*سؤال الشيخ عوض الله الحباك: ما هو الفرق في الجمال بين سيدنا محمد وسيدنا يوسف عليهم السلام*
*سؤال الشيخ عوض الله الحباك* أنا كنت في كسلا منها ولاقيتكم إنتوا بعدين بمدح مدحة في "الماحي" مدحة من الماحي بقول : "متين يا عاشقين نحدا الجمال مفلج سنه اصفى من الريال أعذب ريقو احلى من الزلال وفر تبسيمو برقا لاح وشال على الرسل أجمعين ميزانو مال يفوق داؤود ويوسف بالجمال. بعدين في واحد من انصار السنة كان قاعد جنبي حاضر المدحة دي قالي : نبي الله يوسف أجمل من محمد بمراحل كبيرة" بعدين قلت ليهو انا الكلمة دي ما راح أسيبك فيها الا القى رجل عالم يوريني ليها فعلاً في واحد عالم في الجامع بتاع كسلا راجل كويس متنور بعد ما صلينا العشاء قلت ليهو : مولانا انا في كلمة مؤثرة علي انا بمدح النبي عليه الصلاة والسلام وقلت في مدحة الماحي "يفوق داؤود ويوسف بالجمال" في واحد من انصار السنة قاعد جنبي قالي "نبي الله يوسف أجمل من سيدنا محمد بمراحل كبيرة" الكلام دا في شنو؟ وانا دايرك تفيدني عليهو :قالي حقيقة هو يوسف جميل جمال، ليهو شطر الجمال لكن سيدنا محمد أجمل من سيدنا يوسف بمراحل كبيرة جدا لكن جمال سيدنا محمد ما بتأكد لشدة الأنوار العليهو والهيبة والوقار ومافي أجمل من محمد إلا الله سبحانه وتعالى مافي أجمل من محمد إلا الله وسيدنا محمد مكمل الخصائل كلها في الخصائل الحميدة جميل في الأخلاق جميل وفي خلقته جميل لكن من شدة الأنوار العليهو جمالو ما بكون مؤكد ما بكون الزول بتأكد من جمالو. *رد الأستاذ* دي بتسوقنا برضو لكلام قالوا بعض العارفين الكلام القالو صاحبنا لعوض الله ماهو جديد في بعض الناس برضو قالوا كدا لانو يوسف اشتهر بجمال متواتر في الصور وفي المديح في القصص الواردة وفي المديح جمال يواسف وارد بصور متواترة لكن الكلام عن جمال نبينا وارد في مديحو لكن مش بالمقارنة بيوسف وطبعا مافي قصة تاريخية او عاطفية زي ما حصلت لسيدنا يوسف فقصة ميل زليخة لسيدنا يوسف بقت زي الأسطورة واتنُقلت بالوضع دا ففي واحد من العارفين قالوا ليهو سيدنا يوسف أجمل من سيدنا محمد لانو سيدنا محمد ما حصل انو افتتنت بييهو امرأة زي ما افتتنت زليخة بسيدنا يوسف ودا من البراهين على جمال يوسف فالعارف قاليهم "جمال يوسف جمال جمالي وجمال محمد جمال جلالي معاهو هيبة تدفع عنو ان تتعلق بيهو النساء" والرجل القال لعوض الله قاليهو جمال نبينا محاط بأنوار تخليه ما يُعرف بالصورة العرف بيها جمال يوسف فالإجابتين جيدتين جدا..جمال نبينا معاهو سطوة معاهو جلال والجمال الجلالي اكبر من الجمال الجمالي ..الجمال الجمالي زي هادي مطفي لكن الجمال الجلالي قريب من الله خالص بيهو صهر الأشياء بيهو القوة بالسوق لي الله ..المقام المحمدي مكلف بالسوق لي الله بالصورة الجمالية والصورة الجلالية والصورة الكمالية لكن وقتها ما جاء الصورة الكمالية وقتها ما جاء الصورة الجلالية بدت لمن الناس ما استحقوها الصورة الجمالية بدت في مكة "ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ" لمن برضو كانت خاملة في وقت المرحلة التاريخية ديك جات الصورة الجلالية الصاهرة القاهرة الساقت الناس لي الله اها دي دفعت عنو ان تتعلق بيهو النساء لكنو هو اجمل من يوسف بما لا يقارن
05-20-2020, 08:49 PM
Omer Abdalla Omer Omer Abdalla Omer
تاريخ التسجيل: 03-02-2004
مجموع المشاركات: 4081
الله اكبر، يا سلام يا سلام يا سلام يا شيخ عبدالله كلام.. كلام...كلام والله. هذه الأيام استمع لسلسلة تبسيط الدعوة، والله أعيد الشريط الواحد اكثر من عشرة مرات و كل مرة اسمع كلام جديد من الشريط ذاتو... يا الله يا الله.. هذا علم عجيب.. بارك الله فيك شيخ عبدالله و نفعنا بجاهكم. دخلنا للتبرك في هذه الايام المباركة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالله عثمان
Omer Abdalla Omer
فيس بوك
تويتر
انستقرام
يوتيوب
بنتيريست