يحكى ان جماعة من البشر متباينة السحنات واللغات والأهداف خدمتهم الظروف ولقوا نفسهم فجأة كده على راس مشروع مشترك، اها المشروع ده بيحتم عليهم انو يركبوا طيارة مع بعضهم ، ويقطعوا مسافة تقدر ب (1095 كيلومتر) قاموا ركبوا التونسية (قصدي الطيارة) الناس ديل شايلين معاهم زوادة تكفيهم 36 شهر بس اصحابنا ديل ما شالوا معاهم إلا موبايل واحد بس وتوكلوا على الحي الذي لا يموت اها يا سيد عمك الطيارة دي بسبب سوء (الأحوال) الجوية تعطلت كل اجهزتها واضطروا يهبطوا بيها في غابة كثيفة، مجهولة الموقع على الخريطة الدولية، الغابة دي مليانة وحوش شرسة، جيعانة ومتعطشة للدم.. اها يا سيد عمك بقت عندهم وسيلة واحدة بس عشان يتواصولوا مع (شعبهم) اهلهم، وجماعاتهم الخاصة، الوسيلة دي هي الموبايل الوحيد .. قوم يا سيد عمك الجماعة بعد ما فكت السكرة وجات الفكرة اجمع تجمعهم على ان يتولى مسئولية التواصل والتوصل ومسك التلفون، بعضهم قال التلفون ده (اشتراكية) يجب ان يتولاه الجميع، البعض الأخر قال (انهم اغلبية) ومن حقهم يستخدموا التلفون ده اطول فترة ممكنة المهم التجمع بالزوق بالعافية مسك التلفون ... وما ادراك ما التلفون، اها الجماعة بقوا في الأمر الواقع.. اها بين كده وكده بقى واحد فيهمبيكلم في فرق الإنقاذ: - الو الو.... لو في حد سامعني يرد علي.. - الموبايل- اشششششششششششش - الو الو الوووووووووووو نحن يا جماعة في ورطة، حد يساعدنا... - الموبايل: اشششششششششششششش اششششششش واحد من الجماعة كرب ليه كباية شاي مقنن 100% ووزع للجماعة، وادى صاحبنا الماسك التفلون كباية نصيحة جد.. صاحبنا يجم، ويتكلم: - الوووووووووو الوووووووووووووو - اششششش اششششششششششش صاحبنا لمن شرب اخر الكباية، سمع ليك صوت من الطرف الأخر: -الوووووووووووو الوووووووووووووو معاك فرق المقاومة انت منو ؟ فرحة عامرة تجتاح المتجمعييين اخيرا اخير... - معاك تجمع المستثمرين.. - ان شالله خير؟ - ياخي نحن في ورطة ومافي طريقة نمرق منها الا تجونا ... - انت وين بالظبط؟ - والله ما عارف نحن وين، لكن نحن في غابة كدي... - اها عندك فكرة عن موقع الغباة .. اديني الإحداثيات - كويس خليني ال ارسل ليك الموقع عن طريق قوقل ماب..
وبينما صاحبنا يحاول ان يبعث بالموقع عن طريق القوقل ماب، كان قد انتهى من كباية الشاي حتى اخر قطرة، فمضى بها ناحية انا مليء بالماء لغسيل العدة ليلقيها فيها، فالغاها وما كاد يفعل حتى ادرك انه قد القى الموبايل في الإناء بدلا عن الكوب... انتهت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال المنصوري
فيس بوك
تويتر
انستقرام
يوتيوب
بنتيريست