ناس السيادي والوزراء لمن يجو الالمان البدلة بالكرفتة والكرفتة دي حدها بداية الحزام مش تخليها مدلدلة لامن تقرب تعتر ليك . . قصة البدلة الكاجول دي ايوة هي ظريفة وقاعدين تلبسوها لينا طوالي لكن هسي في ضيوف وانتو رجال دولة ما بودي قاردات في لاس فيقاس . . استاذ فيصل والسيد مدير التلفزيون من هنا لحدي الاربعاء بثو لينا برامج كيف تصنع عصير الليمون وأي لقاء مع فنان نفسكم فيه عشان الخميس في ضيوف جايين وقصة انو نشوف اخبار بلدنا في قناة الجزيرة والعربية دي حاجة ما حلوة في حقنا . . خلصو كل عصاير المفترض نتعلم بتتعمل كيف في اليومين الفاضلات ديل ليمون شعير قضيم المهم الخميس تكون تلاجتكم فضت . . السادة المكتب الاعلامي عشان ما يحصل دفر ومشاكل مع الصحفيين بكرة الصباح ترسلو دعوة لكل الصحف والقنوات والوكالات يحددو مناديبهم وتتعمل بطاقات لطيفة للدخول بالاسم وتراعو في القصة دي سعة القاعات بتاعت المؤتمرات . . بعد كل جلسة مباحثات بكون في مؤتمر صحفي صغير ، منصتين جمب بعض واحدة لزولنا وواحدة لي زولم ووراهم الاعلام وخلفية شعار السودان ستائر ما معانا ومافي زول يقيف جمب الزول البتكلم والتوم هجو ما يحضر اي مؤتمر لانو لو حضر حيقيف جمب البتكلم واحتمال قدامو عديل . . السادة المسئولين ما تتونسو مع الالمان ونسه شخصية وتعملو البساط احمدي بفتوكم لانو الحاجة دي غريبة بالنسبة ليهم يعني قصص زي انا بشجع بايرن ميونخ حتلقاها بكرة في الصحف الالمانية . . علي عثمان ايام نيفاشا ضرب لي وزيرة التعاون النرويجية في وقت متاخر فضفض ليها جات حكت كلامو كلو في كتاب اسمو (اندلاع السلام) . . معليش تعبناكم معانا . .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة