أولاً للنشر حوار شيخ عصام محمد نور ثم نعود ثانياً حسب التساهيل لعمل هايلات على الحتت الفيها نفاق إجتماعي ومحاولة تجميل الذات كفاحاً ..
ثم بعدها نجي لحتة الغناء دا حق ابو مينو فيكم! :)
كنا بنسجل في الحلقة واتفاجأت بفتاة تدخل الاستديو ..وسألت منها ايلاف قالت لي (دي عشة الجبل) حوار:محمد ابراهيم الحاج- الحراك السياسي
.لو صادفت “عشة الجبل” وغنت غير (غنا السوق دا) ح أغني معاها… (ما كنت عارف إنها ح تشارك في البرنامج.. وما بعرف يعني شنو كلمة (قونة)).. البعض وصفني بالـ(عنجهية)… وأنا (ما مصلح اجتماعي).. لم تهدأ الساحة الفنية طيلة اليومين الماضيين بعد انتشار خبر رفض الفنان عصام محمد نور الغناء مع المغنية عشة الجبل في برنامج (يلا نغني) الذي يتم تسجيله هذه الأيام بقناة الهلال وينتظر بثَّه خلال شهر رمضان القادم. ردود الفعل تباينت وأدلى كثير من المتابعين والإعلاميين والنقاد بدلوهم في الأمر، ففي الوقت الذي اتفقت فيه غالبية الآراء مع عصام، مضى آخرون إلى القول إنه كان عليه نصحها بدلاً من مخاطبتها وإحراجها. تحدَّثنا إلى عصام محمد نور عن الواقعة كاشفاً تفاصيل كانت غائبة عن الجميع، فإلى التفاصيل:
* بداية احك لنا ما حدث بالتفصيل؟ “كنا نسجل في البرنامج بشكل عادي وغنت إيمان شريف ثم غنيت أنا وبعدي غنى جمال فرفور وختم بأغنية (زمان الناس) ودي كانت آخر أغنية مفروض يتم بعدها تسجيل الحوار.. وكان هناك كرسي فاضي وفجأة جاءت سيدة وجلست فيه.. وسألت ايلاف عبد العزيز التي كانت تجلس بجواري: دي منو.. قالت لي : دي عشة الجبل”. *”إنت ما بتعرفها”؟ “لا لا ما بعرفها… لكن بسمع بيها وقلت ليهم (بالله دي هي).. وكان قبل يومين شاهدت مقطع فيديو لها تغني (يا روعة) في حفل عام وقلت ليها مداعباً (الأغنية دي عندنا فيها حق) وردت لي “عشة” وقالت (حاضرين) ثم تدخلت إيمان الشريف وقالت لي بـ(نقطة)… وضحكت وقلت ليها لا (بسطر جديد) وضحكنا جميعنا”.. *إذن لماذا تحولت لخلاف؟ “والله يا محمد الزولة دي لو غنت أغنية بتشبه البرنامج إيقاع مختلف ما كنت اعترضت ولا كنت قمت.. وبعد داك غنت أغنية بعنوان (طاقية خضرا) وبعد أن انتهت خرجت فوراً من الاستديو ووقتها تحدَّثت معي رشا الرشيد مقدمة البرنامج (والحوار يا أستاذ).. قلت ليها ماشي اصلي و مشيت للمخرج عادل إلياس وطلبت منه مسح أغنيتي في الحلقة دي وطلعت بره وصليت وجيت راجع ومسكت المايك وقلت ليها: ياعشة عشان الكلام يتنقل من خشمي لاضانك وما يتنقل من زول.. انتي كإنسانة احترمك جداً وكمغنية عندك صوت جميل وشكل مقبول لكن غناك ده أنا وهو في حتة واحدة مابنتلم.. وأنا كل العملتو مشيت لعادل وقلت ليهو امسح اغنيتي من الحلقة.. وبعدها مسكت “عشة” المايك وقالت لي أنا بحترمك ولي الشرف أغني معاك وانخرطت في البكاء وخرجت”… * هل كان سببك فقط لأنها غنت (طاقية خضرا)؟ “تعرف لو غنت أغنية من الرعيل الأول والله كنت ح أغني معاها.. ولو غلطت كنت ح أصلحها عشان دا شكل البرنامج قائم على كده.. لكن غنت لي غنى ما بقدر اسمعوا ذاتو عشان اتكلم فيهو”. *طيب ألم تكن تعلم بقدومها للبرنامج؟ “لو أصلاً أنا عارف أنها جاية أنا جيت ليه.. أصلا ما كنت عارف إنها جاية لكن فاجأتني بأغنية طاقية خضراء وعاينت ليها وعاينت للعازفين وقلت (دا شنو يا جماعة) وطلبت مثلما قلت ليك من المخرج مسح الأغنية ولم أقل له (يا أنا ياعشة الجبل) ولا قلت ليهو شيلها من البرنامج” . *رجعت للبرنامج؟ نعم أنا في طريقي الآن للبرنامج بعدما “حردت” يومين. *هل تم الاعتذار لك؟ تحدثوا معي الناس المهمومين بالبرنامج واتصل بي فرفور وصباح، وشموس، وتحدثت مع عادل المخرج. *ما هو ردك على التناول المكثف للواقعة في أنه كان يجب عليك نصحها بدلاً من مهاجمتها؟ أعتقد انو أية مشكلة عندها علاج وأنا في الآخر قبل إبداء رأيك وتعاطفك مع الغير أو تأييدك لزول معين اسأل الحاصل شنو في الأول ومن ثم عليك تحديد موقفك.. وأنا خشيت لزول معاي في الفيس بوك ووصفني بالعنجهية و(الطنقعة) وكان عليك تنصحها حسب رأيو ورديت عليهو إنو الحصل كده وكده .. فهل يعتبر دا تعالي مني؟. وكتبت ليهو الآية الكريمة: (إن جاءكم فاسق بنبأ فتبينوا…) ويجب التبين قبل أي شيء وعشان لو فيه مشكلة نعالجها وأي زول ربنا اداهو فكر ويجب أن نختلف ولكن بود والخلاف لا يفسد للود قضية. *البعض فسَّر ما حدث بأنه موقف ضد تمدد هذا النوع من الغناء المكنى بـ(أغنيات القونات)؟ أنا يا اخوانا كلمة (قونات دي ذاتو قاصدين بيها شنو والله ما عارف ولا حصل فكرت امشي وراها) وأنا عندي مشروع غنائي ماشي بيهو . ولا التفت لأي شيء لا يخصني ولا يهمني وحاجاتي واضحة مما بديت الغناء … لا أتشارك مع الآخرين وعندي شروط أضعها في أي حفل سواء كان خيرياً أو تجارياً ولا أدخل عادة في صدام مع الناس.. وعمري ما وقفت ضد زول ودائماً ما أحتفظ برأيي لنفسي.. لأنو عارف إنو الرأي السالب دا أكتر مما يجيب لي عداوة ما بيعمل لي شيء تاني وأنا ما مسؤول من الناس.. لكن معظم الناس الحاجاتهم مختلفة مني ما عندهم استعداد انو يسمعوا أو يناقشو ا .. *”البعض يقول إنو أنت حاسدها”؟ “لو بغني نفس (استايل) غناها يبقى الحسد وارد هنا وما قدرت أنافسها.. ونحن إطارين ما بيلمنا خط واحد”. *”أنت رجعت البرنامج لو صادفتها مرة تانية ممكن تطلع تاني”؟ لو غنت غناء محترم ح أغني معاها ولو لقيتها في حفلة وغنت غناء محترم من الحقيبة أو غناء الرعيل الأول ح أغني معاها غير غناء (السوق ده) بدليل إني غنيت الحلقات الأولى مع كمية من الفنانين والفنانات اللي أنا ماشفتهم قبل كده. *”غنيت قبل كده مع (ريان الساتة)”؟ لا ما غنيت معاها.. حضرت ليها حاجة.. غنيت مع شذى وشموس وأفراح وفي الآخر ما عندي رأي في البنات لكن عندي رأي في الغناء بس.. أنا عايز غناء رسالي وهادف والناس تستفيد منو. *”لكن دا غناء الجيل الحالي”؟ “نحن بنغني في قنوات تدخل البيوت.. وده ماعندو علاقة بالجيل ده أو الجيل داك والزول لما يمشي ضيف لبيت بيحترم البيت الماشي ليهو ..ونحن ضيوف بيفتحوا لينا أبواب الغرف مش باب البيوت بس وللبيوت حرمتها.. على الأقل لو فيه زول واحد كبير قاعد ح نحترموا ومثلاً أنا خاشي البيت وفيهو أولاد وأبوهم وجدهم ح اعمل حساب أول حاجة للجد طبعا… وده ما عذر إنو دا غنى الجيل ح اغنيهو في أي مكان”.. *هل لأنه يحمل مضامين هدامة؟ “أنا ما مصلح اجتماعي عشان أتكلم عن تهذيب المجتمع أو إصلاحه.. أنا فنان صاحب رسالة وبقدم رسالتي عشان أسوق الناس وما أجبرهم”.. *ما هو ردك على عزم “عشة” الجبل الترشح للمجلس التشريعي. من حقها.. وأتمنى لها الفوز. *هل ممكن أن يكون ما حدث بداية عداوة بينكما أو يمكن أن تتفهم وجهة نظرك؟ “عمرى ما عاديت زول ولا بقدر أعادي.. لكن كمان ما بقدر اجبر زول يحترم رأيي أو يفهموا بغير الطريقة الأنا قلتها ليهو” ..
ــــــــــــ نعود بعد اللفة
03-15-2021, 08:12 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7215
شكراً يا مولانا .. والله لولاك وشيخ عصام ما سبق وان سمعت هذه التحفة الغنائية الرائعة .. اعادتني لأغاني الرعيـل الأول من عشة الفلاتية وقسمة وفاطمة الجعلي وهكذا بنات.. قبل ما اسمع الاغنية الأثارت حفيظة الموسيقار عصام محمد نور . فمع حق عشه الجبل وغيرها في إحترام أي لونية غناء لها جمهور وذواقة ومعجبين وبيخسروا كمان قروش بأكتر مما تدره الشرايط البايرة لترديد اغاني الغير والرعيـل الاول .. ويكون الهدف بل قمة الإبداع في المغنواتي البيجيد التقليد والمحاكاة احسن من غيره او غيرها..
هسه كان ما طنقعة وفلقصة من كاهن أغاني واغاني ابطاقيـة دي ما بتشبه اغاني البرنامج والا ايقاعاته في شنو؟
03-15-2021, 11:46 AM
Mahjob Abdalla Mahjob Abdalla
تاريخ التسجيل: 10-05-2006
مجموع المشاركات: 8952
الأخ حيدر الزين لك كل التحايا الطيبة أتفق معك تماماً ومع كل الذين تداخلو هنا .. فعصام محمد نور ليس مطلوباً منه تقييم أي فنان آخر وهذا الغناء الذي تغنيه عشة الجبل هو غناء سوداني يستمد وجوده وتعبيره من المجتمع السوداني فإن كان هذا المجتمع لا يعجب عصام محمد نور فأرض الله واسعة فليبحث عن مجتمع يرضيه .. ومافي حاجة إسمها غناء رسالي ولو اتكرم يشرح لينا الرسالة التي يحملها غناءه.. استمعت إلى الأغنية أكثر من مرة وتابعتها كلمات ولحن وأداء وفي كل مرة أزداد إعجاباً "بالبنية"صوت حلو ومميز ومنفرد .. كلمات معنىً وبناءً لم تخرج عن إطار الأغنية السودانية بل شكلاً هي في إطار الأغنية السائدة على ظهر العالم ولو أراد هذا الجاهل شرحاً لذلك فسنقدمه له أما من حيث اللحن فهو غاية في الإبداع أعجبني صوت الطنبور الإيقاعي وعلى العموم الأغنية تصنف في لون لا أظن أن قدرات عصام محمد نور تستطيع إدراكه وكل مافي الأمر أن الرجل أصيب بنوبة أدركها من حاوره وسماها له بالحسد وأعتقد أنه محق في ذلك لك تحياتي مرة أخرى حيدر الزين وأضيف لها شكري الجزل على فتح هذا البوست.
03-17-2021, 08:05 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
Quote: و ان شاءالله اغنية تكون حقتو بالجد و ما من اغانى الرعيل الاول.
البرامج والساحة الفنيتة عموماً تم تصميمها لترديد ومحاكاة الرعيـل الأول فأكيد حا تكون أغنية من إبداعات السلف الصالح.. ثم يقعدوا بعد ذلك في تأصيلها وعنعنتها..
المدعوة بالثقافة والإعلام والإذاعة والتلفزيون السودانية دي أونطة ساي .. مفروض تكون الخرطومية او الأمدرمانية..
نلف ونرجع للفنان المدعي دا
03-15-2021, 06:41 PM
Amira Hussien Amira Hussien
تاريخ التسجيل: 11-26-2016
مجموع المشاركات: 1722
شكلها 4W درايف ... عصام زول الله ساي ... بالمناسبة دي يا عشرين عشرة ... بوست عارف ... أي زول هوب ناحيتو فيه شيء من الشيعه ... 😃😃😃😃😃 ديل بمصرو فيها ليمونه عديييل لزوم الحداكه ... بري بري بري ... كمان تعزم فيني ...
Quote: قال الفنان عصام محمد نور(أنا لم أعترض على وجودها والدليل أنني ذهبت للمخرج، لم أقل له اسحب أغنية عائشة الجبل ولا خيرته بيني وبينها، بالعكس أنا قلت لها رأيي بفهم أن الغناء عندي رسالة وأنا دقيق جداً في مسألة الاختيار لا أجامل فيها ولدي إحساس أن الذين يسمعوني أمانة علي، لذلك عندما أقدم شيئاً أكون حريصاً عليه شكلاً ومضموناً.. وليس لدي علاقة بالمهاترات ولا أبحث عن الشهرة بإثارة الفتن وهذه هي أول مرة أكون حديث السوشال ميديا”.
هسه الكلام دا لزومو شنو! والا محاولة نضافة ساي يا اللقرع!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
HAIDER ALZAIN
Hafiz Bashir
Mahjob Abdalla
بابكر قدور
Amira Hussien
توفيق عيسى مكي
Salah Zubeir
فيس بوك
تويتر
انستقرام
يوتيوب
بنتيريست