برهان،حميدتي،جبريل،عشر،صندل ، مناوي ،أردول و هجو

Quote: لازم تقرأ الكلام ده.. النظام بسقط كيف؟ شوف.. نكون واقعيين.. المليونيات بكل زخمها، فكرتها انها تدي تفويض للجيش بنحاز للشعب وينقلب على الحكم.. بس إنت شايف صمت الجيش.. ليه ما حصل إنقلاب.. ؟! ما عشان جيشنا ما فيهو شرفاء.. بالعكس أنا واثق انو فيهو شرفاء و أولاد ناس، ما راضين عن البحصل لأخوانهم الثوار.. بس أي إنقلاب هو مغامرة غير مأمونة.. البرهان كان ذكي.. عمل مجلس عسكري من 6 أفراد موزعين على طيف التراتبية العسكرية للجيش.. وفوق ده ضم ليهم الجنجويد، والحركات المسلحة.. وقبل يومين عمل مجلس شركاء وسع فيهو قاعدة القيادات العسكرية.. الفكرة شنو؟! ببساطة هو خايف من الإنقلاب عليهو.. وعايز يوزع المسؤولية على الجميع.. فعمل بمبدأ (تشتيت الدم بين القبائل).. عشان أي عسكري حيفكر ينقلب عليهو، يلقى قدامو معضلة تعدد القادة.. ومعضلة الجنجويد.. ومعضلة الحركات المسلحة.. وديل خارج التراتبية العسكرية للجيش، وما حيخضعوا لأي إنقلاب وحيقاوموه بالسلاح لأنو حيسحب إمتيازاتهم.. (عشان كده المجلس العسكري ما حيدمجهم في الجيش إلى الأبد.. لأنهم بمثلوا ليهم طوق نجاة أخير) مقاومة الجنجويد والحركات المسلحة للإنقلاب بتعني حرب عصابات داخل الخرطوم.. فهمت ليه ما حصل إنقلاب حتى الآن!!.. ولا حيحصل.. لانو أي عسكري فاهم إنها مغامرة.. وتكلفتها أعلى من التكلفة الحالية.. يبقى خيارنا شنو لإسقاطهم..؟! التجفيف المالي يا ترس.. نسقطهم من داخلهم.. العصيان المدني بشل حركة البلد، وبضرب الإقتصاد.. العصيان، بالإضافة لتتريس البلد.. كمان انك ما تدفع قرش لمؤسسة حكومية.. تأجل أي إجراء حكومي حيدخل قروشك في جيوبهم.. لأنو قروشك حتستخدم في تصنيع بمبان يخنق أخوانك.. أو شراء الرصاصة الحتقتل أهلك.. ما تنسى انو المجلس العسكري سحب الإحتياطي النقدي من البنك المركزي (مليار ونصف المليار دولار) وصرفها على قواته في خلال شهرين ونص بس.. و دي تكلفة مالية عالية شديد.. العصيان المدني بعمل 3 حاجات مهمة شديييييييد: ١- بحافظ على الأرواح.. دي أهم نقطة. تترس وتولع لساتكك وتختفي.. خليها بلد أشباح.. ٢- نسبة المشاركة الشعبية فيهو أعلى، على عكس المليونيات.. ده برهق العساكر لأنهم حيواجهوا كتلة بشرية أعلى.. وبخليهم في حالة إستعداد دائم.. وسهر الجداد ولا نومو.. ٣- بخنقهم إقتصادياً، وبجفف مصادر التمويل.. ما حيلقوا قروش يصرفوها على المليشيات المرهقة بفعل السهر والجري خلف المتاريس.. ما تنسى انو الحركات المسلحة تفكيرها مادي بحت، وما حتقبل أي تأخير في صرف رواتب وحوافز جنودها.. إستحقاقات السلام زي ما بسموها.. هي مسألة زمن.. و last man standing.. حيبدأ الهروب من الخدمة.. حتبدأ الإنشقاقات.. وحيبدأ التمرد.. وحيبدأ الشك من الإنقلاب الداخلي يغزوهم.. وحتشوف بعينك تساقط قطع الدومينو.. وقتها.. ووقتها بس، وبدون قطرة دم واحدة.. حيسقطوا من تلقاء نفسهم.. حيسقطوا بسرعة تحيرك.. فشنو.. العصيان بس #العصيان_المدني_الشامل 🔥🔥🔥