كشف عضو لجان مقاومة أركويت شريف جابر أحمد الشهير بـ(البعاتي) عن تفاصيل الاعتداء الذي تعرض له في موكب تشييع الشهيد محمد اسماعيل الشهير بود عكر، وقال :”حاول شخص لم استطع أن أتعرف عليه الصعود على زجاج السيارة التي كنا نمتطيها في التشييع وكان برفقته شخص آخر يقف خلفي فوقع اشتباك بيني وبين الشخص الأول وتفاجأت بأن الشخص الثاني ضربني من الخلف بالسكين في ظهري وقام الشخص الأول بضربي بالساطور في ساقي اليمين”.
وأردف بحسب صحيفة الجريدة: وعندما سألهم سائق العربة ماذا تريدون؟ أجابوه (نحن قاصدين الشري وعايزنو) وفي رده على سؤال حول ما اذا كان يوجه اتهام لجهة بعينها، قال الشريف أنا لا اتهم أية جهة لكن حدث لي موقف مع القيادية بقوى الحرية والتغيير ميرفت عند زيارتها لاعتصام شارع الستين ولتقديم واجب العزاء لأسرة الشهيد مدثر مختار، حيث قمت بتوجيه عدد من الأسئلة لها وبعد أن رفضت الاجابة عليها هتفت في وجهها بشعارات مناوئة للأحزاب. وقامت بعد ذلك برفع صورتي على صفحتها في موقع التواصل الاجتماعي فيس بوك وتساءلت عن هويتي وعن التنظيم الذي أنتمي له؟ وكشف الشريف عن اعتزامه فتح بلاغ في نيابة المعلوماتية ضد ميرفت لاتهامه بأنه ينتمي للنظام البائد. الخرطوم (كوش نيوز)

05-28-2021, 04:35 PM
صديق مهدى على صديق مهدى على
تاريخ التسجيل: 10-09-2009
مجموع المشاركات: 10257
توكلنا على الله وعمِلنا بنصيحتك ودخلنا وأرخينا السمع للفيديو على مسؤوليتك وعندما فعلنا- وليتنا ما فعلنا - فإن أول ما قلناه: الله يجازي مِحَنك يا 2010 حيث انتقل إلينا نفس شعورك يا أحمد ونفس إحساسك وأنت تستمع "مستخماً" إلى لايفات "صديقك" (أبو رهف). والطريف في البوشي وفي صديقه (كادر الكوادر ورَكّان الركانة) هشام عباس ان كل واحد منهما يرى في الآخر فلتة زمانه، ولا يتردد أو يرمش في كيل أرادب من المديح وأطنان من عبارات التفخيم.
وعندما تستمع إليهما وهما يحددان معيار اختيار النائب العام، أو يناقشان الانتخابات، أو يتحدثان عن استراتيجيات الإستثمار ، وفتح الباب على مصراعيه "للإستثمار" الإماراتي في الفشقة أو "الإستعمار" القطري في غير الفشقة أو عندما يحذران من ضرورة عدم الخوف من الإتهام بالكوزنة في موضوع النائب العام ثم يعودان نفسيهما ويستديران 180 درجة ويطلقان حلاقيمهما لتضخيم فوبيا الكيزان في موضوع الاعتداء على شريف جابر (البعاتي) وفي عموم الحدث السياسي السوداني فإنك تبحث عبثاً عن تلك الشعرة التي تُشكل فارقاً بين العباقرة الثلاثة البوشي وهشام وأبو رهف.
والمدهش أنهم ثلاثتهم يأمرون أمراً بتشيير سذاجتهم على أوسع نطاق لتصل إلى "كل" السودانيين. بينما ينفرد الثنائي البوشي وهشام بأنهما يريان بأن الشعب السودان نصفه دراويش وجهلة وأن ما نسبته 50% من الشعب كيزان، و47% محض مطبلاتية والشعب في مجمله – بحسبهما - غارق في غيبوبة وجهل و(رِيالته صابه) وهو في أمس الحاجة للايفاتهما "التنويرية" خصوصاً لايفات هشام. التي - بحسب البوشي – هي نهاية الحِكمة وقِمة العقلانية، وتستحق أن تُدرس وتُعلق على أستار كعبة السياسة السودانية.
وربما يُحمد يا أحمد لصديقك اللدود (أبو رهف) أنه ما يزال متواضعاً وأنه مهما بلغ به العبط لن يصل إلى المدى الذي يجعله يصف دولة الإمارات بأنها (أشرف دولة على وجه الأرض)!!!
وبالقطع لن تبلغ نرجسية أبو رهف تلك الآماد الفادحة والنرجسية الشاطحة التي بلغها البوشي وهو يُجزم في مستهل الفيديو (الدقيقة 17:44) بأن الناس متأكدين مسبقاً من أن كلامه مُهم وقيِّم!!! ولم يكن ينقص البوشي ألا أن يقول: (اليوم اكملت لكم، دينكم وأتممت عليكم نعمتي، ورضيت لكم اللايفات ديناً) وإلا ما الذي يجعله واثقاً بأنه هو نفسه - أي البوشي - من سيقوم مقام الله ويحاسب الناس في الدنيا و"الآخرة" في حال "تقصيرهم" في عملية توزيع وتشيير لايفاته وتبليغ "خاتمة رسالاته"..
Quote: اقسم بالله العظيم تلاتة أمَّنتها ليك في رقبتك.. أمانة بسألك منها يوم الوقف العظيم
وأظن أن مرحلة تقمص شخصية الإله الذي سيحاسب الناس يوم القيامة هي مرحلة من "الرُقي الإيماني" لم يبلغها أكثر الكيزان تديناً وأشدهم شططاً.
شفى الله بصر البوشي، وشفى بصيرته وبصائرنا جميعاً تحياتي زهير وصديق مهدي و2010 وود البشرى وكعادتك يا ود البشرى كنت سباقاً للإلتفات إلى تفلتات "صاحب الأوسكارات" .... .. .
شوفوا في عدة حاجات في اللايف دة أنا شايفهم محفزات للتفكير من زوايا تانية 1- موضوع ميرفت اللي تم تداوله بصورة واسعة شديد منذ الاعتداء بشوش على الجاني الحقيقي لأنه منطقياً كدة ما ممكن زول عاوز يقتلك يقوم ينزل صفحتك ويسأل عنك في العلن كدة! 2- شيطنة النائب العام المكلف والحملة ضده قبل ما يمسك القلم ذاتو. يعني الناس ما أدته فرصة يعمل أي حاجة قبل يحاربوهو 3- شيطنة الإمارات ونحن شايفين أفراد الحكومة هم البتجاروا ليها طوال العام! إذا كانت المبادرة الإماراتية كما يقال بتنعش الاقتصاد السوداني بمبلغ 8 مليار وتجعلها منطقة زراعية مشتركة أنا بشوفها أفضل من تظل منطقة حرب تستنزف موارد الدولة
في النهاية الرؤى دي تختلف أو تتفق معاها هي زوايا شوف تانية بعيداً عن الموجة العامة للجماهير
________________ غايتو بالغت في إنك تخت لي أبو رهف مع هشام عباس والبوشي :)
Quote: 1- موضوع ميرفت اللي تم تداوله بصورة واسعة شديد منذ الاعتداء بشوش على الجاني الحقيقي لأنه منطقياً كدة ما ممكن زول عاوز يقتلك يقوم ينزل صفحتك ويسأل عنك في العلن كدة!
أقصد بشوش على الناس ويبعد نظرهم من اكتشاف الجاني الحقيقي لأنه ما منطقياً زول ينزل صورتك ورابط صفحتك ويسأل عنك في العلن كدة قدام الناس كلهم عشان يقتلك
05-29-2021, 04:24 PM
جلالدونا جلالدونا
تاريخ التسجيل: 04-26-2014
مجموع المشاركات: 9390
أضاني جاهزة نضجت وانشوت ،كما تعلم، بمايكرويف البوشي الذي نصحتني بالإقتراب منه، وهي جاهزة لكم (هنيئاً مريئاً) للأكل وللمضغ.
هسع أضاني الشقية دي يا أحمد هل أقوم بتنظيفها وتوفيرها في الساعات القادمة لسماع حفيظ دراجي وعصام الشوالي ومتابعة تشيلسي ومان سيتي ولا أوفرها (على مسؤوليتك) لسماع صاحب المايكرويف وحامل القنابل التي سوف تنفجر في وجوهنا اليوم وربما أيضاً (يوم الوقف العظيم) ؟:
جلال أزيك ياخ عاطر التحايا لك والتحية بالطبع موصولة لـ 2010 الوكيل الحصري لترويج منتجات البوشي وأبو رهف .... .. .
أول حاجة اللايفاتي الوحيد البستمتع واستفيد من أي حرف بقوله وبتعجبني تحليلاته وتوجهاته هو راشد عبد القادر طبعاً بطل يعمل لايفات من زمن لكن هو الوحيد الأقنعني تماماً
نمرة اتنين الترويج للايفات عن طريق طلب الشير واللايكات حاجة عادية. ما هو أصلاً نشاط مرئي هدفه الانتشار في بيئة برمجية وفرت امكانيات الشير واللايك
كمية الإيمان الصابة في البوشي أنا شايف مردها وضعه الصحي كونه داخل في مجموعة عمليات جراحية ولازالت صحته تتحدى الطب فشئ طبيعي في الظروف دي الواحد يزداد ايمانه بالقوى العليا ويتصور إنه الناس كلها في نفس مستوى إيمانه
البوشي بختلف معاهو كتير لكن النقاط الانطرحت في اللايف دة أنا شايفها قيمة وخليني أتناولها واحدة واحدة قضية ميرفت اللي كل الناس بتحاول تجرمها لمجرد منشور عملته قبل يومين حول شريف. وشهادة البوشي فيها رغم العداء الصريح بيناتهم والمشاكل والحظر الفيسبوكي بتوري إنه محايد في موضوعها وعقلاني في وجهة نظره وهي دعوة للشباب المنفعلين وحايمين بي صورها يومين يتريثوا شوية
النائب العام المكلف قامت الحملة ضده حتى من قبل ما يستلم التكليف ودي حاجة ما كويسة وأكيد بتأثر على أداؤه. هو في النهاية بشر والبوشي وضع شهادته حول الرجل في إنه ما كوز يبقى بعد دة الناس البتجرم دي برضو تتريث شوية وما بتفترض سيناريوهات ما حصلت. يعني نخلي الراجل يشتغل ونشوف قراراته حتى بعد داك يا يتردم يا نقول وحاته
موضوع الفشقة فائدة الحرب شنو؟ أخير نستنزف موارد البلد في حرب العصابات وتظل الفشقة منطقة نزاع خالية من السكان وبعيدة عن الاستقرار ولا يتعمل فيها مشروع زراعي بالتوافق بين الامارات والسودان واثيوبيا ونستفيد كلنا؟! أنا شخصياً مع الإعمار وضد الحرب ومسألة السيادة الكايسنها شرقاً وعاملين نايمين شمالاً دي ما بتقسم معاي. ولا شايف الحرب دي بتخدمنا ولا بتخدم اثيوبيا وكان طردنا منها الاثيوبيين تماماً برضو ما بنستفيد منها حاجة. يعني شنو؟ أرض زراعية؟ السودان كلو أراضي زراعية استفدنا منها شنو؟ قمح ما قادرين نوفره الإمارات دولة غنية ممكن تدعمنا ونتبادل المصالح بندية إذا قدرنا كسبناها في مشاريع بدل الشحدة البتجاروا ليها ناسنا كل يومين. عشان كدة برضو فكرة شيطنة الإمارات الناس تعيد فيها النظر، هي غنية بالقروش ونحن غنيين بالموارد ومحتاجين ليها
Quote: ولا أوفرها (على مسؤوليتك) لسماع صاحب المايكرويف وحامل القنابل التي سوف تنفجر في وجوهنا اليوم
اللايف بداهو بالكلام عن أساليب الكيزان في شيطنة الناشطين والحملة التشويهية الاتعرض ليها لما قالوا مسجل فيديوهات لبنات في القاهرة، والغريبة إنه الفرية دي أنا متذكر أيامها وفعلاً انتشرت على شكل واسع لكن ما ظهر أي فيديو أو صورة من البتكلموا عنها دي القنبلة القالها هي لقاؤه بحميدتي وعبد الرحيم دقلو بصحبة ضباط كبار في الجيش بعد دعوته للغداء أثناء الاعتصام ضمن دعوات توجهت لعدد من النشطاء المؤثرين بغرض تحييدهم ووعدهم بمناصب بشرط إبقاء المجلس العسكري على سدة الحكم وذكر إنه الناشط القال وعدوهو بمنصب رئيس الوزراء - يقصد ذا النون لكن ما قالو بالإسم - ما كضب في القالوا دة وفعلاً الكلام دة حصل ودافع عن فكرته السابقة إنه الناس ما ترمي فض الاعتصام على الدعم السريع فقط وتنسى الدور الواضح للمجلس العسكري وجهاز أمن الكيزان
أنا بالنسبة لي البوشي مناضل حقيقي وذاكرة حية لفظائع الكيزان وجهاز الأمن عندي دفعتي وود حلتي جندي في الأمن، ما سياسي ولا حتى كمل الثانوي ذاتو رتبته جندي وهو أصلاً زول بسيط في فهمه مرة كان عندنا جولة تواصل مع أولاد الدفعة في الخرطوم وصاحبنا دة قال شغال لكن مشتاق للناس وأصر علينا نجيه في موقف شندي ونحن طبعاً مشمئزين من الفكرة فحلف علينا نلاقيهو عند ست شاي في الموقف ومكتبهم ما نصله، وفعلاً اتلاقينا وجاء معاه زميله تاني جندي بسيط برضو وداك بحاول يحلف علينا نمشي نتعشى معاهم في المكتب قام واحد من أولادنا أشر علي أنا ومعاي زميلنا كادر اتحادي قال ليه ديل سياسيين كان دخلنا مكتبكم ما بطلعوا معانا .. طبعاً داك فعلاً سياسي لكن أنا خشم كبير ساي :) المهم قعدوا يضحكوا والكان بعزم فينا قال لينا نحن ما عندنا شغلة بالطلبة والناشطين، ديلك بسوقوهم مكاتب تانية نحن ناس مساكين ساي بنحارب ليكم العصابات والانفلات الأمني وهسة أمس دي كان معانا البوشي أسألوا صاحبكم دة الوقت داك نحن انتبهنا وسألنا دفعتنا عن التفاصيل فقال لينا إنه جاء المكتب لقى الجماعة بتعشوا في الحوش وفي واحد مربطين ليه يدينه بي وراء ومغطين ليه راسه بجلابيته، حركة غريبة زول جايبينه من بيتهم بالسفنجة ورافعين ليه جلابيته مغطين بيها وشه وقاعد في السرير قال سألته قلت ليه مالك عملت شنو؟ رد لي بي ضحك انت قايل البجيبوهم هنا عاملين حاجة يعني؟ ماا أي ضابط جهاز وسخان معفن ما عندو ذمة بلقى نفسه فاضي بجي يقبضنا يتسلى بينا قال قلت ليهم يا اخوانا انتو ناس سودانيين ما ممكن تقعدوا تاكلو كدة والزول دة مربط قدامكم كدة فكوهو خلوهو يتعشى معانا قال هم سكتوا ورد لي البوشي قال ليه يا ولدنا ما تضر زملاءك ديل، الضابط الجابني قال ليهم لا يشرب لا ياكل لا يشوف لحدي ما يجي يسوقني مكاتبهم .. انت شكلك ود ناس وجديد في الأمن أكل أكلك ساي نحن متعودين في القعدة ديك لاحظت إنه الجوز ديل كانوا بحكوا عن البوشي بي إعجاب وتقديس كدة وإنه مشهور وسط ناس الجهاز بالصلابة وإنه التعذيب ما بشتغل فيه، مهما ضربته وكهربته وعملت فيه لا بينهار ولا بتجرس
دي شهادة من أمنجية قبل 8 سنين تقريباً عشان كدة لما البوشي يقول لي إنه بعرف ضباط الأمن من شكلهم بصدقه، الزول دة غير الاعتقالات الرسمية كانوا بقبضوهو ساي كدة يخلوهو في الحوش يومين تلاتة ويفكوهو بس المهم ما يغيب عن المكتب كتير
05-30-2021, 11:40 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
أحمد يا حبيبي الموضوع ينحصر في محتوى الفيديو الذي جئتنا به وقدمته كمائدة دسمة تقدّم - قبلي بثوان معدودات– ود البشري ليتذوقها فأحَّس بالندم وربما تمضمض بالماء وبالمعجون وبالكلور، عندما وجدها وجبة (بوش) ماسخة و(بيش) ليس فيها مشهيات تذكر ولم تحتو جديداً وخالية الدسم، ومحض بليلة من الحصحاص الذي يؤلم ويهشم الأضراس، ويُضيِّع وقت الناس.
أضاع البوشي زمناً لا يستهان به في حواديت مكرورة مخزنة في ذاكرته الثابتة وفي "راماته" وعشوائياته (أو كما قال). واستعرض ما تلقاه من ويلات في عهد الكيزان (ولا خلاف أبداً حول ذلك) غير أنه ليس من الحصافة أن يشهد المستر نرجس عن عذاباته وعن بطولاته بنفسه عن نفسه.
واستهلك أوقاتاً أخرى في شرح طبيعة متاعب عيونه شفاه الله، وعدّد الأطباء المصريين الكبار الذين راجعهم وفتحوا عيونه وفحصوه وطمأنوه، ، وخصص الجزء الأهم في مديح الظل العالي لشخصه الكريم ولتوأمه الهِشامي السيامي ، ثم عرّج إلى تقريظ "راكوبة" جهاز المغتربين، وتدخُل أمينه العام العاجل والفوري لحل مشكلة يتيمة تدخل في صميم واجباته ولم يكن هناك أصلاً داع لذِكرها وهي تظل واحدة من بين آلاف مشاكل الطالبات والطلاب المعسرين التي ما كان المفروض أصلاً حدوثها لولا تقصير الجهاز وأمينه الممدوح.
أما في موضوع الإستثمار فأتفق معك ومعه حول المبدأ، وأنا من أكثر الناس سعادة بمشاريع الاستثمار المشتركة، وبالتكامل بين دول الجوار، برغم أن مصطلح "تكامل" ناله الكثير من الابتذال في عهود الكيزان وما قبل الكيزان. لكن يبقى هناك فرق شاسع وبون كبير يا أحمد بين الإستثمار والإستحمار وما تفعله الإمارات بساستنا وجنرالاتنا أصحاب القنابير ينتمي إلى هذا الصنف الأخير.
أما في قضية (البعاتي) فقد نصّب البوشي من نفسه محققاً عدلياً "شفافاً" تحسده وتتواضع أمام قدراته الكشفية السيدة أجاثا كريستي، واصدر أحكامه القاطعة وبلا شواهد أو قرائن أو معطيات، وإنما فقط بالإستناد إلى ما تخزته "راماته" من فوبيا الكيزان .
هذا فيما يتعلق بفيديو (النصيحة) الأول.
... .. .
05-31-2021, 10:37 AM
الصادق عبدالله الحسن الصادق عبدالله الحسن
تاريخ التسجيل: 02-26-2013
مجموع المشاركات: 3244
أما في فيديو "القُنبلة" فلم تكن بحاجة يا أحمد إلى كل هذا "العصف الذهني"..
فأن يأتي البوشي متأخراً - في شهادته بشأن الاجتماع مع حميدتي والعسكر – أفضل من لا يأتي أبداً، وكذلك الحال بالنسبة لشهادة واعترافات عضو مجلس السيادة عائشة عليها رضوان الله.
وأنا أكرر بأن ليس هناك من يقلل أو ينتقص أبداً من تاريخ البوشي في مواجهة بطش الكيزان ولم انتقص من قدراته الخطابية، ولا من نشاطه وعموم تجربته النضالية ولكن يبقى السؤال الموجه لكم يا أحمد هل كانت القنبلة المدوية التي حذّرنا من انفجارها وتداعياتها في الفيديو الأخير تتمثل في استجابة البوشي لدعوة الغداء المقدمة من أبناء حمدان دقلو وبصحبة جنرالات الجيش والأمن، الذين – وبحسب البوشي نفسه – تتلطخ أكفهم هم وأبناء دقلو ، بالدماء الزكية لأبرياء دارفور، وأن أصابعهم وأثناء جلوسهم معهم كانت ما تزال تقطر وتسيل منها الدماء القانية لضحايا مظاهرات 2013 ؟
أم أن القنبلة هي في إقتحام البوشي الجريء وعدم استنكافه من أن يُلبي دعوة الغداء الموجهة من حميدتي وشقيقه، ومِن أن يغمس أكفه بلا خوف أو وجل في صحن الدم وهو يتوسط مائدة العسكر "الدسمة" ؟
أو هي في عدم تعففه وهو يجلس كتفاً بكتف مع أولئك العسكر المطلية أكتافهم وصدورهم بالذهب؟ أو في عدم تأففه من أن يحشر أصابعه وأكفه مع أكف العسكر التي تسيل منها صلصة الكتشب، وأن يملخ ما شاء له أن يملخ من أفخاذ الدجاج الطرية ومن أجنحة وصدور الحَمام المشوية والمطلية بـ "صلصة الكاتشب القانية".
ولماذا ظلت معدة البوشي صامدة وصامتة على الاحتفاظ بأسرار تلك المائدة "المُقنبلة" حولين كاملين لم يستطع صاحبنا خلالها أن يتجشأ ما في جوفه وأن يتقيأ ويفرغ ما حوته معدته إلا في تلك القنبلة النيوترونية ذات الأثر التدميري الهائل التي بشَّرنا بها بالأمس والتي من المؤكد أنها شنّفت آذانك، لكنها خرقت "بموسيقاها العذبة" طبلة آذننا، وجلبت لحبيبنا ود البشرى "الإستمتاع" الممزوج بالسهر والحُمى.
ختاماً يا 2010 كنا نظن أنه لم يُخلق بعد من يستطيع منافسة صديقك أبو رهف لكن شلاقتك أكدت لنا بأن أبو لهب ليس نسيج وحده وأن حواء اللايفات ولاّدة وفيها "الطلق والعادة" وأن صديقك اللدود أبا رهف رفع أكفه ودعى ربه: (اللهم أجعل لي وزيراً من أهلي .. أشدد به أزري) فاستجاب المولى لدعائه ونفخ الله في بطن أم إبي رهف بدلاً من أخ واحد هذا "التوأم اللايفاتي السيامي" .
... .. .
05-31-2021, 10:39 AM
الصادق عبدالله الحسن الصادق عبدالله الحسن
تاريخ التسجيل: 02-26-2013
مجموع المشاركات: 3244
وحاتك انت كاجيهو ساي بدليل إنك بدل تقول اتهام ميرفت محتاج تحقيق قلت إنه تبرئتها إلى حين إثبات التهمة هي المحتاجة تحقيق !!! معقولة ما شايف اتهامها بالشروع في القتل وبتطالب البتكلم عنها بخير يثبت براءتها؟ موش لما تثبت إدانتها في الأول! أنا موضوع قنبلة وبتاع دة ما شغال بيه كتير، لكن الشهادة الشخصية حول محاولات حميدتي استمالة الثوار مهمة بالنسبة لي قد تقول هي حاجة معروفة من زمان. لكن فض الاعتصام برضو كان معروف بس لما ظهرت الفيديوهات كانت صدمة لو جيت تقيس متابعين البوشي بمتابعين ذا النون بتلقاهم أقل من العشر. ذا النون بفتح اللايف كدة بخشوا ليه 5000 في الدقيقة الأولى ودة جمهور ما هين بوريك أهمية استغلال الوسط دة في نشر الوعي بواسطة ناس عندهم تجارب سياسية ونضالية حقيقية ولو كان عندهم سعر كان اشتروهم الكيزان قبل 20 سنة دة لايف في صفحة شخصية مستهدفين بيه المتابعين والملايكين والمشيرين اللايف عندو جمهوره وأكيد انت ما منهم لأنك بتتعامل معاه على إنه برنامج تلفزيوني عندو أجندة وفريق اعداد، بينما هو في كتير من الأحيان ممكن يكون مجرد فضفضة أو تطمين للمتابعين عن الحالة الصحية
Quote: موضوع الفشقة فائدة الحرب شنو؟ أخير نستنزف موارد البلد في حرب العصابات وتظل الفشقة منطقة نزاع خالية من السكان وبعيدة عن الاستقرار ولا يتعمل فيها مشروع زراعي بالتوافق بين الامارات والسودان واثيوبيا ونستفيد كلنا؟! أنا شخصياً مع الإعمار وضد الحرب ومسألة السيادة الكايسنها شرقاً وعاملين نايمين شمالاً دي ما بتقسم معاي. ولا شايف الحرب دي بتخدمنا ولا بتخدم اثيوبيا وكان طردنا منها الاثيوبيين تماماً برضو ما بنستفيد منها حاجة. يعني شنو؟ أرض زراعية؟ السودان كلو أراضي زراعية استفدنا منها شنو؟ قمح ما قادرين نوفره الإمارات دولة غنية ممكن تدعمنا ونتبادل المصالح بندية إذا قدرنا كسبناها في مشاريع بدل الشحدة البتجاروا ليها ناسنا كل يومين. عشان كدة برضو فكرة شيطنة الإمارات الناس تعيد فيها النظر، هي غنية بالقروش ونحن غنيين بالموارد ومحتاجين ليها
اتفق تماماً مع الكلام دا
المبادرة الاماراتية فرصة وضيعناها وتاني وين نلقاها
كلو من جعجعة ابان حلاقيم وورجغتهم في صقيعة الميديا السايبة دي
يا الصادق هشام عباس زول فاهم وقرايتو للاحداث وتحليلاتو دايماً منطقية
اسع اللايف الاتكلم فيهو عن موضوع الفشقة دا هل بتقدر تختلف معاهو وتفند وجهة نظرو دي بنفس العقلانية والمنطق؟؟
الناس مفترض ما تتكلم ساي .. بلدنا واقعة في واطات الله دي ومحتاجة جهد كبير عشان تقوم
اي استثمار جاي داخل البلد طوالي ابان حلاقيم يكوركو دا بيع ودي خيانة والغريبة هم برضو اول ناس تحتج على سوء الاوضاع
نظرية المؤامرة الدخلوها الكيزان في امخاخ الناس حا تضيع البلد دي ونهايتها حا ياها الفرتقة والتشظي والعولاق الخايفين منو طول عمرنا
06-03-2021, 02:04 PM
الصادق عبدالله الحسن الصادق عبدالله الحسن
تاريخ التسجيل: 02-26-2013
مجموع المشاركات: 3244
Quote: بلدنا واقعة في واطات الله دي ومحتاجة جهد كبير عشان تقوم
لا خلاف يا هيثمنا الغالي حول أن الكيزان تركوا البلد أشبه بجثة هامدة والسؤال: لماذا يحيد صاحب القرار السوداني عن مسار الثورة ويسير بعكس مبادئها، ولماذ يُصر على اتباع نفس نهج الكيزان، ليس فقط في جزئية الإستثمار، وإنما في مجمل الشأن الإقتصادي ؟ ولماذا يخجل من الإعلان عن إتفاقيات الإستثمار إن كانت مُربحة ومثمرة وعادلة وليس فيها ما يستدعي الخجل، وتدُر على السودان عشرات المليارات؟
ولماذا لا تسمع أنت وهِشام وأنا وكل سودانية وسوداني، عن هذه الإتفاقيات والبروتوكولات وعن عقود الإذعان والبيع والرهن إلا من خلال تسريبات الطرف الإماراتي أو التركي أو الأمريكي أو الروسي أو الإسرائيلي... إلخ؟
والإنعاش وإعادة الروح الخامدة لجسد إقتصاد السودان المريض، هل تعتقد أنت أو يتوهم الأخ هشام بأنه يمكن أن يتحقق بمثل هذه الإتفاقات المجحفة خصوصاً مع انعدام الثقة في المتفاوضين السودانيين، الذين يتوزعون بين ساذج أو متواطئ على بيع أو تقسيم لحم ثور السودان الذبيح، أو ضعيف فنياً وأخلاقياً ويسهل ابتزازه وإخضاعه.
فمن - بالله عليك يا هيثم - من يثق الآن في الجنرال البرهان أو في "الفيلد مارشال" حميدتي، بعد انكشاف مؤامراتهم الفادحة والفاضحة وروائحهم الفائحة؟
ومن الذي يثق في قُدرة وبراءة السيدة مريم، و"عذريتها السياسية" بعد شطحاتها المرصودة والمشهودة؟ ومن يثق في نصر الدين العدل أو نصر الدين الأوقاف أو سِلك وبقية الطاقم الوزاري لتوقيع إتفاقيات، وفي هذا الوقت بالذات؟
فإن كنت يا غالي أو كان الأخ هِشام عباس يثق ويطمئن لأمثال هؤلاء، فالمصيبة أنهم هم أنفسهم (مجلس سيادة بمكونيَه وشركاء سلامه، وجهاز تنفيذي برئيسه ووزرائه، وقادة ميليشيات) لا يثقون في بعضهم بعضاً
كما أن "عذراء" الخارجية الحالية ومن سبقها من وزراء كانوا هم آخر من يعلم بالشأن الخارجي وبالمكائد الخارجية وبما أبرمه المخلوع سابقاً، وما يبرمه خلفاء المخلوع الجنرالات وأعضاء لجنته الأمنية حالياً وسابقاً، والذين انتزعوا من وزارات الاستثمار والتخطيط والخارجية والمهلبية كل ملفاتها واختصاصاتها وصاروا هم وقادة الميليشيات من يقررون في الشأن "الإستثماري" ومن يعقدون اتفاقيات إذعان وعقود تفريط تتم في الخفاء وفي جنح الظلام.
... .. .
06-03-2021, 08:06 PM
محمد نجيب عبدا لرحيم محمد نجيب عبدا لرحيم
تاريخ التسجيل: 03-21-2008
مجموع المشاركات: 4405
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
صديق مهدى على
محمد البشرى الخضر
الصادق عبدالله الحسن
جلالدونا
محمد نجيب عبدا لرحيم
فيس بوك
تويتر
انستقرام
يوتيوب
بنتيريست