|
|
|
 Re: اعتبارا من اليوم فى الولاية الشماليه، اى (Re: HAIDER ALZAIN)
|
بدأ الشباب
اعتبارا من اليوم فى الولاية الشماليه..... اى وافد لا يحمل الرقم الوطنى او البطاقه القوميه يغادر المنطقة فورا وذلك بعد مقتل شاب فى مزرعته فى ارقوا بعد التعدى عليه وسرقة جواله وفلوسه ، بالفعل بدأ شباب القرى التاكد من هوية الموجودين فى الشماليه من الوافدين ، واى شخص اجنبى لا يحمل اوراق ثبوتية يغادر الشماليه فورا ، تم الاتفاق بين ابناء القرى والمدن في كل مناطق الشمالية ان لا يقوم شخص بتشغيل اى وافد فى المنطقه الا بعد تسجيل كامل معلوماته رقمه الوطنى وعنوانه فى السودان ،
المعلومات المتوفره للشباب بان هنالك عدد كبير من الوافدين من غرب افريقيا واثيوبيا يعملون فى الشمال ولا يحملون اقامات من الجهات الرسميه وهنالك توجيهات لاصحاب الباصات ان لاينقلوا اى شخص الا بعد ابراز ما يثبت بانه سودانى
ومن يخالف هذا الامر سوف ينال العقاب المناسب
اذا عجزت الدوله توفير الامن اللازم فى المنطقة
نحن قادرين ان نجعل مناطقنا اكثر امنا ، صحيح نحن مجتمع مسالم ولا نعرف حروب قبليه ولا ثقافة القتل والنهب وبنكرم الضيف والقادم الينا
ولكن لا نقبل ان يكون امننا وحياتنا مهددة ،،
ربنا يحفظ سوداننا
*شباب الشماليه*
| |
 
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
شهدت محلية البرقيق بالولاية الشمالية قرية أبتة غرب جريمة قتل بشعة امس الجمعة راح ضحيتها الشاب المزارع، عبدالجبار سعيد عمر صاحب ال35 عام.
وتعود تفاصيل القضية إلى ان الفقيد قد تعرض لعملية نهب مبلغ مالي وجوال داخل “كرارك تلودي” حيث تم ضربه وإيذائه بآلة حادة “وِتِد” مما افقد الشاب وعيه وادخله في غيبوبة وتوفي في اليوم التالي، وبعد تشريح الجثة وظهور نتائج التشريح، تحرك تِيم مباحث قِسم أرقو للتقصي حول الحدث، وتمكنت المباحث من الوصول للجاني في ظرف ثلاثة ساعات، وتم إلقاء القبض على المتهم، وفتح بلاغ تحت المادة 130 القتل العمد .
Quote: وقعت جريمة قتل بالولاية الشمالية محلية البرقيق قرية “أبتة غرب” ،وذلك في مساءالخميس امس الاول وراح ضحيتها الشاب المزارع ،عبد الجبار سعيدعمر صاحب ال٣٥عام .
وتعود تفاصيل القضية الي ان الفقيد قد تعرض لعملية نهب مبلغ مالي وهاتفه الجوال داخل (كرارك تلودي) بارقو.
وتم ضربه وايذائه بالة حاده (وتد)مما افقد الشاب وعيه ودخل في غيبوبه وتوفي في اليوم التالي من الحادث.
وبعد تشريح الجثه وظهور نتائج التشريح ،تحرك تيم مباحث قسم ارقو للتقصي حول الحادثة ،وتمكنت المباحث من الوصول للجاني خلال ٣ساعات وتم القبض عليه واعترف بالجريمه ووجهت له تهمة القتل العمد تحت الماده ١٣٠. |
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: أبوبكر عباس)
|
الحبيب حيدرنا الجميل
منطقة البرقيق هي محليتنا وأنا من البرقيق
هذا الحادث كان له صدى كبير جداً لأن مثل هذه الجريمة
عندنا من الممارسات النادرة جداً جداً ..
منطقة ابته هي قرية شاعرنا الجميل محي الدين فارس ، والفنان ادريس ابراهيم ، والشاعر تلودي
هذا الشاب كان ترك الوظيفة وتفرغ للزراعة ..
والحادث كان مؤثر جداً .. وتنادى الشباب عبر القروبات وبدأوا في عمليات التفتيش والقبض
وهذا دليل على غياب الدولة وهذا هو الأخطر من الجوع والمرض .. الخ لأن الأمن هو الأهم وهيبة الدولة
قبل ايام نفس الطريقة في حلفا في اقصى الشمال والغريبة الخبر كان منقول في التلفزيون ( الشمالية ) بدون اي تحفظ
القبض على الناس وتسفيرهم عن طريق البصات الى العاصمة ( كما يتم هنا الخليج )
المشكلة ما في السودانيين هناك اعداد كبيرة من المعدنيين اثيوبيين وتشاديين ... الخ
في الأصل لم يكن هناك حرص أمني في المنطقة لقلة الجريمة أو انعدامها وندرة الحوادث
وهذا ترتب عليه فراغ كبير واستغلها البعض في ممارسات لم تكن معتادة في المنطقة
لأن في الاساس كل ناس تربطها صلة قرابة مع بعض ومصالح ونسابة مع قلة السكان
ولكن يبدو ان الأمر اختلف الآن ..
المصيبة يا الحبيب حيدر غباب الدولة .. وقيام المواطنين عاديين وبدون خلفيات بتطيق القانون
هذه الرمزية هي الأخطر .. وربما تكون منتشرة في الهوامش في الوطن ..
انحسار كامل للدولة في الهوامش البعيدة .. ولكن حتى العاصمة بدأت تشكو من نفس التهميش الامني
تحياتي الحبيب حيدر بوست مهم
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: علي عبدالوهاب عثمان)
|
الحبيب حيدر .. تحياتي
أنا في اجازتي لاحظت وجود عدد كبير جدا من الاثيوبيين واحبابنا من تشاد
في عندنا من كل القبائل السودانية موجودة وخاصة في سوق دنقلا
في أمن وأمان .. ومعظم التجار والموردين منهم ..
لأن السودان مهما يعرف أهل المنطقة ويعرف سلوكياتهم ويتعامل معهم على هذا الاساس
ولكن المشكلة في القادم من خارج الوطن ليست لديه ثقافة التعامل مع الناس
لأننا كسودانيين نعرف جيداً عادات وتقاليد كل منطقة ونتعامل مع الشخص على هذا الاساس
مع التحية للاحباب
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: علي عبدالوهاب عثمان)
|
الحبيب علي عبدالوهاب سلامات ياملك ..
والرحمة والمغفرة للمغدور ..
Quote: المصيبة يا الحبيب حيدر غباب الدولة .. وقيام المواطنين عاديين وبدون خلفيات بتطيق القانون
هذه الرمزية هي الأخطر .. وربما تكون منتشرة في الهوامش في الوطن ..
انحسار كامل للدولة في الهوامش البعيدة .. ولكن حتى العاصمة بدأت تشكو من نفس التهميش الامني |
نعم التحرك بالكيفية دي مع غياب القانونية فيهو خطورة
لكن القتل والنهب وعدم الامن اكبر خطر زي ما تفضلت.. وطالما للا توجد دولة ولا تستطيع بسط نفوذها وهيبتها على الاطراف فمن حق المواطن ان يحمي نفسه وماله
ومن حقه حمل السلاح وتطبيق القانون الذي يكفل له حماية نفسه بيـده..
بل ومن حقه ان ينادي بالحكم الذاتي وغدارة نفسه بنفسه طالما هو في الهامش ولا تستطيع الدولة إدارة شأنه وامنه..
حكومة عصبجية الخرطوم فالحة بس في فرض الضرائب والأتاوات وقلع زراعة ومحاصيل الناس بالباطل..
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
Quote: في الأصل لم يكن هناك حرص أمني في المنطقة لقلة الجريمة أو انعدامها وندرة الحوادث
وهذا ترتب عليه فراغ كبير واستغلها البعض في ممارسات لم تكن معتادة في المنطقة
لأن في الاساس كل ناس تربطها صلة قرابة مع بعض ومصالح ونسابة مع قلة السكان
ولكن يبدو ان الأمر اختلف الآن .. |
قبل سنين عددا نصحت ناس الشماليـة وشمال نهر النيـل انهم مفروض ينسوا الطيبة والمسالمة ويسعوا ليهم سلاح شخصي
وكل زول مفروض يجهز ويتحضر ليوم اسود بانه يوفر بندقية او رشاش تحت يده..
ولا بد من تعليم الأبناء الرمي والسباحة وركوب التاتشرات ..
أغلب - حتى ابناء الشمالية نفسهم - الوقت دا اعترضوا على الدعوة دي واعتبروها ارهابية
لم يوافقني او يساندي فيها غير الفارس ول ابا بريمة ..
الآن السلاح حملهم غيرهم وجاءهم في عقر دارهم
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: نعمات عماد)
|
معقول الواحد معاكم بلمباتو ليهو سنين ولسّ غالبكم تقروا ما تحت الكلمات؟!!
يا خسارة استنارتي فيكم!!
ما حمله لنا المدعو حيدر الزين يقول؛
أي وافد لا يحمل رقم وطني ......
كلمة وافد هنا لو جاء سيبويه ومعاهو منو داك لا يمكن أن تفسر خارج العنصرية والشكل!!!
لا يمكن للشباب أن يتحروا من كل السكان
كل الحا يعملوهو؛
أي زول أصفر وعيونو دقاق
ح يقولوا ليهو جيب رقمك الوطني
معقول يقولوا لزول دنقلاوي برطن أو حلفاوي بسب في الدين؛
جيب رقمك الوطني؟!
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: الزبير بشير)
|
Quote: قالوا كل زول ما عنده اوراق ثبوتية اغادر
عندما يسود العدل و الامن و الامان السودان سجادة كبيره من اراد تبتلا |
حبيبنا الزبير الختمي تحياتي
والتحية للحبيب حيدر ..
المنطقة عندنا في الشمال لها ارتباط كبير منذ تاريخ قديم مع التجار في الغرب
خاصة درب الاربعين وتجار التمور من دارفور وكردفان
اليوم السوق الشعبي في مدينة دنقلا الغالبية من قبائل السودان المختلفة
لأن معدل السكان عندنا قليل ..
كما ذكرت في مداخلتي .. السودانيين يعرفوا بعضهم كويس جداً
يعني كيف يتعاملوا مع بعضهم .. أبداً لم تكن عندنا مشكلة
ولكن تسرب غير السودانيين وخاصة ( المعدنيين) وكمان المنطقة اصبحت معبر
الى ليبيا .. احبابنا الاثيوبيين .. واحبابنا من تشاد وافريقيا الوسطى بين المعدنيين
وللفراغ السكاني اصبحوا بأعداد كبيرة جداً .. وكذلك حسن المعاملة ..
لكن اخواننا من مختلف مناطق السودان ليس لديهم مشكلة فهم يجيدون فن التعامل مع بعضهم
ولديهم مصالح تجارية .. وكل قبيلة أو اثنية عندنا تعرف ما يسر الاخر وما يغضبه
المشكلة الكبرى غياب الدولة ..
وحادث هذا الشاب كان مؤثر جداً
تحياتي الحبيب حيدر ..
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: علي عبدالوهاب عثمان)
|
بدأ الشباب
سلام يا حيدر...
بحاول افهم غلبني..وقع الكلام ...منو الشباب ديل اقصد صفتهم القانونية...
يعني انا الملامحي الغير سودانية او قول سودانية و ما من اهل المنطقة...يقومو يوقفوني و يقولو لي بطاقتك.. اقول ليهم انتو منو يقولو لي نحن الشباب...معقول الكلام دا...على الاقل الدولة تديهم تفويض و بطاقات...لكن شغل الحقارة ما ينفع
دي اكتر من عنصرية دي فوضى و الكلام دا بشعل النيران اكتر
| |
|
|
|
|
|
|
|
|
 Re: اعتبارا من اليوم فى الولاية الشماليه، اى (Re: HAIDER ALZAIN)
|
| Quote: كلمة وافد هنا لو جاء سيبويه ومعاهو منو داك لا يمكن أن تفسر خارج العنصرية والشكل!!! |
العنصرية في وافد هنا وين يا سعادة الدكتور..!!
ما اهو دي السعودية والخليج كله من سنة 79 شابكيننا وافديـن ووافدين .. هل بتلمح لعنصرية السعوديين او الخلايجة كمان؟ !
امريكا وابناء العم سام بجلالة قدرهم شابكنكم المهاجرين المهاجرين..
هل حملات وكالة الهجرة بتقوم على اساس عنصري برضكـ ..والا بيفرزوا عند الشعر واللون
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Omer Abdalla Omer)
|
البركـة فيكم يا حيدر وعلى عبدالوهاب.
عمر كتب:
Quote: من الافضل ما تفتحوا باب زي دا!
لكن الواجب الحكومة تتولى زمام الامر و تضمن امن الناس و سلامتهم..
باب زي دا بجيب هوا شديد في مناطق كثيرة في السودان و برجعنا الغاب و الغاب ما حبابو و ما كل زول بقدر عليهو |
أقرأ الأية * واتقوا فتنة لا تصيبن الذين ظلموا منكم خاصة...الأية *
الفتنة لو وقعت لا تصيب المجرمين والظالمين فقط.. لذلك الحل هو تجنبها.. والحديث من مات دون ماله فهو شهيد.. لو وقعت الفتنة فكل هذا الكلام حتى عن القوانين سيذهب مع الريح.
وما فى زول يلتفت ليه.. كل زول ويا روحى.. الحكومة طبعا ستأتى بعد وقع الفاس على الرأس عشان تقمع.. فالحين فى القمع وما فالحين فى التخطيط لبسط الأمن وتحمل تبعاته وتكاليفه,
حين يتعلق الأمر بالقتل وإزهاق الأرواح وتتقاعس الشرطة.. والحكومة غائبة حتى فى الخرطوم التى فيها قصرهم الوريف.. حينئذ المواطنون سيبحثون عن الوجوه الغريبة على المنطقة
بصرف النظر عن سحناتهم ويسألونهم عن الهوية.. فى أمريكا قتلوا اليابانيين بالأمراض فى السجون ولم يسألوهم عن هوياتهم ويطلقون سراحهم.. مافى مقارنة.. ما يقوم به هؤلاء الشباب هو عمل
الشرطة التى تقاعست عن واجبها.. وفى أمريكا حتى اليوم المواطن فى غياب الشرطة له حق الإعتقال citizen's arrest (أعمل قوقل)
يقينى انهم لا يتعرضون لمن يعرفونهم من الوافدين الذين استقروا معهم، فهم ليسوا مجانين. ثم ان هذه المنطقة فيها حضارة الاف السنين.. قالوا يسألوا الشخص ولو ما عنده هوية سودانية يسفروه
ما يقتلوه مثل ما حدث لليابانيين أو للتوتسى فى افريقيا
كامل التضامن مع شباب الولاية الشمالية ولهم الحق الأساسى فى حماية ممتلكاتهم وعروضهم. فقد طفح الكيل وبلغت الروح الحلقوم.والحل الوحيد هو تقوم الحكومة بواجبها فى حماية المواطنين
ثم تطلب منهم (بعد ذلك) عدم أخذ القانون فى اليد.. الأمن هو الشئ الوحيد الذى لا يحتمل الفراغ.
على الحكومة أن تتحرك، إن كانت هناك حكومة.. وإلا فسيأتى يوم فيه الشماليون سيرحلون أى واحد عنده هوية سودانية.. جـد.
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
| Quote: معقول يقولوا لزول دنقلاوي برطن أو حلفاوي بسب في الدين؛ |
حبيبنا الجميل ابوبكر المستنير تحياتي
والتحية للحبيب حيدر
دنقلاوي برطن .. وحلفاوي يسب في الدين
يا سلام ده كان في الزمن الجميل وقت الرخاء والسعادة
والحاجات الحلوة كانت تأتي من مصر
وناس مرتاحة معايش .. كانت جلسات البوقانة والدكاي والنبيذ
وكمان ( موية التمر ) الصافي ..
آه يا زمن ..
الخوف كمان الامتداد المصري لسعة الاراضي الزراعية وتوفر المياه الجوفية
وقلة عدد السكان ..
يا سلام يا المستنير ذكرتنا الزمن الجميل وفرة المحاصيل
تحياتي الحبيب المستنير
معليش الحبيب حيدر .. المستنير مداخلاته جميلة ..
تحياتي
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: علي عبدالوهاب عثمان)
|
المواطن ما بين غاضب و مرعوب من الإنفلات ،لجأ لأصعب الحبوب
واضح أنه حل مؤقت لأن الحكومة لن تقف متفرجة و تترك المشكلة
تتضخم.
الرجال أو الشباب السودانيون أغلبهم عندهم رقم وطني .و هو مطلوب
منهم في مؤسسات التعليم و شركات الإتصالات لشراء الشرائح و في
تطعيمات الكورونا و الحمى الصفراء و إلتهاب الكبد و في البنوك و
بيع و شراء السيارات و البيوت و معاملات كثيرة أخرى.
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: نعمات عماد)
|
سلام للجميع,
تعرفو موسم الخريف هذه الايام و اهلنا المزارعين و هم لا يملكون المال لشراء سلاح, هذه الايام يعانون الامرين من قبل الرعاة و تم تشريد قرى بأكلمها الي معسكرات النزوح حيث اتلفت المزارع و قتل عدد من الذين حاولو منع البهائم من دخول الزراعة و الحكومة لم تتحرك او ليس بأمكانها التحرك.
95% من المواطنين السودانيين (المزارعين عموما) ليس بأمكانهم امتلاك سلاح و كذا ليس بالامكان الدفاع عن النفس.
الدولة السودانية فشلت منذ ان تم تحييد الجيش و استبدالها بلميشيات للقيام بواجب حماية الدولة, النتائج تأتى تدريجيا فنرى الان انفلات امنى في عاصمة البلاد و انتقلت الي اطراف اخرى غير تلك التى تعود الناس سماع اخبارها حتى صارت (Norms).
من الصعب العودة الى الوراء و حلول الـ vigilante عواقبها وخيمة و قد تنتج مليشيات (جنجويد) و مداها قصير.
الشئ الاخر, هل الوافدين اجانب (تشاديين و اثيوبيين) بالتأكيد, ام سودانيين من مناطق اخرى؟ و كيف التفريق؟
و ده برجعنا لكل احداث ما قبل ِاغسطس 17, 2019 حيث كان من الضرورى علي التوافق علي تأسيس دولة بدلا من الاصرار علي مكاوشة تركة المؤتمر الوطنى و تكرار نفس الاخطاء. النتائج ظهرت في اقل من سنتين.
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Asim Ali)
|
| Quote: تعرفو موسم الخريف هذه الايام و اهلنا المزارعين و هم لا يملكون المال لشراء سلاح, هذه الايام يعانون الامرين من قبل الرعاة و تم تشريد قرى بأكلمها الي معسكرات النزوح حيث اتلفت المزارع و قتل عدد من الذين حاولو منع البهائم من دخول الزراعة و الحكومة لم تتحرك او ليس بأمكانها التحرك. |
أ.محجوب
عشان الكلام الفي المقتبس و ما شابهه في مناطق أخرى من السودان ،
أخاف نزول عقاب يعم البلد،أكتر من ال نحن فيه .
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: أبوبكر عباس)
|
Quote:
عاصم عليك الله سيب اللولوة
قالوا رقم وطني
|
لولة شنو
القاتل ماسودانى وظن شايف صورو حايمه فى الوسائط
الجهه الطلعت كلام رقم وطنى فى النهايه -ماجهه رسميه انما اسياد وجعه- وافد اجنبى او سودانى لازم يكون معروف بوثيقه ثبوتيه الاجنبى برقم الحصر حسب المسمى او وافد يكون معروف طالما الدوله ماشايفه شغلها ومسيطره امنيا وضابطه للحدود
والشماليه ونهر النيل بين التعدين ومشاريع الشماليه (الاستثمار) مدخل لوجود غير معروف مجرمين هاربين او او دخول غير شرعى او ..او ..كلو وارد
اذن لازم الناس تجمى نفسها باجراءات الى ان تتحمل الدوله مسئولياتها
والا تحولت المنطقه لحاله فوضى ربما تتعدى ماحدث فى اطراف تانيه من السودان
وشمال السودان مطمع مصرى من جهه ومن دول الشرق الجاره من جهه
فى النهايه اى مواطن المشكله شنو يكون ملتزم برقمو الوطنى المشكله شنو ؟
اى انسان بيحترم القانون فى الشارع فى اى مكان ولايتو او بلدو او خارج وطنو عدم حمل وثيقه ثبوتيه مشكله مع السلطات
.
الان المشكله مش رقم وطنى ولا اجنبى
المشكله انو ولايه اضطرت تتخذ اجراءات بشكل (شعبى) فى غياب الاجهزه الامنيه وقيامها بدورها فى لايات الشماليه مشاريع اسثمار اجنبى وولايه تماس ووحركه حدوديه وهى ونهر النيل ولايات ارهقها التعدين امنيا وبيئيا وربما اجتماعيا
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: جلالدونا)
|
ول أبا حيدر،
سلام ..
Quote: قبل سنين عددا نصحت ناس الشماليـة وشمال نهر النيـل انهم مفروض ينسوا الطيبة والمسالمة ويسعوا ليهم سلاح شخصي
وكل زول مفروض يجهز ويتحضر ليوم اسود بانه يوفر بندقية او رشاش تحت يده..
ولا بد من تعليم الأبناء الرمي والسباحة وركوب التاتشرات ..
أغلب - حتى ابناء الشمالية نفسهم - الوقت دا اعترضوا على الدعوة دي واعتبروها ارهابية
لم يوافقني او يساندي فيها غير الفارس ول ابا بريمة ..
الآن السلاح حملهم غيرهم وجاءهم في عقر دارهم |
ما زلنا نقول ونذكر الناس .. أن يحموا أنفسهم ومالهم وأعراضهم ..
فأنتم في الشمال أوكلتم الدولة لحمايتكم .. لكن ليس هناك دولة الأن، إنهار الأمن منذ زمن طويل ..
حمل السلاح لا يعنى أن تعتدي به علي الغير .. فقط لتأمين حماية نفسك وممتلكاتك وأهلك ..
فمن أعتدي عليكم فأعتدوا عليه ..
ح تبكوا كثيراً إن تقوموا بحماية أنفسكم .. والمؤمن لا يلدغ من جهر مرتين ..
هذه الدعوة موجهة لكل سوداني .. وفي أي بقعة من بقاع السودان ..
ولو تتذكر يا حيدر، أني تنبأت بضرب مناطق المساليت والفلاتا في غرب دارفور حتى بعد سلام جوبا .. وناديت من هنا أبناء المساليت والفلاتا أن بحملوا السلاح للحفاظ علي سلامة أنفسهم ..
الأن المساليت والفلاتا يجمعون القروش من جميع أبنائهم أينما كانوا لشراء السلاح للحفاظ علي أنفسهم وممتلكاتهم ..
أفعلوا نفس الشيئ .. أحملوا السلاح .. ودافعوا عن أنفسكم .. بمثل ما يفعل الأخرون ..
بريمة
| |
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Abureesh)
|
فصك
اول حاجة
يرجع الااقليم
وننتخب حاكم اقليم
وبرلمان اقليم
ومجالس محلية للشباب ديل يتعاملو مع الواقع من خلال سلطات الاقليم الفوق دي بس
والادارة الاهلية القبائل والجنسية الخضراء
ودي جريمة جنائية عادية يا غاغا قحت انت والشباب والبليد بتاعك ده
في زول عابر كتل بنت في بوتيك في عطبرة ابوها سامحو وانتو عايزين تنكلو بي الناس من طرف
البنهب الشمال يا ساقطين عافنو يا جذم وساكتين عليه هم
الشركة القابضة المصرية والمخابرات المصرية وعربان الخليج بواسطة حثالة المركز من مدنيين وعسكريين وموثق وموجود
****
لمن كنا بنقول الكلام ده في البورد انت مباري كعوك البورد والمركز وتتمسخر سنتين حاصل فارغ
عليك الله انت عندك مخ هسة
البوليس وين ده شغل البوليس بس
بلا شباب بلا كلام فارغ معاك
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: adil amin)
|
الكوكلكس عادل أمين،
سلام ..
Quote: عليك الله انت عندك مخ هسة
البوليس وين ده شغل البوليس بس
بلا شباب بلا كلام فارغ معاك |
كلامك سليم في حالة وجود دولة تحفظ أمن مواطنيها .. لكن الأمر صار ليس هناك أمن
وفي حالة اللاأمن أفضل أن يحمي الناس أنفسهم .. بدل أن يموتوا وهم عزل.
نعم، أنا شخصياً أعرف وبتجارب أن حمل السلاح بدون وعي يقود إلي إنفلات أمني أخر ..
وعوا الشباب وأهلكم أن أستعمال السلاح في غير محله له تبعات جنائية ..
الناس لا تستسلم ..
وكامل التضامن مع المواطن السوداني في كل مكان ..
بريمة
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Biraima M Adam)
|
أنا أعلم بأن الشرطة قادرة على حسم الفوضى الأمنية خلال شهر ولكن لا توجد إرادة لذلك لست معجب بسيناريو المؤامرة لكن ده مش نفس الحصل في مصر البلطجية عاثوا في مصر فساداً وأول ما حصل الإنقلاب إختفوا بنفس السرعة ، لو استطعت فهم سكوت المكون العسكري لماذا سكوت المكون المدني هل هم مشاركون ؟
| |
|
|
|
|
|
|
|
|
 Re: اعتبارا من اليوم فى الولاية الشماليه، اى (Re: Hassan Makkawi)
|
شخص يقاوم الاعتقال فى مواجهه كم شرطى (غض النظر عن كونو مجرم اوالقبض لسبب اخر زى مقاومه تنظيم الاسواق ..مصور الفيديو صور وماقدم حقيقه الحادثه)
لكن المشكله انو دا شكل العجز وسقوط هيبه القانون فى شخص من يمثل ويحفظ النظام والقانون.
(الفيديو دا مايكون كمان حايم فى الواتس وانا جبتو تحصيل حاصل ) ههههها
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Asim Ali)
|
دا اسمو ارتكاب الجرائم الجماعية داخل العاصمة و في رابعة النهار ..
او .. وضح النهار.. دون خوف لا من شرطة لا من عسكر ولا يحزنون
وبدأت الانتهاكات والجرائم ..خاصة الاعتداء على الانفس والاموال
تكثر وتزحف نحو الولايات المختلفة....
في غياب الامن والامان من السلطات... فيجب حفظ ارواح الناس
ب (العون الذاتي) وحماية انفسهم بانفسهم واخلاء مناطقهم من الاجانب
الغير نظاميين ومن المتفلتين والمجرمين...
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Ahmed Yassin)
|
Quote: يا كيشة،
انت قلت وافد لا يحمل الرقم الوطني
يعني في وافد يحمل الرقم الوطني |
يا دكتور
الكلمة لا تحمل اي مدلول عنصري أو سلبي .. وهو اسلم كلمة او تعبيـر يعبر عن الحالة...لغةً او اصطلاحاً..
وماتنسى انه العربي والديـن وفصاحتك دي دخلوها ليك في الجزيـرة الدناقلة وأسلافهم اساسها في عموم السودان ..
المهم..
نعيد ليتك الصياغة:
اعتبارا من اليوم فى الولاية الشماليه..... اى قادم لا يحمل الرقم الوطنى او البطاقه القوميه يغادر المنطقة فورا ..
اعتبارا من اليوم فى الولاية الشماليه..... كل من يحضر من منطقة أخرى لا يحمل الرقم الوطنى او البطاقه القوميه يغادر المنطقة فورا ..
اعتبارا من اليوم فى الولاية الشماليه..... اى من جاء لاجل العمل وليس من سكان المنطقة لا يحمل الرقم الوطنى او البطاقه القوميه يغادر المنطقة فورا ..
كلمة وافد في مدلولها العام بتعني الجايي من مكان تاني سواء قريب او بعيد..
يحمد للشباب في بيانهم هنا انه وكعموم تلك الديار رحبوا باي سوداني بدون أي استثناء او جهويـة بشرط وحيد ارقم الوطني
إثبات المواطنة .. طلب بسيط بيقابلك في مؤسسات مدنية وعامة و خاصة كتيرة ما شرطاً بواسطة شرطي..
بالنسبة للاجنبي الغير مواطن سوداني اثبات انه دخل بطريقة سليمة وبعلم السلطات.. !!!
العنصرية وين هنا يا عمر عبد الله عشان يجيب هواء؟
أي سكان منطقة بيعرفوا بعضهم وبيعرفوا الغريب..
ومن حقهم ان يشعروا بالأمان تجاه من يسير بشوارعهم ويدخل حلالهم ومزارعهم وبيوتهم..طالما لا توجد شرطة لا تحفل الا بتلقيط الرشاوي والأتاوات من الاجانب العابرين..
كمثال فيديو يحكي واقع بسيط لشرطي مرور شاهدته قبل يومين بيطقطق في سواق شاحنة مصري بتلك النواحي..
وما تخلونا ندخل في نازج النظاميين بالخدمة او المعاش النشرت اخبار جرائمهم وسرقاتهم ونهبهم في الجرائد..
مؤسسة فاسدة زي دي الآن وفي الظرف دا هي نفسها جزء كبير من المشكلة ..
فلا حك جلدكـ مثل ظفركـ ..
والا شنو يا جقود :)
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
Quote:
مؤسسة فاسدة زي دي الآن وفي الظرف دا هي نفسها جزء كبير من المشكلة ..
|
تصورحتى العناصر الجديده كوجوه للجنس الناعم برضو بقو جزء من منظومه الفساد داخل المؤسسه دى
سواق هايس ركب معاهو بنتكلم فى موضوع غرامه العشره الف وبيحكى لى عنمواقف كتيره منها يوم فى الاشاره راكبه استغلت فرصه الاشاره ونزلت ودفعت اقل من حق التذكره فى اللحظه البيقولليها السواق القروش ناقصه الاشاره فتحت وعلى بال ماردت ليهو لقى العسكرى جنب الشباك و(رخصتك)وسحب الرخصه
قال كملت اليومونهايه اليوممشيت القسم عشان استلم الرخصه وادفع الغرامه والزول يتواغ منى (شكلو خجلان يطلب حاجه وينسى موضوع المخالفه)
قال لى فجاءة صادفت واحده من العناصر الجديده البتقيف فى القاطعات وعرفتنا وعرفناعا من مرورنا فى الشارع طول اليوم
قالت لى مالك
قلت ليها حاصل كذا كذا
طوالى قالت لى هو وينو ؟
اشرت ليها عليهو
نادتو
شنو يافلانمالك مع ود جيراننا دا
المهمكلمتين تلاته داير يسلمنى الرخصه وينسى المخالفه طوالىقالت ليهو
لكن كان مادفعحق الفطور 2000 ماتديهو
استغرب العسكرى وقال ليها ماقلتىود جيرانكم
قعدت تضحك
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
| Quote: أنا أعلم بأن الشرطة قادرة على حسم الفوضى الأمنية خلال شهر ولكن لا توجد إرادة لذلك لست معجب بسيناريو المؤامرة لكن ده مش نفس الحصل في مصر البلطجية عاثوا في مصر فساداً وأول ما حصل الإنقلاب إختفوا بنفس السرعة ، لو استطعت فهم سكوت المكون العسكري لماذا سكوت المكون المدني هل هم مشاركون ؟ |
كنت واحد من الناس واقفين في صف البنزين بمحطة بشائر بإجازة العيد الفاتت.. المهم وقفة ما طويلة شديد من 12 ضهر لـ 3 تقريباً .. وكلهن ما فايتات 22 عربية..
لكن قصاد كل عربية بتتملئ زي طلشمية باغة بنزين وكم موتر ودفع رباعي لعسكري او جياشي .. ونحن صابريتن وشاكرين حمدوك..
بعد شوية دورت شكلة قدام مكنة البنزين وتسمع كف ودل وجوطة ..
مجموعة من المدنيين الفوضجية اتشاكلوا في بعض ووقفوا شغل الطلمبة ..
الساعة اللشوف ليك نقيب شرطة نازل من موتره - نقيب شكله صفوفي لانه بيكون دق الستين..ماشي تجاه الشكلة بثقة..
انبسطت وقلت خلاص مرقنا وتنكينا عبئ..
اللحظة ديك القاه مشي مد كريستالته لعامل المحطة ملاها وقفلها ورفعها فوق عشان ناس الشكلة قربوا يدفقوها..
ودور وفحط..
انا كمراقب . مركز معاهو و مندهش في تركيزه وحرصه وقوة إرادته انه اطلاقاً ما يلتفت او يعاين جهة الناس المتضاربين
غايتو عمك عندو خبرة فريق اول في الطناش..لدرجة ممكن يحلف قسم صادق انه ماشاف ليهو مشكلة..
مهما قيـل .. لكن مؤمن بانه توجد مؤامرة في الاحداث دي والشرطة ضليعة وشريك فيها ..
والسوابق كتيرة في مصر وامريكا غيرهم .. بتجعل الشرطي عندما لا تخضع لإبتزازه او رشوته بيتحول لحرامي وبلطجي..
من الإبليس الاوحى للبشرية بفكرة حاجة اسمها جهاز شرطة!!!
| |
|
|
|
|
|
|
|
|
 Re: اعتبارا من اليوم فى الولاية الشماليه، اى (Re: أبوبكر عباس)
|
الحرامي منو ؟
لعناية مدير عام الشرطة ..
🖋 مصطفى عوض
الحاصل كالآتي. الخميس القبل الفات تمت سرقة منزلي انا كاتب المنشور ده مصطفى عوض ومسئول من اي حرف اكتبو هنا .
تمت سرقة منزلي مجوهرات فقط . وانا كنت مسافر . والاولاد قاعدين . تمت السرقة بين صلاة العصر والمغرب . من الخزنة في البيت . لحدي ما اتفتح البلاغ كان حوالي الساعة ١٢ ليلا . تم تحريز عدد لابأس به من الأدلة للبصمات طبعا نتيجة ماجات للبصمات حتى كتابة النشر ١٥/٩ .
المهم انا رجعت صباح السبت من السفر يعني بعد يوم واحد من تاريخ السرقة .
صباح الأحد شاءت الأقدار أن يتم القبض على حرامي في بيت من بيوت الجيران الساعة ٧ صباح بعد طلوع سيد البيت للشغل . لأننا سكان حي واحد مشيت اشوف الحرامي . لقيتو مضروب في راسو قال ضربو شافع بحديدة. بصفتي رئيس لجنة الخدمات بالحي . انا مصطفى ده زاتي . منعت اي زول يضربو. وطلبت من صاحب البيت يمشي يفتح بلاغ . الحرامي ماكان شال حاجة من بيت الزول نط جواهو بس .
سقت الحرامي ومعاي أربعة اشخاص ومشيت المستشفى عملت ليهو عملية خيطو ليهو الجرح ومعاي اتنين بتاعين مباحث ضربت ليهم انا . حضرو خياطة ونظافة الجرح . ركبت الحرامي معاي في عربيتي ومعاي نفرين . بقيت ادردش معاهو . قلت ليهو سرقتو كم بيت في حينا ده . قال لي بكل هدوء كم بيت .
سرقتو شنو . سرقنا لابتوبات ودهب وقروش ومراوح وموتورات موية .
طيب ممكن تمر معاي على البيوت السرقتوها. اي بمشي معاك . طيب نمشي . قمت عديل زغت بالحرامي من ناس المباحث. مشينا البيت الاول . هو بخبرنا بالبيت السرقو. انزل انا ادق باب البيت . يااخوانا انتو اتسرقتو دهب وقروش . اي والله الاسبوع الفات . طيب امشو القسم ارجوني هناك وافوت البيت التاني والحرامي يوديني. ادق باب البيت . انتو اتسرقتو لابتوب وموتور. اي والله طيب امشو القسم . نمشي البعديهو لمن مريت على بيوت وداني ليها الحرامي .. وكلها اكدت سرقتها.
قمت قلت ليهو انا السرق بيتي منو .
قال لي بيتك وين . جيت بجمب بيتنا. قلت ليهو بيتي ياهو ده اتسرق اول امبارح . قال لي ديل ناس محمد .
جميل جدا محمد منو . قال محمد ده الخبير حقنا.
طيب تودينا ليهو. قال خلاص نمشي. اتحركنا في الشارع قلت ليهو بتبيعو حاجاتكم البتسرقوها وين قال لينا في الميزان بتاع الخرد. حتى الدهب اي حتى الدهب ده نحاس محسن بتاع الميزان بدينا فيهو قروش كتير بقول جيبو منو كتير . يشهد الله ده القالو بالضبط.
واللابتوب برضو لبتاع الميزان اي بنبيع ليهو اي حاجة. بعتو اللابتوب بكم. بي سته الف .
لف بجاي تمام . الميزان وين حقكم. الميزان بتاع تقاطع كده . تمام عرفتو رايك شنو نمشي الميزان اول . نمشي خلاص . طبعا الميزان طلع في تقاطع الحي . سبحان الله نحن ماشين على الميزان محمد يجي قدامنا داخل على الميزان . الحرامي قال محمد ياهو داك داخل الميزان . تمام كده ظابط جدا . طوالي اتصلت على ناس المباحث جو . ومشينا الميزان كلنا عربيتين. لقينا محمد وبتاع الميزان . من شافو زولهم معانا عرفو الحاصل . محمد قال لي رفيقو كمشوك. اي كمشناهو. محمد الدهب وين ؟ قال بعناهو للزول ده . بتاع الميزان محترف جدا . قال ليهو دهب شنو . طبعا بصراحة احيانا الشلوت بنفع .
شوف ياظريف انت هنا قبلك حاتعترف بأي حاجة وبعد تمشي الحراسة . دحين خارجنا اللعمنو نحن ماني فاضيين نضيع زمنا معاك .
محمد جبتو الدهب متين . امباره ده ناس مهند جابو الهاجات ده هنا . ايوااا مهند ده جديد .
طلعت صورة الدهب في التلفون بتاعي دهب ذي ده . اي اي ياهو زاتو يا عمك ده ما هق امباره زاتو. بتاع الميزان قال يضرب لشريكو يجي . تمام اضرب . ماضرب طبعا قال في الرواكيب. ماعلينا كدي تلفونك افتح القفل. فتحنا الاستديو والله لقينا صور دهب تلخم اشكال والوان . انت شغال شنو يا عمك . سبحان الله عاينا في الخردة تحت التربيزة نشوف ليك كيس . مرقناها
عارفين فيهو شنو غويشات وختمة مكسرة . انت اشتريت اللابتوب اي . انت ديل شغالين معاك . محمد نط قال بدينا قروش يقول جيبو حاجات. بعتو اللابتوب وين ؟؟ بعناهو ليهو. طيب جبتو ليهو شنو تأني. موتورات ومراوح . تمام . ارفعو الناس . رفعناهم القسم . دخلنا مكتب الضابط المناوب. الحرامي الاول كدي وصف دهب الزول ده . سبحان الله الزول ده وصف خاتم يمكن في البلد دي نادر جدا يا سعادتك الزول ده شاف دهبنا عديل وعارفو كمان . اتاكدت ١٠٠% دهبنا بتلقي عشان ناس المباحث لقو قضية جاهزة واعترافات كاملة .
طيب عايزين الكلب البوليسي سعادتك تحريز. والله عربية ماعندنا ياسعادتك انتو ٤ يوم ماعندكم عربية جبنا عربية سوناتا قلتو لا . جبنا بوكس قلتو عربية ملكية لا . طيب الأدلة بتروح والريحة بتروح. ماعندنا عربية قلنا . تمام عديلة .
خليت الحرامية في القسم بي زولي الحرامي العالجتو واديت بتاع المباحث ٤ الف حق الروشيته العلاجية لانو قال لي الزول ده كاتبلو علاجات.
مشيت مسرح الحادث طلبت كلب بوليسي . قال لي نرفعو في عربيتك عشان ما تاجر عربية. تمام . رفعنا الكلب . ومشينا البيت الأثر مغطينو الكلب قام بالواجب في المتابعة . اتخيلت انو بعديها بمشو بالكلب للحرامية عشان يشمهم. وياكد الريحة حقتهم مع الموجودة في الأثر. تصدقو شممو الكلب الأثر ورجعناهو قفصو. طيب يعني انتو كلبكم ده كان عايز عطور رجلين بس .
المهم . اها نتيجة البصمات عشان مطابقتها مع بصمات الناس المقبوضين ديل . لسه النتيجة دي لو عندك زول في الادلة خليهو يحركا ليك . طيب البصمات سلمتوها؟؟ لسه . يااخوانا انتو ليه بتعملو كده .
طبعا من جوة مغيوظ لكن كاظم غيظي. بنتحرك يا شاب . ده شغلنا.
طيب تمام قبلنا. رجعت البيت .
نرجع لناس الحي . والله بتاع اللابتوب طلعولو بلاغو مشطوب وبتاع الموتور حاكايتو شربت.
النجي لي انا . قالو لي تدفع مبلغ كده الناس ديل عديل قالو ليك تدفع الدهب بجي تمام اتفقنا هاكم دي مقدم . واديتها بتاع المباحث وشاهد ماعندي غير الله لانو بتاع مباحث بورط نفسو مافي . شالا وهو راكب براهو في عربيتي . دايرين تحاكموني بالرشوة عشان موظف دولة يشتغل وهو طلبها عشان يشتغل جاااااهز وطظ في اي قانون ما يحمي حقي .
عارفين الحصل بتصل عليهم كل يوم . شغالين تمام في بلاغك ده .
طيب الجميل في الموضوع جوني اهل الحرامية قالو لي ولادنا قالو هبشوك. ياخ ديل طسوني عديل ماهبشوني بس . طيب ياخ نحل الموضوع . خلاص جيبو الدهب . خلاص نحن بنعرف مهند . تمام سلموهو المباحث .
اقسم بالله بعد يوم من ظهور جودية اهل الولاد وبتاع الميزان ناس القسم فكو الحرامية جت .
يا مدير الشرطة . البيوت الاتسرقت واعترفو بيها ده بلاغات. وانا بلاغ . مافي في قانونكم مادة تحاكم الناس ديل اصلو ؟؟
قضيتي اتباعت لي بتاع الميزان ولا للحرامية ؟؟
القانون عاجز عن حسم المجرم .
للعلم انا حقي عند الله مابضيع لكن القانون اعرفو نفسكم بضيع في حق الناس .
والمرة الجاية انا بجيب دهبي براي لأني كمان والله اواصل في الموضوع براي واسوي لي حمام حراسة في البيت لامن اجيب اخر جرام ولو عارف القانون بضيع حقي كنت من بتاع الميزان مشيت مهند لامن اصل لاخر زول . لانو البعرفا في نفسي بخاف من الخلقني بس تاني بني ادم وشيهو شبر كتير ما بقيف عندو. والقانون بحترمو ما بخاف منو لكن بحترم القانون لكن القانون براهو لمن يخالف العدالة بدوسو.
اللعمنو حتى العدالة في الظلم عدالة .
كان بقيتو على الاماكن والقسم والناس والمباحثية وفتح تحقيق حبابكم طن يا مدير عام الشرطة ووزير الداخلية جيبو معاك . انا المسروق وانا الناشر وانا القلت الكلام ده ومسئول منو بس اعرف الحرامي منو . القانون الضيع حقوقنا ولا الحرامي الكسر الخزنة ولا بتاع المباحث المرتشي ولا انا العالجت الزول ناحية أخلاقية خلتو يعترف لي بأي حاجة .
سلام
المواطن مصطفى عوض
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
| Quote: طيب عايزين الكلب البوليسي سعادتك تحريز. والله عربية ماعندنا ياسعادتك انتو ٤ يوم ماعندكم عربية جبنا عربية سوناتا قلتو لا . جبنا بوكس قلتو عربية ملكية لا . طيب الأدلة بتروح والريحة بتروح. ماعندنا عربية قلنا . تمام عديلة . |
هذه الجزئية ذكرتنى ايام النهب المسلح و هى المرحلة التى سبقت الحرب في دارفور.
يسرقو لينا جمل, الناس (من القرى حول كتم) يمشو يبلغو البوليس في كتم. طبعا لا يوجد بوليس خارج المدينة. يقومو يتماطلو بذات الاسلوب (ما لاقين عربية, ما لاقين بنزين, ما طلعنا اذن الفزع, الخ) لغاية من الشمس تقرب تغيب, يقولو ليكم بعد كدا الا صباح اليوم التانى عشان تتبع الاثر بالليل غير ممكن, هكذا تمر 3 ايام قبل التحرك و العودة بعد ساعتين (الدرب دخل في المى, رمال الصحراء او بين الجبال) و كذا راحت الجمال التى قد تكون عبرت الحدود حينها.
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Mahjob Abdalla)
|
مصطفى عوض
انت بتتكلم بجدك؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اذا فعلا قصتك دي حقيقية ،،فعلى السودان السلام ...
على الوطن السلام..
وكل واحد يمشي يشتري سلاح لحماية ممتلكاته ...
والله ول ابا بريمة اصلوا ما كضب ..واداكم النجيضة ..واسمعوا نصيحته..
ال حكومة ال...!!!!!
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: بسمات الشيخ)
|
سلامات الاخت بسمات
الفيديو لو تابعت المتحدث في الاخير وضح انهم في السودان وناس الشرطة موقفين الشاحنات وبيطقطوا فيهم على عشرة وخمسة ألف..
اما بالنسبة للخو بتاع المرور الظاهر..
فلو ركزت بيبدأ كلامه مع السواق المصري بـ .. لا تعصر علي لا اعصر عليـك ..
وبينهي النقاش على انه الشاحنة تدفع 2500 وتمشي
السواق بيناقشه في انه دي شاحنة شركة وبدون ايصال او حجة لدفع المبلغ فحايدفع القروش من جيبه هو..!
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: Mohd Ibrahim)
|
زيـــادة خير :)
Quote:
الخرطوم: وجدان طلحة
كشف رئيس المجلس الأعلى لكيانات الشمال أبوالقاسم برطم، عن إغلاق طريق الشمال في مناطق أرقين ونهر النيل والدبة أمس. وقال إن الإغلاق سيتواصل ليكون شاملاً.
وكشف برطم في تصريح لـ(السوداني)، عن تقديم مذكرة لرئيس الوزراء ورئيس مجلس السيادة الانتقالي تحوي عدة مطالب من بينها الحكم الذاتي أسوة النيل الأزرق ودارفور، واعتبر أن عدم الرد عليها استهتار لا يمكن السكوت عليه، وهدد باستخدام كروت ضغط ضد الحكومة في الأيام القادمة من بينها إيقاف التعدين . |
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: HAIDER ALZAIN)
|
حبيبنا حيدر تحياتي يا جميل
قريبنا برطم ده رغم امواله ما شاء الله لكن كان اللوم عليه بأنه لايتبرع
لأي عمل خيري في الشمال .. رغم فوزه في دائرة دنقلا ( مستقل) صحيح هو كان ضد الكيزان
ولكن تعرف عندنا يا حيدر الحبيب أهم شيء الفعل التبرع والعمل الخيري ودعم المتجمع ( برطم زيرو)
رغم ذلك استطاع أن يحشد الشباب
اذكر في مداخلة لك في بوست .. تحدثت عن استغلال الفرصة لنيل المناصب
برطم ما شاء الله مرطب للاخر .. ولكن المشكلة في المنصب
كلنا نسعى لما بعد الاغتراب وقد اوشكت اللحظة ( خلاص )
والبديل يا حيدر الحبيب ( انفنيتي) كمان انا طامع في منصب مساعد وزير التعدين بالشمالية
فقط ( مساعد ) شوف التواضع كيف ..
يا ريت ألقى فرصة اجازة للبلد لأكون ضمن الوفد المفاوض ( أكرر دائما شر البلية ما يضحك)
الوطن يتمزق .. يا حظ المخابرات المصرية ..
طيب دولة الشمال .. يا ربي تكون جنوباً من كاسنجر أو من الجيلي
شمالا طبعا حلفا .
.
أحسن من كاسنجر .. أهلنا الشايقية نقدر نتفق معاهم .. لكن ناس ود الباوقة خطيرين ( الله يطراه بالخير ودالباوقة)
والأفضل من الغابة او من تنقاسي .. عشان نحن كنوبيين نسيطر على الوضع ..
معليش الحبيب حيدر أدخلتنا في اعماق وأحلام وخيالات وكوميديا ..
اخيراً وبالجد كده وبدون مزح .. السودان في خطر
مودتي الحبيب حيدر وآسف للهطرقة (مجبورين) .. تحياتي يا جميل
| |
|
|
|
|
|
|
|
|
|
Re: اعتبارا من اليوم فى الولاية الشماليه، اى (Re: علي عبدالوهاب عثمان)
|
عمنا علي عبد الوهاب
التحيات والتبريكات
قريبك برطم ختاها علي بلاطة للناس الحايمة وسط هرطقات التوم هجو الجاكومي في آخر حوار قال:/
إذا لم تستجب الحكومة لمطالبنا سنطبق سيناريو الشرق
تصاعدت أزمة الشرق بصورة كبيرة على ضوء استمرار إغلاق الطرق القومية وميناء بورتسودان، ولم تلوح حتى الآن حلول في الأفق، المحتجون من جانبهم امهلوا الوفد الحكومي الذي جلس معهم مؤخرا، اسبوع لحل قضاياهم وهناك توقعات بإلغاء المسارات، لكن قبل أن تنتهي أزمة الشرق، شرع المحتجون في الشمال بإغلاق الطرق وهددوا بتطبيق نفس سيناريو الشرق في الشمال الذي سيؤثر على الموارد والطاقة الكهربائية والمائية، وهناك ترتيب لعمل مشترك يضم الشرق والشمال والوسط، الحكومة حتى الآن يبدو أن احزابها الممسكة بالسلطة مختلفة في معالجة قضية الشرق والشمال، فبعضهم اعترف بعدالة قضيتهم، فيما ظل آخرون ينكرون هذا الحق ويتهمون من يتبنون الحراك بالفلو ل وأعضاء النظام البائد، وفي الأثناء أعلنت امس بعض قوي الحرية والتغيير تدشينها لميثاق الوفاق الوطني وفتحت فيه التوقيع لكافة القوى الآخر. عدا المؤتمر الوطني المحلول، من بينها تيار المستقلين، اليوم التالي التقت رئيس البرلماني المستقل السابق ابو القاسم برطم في حوار تناول قضايا الشرق والشمال والوسط، وتطورات الاوضاع والحلول المطلوبة فإلى مضابط الحوار:-
حوار/ فاطمة مبارك
# كيف تنظرون للاوضاع في شرق السودان وشماله ؟
في تقديري أن حكومة السودان تعاملت مع الملفات بصورة عامة وملفات الشرق والشمال والوسط باستهتار. مواطني هذه المناطق لها مطالب مشروعة، وعدم احترامها يعتبر مشكلة.
# لكن الحكومة عابت على المواطنين إغلاق الطرق الرئيسية التي اثرت على الموارد؟
التتريس وإغلاق الموارد و الطرق الحيوية كانت واحدة من آليات الحراك الثوري السلمي، لايمكن أن يكون المجد للمتاريس في الخرطوم وفي شرق السودان يصبح هؤلاء فلول ضد الوطن.
# ربما لأن الشرق منفذ للموارد ؟
الشرق لديه قضية مشروعة من حقه أن يدافع عنها بكل الوسائل بما في ذلك إغلاق الطرق والمواني.
# بعض الممسكين بالسلطة اعتبروا استخدم المتاريس ماعاد ضرورة بعد سودان الثورة؟
هذه حجة مردودة عليهم، استخدام المتاريس استمره حتى بعد فض الاعتصام، وانا كنت من الذين قالوا إن هذه الوسيلة كانت فاعلة قبل سقوط نظام البشير والان لاينبغي إغلاق الشوارع، لأن هناك مواطنين يتضررون من الاغلاق.
# البعض قال انكم تتبنون مسألة إغلاق الطرق في الشرق والشمال لأنكم فلول تتابعون للمؤتمر الوطني ؟
هؤلاء مستجدي سياسة، من تابع الساحة السياسية من 2015-2019 يعرف برطم شنو.
# الم تكن قريب من حزب المؤتمر الوطني قبل سقوطه؟
دعيني أوضح لك اشياء مهمة، الدائرة (2 ) دنقلا دائرة كانت مملوكة للإسلاميين منذ العام1986م ، وأول من انهزم فيها حينما خضنا معهم الانتخابات هو المؤتمر الوطني وشيعنا جنازته بعنقريب.
# قد يكون مرشح المؤتمر الوطني غير معروفا؟
ابدا، مرشحه وقتها كان رئيس حزب المؤتمر الوطني في الولاية الشمالية ورئيس لجنة انتخاب الرئيس المخلوع عمر البشير وكان المرشح الوحيد للمؤتمر الوطني.
# لكن كنت برلماني في عهد النظام البائد أليس كذلك؟
أبوالقاسم برطم، لما كان عضو برلماني، فتح فيه بلاغ في العام 2019م هذه مزايدات ليس لها قيمة وتأتي من أطراف مصطلح ناشطين كثير عليها.
# قد يكون دعمكم لمحمد الأمين ترك هو سبب اتهامكم بالفلول؟
إذا كانت الحشود التي تساند وتقف مع ترك هى مؤتمر وطنى، برافو على المؤتمر الوطني، لكن هذه حجة فطيرة، وترك يمثل إدارة أهلية، والإدارات الأهلية في كل الحكومات معروفة بوقوفها مع المواطنين، وهذا دعا رئيس الوزراء عبد الله حمدوك يختار احد المعروفين بانتمائهم للمؤتمر الوطني المحلول وبرر الخطوة بقوله إن الإدارة الأهلية حزب كل حكومة.
# قيل أن حراك الشرق تحركه دوافع قبلية ؟
هذا الكلام غير صحيح، محمد الأمين ترك، يمثل رمزية لهذا الحراك هذه قضية سياسية وليست قبلية، والزج بالقبيلة في هذا الصراع سيخلق فتنة، نحن لم نقف مع ترك من منطلق قبلي وإنما لأن للشرق قضية وحقوق مشروعة، سواء تبناها ترك أو برطم أو الدروب.
# الاوضاع في الشرق تعاني من هشاشة امنية، عدم الالتزام بالمسارات التي أقرتها اتفاقية مشهود لها، من قبل مراقبين دوليين قد يفتح الباب لتدخلات خارجية ماتعليقكم ؟
ناس المسارات يسعون لخلق فتنة وإذا فتح الباب لتدخلات خارجية، سيفاقم من الوضع لأن الخارج، محسوب على بعض المكونات القبلية.
# الا تخشون من تدخل دولي لمساندة الاتفاقية التي أصبحت مسنودك دوليا؟
ليس هناك (حاجة) اسمها اتفاقية دولية متفق عليها، الوثيقة الدستورية تم اختراقها وتعديلها أكثر من 85 مرة، فإذا وقع كل العالم على الاتفاقية وكانت ظالمة سنرفضها.
# المعارضون لاحتجاجات الشمال، قالوا لاتوجد قضية وإنما يوجد أشخاص لهم أهداف ومصالح تخصهم؟
المعارضون لقضية الشمال ليس لهم علاقة بالشمال، شاهدوه عبر الأندية في الخرطوم والشمال لايتشرف بتمثيلهم له.
# لماذ ترفضون الحلول التى وردت في مسار الشمال ؟
مسار الشمال في اتفاقية جوبا، كان خمسة ورقات، ورقتان ديباجة.
# لماذا لم تحتجوا على ذلك ايام التوقيع ؟
احتجاجنا لم يكن جديدا، في أكتوبر 2020 م اصدرنا بيان اوضحنا خلاله موقفنا. والآن مايحدث من توتر و فوضى سببها المسارات.
# الان يدور حديث عن إلغاء المسارات هل سيحل المشكلة؟
الغاء المسارات اول طلب، لكنه ليس الطلب الوحيد، لدينا مطالب أخرى.
# رئيس مسار الشمال محمد سيد أحمد الجاكومي، قال انكم لم تشاركوا في حل قضية الشمال في المفاوضات والان تريدون معارضة ماتم ؟
انا لا اعرف الجاكومي،لكن مفاوضات السلام، كانت تحت مظلة الجبهة الثورية و التفاوض يدور بين الحكومة والجبهة الثورية لم يكن هناك مجال لمشاركتنا، كما ان المسارات صنعت لإضفاء الصبغة القومية على الاتفاقية. وليس لأجل مصلحة المواطن.
# الحكومة شرعت في حلول لقضية الشرق ماتقيمكم لها؟
هذه حلول فطيرة، وهم حتى الآن لم يجلسوا مع الشمال.
# ربما لأن ليس هناك تصعيد في الشمال؟
نحن سنطبق في الشمال نفس سيناريو الشرق، إذا لم تستجب الحكومة لمطالبنا،ولدينا سد مروي وبوابة تدخل عبرها العديد من الموارد.
# هل تقدمتم بمطالب ؟
نعم، تقدمنا قبل يومين بطلب لرئيس المجلس السيادي وننتظر الرد.
# بماذا طالبتم؟
الحكم الذاتي لإقليم الشمال، الذي يضم الشمالية ونهر النيل، نحن لدينا موارد وأراضي ممنوحة لمستوردين، وآلاف المواطنين يموتون بداء السرطان والفشل الكلوي، بسبب التعدين والمواطن غير مستفيد، لابد من استمرار التحالف بين الوسط والشرق والشمال ضد الظلم الممارس عليهم.
# قبل ذلك تم التوقيع على تحالف أليس كذلك؟
تم التوقيع على تحالف استراتيجي بين الوسط والشمال والشرق في منطقة هداليا قبل ثمانية أشهر.
# تفاقمت الأوضاع حيث تم مؤخرا التوقيع على ميثاق الوفاق الوطني، تبنته بعض تنظيمات الحرية والتغيير وتيار المستقلين كان من ضمن المشاركين، كيف نظرتم لهذا التحول؟
انا من يوم 13 أبريل 2019 نبهت لنقطتين، قلت يجب أن لا تبدأ الدولة بالكراهية. أو تحاسب شخص بانتمائه السياسي، وطالما اعتمدنا المواطنة كأساس يصبح اي فرد لابد أن يتمتع بهذا الحق، والفساد يجب أن يحاسب كظاهرة ولا أن تقوم المسألة على الانتقام، و أعضاء لجنة التمكين لاينبغي أن يحاسبوا الأشخاص بنتماداتهم السياسية.
# تقصد أن هذا السلوك السياسي أدى لتدهور الاوضاع؟
للأسف، تم تطبيق نفس سياسة المؤتمر الوطني، آلاف الموظفين احيلوا إلى الصالح العام،هناك من تعلم وتدرب في الخارج واصبح خبرة وكفاءة يجب أن يستفيد منه الوطن الشخص غير المؤهل يجب ان يذهب إذا كان فعلا مؤتمر وطني أو حركة إسلامية، ولابد من التمييز بين الحكومة والدولة، لكن النخب الحاكمة سيطر عليها ضيق الأفق ،و استبدلنا استبداد باستبداد آخر.
# ما المتوقع بعد التوقيع على وثيقة ميثاق الوفاق الوطني ؟
الوثيقة الدستورية تحدثت عن حكومة كفاءات مستقلين، الحكومة الحالية تمثل أحزاب صعيفة، لم تستطع بسط الديمقراطية المطلوبة.
في الشمالية كل المسؤولين من حزب واحد، فإذا ملكت موارد الدولة، التنافس سيكون صعبا، في الانتخابات هذا نفس سلوك المؤتمر الوطني، لذلك كان هناك ضرورة لمراجعة الوضع والإقصاء الذي تم للمستقلين.
# بعض قوي الحرية والتغيير انتقدت، مشاركة بعض القوي التي شاركت في النظام البائد؟
معظم أحزاب قحت تتنطع وتقول هذا الأحزاب كانت مشاركة في عهد الفلول وتنسى ان معظم أحزابا وقياداتها شاركت النظام البائد وكانت جزءا منه. هذا منطق غبي وغريب.
# باية صفة شاركتم أمس في ميثاق الوفاق الوطني ؟
شاركنا باسم تيار المستقلين لإصلاح الخلل ومسار الثورة (والثورة ماحقتن حقتنا كلنا).
# اين يكمن هذا الخلل؟
الفشل ظهر من خلال فشل الأحزاب الأربعة التي سيطرت على الحكم،لكن تبديل هذه الأحزاب لايعني العودة للمؤتمر الوطني.
ـــــــــــ
الراكوبة نقلاً عن اليوم التالي :)
| |
|
|
|
|
|
|
| |
HAIDER ALZAIN
أبوبكر عباس
علي عبدالوهاب عثمان
الزبير بشير
نعمات عماد
عمر نملة
Hafiz Bashir
Omer Abdalla Omer
Abureesh
Mahjob Abdalla
Asim Ali
جلالدونا
Biraima M Adam
Ahmed Yassin
ترهاقا
adil amin
Hassan Makkawi
بسمات الشيخ
Mohd Ibrahim
فيس بوك
تويتر
انستقرام
يوتيوب
بنتيريست