السجن شهرين لمجموعة فيد للفنون بسبب هتاف حرية سلام وعدالة

Quote: ⭕️مهم جدا⭕️ الحصل معانا بالتفصيل.. كنا شغالين ورشة عن المسرح والايقاع والجسد في معمل الخرطوم حي الزهور العمارات فجأه جاء واحد كبير اسمو(الحبوب) قال في ازعاج حاصل علما بانو ما كان في صوت عالي و نحن اعتذرنا ليهو فدار حوار بينو و بين (دعاء طارق) فجاء واحد من ناس الحي قال ليها انتي بنت ما تتناقشي معانا جيبي لينا راجل فدار بيناتهم حوار فقام أداها كفين علما بانها هي المسؤولة عن المعمل و مجموعه فيد كانت دي اول مره تجي المعمل شباب الورشه قامو بالتدخل و تهدئه الوضع لكن شباب الحي اتهجمو علينا بالضرب بالطوب و العصايات و كسرو لينا عربيتين و موتر و حصل اشتباك بين شباب الحي و شباب المجموعه و نحن انسحبنا و دخلنا المركز لكن شباب الحي ما اكتفو و جو داخلين لينا في المركز منها جات الدوريه(الشرطه) و أفراد الشرطه اصرو انو مجموعه الفنانين يركبو الدوريه لكن نحن رفضنا بعدها دار اشتباك بين فرد من افراد الحي مع علاءالدين الفيل و افراد الشرطه رفعوهم الاثنين في الدوريه و نزلو شباب الحي من الدوريه مع العلم انو تم التهجم على علاءالدين و هو راكب في الدوريه و شباب الحي اتهجمو على الدوريه بالرجم بالطوب دون رده فعل من افراد الشرطه تم اقتياد الشباب لقسم الخرطوم وسط(الجنوبي سابقاً) دون اخذ احد من شباب الحي بإستثناء الزول الاتشاكل مع علاءالدين من داخل القسم الزول المتشاكل معانا طلع بيعرف جميع افراد القسم و قال داير يعمل اورنيك8 ووافقو ليهو (علاءالدين الفيل) كان متاذي جسدياً وقال للظابط بانو داير اورنيك 8 لكن الظابط رفض ليهو طلبو و تدخل (حسن طلب) وقال يا جنابو من حقو ياخذ اورنيك وتدخل عسكري و قال انو لا من حقو ولا غيرو دي حاجه ما بتهمك انت داير تورينا شغلنا علما بانو حسن طلب ما عندو دخل بالمشكله) بعد داك دخلو الشباب جميعهم ال11 شخص و معانا حسن طلب عشان قال ليهو من حقو في الكاونتر بعد ما قلنا ليهم نحن فنانين و ممثلين تم التعامل معنا بإستهتار من قبل افراد الشرطه و قعدونا في الأرض (اقعد تحت). في عسكري اتهجم علينا بكلام و قال لينا انتو عاملين فيها شفاته و ممثلين و اشار بالكلام دا لي (حجوج و علاءالدين الفيل) وقال انو الحركات دي بتتعمل برا ما هنا، الليله حتقعدو هنا لمن تعرفو حاجه و ما حتطلعو من هنا و بالاضافه لكلام خارج حدود الادب. الشابه دعاء طارق في عسكري لابس مدني صورها بالتلفون بالدس و هي شافتو و قالت ليهو ما تصورني فقال ليها اسكتي ولا بديك كف، فقالت ليهو ما بسكت الا تمسح الصوره فالعسكري اداها كف لمن وقعت على الارض مغمى عليها، فنحن اعترضنا على الموقف دا و قلنا ليهم افتحو بلاغ لكن هم رفضو و طنشو الموضوع و دا كلو حصل و دعاء ما كانت عارف انو هو عسكري لانو لابس مدني و ما ابرز لينا بطاقه تثبت انو قوه نظاميه. الشابه دعاء بعد وعت كانت تعبانه و المفروض انها تمشي المستشفى و طالبت بي اورنيك8 و رفضو ليها بعدها شالو مننا تلفونات و كل حاجاتنا و دخلونا الحراسه و حجوج طلب بمكالمه هاتفيه و هم قالو ليهو مافي ليك مكالمه. لمن دخلنا الحراسه كانت عباره عن اطفال قاصرين و مساجين ليهم شهور ما عارفين يعملو حاجه و في شباب قاعدين ليهم شهور ما عارفين الحاصل عليهم شنو و منهم مصابين لم يتم اسعافهم قعدنا نص ساعه و بدينا نهتف هتافات ثوريه من الزعل لانو التصرفات الحصلت معانا دي تصرفات كيزان. جانا ظابطين برتبه ملازم و عسكري و قالو لينا امنعو الفارغه و الازعاج و في واحد من الظباط قال لينا دا ازعاج و ممكن افتح فيكم بلاغ نحن قلنا ليهو دي هتافات ما ازعاج قال لينا دا ازعاج و امشو اتكلمو و قولو ليهم الظابط الفلان الفلاني قال ليكم دا ازعاج و طلع. بعدها تم استدعاء علاءالدين الفيل للتحري و في التحري علاءالدين بيقول كلام و المتحري بيكتب كلام تاني علاءالدين قال ليهو اكتب كلامي المتحري قال ليهو دا شغلي و انت ما عندك بيهو علاقه و المتحري مصر انو ضرب الزول و علاءالدين بيقول ليهو انو هو الاتهجم علي نسبه لانو المتحري ما كان بيكتب كلام علاءالدين و بيكتب من راسو ف علاءالدين اعترض و رفض انو يتحرى معاهو فرجعوهو الحراسه تاني. في شاب اسمو مصعب جاء عشان يطلعنا بي ضمانه لكن الظابط رفض الضمانه و دخل مصعب معانا الحراسه من غير سبب أساسا نحن قبل ندخل القسم استنجدنا بي ثوار و كلهم كانو قاعدين قدام القسم لحدي الساعه 3 صباحاً و فعلا ساعدونا و جابو لينا محاميه و المحاميه صدقت الضمانات من النيابه و ضمنت انو 8 مننا الا علاءالدين و خالد و مصعب و رفضو يطلعوهم الا الصباح و قالو لينا تجو الصباح للمحكمه جينا الصباح لقينا انو مافي اي بلاغات جات للمحكمه من النيابه، رجعمت القسم نراجع البلاغات لقينا انو البلاغات ما طلعو من القسم بحجه عدم إتمام الإجراءات و البلاغات فتحت للاستفزاز ليس الا دايرين نفتح بلاغات قالو لينا النيابه قفلت جينا الليله و مشينا النيابه و فتحنا عريضه و مشينا بيها قسم الدرجه الاولى و ادينا ورقنا لي محامي عشان يتحرو معانا، والمحامي لاقى مدير شرطه الولايه في القسم و قال ليهو انا عارف بالمشكله و الشباب ديل عاملين ازعاج و امشو قسم الخرطوم وسط لانو البلاغ دا هنا ما بيتفتح و قسم الخرطوم وسط أساساً دا القسم الكنا فيهو مسجونين و هم أساساً اصحاب ناس الحي الاتهجمو علينا و نحن عندنا أصلاً مشكله مع ناس القسم. في اول تعليق موجود فيديو توضيحي لجزء حاصل داخل الحراسه. #اعاده_هيكلة_القوات_النظاميه #حقوق_الفن #سياده_القانون #وزاره_الثقافه_والفنون #الفن_يغير_في_الشعوب #الفن_ثقافه_تربية_رسالة

Quote: من حوالي شهر تقريبا مجموعة من الشابات والشباب عملو منشط ثقافي في منزل في الخرطوم. عدد من الجيران استدعى الشرطة بسبب الاختلاط. الشرطة جات قبضت عليهم بتهمة "كسر الحظر". في القسم فرد من افراد المباحث حاول يصور واحدة من الشابات خلسة. فشافتو ومنعتو فاعتدى عليها وضربا كف لحدي م غمرت! لما فاقت حاولت تفتح بلاغ لكن القسم رفض ليها. فهتفت وهتف معاها الشابات والشباب المعاها جوه القسم "تسقط بس" اعتراضا على عنف الشرطة وسوء استغلال السلطة. فاتفتح ضدهم بلاغ ازعاج عشان الهتاف ده. وطلعو بكفالة. تواصلو مع جهات حكومية لعرض مظلمتهم مافي جهة اشتغلت بيهم. نشروا قصتم علنا وحكو الانتهاكات الاتعرضو ليها .. وبرضو ما كان في اي تجاوب او اهتمام. اتحولو للمحكمة بدون م يقدرو يفتحو بلاغ في الاتعرضو ليهو. وفي المحكمة كان الشهود ضدهم رجال شرطة انهم هتفو جوه القسم. الليلة اتحكم عليهم بالسجن شهرين. وكتبت الشابة الاتعرضت للضرب وما سمحو ليها تفتح بلاغ وما لقت زول في حكومة الثورة يقيف معاها واتحكمت بالسجن الليلة: "احنا قنعنا من العدالة في البلد دي".

Quote: ولا السجن ولا السجان باقٍ ____________________ أدان القاضي عمر عبد المجيد خمسة من شباب الثورة ١.بالسجن شهرين ٢. الغرامة ٣. بالعدم السجن لمدة شهر قامت الشرطة بفتح بلاغ الازعاج العام وهي من المواد التي يجوز للشرطة أن تقبض بموجبها على المشتبه فيه بدون الحاجة لأمر قبض من النيابة. وقد جرى العرف أن تقوم النيابة بشطب هذا النوع من البلاغات صباح كل يوم أثناء مراجعتها ( بلاغات اليوم السابق) (للمعلومية). طوال عملي سواء بالمحاماة أو بالنيابة لاأذكر أن النيابة قدمت متهمين للمحاكمة بسبب بلاغ إزعاج عام. وهذا يشير إلى أن المدانين كان لهم وضع خاص وتتوفر رغبة في إدانتهم خاصة المدانة (دعاء) (شقيقة) (لدن) وقد تشابهت الوجوه على الشرطة فظنوا أن (دعاء) هي (لدن) صاحبة الهتاف ضد الجيش وقد جاء الانتقام (بالغانون) أي تحت مظلة النيابة والقضاء وليس في الأمر عجب... فلا ينبغي لعاقل أن تدهشه جرائم القضاء والنيابة فكوادرها ماتزال هي التي إختارها البشير #ورضي عنها #وأرضته. النص القانوني الذي (إستعان) به القاضي لإدانة الشباب لاينطبق على أفعالهم فالمادة 69 من القانون الجنائي تنص على تجريم من يقوم بفعل #يقصد منه الاخلال بالسلام العام .. و هتاف (حرية سلام وعدالة) داخل حراسة ولوقت قصير ليس فعلا مخلا بالسلام العام ولايمكن أن يتوفر القصد الجنائي في هذا الهتاف. أما المادة الثانية التي حاول القاضي تطويعها لادانة (المطلوبين) هي المادة 77/ 1 وهي تجرم الفعل الذي يحتمل أن يسبب الضرر أوالخطرأو المضايقه،،، ولكن بشرط أن يكون الفعل موجه ضد الجمهور،، ولايمكن اعتبار (كاونتر) الشرطة هو الجمهور وكل الفئات المستهدف حمايتها من الازعاج العام لاتشمل كاونتر الشرطة وبالتالي لايمكن أن نعتبر المدانين قد سببوا إزعاجا عاما للسكان حول قسم الشرطة! لايحتاج المتابع لحال العدالة في السودان الي تأكيد بأن المدانين لم يرتكبوا جريمة ولكنهم من المغضوب عليهم (حكوميا) ومع ذلك اليك بعض الشهواهد: ١.القبض على المدانين وايداعهم الحراسة لم يكن بسبب المواد التي أدانتهم بها المحكمة بل هي تهمة ببلاغ جديد إختلقتها الشرطة ممثلة في الشاكي بعد فشل التهم التي تم بموجبها القبض عليهم ٢. إختار القاضي أن تطبق العقوبات (بالتتابع) وليس (بالتطابق) الفرق بينهما أن التتابع يعني بعد نهاية العقوبة الأولى يبدأ تطبيق العقوبة الثانية عكس (التطابق) أي يوم في السجن يعتبر عقاب عن الجريمتين في نفس الوقت مما يختصر نصف المدة. ٣. لايجوز للقاضي أن يعاقب المتهم #بعقوبتين الا في حالات نادرة والصحيح أن يوقع عقوبة واحدة (الأكبر) عن الجريمتين. وليس لديه تبرير ٤. تبدأ العقوبة حسب قرار القاضي من تاريخ الحكم والصحيح أن تبدأ من تاريخ القبض على المدانين. مواد الازعاج العام ليست من الجرائم الخطرة بدليل أن القانون جعل للمحكمة السلطة بأن تطلب فقط من المتهمين #إيقاف الازعاج بدون أي عقوبة. وللعلم هؤلاء الشباب سكتوا عن الهتاف حين طلبت الشرطة منهم الكف عنه. لا يحتاج القضاء ولاتحتاج النيابة لهذه السقطة الجديدة لتشويه تاريخها فعندها من المخازي مايندى له جبين العدالة. كيف لا وقضاة ونيابة الطواريء التي أدانت من يرفع علم السودان هم في أعلى مراتب القضاء والنيابة ... لانجد كلمة تعبر عن هذا الحال أدق من جملة الكاتب عثمان شبونة (أعوذ بالله) والحق يرعاكم عمرو بن العاص خيرLPCM

Quote: كان ممكن ولاء البوشي تسجل نفس الزيارة التضامنيه لمعمر موسي ومعتقلي الرأي الاخرين ..وتثبت انها وزيرة وحكومة لكل الناس وتحرج مناصري معمر والاخرين..ولكنها اختارت عشيرتها مع انو فرق ساشع بين معتقل راي وبين من صدر حقهم حكم قضائي ..يعني الاحق بالزيارة هو المعتقل وليس الذي صدر في حقه حكم قضائي ولكنها الشلليات أهم من كل شي ..والحكومة وشعبها الخاص .وللمرة المليون يثبتون انهم اقزام

Quote: كتبت الأستاذة ناهد جبر الله شباب مبدع حد الرعب لأعداء الثورة فاستحق الاستهداف و وزيرة الشباب كما يليق به تماذج لتحقيق الشعار العظيم حرية سلام و عدالة حتى تحولت زيارة الدعم و التضامن بمكتب السجن حيث اللقاء لاجتماع تفاكر حول قضايا الشباب الثورة و الوطن و الابداع و بشريات لمساحات للمبدعين و أنشطة قادمة رسمت خطوطها في داخل السجن .. و تستمر معركة الإنصاف و العدالة و معركة تنظيف الأجهزة العدلية ولكن اللقاء بمكانه و زمانه كان له وقع خاص و مخرجات واعده بحجم التحدي توضيح : أكد الشباب رفضهم لأي وساطة او تجاوز للقوانين او استرحام لإطلاق سراحهم و حرصهم على ان يتم الإستئناف بشكل يحقيق العدالة لهم و يصب في مجرى الاصلاح القانوني و المؤسسي و كذلك أكدوا إصرارهم على اتخاذ الخطوات القانونية تجاه ما تعرضوا له من انتهاكات، وقد انبرى للانضمام لهيئة الدفاع عدد كبير من المحامين و كذلك المستشار القانوني لوزارة الشباب و الرياضة

Quote: تنسيقية لجان مقاومة أحياء الخرطوم شرق #وقفة_إحتجاجية في سقطة داوية في مسلسل سقطات القضاء السوداني والأجهزة العدلية تم بالأمس الحكم على عدد من أعضاء لجان المقاومة ومجموعة "فيد للفنون" بالسجن لمدة شهرين والغرامة إثر بلاغ كيدي من أحد منسوبي الشرطة. إن هذا الحكم الجائر يمثل إمتدادا للملاحقات والاعتقالات الممنهجة التي طالت عدداً من الأعضاء الفاعلين ضمن قوى المقاومة الشعبية، ندرك أن هذه الانتهاكات لا تنفصل عن التوجه العام للسلطة الانتقالية والذي يهدف إلى كبح جماح المد الجماهيري والحفاظ على بنى ومؤسسات الدولة البوليسية في شكلها الغاشم واستخدام نفس أدواتها القمعية للحد من حركة المجتمع وقوى المقاومة عبر ملاحقة الثائرين والثائرات والتربص بهم. بهذا تدعوكم تنسيقية لجان مقاومة أحياء الخرطوم شرق للمشاركة في الوقفة الاحتجاجية أمام مباني وزارة العدل رفضا لقمع الحريات العامة وتضامنا مع المحكومين : أعضاء مجموعة فيد للفنون أعضاء مجموعة colour Sudan عضو لجنة مقاومة الجريف غرب حجوج كوكا عضو لجان أحياء بحري حسن طلب عضو لجنة مقاومة اركويت مهند مالك عضو لجان مقاومة أمدرمان منتصر الثائرة دعاء طارق ⭕ المكان : أمام مباني وزارة العدل ⭕ الزمان : غدا الأحد 20 سبتمبر الساعة 11 صباحا ندعو كافة أبناء وبنات شعبنا للالتفات إلى هذه الممارسات والنهج الذي تتبعه السلطة الانتقالية والوقوف بشكل جاد وموحد في وجهها من أجل إستعادة الحقوق المغتصبة وتفتيت الدولة البوليسية التي تسعى لتضييق الحريات العامة وتثبيط الحراك المجتمعي المقاوم الساعي لإستكمال أهداف ثورة ديسمبر المجيدة . #إلغاء_القوانين_القمعية_والمقيدة_للحريات #مراجعة_وتعديل_القانون_الجنائي_والإجراءات_الجنائية #وقف_استهداف_الثوار_فورا تنسيقية لجان مقاومة أحياء الخرطوم شرق 19 سبتمبر 2020