكر له بأنه واحد من أنظمة
التشغيل مفتوحة المصدر
طيب يافويلح اللي تهاجم في الناس وانت لا تعرفها
ده بسبب قلة الإمكانيات وجعلت فرق في المعرفة
ام لا ولا انت حاسب الشغلة مكاوة وبس ومن قال
أنه استاذ جامعي عشان تشوت ضفاري
نحن فتحنا باب النقاش لنبكي عن تأخر جامعاتنا في
حين أنه تصدرت جامعة وليدة في قائمة التصنيفات
ولعمري ما رفعهن الا إمكانياتهم المادية التي بها وفروا
كل شيء وفروا المعمل والمرجع والمدرس وكنت أرى في
الجامعات الخليجية أنها تستجلب الاستاذ صاحب المرجع
نفسه لتدريس مادته ويغدقون عليه ويغرونه بالمال اها
دي امكانيات ولا شنو
احسن خلي المماحكة وناقش في صلب الموضوع
يا استاذ عاطف
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
هههههههه براحة يا سميي
عطوفي دة خليهو لي براي
عطوفي يا الحبيب كيس ملاكمة :) لو عندك أي شتيمة حارقاك وما قادر تقولها لي زول تجي تلصقها فيه طوالي :)
لكن موضوع نقاش وحوار دة ما معانا
عاطف دة سخلة ساي عندو لستة بتاعة أعضاء أول ما يشوف واحد منهم بجي يتحكحك في الحيطة
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
الفضاء الحر لا يعني أننا نكتب
ما يليق وما لا يليق
بعدين ياريتك تكون واضح
في كلامك وماذا تعني استاذك
من استاذ من ومن اين لك هذا
هل تصدق انا لا اعرف اي احد
في سودانيزاونلاين ولا
اظن انني التقيت اي احد منهم
من يوم بدأت اشارك في هذا الموقع
من العام 2001 تقريبا
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
شوف انا سوف اناقش معك جوهر الكلام
وباقي كلامك ده ما يهمني في شئ هو كلامك
ويمثلك بل ويمثل كل من يتلفظ به
ولست هنا في معرض الدفاع عن فلان
أو علان .
بالنسبة للجامعة الوليدة وتقدمها وتأخر الجامعة
العتيقة هذا أمر بديهي اذا
أن الجامعة العتيقة من المفترض
لها خبرات تراكمية تساعدها
في تلمس الجديد من المعارف
وقد حدث خلال العقدين الأخيرين
ظهور التكنولوجيا بصورة
قوية وارتباطها بتقدم
أو تأخر العملية التعلمية
وهذه الخدمات التكنولوجيا
باهظة الثمن والى يومنا
هذا خدمة الإنترنت التي تعتبر
عمادة في العملية التعليمية
تجدها شئ عزيزة في جامعاتنا
والتي تساعد الدارس والمدرس
والمؤسسة في المواكبة .
وجامعات وليدة حديثة عهد كما
جامعات الخليج لما توافرات لها الإمكانات
استطاعت ألمواكبة لكل ما هو حديث
ولذا استطاعت أن تقفز قفزات هائلة
في ظل تراجع جامعة مثل جامعة الخرطوم ذات
المائة عام ويزيد والتي لم يتبقى منها إلا
اسمها.
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
على فكرة بعرف انزل معاك لمستواك التحتاني
حيث تقبع في المؤخرة حسب رغبتك وقناعتك
الا الواحد يحاول يرفع نفسه عشان كده
خليك تحت في المكان الذي يليق بك ويشبهك
لانه ليس هناك من سبب لتقول عني جاهل ومتثاقف
وشويبر وكلام على هذه الشاكلة لكن فيما يبدوا فهذه
لغتك وتلك سجيتك
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: احمد عمر محمد)
|
Quote: لولا خوفي من فهم غلت لقلت انك من افضل من ناقشتهم
إن لم تكن افضلهم!! |
انت بقيت بتناقش من ورانا ولا شنو يا حافظ؟
هسة أفرض سألوني قالوا لي حافظ بعمل في شنو أقول ليهم بتناقش مع عاطف ؟
يا ديني النبيييي .. أنزلك الدهر وأنزلك حتى قيل حافظ وعاطف :)
نظرت من سقطي :)
يا أحمد عمر محمد روّق المنقة يا حاج .. الزول دة اتشعبط فيك قايلك تبعنا
Quote: Atif Omer Mohamed Ali
يا احمد عمر محمد
لك العتبى حتى ترضى
ولجميع من توهم او ظن اني امسه في شخصه!!
وانما الاعمال بالنيات
وأسال الله الا يجعل لنفسي حظ فيما اكتب!! |
امسك الاعتذار دة وصافية لبن .. وحاة الطلاق ما تقول حاجة
مالك ومال السخلات انت! القاذورات التحت دي خليها لينا نحن بنعرف ليها :)
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
Quote: ما بعرف عن البنوك لكن في حالة الجامعات المعايير منشورة ويمكن التأكد منها مباشرة من مواقع الجامعات
التلاعب ما بيتم بإنك تدفع قروش للمؤسسة صاحب التصنيف وإنما بإنك تدفع قروش لبروفيسور حامل جائزة نوبل مثلاً كما تفعل بعض الجامعات الخليجية وتصوره ضمن أعضاء هيئة تدريس الجامعة في حين إنه علاقته بالجامعة تكون اشراف على مشاريع تخرج فقط وعن بعد كمان |
المعايير المالية برضو منشورة ومتعوب عليها؛ ولديها لجان متخصصة ومقار مؤسسة وتخصصات عميقة ومعايير دقيقة جدا لدرجة يمكن أن تعطيك تصنيف البنك أو المؤسسة المالية في رقم تصل اجزأؤه لثلاث خانات بعد الفاصلة العشرية ؛ ورغم كده بيحدث التلاعب والتجاوز والتصنيف غير الموضوعي، وفى مجال التعليم العالي يحدث ما هو أسوأ؛ وقروش الجامعة ممكن ترفعها أو تحطها رغم أنف المعايير، ومعايير الجودة والالتزام والاعتماد الأكاديمي واحدة من تلك المعايير الأكاديمية التي اذا غصا فيها ستجد ان اغلب الجامعات المصنفة فوق هي جامعات ثرية، لأنها لديها القدرة لانتزاع المنتوج العلمي من الأساتذة، وانت اه الأساتذة المميزين أنفسهم من جامعتهم، ولك أن تتخيل مدير الجامعة التي كنت أعمل فيها كان يقف في صف المعاينات، وعندما سألته مقدم منو قال لي مقدم نفسي.. قادر تتخيل القرش بيعمل في التعليم شنو؟ جامعات عريقة مثل جامعة الخرطوم رغم عمايل الكيزان فيها مازالت الاجود تعليما وقدرا بين اغلب الجامعات العربية؛ ولكنها في التصنيف العالمي تتذيل الجامعات التي تصدر اليهن الأساتذة والمناهج.
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: عمر التاج)
|
| Quote: جامعة الخرطوم رغم عمايل الكيزان فيها مازالت الاجود تعليما وقدرا بين اغلب الجامعات العربية |
ياااا زول! معيارك شنو في الكلام دة؟
"جودة التعليم" دي كلمة صعبة خلاص لو تدري .. وحاة الله قريتها ساي ضهري وجعني من قعدة الاسكانر :)
طبعاً موضوع جامعة الخرطوم دة عاطفي ساي .. الناس بتقيسها بي تميز خريجيها لكن هم أساساً كانوا متميزين أكاديمياً وأوائل فصولهم قبل يدخلوها ولو درسوا في جامعة ام طرقاً عراض برضو حيتميزوا
لكن الجامعة نفسها من ناحية حداثة مقررات ومواكبة العلوم والطرق الحديثة في التعليم راقدة مستشفى
في المقررات كمبيوترمان أو جامعة المستقبل حالياً تتفوق عليها بسنين ضوئية بس لأنها جامعة خاصة بتدخلها نسب متدنية ما بتحس بالتميز دة
الحاجة التانية مصطلح (أغلب الجامعات العربية) دة برضو مطلوق ساي معتمد على أكذوبة فكيناها في روحنا وصدقناها بإنا العالمون إذا درسنا وخير من اشتغل في أي مجال .. في حين إنه أي زول لو نظر بعين الحياد بكتشف إننا عاديين جداً وفي جنسيات كتيرة أذكى مننا بمراحل
| |
|
|
|
|
|
|
|
|
|
Re: تصنيف الجامعات العربية ومكانة جامعاتنا (Re: أحمد محمد عمر)
|
Quote: ما بلقا عندك المجموعة الكاملة
لمدائح اولاد حاج الماحي؟
ههههههههههههههههههههههههههههه |
عندي المجموعة الكاملة لأولاد حاج الماحي والمجموعة الكاملة لأولاد حليب والمجموعة الكاملة لود سعيد
وكل من صدح مادحا في أي قرية بين الكاسنجر والغابة
لكن اول حاجة لازم إنت تعرف ابجديات ادب المدائح
اولاد حاج الماحي لم يرددوا مدحة لراوي غير حاج الماحي
| |
|
|
|
|
|
|
| |
احمد عمر محمد
عمر التاج
Asim Ali
Hafiz Bashir
فيس بوك
تويتر
انستقرام
يوتيوب
بنتيريست