|
|
|
 Re: الواضح ما فاضح: ها هى ازمة الحواكير (Re: Mahjob Abdalla)
|
Quote: الحواكير ضمن هذه المصطلحات
لنعرف ماذا بالضبط في هذه الجغرافيا |
سلام استاذ علي,
شكرا لمرورك الكريم.
عندنا في دارفور, ممكن اى شخص يجى عابر و لو عجبو المكان يقعد ضيف اسبوع او شهر و بعد شهر اوشهرين عادى ممكن اتزوج و صار من جزء من المجتمع.
لو عجبتو الحتة جد جد ممكن يوصى لاهلو في المنظقة الـ جاء منها انهم يجو يحصلوهو.
بعد شوية لو عددهم بقى اكبر ممكن يؤسسو قرية صغيرة و كدا بكونو مؤهلين يكونو مشيخة (سلطة) بتصديق من العمدة. -
لو بعد فترة جاء عدد اضافى من نفس المكون و بقى عندهم قريتين او ثلاثة او اربع, و هكذا ممكن يكونو عمودية , العمودية (سلطة) هى مجموعة مشايخ بأذن من الناظر او الشرتاى او الملك او السلطان حسب تراتيب السلطة في القبيلة المعينة.
و لكن مهما زادت اعداد المجموعة لا يمكن ان يكونو نظارة او ملوكية او سلطنة (كاعلى سلطة في تلك الحاكورة).
علي قول النظارة, هل تتذكر بوست قبل شهرين او ثلاثة عن مشكلة كادت ان تتحول الي حرب بين قبيلتين في منطقة تابعة لولاية الخرطوم بسبب محاولة احدى القبائل تكوين نظارة و رفضت القبيلة التى تدعى ملكية الارض تكوين تلك النظارة رغم انو القبيلة التى تريد ان تنشئ نظارة استقرت في المنظقة لمئات السنين؟
هل تعرف السبب؟ السبب هو مبدأ التراتبية السلطوية. تلك القبيلة كانت عندهم مشايخ و عموديات و لكن حاولو اقامة نظارة (دولة داخل دولة) و لذلك رفضت القبيلة صاحبة الحاكورة (الدولة) مبدأ اقامة نظارة (دولة) اخرى داخل حدودها.
هذا المفهوم واحد بغض النظر عن المسميات من منطقة الي اخرى في كل السودان.
في دارفور اسمها الحاكورة من مسميات سلطنة الفور التى حكمت دارفور من حوالي 1500 الي 1880 و المرة الثانية بواسطة علي دينار من 1900 - 1917
| |
 
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
البحصل في دارفور ليست حرب قبلية. كانت اعتداءات من قبل الرحل علي الزراعة و تحدث احتكاكات, لو كان الناس يرفضون وجود الرحل اراضيهم لما تم فتح ممرات للمراحيل و لما كانت هناك قوانين منذ زمان سلطنة الفور التى قننت فتح ممرات لعبور البهائم دون اتلاف الزراعة و لما كانت هناك قوانين تحاكم الذين يخلون بتلك القوانين.
كل الذى حدث هو اخلال طرف واحد بهذه القوانين.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
Quote: بالنسبة لمسألة الديار والحواكير، دا نظام موجود فى كل السودان( ربما ما عندهم مصطلح الحاكورة) لكن قطعا كل السودان عندهم مسألة الديار. مثلا فى:
١- شمال السودان عندهم ديار الدناقلة/النوبيين، المحس، والسكوت، والمناصر، والجعلين والشايقية، الخ. وطبعا ديار الحلفاويين صودرت منهم وهجروهم الى حلفا الجديدة
٢- شرق السودان، عندهم ديار الهدندوة وبمشتقاتها(خشوم بيوت) ، والبنى عامر، والبجة،الخ.
٣- فى الوسط عندك ديار البطاحين، والشكرية، والجموعية، والحسانية، الخ.
٤- كردفان، عندك ديار الحمر، والبديرية، الشنابلة، والمسيريرة الحمر، والمسيرية الزرق، الحوازمة، وكذلك عندك فى جبال النوبة عندك ديار الغلفان، والنماق، والاجناق، الخ.
٥- جنوب السودان(لما كانت موحدة مع الشمال) عندك الدينكا عندهم ديار دينكا اويل، دينكا مارتل، ودينكا واو، دينكا ابياى، دينك رمبيك، دينكا بور، الخ. ونفس الشيى مع النوير، والزاندى، والكاكوا، والكريج، والفرتيت(جزء منهم فى جنوب دارفور)
٦- دارفور، عندك دار المساليت، ودار تاما، ودار قمر، ودار زغاوة، ودار الميدوب، ودار الببرتى، ودار المعاليا، والرزيقات، والداجو، الخ.
اما بالنسبة لدارفور، ففى داخل كل دار بكون فى عموديات ومشايخ، ودمالج وفرشايات، وعقدة، مقسمة ما بين اصحاب الدار(القبيلة المعنية) وبقية القبايل المختلفة العايشة فى نفس الديار ( بكون لكل قبيلة اراضى ملكية/حاكورة) ودا بتوقف على القبيلة الغير صاحبة الدار هل عندها عمودية ام مشيخة، فاذا كان يمكلون عمودية او مشيخة عندهم الاحقية فى امتلاك الحاكورة. ام اذا كان لا، فلهم حق الاقامة والانتفاع فى الاراضى(زراعة او رعى). |
في كلام بقول ((ويقال ان اصحاب الديار الاخرى فى الشمالية رفضوا ان يقبلوا بالحلفاويين على ديارهم لذا النظام فى ذلك الوقت اختار لهم حلفا الجديدة))
هل هذا صحيح؟
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
تشكر يا محجوب. تابعت الفيديو إلى النهاية لأنه كلام مثير لكن ما عرفت أخونا دا تابع لناس وين!! كلهم اخوانه في دارفور وهو ما معروف. لكن كلامه فيه شرح واضح ويمكن معظم المتابعين عارفين بعضاً منه.
دارفور التي أصبحت لا أهل لها، رغماً عن أنف الفور أصحاب الساس والراس. مين عامل المشاكل في دارفور؟ قطعاً ليس الفور.
ما جلب البلاء إلى أرض الفور غير الزغاوة والعرب، دي حقيقة. الفور أصحاب ممالك وسلطنات وحواكير.
إذا كان الشاب الواعي ده زغاوي فهو لا يختلف عن عرب حميدتي، لأن الزغاوة جايطين من تشاد إلى السودان قبل العرب العايشين في النيجر أو في تشاد.
فــ شفت يا هبيب، الفور المعروفين لا يمكن أن يعتدوا على أحد. الزعاوة والعرب في دارفور أو القادمين من بلاد أخرى إلى دارفور هم سبب الكفوة.
وفي النهاية حميدتي نجح وتمكّن وسوف يجد مؤيدين في الداخل والخارج ... ويضيع الفور.
لا تحلموا بعالمٍ سعيد.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Shinteer)
|
سلام اخ شنتير
و شكرا لمرورك الكريم.
يمكن ان نحاسب الشخص حسب ما بذله من رأى بعيدا عن انتمائه القبلى.
ما قاله هنا قد يساهم في فهم المشكل و بقول في المثل (فهم السؤال, نصف الاجابة).
في تقديرى الشخصى, اغلب الناس (المسؤولين بالاخص) ما قادرين يستوعبو الفرق بين الارض و السلطة و لذلك كل محاولات الحلول تأتى في اطار تصنيف الارض و السلطة (الحاكورة) كشئ واحد. حتى مفاوضات جوبا الاخيرة نصت علي (ازاحة المستوطنين الجدد من حواكير السكان الاصليين).
بدلا من القول بتأمين الاراضى الزراعية الممكوكة و فتح ممرات العبور و انفاذ القانون علي من يعتدى علي زراعة الاخر.
الفرق كبير بين ارض (زراعية) و حاكورة (سلطة) و لا يمكن تنقل كل المواطنين او غير المواطنين في اى مكان و حق التملك في اطار القانون و ليس بالاعتداء او الاستيلاء.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
المسألة أعقد مما نتصور
أعملوا فينا معروف يا الواطين الجمرة
وأشرحوا لينا شوية تعقيدات الصراع في دارفور
وورونا هل نفرح لهذا السلام ولا شنو بالضبط
دايرين سلام وما دايرين حرب ولا تشرد ولا بشتنة للبشر السودانيين
لكن ما نيل المطالب بالتمني لكن تؤخذ الدنيا غلابا
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
الأخ شنيستر
| Quote: دارفور التي أصبحت لا أهل لها، رغماً عن أنف الفور أصحاب الساس والراس. |
الفور ما عندهم حاكورة معينة ..تأريخيناً .. لأن البلد كلها حاكورتهم .. يحق لهم العيش في أي مكان ..
محجوب، هل الفور الأن حصروهم برضو في حاكورة معينة؟
-------------------------------
لكن ما تنسوا دماء الفور هى خليط من كل دماء أهل دارفور .. وأهل السلطة في قبيلة الفور هم فرع الكيرا (أحفاد خيرا) وجذورهم عربية والأخ محجوب كان أسمه المستعار في المنبر "شاو دور سيد" وشاو ودالي هما أبناء أحمد المعقور مؤسس السلطنة وهو عربي الأصل .. أها الكلام دا ككيف؟
بريمة
| |
|
|
|
|
|
|
|
|
Re: الواضح ما فاضح: ها هى ازمة الحواكير (Re: muntasir)
|
| Quote: غايتو ناس بريمة ما فضل ليهم إلا يتسلبطوا في ملكة بريطانيا عندك فكرة إنه فيها دماء آل البيت غايتو ألحقوا غزوا ليكم عمود في باكنغهام بالاس كرهتو عادل ويستمنستر ذاتها |
سلام منتصر
اصلو كان المسألة بقت جدود السودانيين كلهم من بره, فيحق لي ان اقول جدى من الصين بحكم الاسم: شاو
رغم انو التاريخ في بعضو بقول انو كل شعوب العالم من افريقيا الا نحن السودانيين نقول جدودنا جاءو من خارج افريقيا.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Biraima M Adam)
|
ول أبا بكري عبد الله
| Quote: ثانيا شاو دورشيد مؤسس سلطنة التنجر والتنجر لا علاقه لهم بالعرب البتة |
هنا أنتم ترجمتم الأسم ترجمة حرفية من مخطوطات الرحالة نختيغال أو بروان .. هل قرأت لأبن بطوطة الذي زار الحزام السوداني .. أو كتب المغيرزي .. تجد الأسماء مختلفة.
حسي أسمي بريمة Biraima .. الحبش كلهم يقولوا لي " براهيما" .. قلت ليهم "براهيما" دا شنو؟ .. قالوا دا منسوب لأسم أبرهه .. يعنى زي ما تقول حمد وحميد وحميدتي ومحمدين وحامدين .. كلها فيها أسم محمد أو حامد ولما ظهر حميدتي ناس البحر أستهجنوا الأسم تماماً ونسوا أن بينهم حميد وحمدتو. وهكذا ما تزيفوا التأريخ .. غالطوا في الأصل الزنجي ونحن نغالط في الاصل العربي .. وكلو خير .. أنتم تقربونا من أخوالنا الزنوج ونحن نقربكم من أجدادكم العرب.
بريمة
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Biraima M Adam)
|
جيتك تاني يا بكري
| Quote: ثانيا شاو دورشيد مؤسس سلطنة التنجر والتنجر لا علاقه لهم بالعرب البتة |
التنجر ديل .. عرب بنو أمية .. قريت الكلام دا في كتب الـتاريخ أم لا؟
خليك من كتبنا السودانية ..زمان أنا ترجمت جزء من كتابات ألمانية وفرنسية وأسبانية عن التنجر وعن قبيلة الجور (اللو) في منطقة أبيي .. هل تصدق يقولون عنهم عرب قدماء في أفريقيا .. هاجروا قبل دخول الأسلام وكانو وثنيون .. فأسلم التنجر لدماءهم العربية .. والجور تزنجنوا .. فهربوا بوثنيتهم إلي أدغال الجنوب وأحتموا بها .. والأظرف، في أن الدنيكا .. رفضوهم رفض قاطع وكانوا يخافون منهم .. أسم اللو سموهم به الدنيكا .. ذو الأصل المجهول .. أو الجور .. أي المتجولون .. ! ..
----------------------------
"اللو ديل أهل العبار دينق .. تحت تحت دينق العربي .. لكن ما بقدر أقول بغم ..".
بريمة
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Biraima M Adam)
|
بالله يا بكري، بس لاحظ كلمة التنجر والجور .. (وفي حقيقة الأمر الدنيكا ما بنطقوها كده ..بنطقوها نجور .. أها تقول شنو؟) .. أنت ودينق أولاد عم رغم أختلاف المسيمات قبيلة واحدة في الاصل .. ويرجع نسبكم إلي بنو أمية مع أختلاف السحنات بسبب جداتنا الزنجيات.
بريمة
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Biraima M Adam)
|
الاخ محجوب شكرا لمحاولة توضيح مسألة الحرب أو النزاع في دارفور بطريقتك الهادئة الرزينة...فعلا مفهوم الحواكير قد يكون سبب في النزاعات وينبغي الالتفات إليه..
الأخ بريمة كل العادة واسع الصدر و الفكر و مستوعب للشأن القبلي و موضوعات الهوية التي نادرا ما يتناولها الناس هنا من خلال كونها متسعة و متشابكة و متداخلة..
ما المانع أن يكون الشخص أفريقي و عربي في نفس الوقت؟ ليس ضروري أن تكون النسبة كم و لكنها واقع إن لم يكن لدى قبيلة أو منطقة حسب الإدعاء فقد تكون لدى
أفراد في تلك المنطقة أو القبيل’ز الناس تجاوزوا فكرياً النقاء العرقي و لذلك استبدلوا العرق بالإثنية ..أي الميل أكثر للجوانب الثقافية و الاجتماعية...
لكن نحن لسه في حكاية عرب و أفارقة..الله يكبر العقول و يوسع الصدور.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: محمد عبد الله الحسين)
|
حديث مرتب وجيد
المتحدث
كان متسامحا جدا يقبل باستيعاب اى قبائل سودانية فى حواكير دارفور
بل حتى لا يرفض تواجد من جاء من خارج السودان ان يعيش فى دارفور بشرط ان لا يستولى على اراضى الغير
ذكر باستحداث 6 عموديات جديدة 46 بئر وهذا ما يؤكد التغيير الديمغرافى
ادعوكم للاستماع لحلقة فى الفيس تحدث فيها د مجدى الجزولى ود سليمان بلدو عن صراعات دارفور
د مجدى حدد ثلاث مستويات للصراع فى دارفور يجب التباحث حولها لايجاد الحلول
المستوى الاول وهو الصراع بين الهامش في دارفور والسلطة المركزية وهو ما ركزت عليه اتفاقية جوبا لتقاسم السلطة والثروة مع المركز
ولكن المستوى الثانى للصراع وهو صراع السلطة المحلى فى دارفوار لم يناقش
كذلك مستوى الصراع بين الرعاة والمزارعين
اكد د مجدى ان جذور الصرا ع ت ك من فى الاقتصاد وليس صراع اعراق
لحل مشكلات دارفور من الجذور يجب الكشف عن كل المسكوت عنه
من اى اراضى تم النزوح
ومن الذى استولى عليها
وكيف ترد الحقوق
عن طريق التنمية الاقتصادية والاستثمار فى الزراعة والرعي يمكن ان تستوعب دارفور الجميع وتسهم فى دعم الاقتصاد لكل البلد
اما الاتفاقيات التى تقف فقط عند تقسيم مناصب واموال لن تحل المشكلة مهما تعددت اسمائها وعواصمها
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: mohmmed said ahmed)
|
Quote: د مجدى حدد ثلاث مستويات للصراع فى دارفور يجب التباحث حولها لايجاد الحلول
المستوى الاول وهو الصراع بين الهامش في دارفور والسلطة المركزية وهو ما ركزت عليه اتفاقية جوبا لتقاسم السلطة والثروة مع المركز
ولكن المستوى الثانى للصراع وهو صراع السلطة المحلى فى دارفوار لم يناقش
كذلك مستوى الصراع بين الرعاة والمزارعين |
سلام استاذ محمد سيد احمد
فعلا, المدخل الصحيح هو مفتاح الحل و يأتى ذلك في هذا التقسيم الي ثلاث مستويات.
المستوى الاول يشترك فيه كل السودانيين و لكن درجة الوعى بخطورة الامر مختلف من منطقة الي اخرى. فمثلا جنوب السودان انتبهو للخل منذ عام 1955 و دارفور بدأ ينتبهه في الستينات و لكن بطريقة اكثر وعيا في الثمانينات و كذلك شرق السودان.
و بهذا نشوف انو كل السودان غير راض علي وضعية الخرطوم كمحور رئيسى في ازمات السودان.
اما الصراع المحلى حول السلطة في دارفور ايضا يمكن حلها في اطار الحل الشامل لكل السودان بترسيخ الديمقراطية و تكوين مجالس تشريعية علي مستوى الولاية و مستوى القطر وذلك يؤدى الي سماع اصوات كل الناس في كل مستويات الحكم و كذلك الخروج من فوبيا الهجرة ذات الاتجاه الواحد الي الخرطوم.
المستوى الذى تحدث فيه د. مجدى ربما لو استمعت الي حواره قد استطيع ان ادلي برأى فيما قال.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: محمد عبد الله الحسين)
|
| Quote: الاخ محجوب شكرا لمحاولة توضيح مسألة الحرب أو النزاع في دارفور بطريقتك الهادئة الرزينة...فعلا مفهوم الحواكير قد يكون سبب في النزاعات وينبغي الالتفات إليه.. |
سلام اخ محمد عبدالله و شكرا لمرورك الكريم
النزاع من طرف واحد لانو لو قلنا النزاع من طرفين كأننا بنقول المنطقة المستقرين (المزارعين) برفضو وجود الرعاة و لكن هذا ليس صحيحا.
الناس بترفض الجار الكعب و الذى يقوم بأذى جاره بأقسى انواع الاذى و هو القتل لا لسبب الا لانه يرى ان ماشيته اولى بالقندول الاخضر في الزرع.
اذا توقف هذا الاعتداء ف سوف يأتى الخير للجميع.
المشكلة ابدا ليست مشكلة قبلية.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Mahjob Abdalla)
|
Quote: المسألة أعقد مما نتصور
أعملوا فينا معروف يا الواطين الجمرة
وأشرحوا لينا شوية تعقيدات الصراع في دارفور
وورونا هل نفرح لهذا السلام ولا شنو بالضبط |
سلام نصر
شكرا علي سؤالك المباشر.
اشرح ليك ببساطة عسى و لعل تقدر تشوف المسألة بدون تعقيدات:
1. التعقيد يكمن في تعريف الحاكورة و الارض. يبقى,
1. الارض و فيها نوعين من الملكية: ارض سكنية و ارض زراعية.
2. الحاكورة هى السلطة علي الارض مقابلو في مصلحات اليوم (محافظة او ولاية او دولة عديل). يعنى سلطة ادارية علي بقعة معينة من الارض وبما انو في السابق كان الهجرة محصورة فكان التقسيم الادارى مبنى علي حدود القبيلة.
طيب هل في مشكلة زمان مختلفة عن الان: لا
من زمان في مشكلة الاحتكاكات بين الرعاة و المزارعين و لذلك وضعت القوانين في المحافظات (اقصد الحواكير) لادارة هذه الاشكالات, اولا بفتح ممرات العبور و ثانيا معاقبة الذين يخالفونها
الجد شنو؟
- اختلال معادلة القوة بظهور السلاح النارى (غالبا في ايدى الرعاة) في اواخر الـ7عينات و نتج عنها عدم احترام هذه القوانين من قبل الرعاة تجاه المزارعين + زيادة الرقعة الزراعية + الجفاف و التصحر + ضعف الحكومة المركزية + حل الادارات الاهلية. مع القوة معناها حسم الخلاف بالقوة (ادخال الماشية عنوة في الزراعة و حين الاحتكاك ينتج عنه القتل).
- منذ حرب العرب و الفور و ظهور منفستو التجمع العربى (المتعلمين) , ظهرت بوادر اجندة الاستيطان بمحاولة تهجير المزارعين بشتى الطرق
- مع الانقاذ و بداية التمرد, المسألة اخدت منحى مدروس و متكامل من قبل الدولة بتغيير الديمغرافية (تجنيد للحرب من كل دول الجوار الغربى + تجنيد + مقابل الارض) + طرد المزارعين الي معسكرات النازحين و الاستيلاء علي الارض
- جاءت مرحلة ما بعد سقوط الانقاذ: كيف العودة الى الارض؟ هنا في ناس جابوهم بأسم حكومة السودان و استقرو لاكثر من 10 سنين بأعتبار انه هذا الارض سلمتهم حكومة السودان. كيف تخاطبهم و تخبرهم بالحاصل دون دغمسة الامور؟
هذه هى المشكلة الان!
محاولة وضع المزارعين كأنهم يرفضون الاخر, هذا كلام لا اساس له من الصحة.
الحل في 3 نقاط:
1. عودة المزارعين الي قراهم
2. احترام الرعاة لقوانين المسارات بين الرعى و الزراعة
3. انفاذ القانون علي المخالفين
اتمنى اكون اوضحت
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: Nasr)
|
Quote: هل نظام الحواكير وما يستتبعه من إدارة أهلية
معترف به قانونيا ؟؟؟
أم أنها الأعراف والتقاليد؟؟؟
هل قوانين الحكم ا
وصلاحيات السلطة المركزية قدر كيف في إعادة توزيع الحواكير ؟؟؟؟ |
سلام نصر
النظام ده الغاه نميرى و اعاده الانقاذ بنفس طريقة الانجليز حيث قامو بفصل كل من يعارضهم و عينو من يواليهم. يقومون بفصل الاخ او الوالد و تعيين اخيه او ابنه مع بعض الامتيازات (عربية و مرتب) و بعداك يبصم ليهم بالعشرة في مجالات البيعة و حشد القبيلة او انضمام القبيلة بأكلمها للمؤتمر الوطنى.
هى اذا اعراف و تقاليد و لا وجود لها في سلم الدولة. يعنى لو الواحد عندو مشكلة بمشى سلطة الدولة (شرطة و محكمة و غير) و لن يطلب خدمة من الادارة الاهلية.
الصراع ليست عن الحاكورة بل حول الاراضى المملوكة للافراد (مزرعة او جنينة) حين يعتدى الراعى.
اول حوادث صراع الحاكورة كانت في غرب دارفور في عام 1998 حيث قام عبدالرحيم حسين (وقتها وزير للداخلية) بتثبت نظارات عدة للعرب داخل دار مساليت, هنا تأتى المعضلة, في الوقت الذى كان من المفترض الغاء الحواكير (سلطة) (لابد التمييز بين الغاء سلطة و الغاء تملك الارض, قامت الانقاذ بتأسيس نظارات داخل نظارات اخرى و هى ما ادت الي حروبات لم تتوقف.
تذكر قبل عدة سنوات في شرق السودان كانت هناك مشكلة بين الهدندوة و الفلاتة برضو ذات علاقة بتأسيس نظارة للفلاته في ارض الهدندوة.
اوضحت في بداية البوست, تراتيبية السلطة الاهلية و الذى يمكن سلطة الادارة بمنح الوافدين اليها سلطة محددة داخل ترابتبية السلطة و لا يسمح بتعديها. فالنظارة هى اعلي درجة في سلم الادارة الاهلية. حدث ايضا قبل شهرين في شرق النيل بين الكواهلة التى حاولت تاسيس نظارة داخل حدود ادارة اهلية لقبيلة اخرى (لو في زول يذكرنى بالاسم).
الحادثتين ديل موثقات في البورد هنا.
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: mohmmed said ahmed)
|
سلام يا محجوب
البعشوم عمل بوست فى الفيس بوك لاخذ اكبر قدر من الآراء حول مشكلة الحواكير فى دارفور
من ابناء دارفور والمهتمين وبعده قام بعمل هذا المقطع وفيه آراء جديرة بالوقوف عندها
مثال مطالبة احدهم : الفصل التام بين مناطق الرعى والمناطق الزراعية وبدعم ورعاية تامة من الحكومة .
نزع سلاح المليشيات وعلى ان تكون السلاح فى يد الجيش والشرطة فقط وان يتم تحسين شروط خدمة لهم فى المنطقة .
معاقبة المتسببين فى الاحداث والقبض عليهم وانزال اقصى العقوبات عليهم .
المقطع يستحق المتابعة للمهتمين بقضايا الحواكير فى دارفور .
| |
|
|
|
|
|
|
|
|
|
Re: الواضح ما فاضح: ها هى ازمة الحواكير (Re: علاء سيداحمد)
|
| Quote: مثال مطالبة احدهم : الفصل التام بين مناطق الرعى والمناطق الزراعية وبدعم ورعاية تامة من الحكومة . |
سلام علاء
ده كلام زول افندى و يبدو عليه ما شاف الريف خالص.
اولا لا يمكن الفصل او كأنو عايز يقول تتعمل حظائر زراعية زى النظام المتبع في الدول الغربية. يعنى ننتهى من مسألة الكاوبويات الى الابد و لو كان يقصد هذا اوافقه.
اما بالنسبة للوضع الحالى, فقط مطلوب:
1. فتح مسارات و هى موجودة اصلا منذ القدم و هى لعبور الرعاة شمالا و جنوبا بحثا عن الكلا و الماء. في فصل الرشاش (مع اول هطول الامطار)
- يعبر الرعاة الى الشمال حيث يتوفر الماء و العشب في اطراف الصحراء و الجبال و لا توجد زراعة. هذه ليست كانت مشكلة في السابق لانو عند العبور شمالا, الزراعة في بداياتها و لا تسبب مشكلة. المشكلة التى حدثت في شهر مايو و يونيو الماضى كان سببو احتلال الرعاة (المستوطنين الجدد) لاراضى المزراعين بأعتبارها اراضى ليست ملك لاحد و رفضو للمزراعين الاقتراب منها. يعنى مشكلة جديدة (Post Omer Albashir regime).
- في شهر 12 و يناير, يقل العشب و تنضب مصادر المياة و هنا يبدأ الرعاة في العبور جنوبا في موسم الحصاد. منذ 2003 او قبيل بداية المشكلة السياسية في دارفور, بدأت مرحلة عدم احترام حرمة الزراعة و الاعتداء عنوة علي الزراعة و مقننة من دولة الخرطوم. هنا يمكن ان اشرح ليكم مراحل الحصاد:
0 - القندول بكون استوى و جف و يقوم المزارع بقطع القناديل باليد (واحدة واحدة) و وضعها في شىء يسمى (جرن). الجرن مصنوع من اعواد مرفوعة قليلا من الارض لتجنب وضع القناديل في التراب.
0 - يقوم المزارع ببناء (مدق) خلطة طينية معينة (زى مسطبة اسمنت) في مساحة دائرية بقطر 5 الي 8 امتار. و هنا يأتى دق العيش لفصل الحبوب من القناديل. في فيديويات كتيرة
0- بعدها يأتى طق القصب. قصب الدخن يستخدم في بناء القطاطى
0- ايضا في هذه الفترة بكون في كمية من البطيخ. طبعا انتو ناس البنادر بتعرفو التسالى. اها البطيخ ليهو استخدامات كتيرة (منها صناعة العسل (مربى) و التسالى والقطران)
هذه العمليات الحصادية بتخلص حوالى نهاية شهر فبراير و بعدها يمكن مسموح للرعاة بطلقها وبعدها الكل مبسوط حيث يتبادل الرعاة و المزارعين المنتجات الزراعية و الالبان. و لكن هذا ما تم فقده
يبقى ليست هناك ضرورة للفصل التام, فقط مطلوب:
- احترام المسارات
- احترام القانون بعدم الاعتداء علي الزراعة و المزارعين
| |
|
|
|
|
|
|
| |
Mahjob Abdalla
علي عبدالوهاب عثمان
Shinteer
Nasr
Biraima M Adam
bakri abdalla
محمد عبد الله الحسين
mohmmed said ahmed
abas
اسماعيل عبد الله محمد
علاء سيداحمد
فيس بوك
تويتر
انستقرام
يوتيوب
بنتيريست