ما لقيت وصف لصوت وأداء الحويج غير الالفة تحس بقرب شديد منه وانت بتسمع وتغمرك الفة فياضة في حضرة صوته
الحويج من مواليد العام ١٩٢٥ بالمكنية غرب شندي بعد ما قرا الخلوة في المكنية حاضرة العمراب وقرا الوسطى في عطبرة جا العاصمة والتحق بمهنة التمريض ولكن روحه الوثابة وطموحه العريض خلاه يسافر القاهرة ويلتحق بالأزهر وتزامن سفره ووجوده في القاهرة مع وجود سيد خليفة الكان سافر لنفس الغرض وسبحان الله الاتنين قررو يتركو الازهر ويتجهو لدراسة الموسيقى الخويج في المعهد الإيطالي وسيد في معهد فؤاد الأول
وبعد رجوع الحويج اشتغل في وزارة الاعلام وكان في فترة مدير تحرير مجلة الإذاعة والتلفزيون أيام ما كان رئيس تحريرها الفيتوري
اشهر عمل فني للحويج هو اغنية "امل" أو "كلمة منك حلوة" زي ما اشتهرت ودي الثنائية النادرة مع عثمان حسين، من كلمات قرشي محمد حسن
وأغنية "مين احلى من حبيبتي مين" كلمات عبد المنعم عبد الحي وأغنية على ربي امدرمان وغيرها من أغنيات ما كتيرة، وقلة اعمال الحويج ليها سببين اتنين انشغاله بالصحافة والإعلام ثم المرض والرحيل السريع من الدنيا في يوليو ١٩٦٤
الحويج تاني اتنين في غار الثنائية الجميلة والفريدة مع عثمان حسين والما تكررت تاني
وتالت التلاتة في ثلاثي العاصمة السني الضوي وإبراهيم ابو دية ومحمد الحويج
وحياة المحبة كلمات محمد يوسف موسى
وبعد وفاة الحويج قرر ثنائي العاصمة يخلو الغناء نهائيا لولا تدخل عثمان حسين وعلي شمو وآخرين
نسال الله الغفران والقبول والرحمة للحويج
08-20-2021, 04:46 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8795
صطبعا برعي .. والكلام لي قرشي محمد حسن صوت يتماهى ويتماشى ويحاكي ويقترب من صوت (رمضان حسن) بس صوت الحويج هو صوت شجن السنى الضوي من يوم فراق الحويج لم يفارقه الحزن ودمعته اصبحت اقرب
08-22-2021, 06:12 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8795
الحويج يا اباذر فات وعمره ( 38 ) سنة .....مشروع كبير لم يكتمل زي فوات سرور وكرومة اساطين الغناء. كما قلت انت يا ابوذر بصمة برعي وبصمات حسن الخواض و عربي ..واكورديون وهبة بصمة صوت الحويج فيهو نداوة محمد ودالفكي.. والشفيع.. انسان وفنان تلك المناطق.
08-22-2021, 06:50 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8795
للامل والسلوى هنا اوضح ما يكون صوت الحويج الدافىء الحاني والحنين.. يظهر حتى لو كان بين مجموعة غنائية مثلا .. صوت( هادية طلسم ) الصوت الالطو المسنكب في اغنية ( يا طير الجنة ) يكون اكثر وضوحا بكل جمالياته وقوته ونقائه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
Ahmed Yassin
فيس بوك
تويتر
انستقرام
يوتيوب
بنتيريست