ليالي الخير جادن — ود الرضي ليالي الخير جادن…………….من المحبوب نسائم الليل عادن…………….من المحبوب شفت في الأحلام ظبى يتهادن…..برخيم نغمات خلى تنادن عبرات الشوق بى ازدادن……تلكم أحلام ليت تمادن شفت الحسن الحافل رافل …..في ثياب العز والعز كافل رانع واحل تايه غافل……..لادن هادل ضامر كافل هادئ ساكن آمن قادل ……..بهجة هيبة حاكم عادل لافح فره وطارح سادل……ليل عسعس كاسى الهادل بوبح جيده وأبصر واقل ……ظن مراقب صدق العاقل قلب المخضوب فوق الفاقل……..تل اليمنى ومشى متاقل رنا متخاوف بارق لجّ………بعضه فى بعضه ترادف لجّ نصفو تثنى وآخر لجّ ………..لاطم أمواج من غير لج رفع الهدب شفت محور ……….نوره تدفق صعد أتدور فكر في شئ فضل أتصور…..بسم النوار فتح نور فيه تأمل أيسر بند ……….لدن المثمر غصنه البندى مايقه ترقرق شهر الهندي ……… فوح منو العرف الرّندى وصحيت ندمان نومي انقل……..تناوم غش وقواي كل ّ حاولت النوم لكن كلا………هيهات يعود الكان ولّى والقصة تقول إن الشيخ محمد ود الرضي كان يحب إحدى الفتيات وكان يريد الزواج منها ولقد غاب فترة من البلد إبان عمله بخزان سنار ولكن حين عودته وجدها قد تزوجت من احد الرجال المعروفين ..وتصادف أن رأى ود الرضي في منامه انه وفي مايرى النائم أنه مرّ بأمام منزل الملهمة وكانت أبواب المنازل تصنع من المطارق وهى أعواد الأشجار ويمكن لاى شخص أن يرى ما بداخل المنزل من بينها …فشاهد ود الرضي هذه الجميلة..فماذا شاهد… شفت الحسن الحافل رافل …..في ثياب العز والعز كافل رانع واحل تايه غافل……..لادن هادل ضامر كافل هادئ ساكن آمن قادل ……..بهجة هيبة حاكم عادل لافح فره وطارح سادل……ليل عسعس كاسى الهادل هذا هو الجمال والحسن والروعة التي شاهدها ود الرضي…ولكن هذه الجميلة شعرت هنالك من يراقبها وينظر إليها من بين الفتحات ….فماذا فعلت ؟..من عادة النساء في السودان في الأيام التي ليس فيها مناسبة أو عيد يخضبن الكف الأيسر…فلما رأت هذه الملهمة من يراقبها هزت جيدها ووضعت يدها المخضبة وهى اليد اليسرى على وسطها وتلت اليمنى ومشت على مهلها يتثنى قوامها ويتمايل بعجن يكاد أن ينقسم .. بوبح جيده وأبصر واقل ……ظن مراقب صدق العاقل قلب المخضوب فوق الفاقل……..تل اليمنى ومشى متاقل وعندما وقلت بعينها مستغربة رأى ودالرضى العيون التي يشع ويتدفق النور من كل جوانبها …وترقرقت عيونها بالدموع فأصبحت جارحة كالسيوف الهندية …أما قوامها اللادن فقد أثمر وفاحت منه العطور الطيبة .. رنا متخاوف بارق لجّ………بعضه فى بعضه ترادف لجّ نصفو تثنى وآخر لجّ ………..لاطم أمواج من غير لج رفع الهدب شفت محور ……….نوره تدفق صعد أتدور فكر في شئ فضل أتصور…..بسم النوار فتح نور فيه تأمل أيسر بند ……….لدن المثمر غصنه البندى مايقه ترقرق شهر الهندي ……… فوح منو العرف الرّندى العرف هي الرائحة الطيبة أما الرندى فهو من الرند وهو شجر طيب الرائحة…أما في نهاية الأغنية فيقول ودالرضى انه قد صحي من هذا النوم وحاول أن ينام مرة أخرى حتى يستمر الحلم ولكن هيهات يعود الكان ولى… وصحيت ندمان نومي انقل……..ترخرخ جسمي وقواي كل ّ تناوم غش لكن كلا………هيهات يعود الكان ولّى وفى رواية أخرى …حاولت أنوم لكن كلا ….هيهات يعود الكان ولى والعبادى جارى ود الرضي في كسرة هذه الأغنية أيضا حيث قال في أغنية بلابل الدوح …عيد لي النوم من اجل خيالك ……
10-15-2022, 10:37 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
نعيم الدنيا — عمر البناء كيف الحياه غير ليمك في بعدك أصبح حظي زي لون هضليمك يا نعيم الدنيا يا حليف الخدري التايه في نعيمك ما دام هاجرني أرسل لي نسيمك و أنعش لي روحي بندى جسيمك أو طيب المسك الفايح من تبسيمك يا أماني حياتي البيك نور إقليمك يتمنى التبري يلمع كأديمك مشتاقه الشمس تظفر بي ليمك تاخد من نورك تلثم لي قديمك يا فرع البانه المايل في خميلك من قامتوا حبيبي متعلم ميلك يا البدر التم ما بتم تكميلك لو ما تجعل لي محبوبي زميلك سيوف الهندي من لحظة عينك ليه بيها تصيبني إيه بيني وبينك غير كوني بريدك و حياة خدينك كف عني صدودك يا روحي و بينك ليك حق في صدودك و تيهك و تذليلك ليك حق تهجرني … و يكتر تعليلك ما دام فردي … على جيلك تمتاز بالعفه المانعني أجيلك مع صدك و هجرك لا زلت أريدك و منام عيني بين حظوظ جيدك تيه بي نعيمك مولاي يزيدك ضيعت حياتي تسلم لي إيدك
10-15-2022, 10:39 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
نغيم فاهك يا أم زين دواى شفاى البجبر … قواي يا أم حبا ردف .. تواى كمل صبري وزود هواي رقى رقى جودي بدواى ظمأى بعدك وقربك رواى أقيم ليلى واحسب سهاى يغيب عقلي وافقد نهاي وفى جسمي ظاهر وهاى اسعفينى دنا … إنتهائى أفراح عصام - نغيم فاهك يا أم زين ذكرت البين ليه ياغراب صياحك يافراق يا خراب ديار أم زين كانت قراب غبن بانن في … السراب البدر محيك وشعرك كليل يميل خصرك منه العليل تقل ردفك لاعضاك فليل قتيل حبك ودمعي الدليل رق جسمي وصابه انتحال على حبك حمل الرحال ومن بعدك أنا حالي حال يالقمره وصالك محال أنا أعيد الحب من جداد أنا الحافظ حق الوداد أنا الهائم والناس شداد أنا اللابس توب الحداد أنا الكاتم السر ما حكي أنا الحاضن البلا ما اشتكى أنا الحجة بحل مشبكا أنا المساح دمع البكا
10-15-2022, 10:44 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
ا تؤاخذني فيما جرى عمر البنا ألحان وغناء / كرومة لا تؤاخنى فيما جرى بحكم نفسى وليك بزجره يا ظبى الحجره الدموع من عينى متفجّره والغمضه علىّ محجّره روحى من بعدك متضجّره حرام عليك يا الأهيف تهجره نيران جفاك ما بقدره وأنا بخشى روحى تودّره أرجوك يا الحسنك بالحور ازدرى العفو يا حبيب عند المقدره النسيم بى طيبك لو سرى يطفى نارى البى مؤثّره حال غرامى ليك كيف افسّره انت فوق لى زحل وانا فى الثرى الأسود الضاريه الكاسره يا غزال لحظاتك تأسره عيناك لو ترضى تجسّره الجبال الراسية تكسّره بعد ذلك هل يا ترى أنظر اللحظات الفاتره والقامه البتميل متبختره وبى توب الهيبه مستّره العقول فى وصفك حائره والبدور من نورك غايره كيف أشوف خدّيك النايره والعفاف والجبره وزايره الدنيا دايما جايره والمقادير فينا مخيّره عسى رب القدره يغيّره والحى لا بد ما يرى
10-15-2022, 10:46 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
عشقت شادن عبد الرحمن الريح عشقت شادن عيونو ساحرة وقوامو لادن .. كأنو زهرة عشقتو من نشأة الطفولة محبو قلوبنا طاهرة وحياتنا طولها بحبو كنا لا نعرف الهوى إذا جلسنا الصباح سوى نغيب عن الكون وماحوى خلقنا من عنصر المحبة وبقينا طول الزمن أحبة هوانا فطرة عواطفو من أنبل العواطف لذيذ محازق حبيب ملاطف نضر محاسن حلو الشمائل شدوت بذكرو في الخمائل كأنو من كوثر الفضائل حبيبي من عالم الملائك سماوي جالس علي الأرائك مكانتو عالية عالية عالية وطريقو شائك مالو مالو الحبيب دا مالو عن يمينو و عن شمالو الناس يحسدوه في كمالو والزول يذوب لو نظرجمالو أقل نظرة
10-15-2022, 10:48 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
كم نظرنا هلال صالح عبد السيد كم نظرنا هلال ما شاقنا غير هلالو ما أظنو زلال يروينا غير زلال أرى الهلال ينقص وأرى محيو يتجلالو كل يوم يزداد في خديدو نور يحلالو تتقاصر الأبصار من حسنو من إجلالو يتيه يصد باسم آه .. ما ألذ دلالو ألذ شيء قُربو وغزلي النظر في جمالو وأمرّ شيء بعدو وجفاهو وإهمالو أرى الغصون بتميل وأظن هواها أمالو على الخلاف وإذا مَيّل عليّ أنا مالو طرفو ليه نعسان وأنا طرفي ليه يصحالو يتلو آية الحب الفي الخدود لايحالو جمالو كل ما يزيد جسمي يزيد إنحالو أما قلبي الضّاع خلّي اليروح في حالو إذا أدار لحظو على جبل دكّالو ولو بَسَم أنزل دمع السحاب أبكالو قلبو لا يشفق على عاشقو مهما شكالو حبيبي طبع الطير ينزل على أشكالو أنا لي حبيب يا ليل نوم العيون ملالو وليْ حبيب يا ليل قتل النفوس حلالو وليْ حبيب يا ليل تشوف خِدودو يلالو مع الظلام تشتاق الزهرة تدّلالو
10-15-2022, 02:07 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
ما رأيت في الكون الشاعر/عبد الرحمن الريح ما رأيت في الكون ياحبيبي أجمل منك فـي دلالك و تيهك وفي جهالة سنك من كمالك وظرفك ومن جمالك أظنك يا حـبيبي نـساء الدنـيا ما ولدنك راجي عطفك ولطفك وراجي حلمك وحنك ديما يا مريودي تجدني سائل عنك ياجميل المنظر كيف كيف أذمك سيبني في آلامي وبالعلي مايهمك خالي عقلك وقلبك وفاضي فكرك وهمك المدام المسكر والعسل في فمك ياحـبيـب الأنفـس مـا بتوب مـن حـبك إن صـليتني بنـارك بـرضي برضي بحبك مـرة تـيه فـي دلالك ومـرة أرعي محبك و مـرة خـليك جـاير ومرة خاف من ربك قلبي ذاب من نارك وصبري ضاع من صدك هل أداري حياتي أم أعالج ودك نسمة الأسحار مزاجا نفحة ندك وزهرة الأزهار بستانا صفحة خدك السرور أوقاتك والمحاسن خمرك والزمان خدامك وممتثل لي أمرك إن أمرتني بقبل بالوقوف في جمرك نحن والأيام أعمارنا يفدن عمرك
10-15-2022, 02:11 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
نايرات الوجن الحسن ود سالم نايرات الوجن تومي متين لي يجن نامو الخلوق والليل جن مرسالي جاء وقال لي جن ماشات علي يدرجن ميهن خفاف يتبرجن ريفات صغار بنات عجن زي الجواهر يلهجن من غير شمع هن سرجن أخدن معاي ساعتين رجن شالن فؤادي وعرجن جمل قوافيك للوزن لي الجمروه وبقى للوزن أخفي الاسوم لا تفرزن جنّ عشوقن عايزن فارمة الكبد بي مقصها قصصا عياني قصها قادت المحزم نصها وحلاهٌ روحى بنصها قاموا الخلوق وقفوا ليها صف مدبور ساقك ما أصف مراية خديدها الاتلصف مظلوم أنا وقط ما اتنصف أصبحت حائر بي الدليل وكايس لماك ما لقيت دليل كاتلاني عندي عليك دليل عينيك صاد ود الدليل برسل سلامي بعد ما دودا السحاب كر حبّ ماء يمسك يديك ويلثما
10-15-2022, 02:13 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
مليح الزي سيد عبدالعزيز مليح الزى ساحر المحاجر يالحجروك لى نومى حاجر بهاجر ليك يا اللى هاجر يا اللغز الفى شرحه حائر يعجز عنه العقله ناير ليك منازل فى الضماير تجليت فوق البصاير وعن العين سابل الستاير يا حبيبى النديان وناير أدور قربك ولى بعدى داير ما بتنزار وما جيتنا زائر مثال الجبرة عليك سائر كيف أتعدل يا الطبعه جاير وكيف أرتاح وأنا دمى ثائر تعال حساب راجع الدفاتر يامثال اللى عرضه ساتر لأجلك كم راعيت خاطر لأجلك كم خضت المخاطر وراك بالمال والروح أخاطر فترت معاك يالطرفه فاتر تتواضع وقدرك عالى أرفع من سموه معالى أدبك مضرب الأمثالى ولأخلاق جمالها مثالى شفتك يوم تضوى تلالى قلت الليلة هلى هلالى حسن الدنيا إتجلالى والأحجار حداك لآلى برسالة المحبة أو حالى حسنك وسحره أُر حالى كأنى نبي الزمان الحالى من الناس بقالى حالى ما بهم إن سهت ليالى وأسهرن اللى كانوا حيالى فناى فى هواك أحيالى ذكرى ترددها الأجيالى
10-15-2022, 02:15 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
من قليبو الجافي صالح عبد السيد من قليبو الجافي ولى قليبي الحان النسيم يتردد عامل استمحان الغضون تتناول منه خمر الحان والطيور تتناشد رايق الألحان والفروع تتمايل ميلة الفرحان والزهور بتصفق ويرقص الريحان يا نسيم ما بالك تتنى قامة البان إنت رايق تلعب والعشوق تعبان اكتشف ما دائي وما الدواء الصعبان هل دا جرحا بالغ أم دا سم ثعبان قال لي لازم جرحك مدة الأزمان لا روايحى تطبك لا ولا لقمان البداوى جروحك إن شفتو يا سقمان في عصير الند البنضحو الرمان يا الغرامك حلّ ورحل السكان من مدائن جوفي تملك الأركان ما ألذ النار السارجه بى لو كان يبقى قلبي وقلبك في الغرام شركان قلبي لا يسلاك ولا يطيق نكران بين شاهد جفني البى الدموع وكران درعك البتقمز بالوضيب عكران والضمير الميل صاحي أم سكران صاحي سياف لحظك والطريف نعسان ليك رشرش قاطع جندل الفرسان إنت بدرا ساطع في قوام إنسان ليك حسن الدنيا ولى شعر حسان الدوش أفكارى وربّ لي جنان خمرة تمزج لينه وتسقى در أسنان رق يسطل سمعي لهيجك الرنان إنت ناس في دنيا ولا حور في جنان إنت حسنك كامل والعشوق كملان طش عقلو الهامل فارق الزملان في المنام يتقدل طيفك العطلان والحجارة اتنت لو قليبك لان خلى ما بتفيدك لمة الفيران خلى ديل ورّح دق ليك طيران أبقى دايما تايه في الهجوم حيران سفوا في برسيمكم يلا يا تيران خلى روق بالك لا تبيت نكدان بطل الجمعية…. ودور البلدان لا تلم حرابك في مدافع الدان نارو توقد فوقك تحرق الأبدان البهائم جاطت والغرام فتان يادحيش اتدرج لما تبقى أتان أما قولي وقولك في النظام شتان والأسد من طبعه بطرطش العتان
10-15-2022, 02:19 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
من فروع الحنة صالح عبد السيد - أبو صـلاح - غنــاء : أولاد شمبات من فروع الحنـة وزهرة التفاح هـاج بلابل فكري النسيم الفاح الجداول تجري فوق خدودك دُر والرشيمات بقّت بي أشعة خُدر يعمي عيني قبلك ما نظرت بدُر فوقو ليلاً حالك يعلو غصناً ماح كل معصم جدلة والكفيفــات غـوف والكتيف الهادل بالكفــل مشــغوف نايمة او كان صاحية حال جلوس و وقوف فيهو لاحـــم ديمة ومنو مالو بـراح إختصر أفـكاري خصـرك المعقود ما بيمس بي كفة لا قميص لا عقـود جالبو ردفاً جايل حلمو ليه مفقــود عذرو وااضح صدرك مالبو جوز تفـاح القوام متوازن لا قُـصر لا طـول والخديد أفعالو تصرفــات مسطول ماهو خاتي دا ساند ضهرو فى الأسطول والعيون حراسن فوق جفونو صـفاح إنتي روحي وراحي ليك ظمآن غاب ما بصرح بإسمك ما بجيب ألقـاب إنتي ديسك خدرك ماكي صيدة غاب من فوارس حييك ليكي غابة رماح- خلي أمعن شوفا قول لي إيه النـور هل رأيت لك صيدة أم دا جام بلـور جـلّ من أنشاها وصاغا شُـعلة نور هل دا جيـد وقلادة أم نجوم وصباح
10-15-2022, 02:21 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
بدرالحـــسن فــاق عبد الرحمن الريح بدر الحسن فاق القبلو ووراهو بين اجيالو حايز حسن الكون براهو آمن في قراهو تعبانين وخاسرين الجارين وراهو القاصد وصالو والعايز يراهو ماطايلين خيالو ومانايلين ثراهو مابنطال سماهو امتي يجود ويرحم بي ودو ولماهو مالو منع وصالو واختفي في حماهو يانسيم روح واسأل عن سببو الحماهو اسكر من شذاه واطرب من محاسنو وارتاح لي اذاهو بي صدو ونفورو آلامي ورزاهو مهما جازي قلبي اقل عن جزاهو مابجيب من دعاهو ولابيرحم فؤادي الحتي الطير نعاهو بي نيرانو عذب قلبي ومارعاهو مابنفع بلاهو وكيف اعمل معاهو يانع في نداهو وقايم بالمحاسن من أول بداهو دمع الهجر رافع خبرو ومبتداهو ضيع عمري ظلماً فلتسلم يداهو
10-15-2022, 02:30 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
بدرالحـــسن فــاق عبد الرحمن الريح بدر الحسن فاق القبلو ووراهو بين اجيالو حايز حسن الكون براهو آمن في قراهو تعبانين وخاسرين الجارين وراهو القاصد وصالو والعايز يراهو ماطايلين خيالو ومانايلين ثراهو مابنطال سماهو امتي يجود ويرحم بي ودو ولماهو مالو منع وصالو واختفي في حماهو يانسيم روح واسأل عن سببو الحماهو اسكر من شذاه واطرب من محاسنو وارتاح لي اذاهو بي صدو ونفورو آلامي ورزاهو مهما جازي قلبي اقل عن جزاهو مابجيب من دعاهو ولابيرحم فؤادي الحتي الطير نعاهو بي نيرانو عذب قلبي ومارعاهو مابنفع بلاهو وكيف اعمل معاهو يانع في نداهو وقايم بالمحاسن من أول بداهو دمع الهجر رافع خبرو ومبتداهو ضيع عمري ظلماً فلتسلم يداهو
10-15-2022, 02:59 PM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11563
ما شاء الله عليك ياخي ديل ناس مبدعين لدرجة المبالغة سواء في الوصف أو في استخدام اللغة
قسما اساتذة بدون شك
شوف كمثال فقط:
فريع البانة صالح عبد السيد (ابوصلاح) فريـع البـانة المِـنْ نسمة يـتـمـايل حـاكى المـنقسمة نار قـلبي بتوقد من وسمه تلـمع فـي خـديدا وفـر بسمه الفـم الزي خاتم نص قسمة يالـمـاك داريه بَـي الغي قسمة حـبـوب الفـاطـر دُرّيـة وسـطـك يتـلاحـم من دريـة
وقصيدة نايرات الوجن نايرات الوجن تومي متين لي يجن نامو الخلوق والليل جن مرسالي جاء وقال لي جن ماشات علي يدرجن ميهن خفاف يتبرجن ريفات صغار بنات عجن زي الجواهر يلهجن من غير شمع هن سرجن أخدن معاي ساعتين رجن شالن فؤادي وعرجن
ياخي ديل ارتادو القوافي الصعبة بكل أريحية...
شكرا صفصف على نشر هذا الإبداع والفن الشعبي الراقي
10-16-2022, 05:31 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
محمد عبد الله الحسين اخى الغالى صباح الخير وصباح النور عليك يازهور وواهديك الابداع
صباح النور عليك يازهور صباحك يوم يقاس بدهور في خدرك وحسنك مشهور هلال محياك المابي ظهور هلال ماهلت مثله شهور زاهر طاهر ما المغرور عليه جناح الرضا مفرور صباحه سعادة وكلو سرور جماله يغني عليه سرور نظرتك جالس بين خدور بدري حداك أنكسفوا بدور تفوق نيشان ممتاز في صدور جلاله جلال ملكاً منصور دلاله دلال مقصور في قصور فيه جمال الكون محصور بديع ماشافت مثله عصور يلوح للعين من نورك نور شعاع الشمس على البلور جهرت عيوناً كفاك يانور قلوبنا رميتن في التنور فريد حسنك ودلك موفور وأنا دمعي يجر مجرى البسفور تزيد في عناد ودلال ونفور وبرضي أقول ذنبك مغفور أيا صاحب الطرف المكسور كسرت قلب شجاع وجسور تتجاهلني وأنا بيك مأسور حسابي معاك بقى كله كسور
10-16-2022, 05:35 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
متلى كم ضايعين صالح عبدالسيد –أبوصلاح- متلى كم ضايعين مالى ومال سهام العين لا اطيق تطعين ولا استطعت مرام لحظات دغس لامعين تهتا بين تمعين ماء ونار وخضار فى خدودو مجتمعين غيرو شفنا متين فرع بان يانع شايلو رمانتين وكيف درر نابتين فى نفيس مقل ريحان والراحة داخلة الدين أشواقى مئتلفين والمنام وعيونى صارو مختلفين يا ناعس الطرفين بالله أبحث شوف نوم عينى رايح فين نومى ضاع ما بين الهجر يا شقيق البدر اظهر بين أشواقى ليك طالبين قلبى وهو معاك ياليتو لى قلبين عقلى زاد تجنين قلبى بين عينيك وافكارى فى تفنين يا صغير لمتين يا ملاك ارحم خليك شوية حنين أنوارك الساطعين لا فى انس ياجميل ولافى الحوارى العين الفى الهلال راضعين ولا الثريا معاك وريا ليك واضعين
10-16-2022, 05:36 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
طول يا ليل على الباســـــــــل طول يا ليل على الباســـــــــل كلمات الشاعر : على المســـــــــــــــــاح غناء الفنان: عبدالعزيز محمد داؤد طول يا ليل على الباســـل على هضـــــــــــــليما متماثل حلاتا خــــــــدها الآســــــــــــل حليلو الفى القلب مرســـــــوم شويدن .. خلقة .. فاطرو بســوم يتل اكتافو يجيك مقســـــــــــــــوم هلك عضمى وهرانى سمــــــــــــوم جبينو العـــــــــــطر انداهـــــــــــو ســـــطع نور خدو فى حداهو هلكنى ولسة فى حداهو عميرى وروحى تفداهو لوينة وزى فـــريع البان تفوق الشابو والشبان تفوق أندادا تيه وعجن وبى ســـــــاداتا تتعجن حليلو الفاهو ما هــــراج حليلو العاصى والسراج حليلو الغــــــــــالى يا دراج حبيبى اللى همــــــوم فــــــــراج حليلو اللآح فــــــر بســــــــــــــمو حليلو الكية لى خصـــــــــــــــــــــمو جميع من سم بى إســـــــــمو حرام النار علي جسمو
10-16-2022, 05:54 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
في الضواحى وطرف المداين يلا ننظر شفق الصباح قوموا خلو الضيق في الجناين شوفوا عز الصيد في العساين يله نقنص نطرد نعاين النهار أن حر الكماين كلبي يا جمجوم أصله خاين شوفوا كيفن يبرأ الملاين هب شال وكشح المراح للقنيص الخيل خف راسن نحن ما بنخاف من مراسن المكارم غرقنا ساسن والمجاهل مين غيرنا ساسن ان عطشنا نمز مر وآسن وأن عشقنا بنعشق محاسن فى المحاسن كفي يومنا راح في الخميلة انجلت المحاسن عيني حايرة ومشي قلبي جاسن بعض حسنك هي يا محاسن الحرير حين قدميك داسن والزهور حين شفتيك باسن والغصون من لدنك مياسن والنسيم فاح بكر الملاح يا الطبيعه الواديك ساكن ما في مثلك قط في الأماكن يا جمال النال في ثراكن ياحلاة البرعن أراكن في قفاهن تور قرنه ماكن لا غشن لا شافن مساكن في الخزام والشيخ والبراح شوف صباح الوادي وجماله وشوف خضاره وصيده ورماله شوف يمينه وعاين شماله شوف نسيم الليل صاحي ماله شوف فريع الشاو مين أماله القمر خجلان من كماله والصباح لا بهل الوشاح يا أم لسانا لسع معجن كلمة كلمة وحروفه ضجن ديل خدودك غير داعي وجن ديل عيونك من غير سبه لجن ديل دموعك من نظرة شجن ده دلال ايه ده دلال معجن محن الامات يا رداح ماك نسيم الليل بي برودك نامت الازهار فوق خدودك غرد العصفور فوق عودك النفوس ما اتعدت حدودك ما عرفنا عدوك من ودودك بس أنا المقسوم لي صدودك يا حياتي وأملي اللي راح
10-16-2022, 06:05 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
ذكري أيام صفانا كلمات الاستاذ/محمد بشير عتيق أذكري ايام صفانا واذكري عهد القاء والليالي الفي حبور اذكري ايام صفانا والليالي الفيها متبادلين وفانا جينا بي كل اقتراح من حديث يشفي الجراح بي مغازلة وانشراح والقمر بي ضياهو آالق والنسيم يهدينا انفاس الزهور كنا داخل روضة مافيش حد سوانا غير ان القمري يهتف بي هوانا من اهازيج فنه يسمعنا اسطوانة اما ارواحنا الخفاف رافلة في اثواب عفاف زي عرائس يوم زفاف والنجوم بي عيون تسارق في اشتياق تنظرنا من خلف الستور الرياض مبتهجة داخل اقحوانا والزهور نديانة تستقبل اوانة زاهية يانعة ورايعة في توب ارجوانا والنهر لينا اقترب والطيور تسجع طرب عاملة موسيقة قرب انحنا صار مجلسنا عامر في طرب في قبطة في نشوة وحبور يا امير الحسن يا سامي المكانة من عواطفك حبي لو فاقد مكانة اهدي لي تفاحة بس او برتكانة فهي غير شك مرضية بيها اقتبس الضياء بل اذوق طعم الحياة انت ملهمني الاغاني وانت مصدر فني احساسي وشعوري
10-16-2022, 06:11 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
ذكري أيام صفانا كلمات الاستاذ/محمد بشير عتيق أذكري ايام صفانا واذكري عهد القاء والليالي الفي حبور اذكري ايام صفانا والليالي الفيها متبادلين وفانا جينا بي كل اقتراح من حديث يشفي الجراح بي مغازلة وانشراح والقمر بي ضياهو آالق والنسيم يهدينا انفاس الزهور كنا داخل روضة مافيش حد سوانا غير ان القمري يهتف بي هوانا من اهازيج فنه يسمعنا اسطوانة اما ارواحنا الخفاف رافلة في اثواب عفاف زي عرائس يوم زفاف والنجوم بي عيون تسارق في اشتياق تنظرنا من خلف الستور الرياض مبتهجة داخل اقحوانا والزهور نديانة تستقبل اوانة زاهية يانعة ورايعة في توب ارجوانا والنهر لينا اقترب والطيور تسجع طرب عاملة موسيقة قرب انحنا صار مجلسنا عامر في طرب في قبطة في نشوة وحبور يا امير الحسن يا سامي المكانة من عواطفك حبي لو فاقد مكانة اهدي لي تفاحة بس او برتكانة فهي غير شك مرضية بيها اقتبس الضياء بل اذوق طعم الحياة انت ملهمني الاغاني وانت مصدر فني احساسي وشعوري
10-16-2022, 06:58 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
ما بنسي ليلة كنا تايهين في سمر بين الزهور انا وانت والنيل والقمر وين يا جميل يوم كنا تايهين في سمر من انسنا اتمتعنا بي جني الثمر كم قلبي بالانفاس لانفاسك غمر الجو سكر من ريك اتعطر خمر ما بنسي ليلة كنا في شاطي النهر نتعاطي خمر الحب بكاسات الزهر والبدر مزق ظلمته و سفر ازدهر في النيل سطع بي نوره واتقطع بهر الليل هدا والجو صفا وغاب الاثر النسيم بجيب من توتي اصوات المتر اتا يا جميل بي صوت ضميرك المستتر من شعري كم اسمعتك الحان في وتر شفت النجوم تنظرنا بي نظرة شذر لما القمر في افقه بغيابه اعتذر صافين عفاف ياحبيبي خالين من قدر في هوانا لا واشي ولا مراقب حذر انا بي غرامك ياحبيب دمعي انفجر وانا بي غناك ايقظت سكان الشجر قبال اراك انا كنت في حيرة و ضجر اليوم حظيت بلقاك يا ظبي الحجر
10-16-2022, 07:03 AM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
حبيبنا مصطفى نور .. تحياتي شكرا على هذه التحف شعراء الحقيبة كانوا قمة في الابداع و الموهبة والنظم أنا اعتبرها معلقات سودانية ( اسوة بالمعلقات السبعة العربية ) شعر الحقيبة وحد السودان وثقافة أمدرمان كانت مؤسسة على التسامح والمساواة مجتمع متنوع من كل الاثنيات والديانات شعر الحقيبة فيه عمق فن واجتماع
واصل هذا الجمال
10-16-2022, 08:29 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
علي عبدالوهاب عثمان اخى الغالى هولاء المبدعين غلبهم لم يتلقوا التعليم واحتمال من ناس الخلاوى وفيهم من لايكتب ولا يقراء ولكن لو ربطوا شعراء الان اجمعين ما اظن يطلعوا شاعر وواحد من هولاء الفطحاله المبدعين كدى شوف الكلام ده
انت حكمة.. ولا آية... ولا انسان... انت صاحي .. ولا نايم.. ولا طرفك من طبعو نعسان.. انت راحي.. انت روحي.. انت انسان عيني يا صاحي.. ولا انسان انت نادي.. انت هادي. انت ميسان انت ظافر.. انت ضافر اسود وفرسان انت شادن... انت لادن.. انت فتان. انت ضامر.. انت سامر.. انت هتان... ولا طرفك من طبعو نعسان
انت ناظر.. انت نادر.. انت بستان.. انت صافي.. انت نافي زور وبهتان... انت صاحي .. ولا نايم.. ولا طرفك من طبعو نعسان.. يا حياتي.. يا مماتي.. هاك سطران الصبابة.. مر عزابا... وقلبي انت ساهي.. انت لاهي.. انت بطران بجلالك... بدلالك يا سامي بطران انت حكمة.. ولا آية... ولا انسان... انت صاحي .. ولا نايم.. ولا طرفك من طبعو نعسان.. يا منايا يا وفايا هاك برهان عن غرامي وهيامي السابني ولهان ولا طرفك من طبعو نعسان.. عز فربك.. رغم بعدك.... قالوا لي هان قلبي خافق هل توافق قدري ينهان انت حالي... انت عالي... انت سلطان انت صافي انت ساجي بين طال طال انيني طال حنيني الحال
10-16-2022, 03:04 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
انا صادق في حبك لو قلبي يتصل بي قلبك .. هذا مقصودي أنا أقصد ودك وأنت تحرمني النظر في خدك …. لأذاي ديمة باذل جهدك مع علمك بهواك منذ أيام مهدك … انت مريودي أمتى تنجز وعدك وعني يذهب نحسي ولي يطلع سعدك … يا حبيب غثني ما بطيق نار بعدك وأنت عارفني ما بعيش من بعدك … انتهى وجودي الشباب في عصرك جملة معترفين لجمالك وحسنك .. يا مهدّل يا مفدّل قاصرين عن قدرك .. كيف أنا هجودي أمتى يفرج سجنك وأشوف صورتي في مراية وجنك … تنجلي عيوني بي تغزُل حسنك أكوي عزالي بالتقرب منك وفيك أرى سعودي قال لي لازم .. صبرك من وصالي قريب الدخول في قبرك من زمن يا عشوق لي قاهر أمرك والعفاف يمنع قلبي ليك يتحرك .. والجفا شهودي قلت له بحق .. ربك أسلي كل …… أهلي لو حظيت بي قربك حظي لو … ساعد ثانية بس أظفر بك بعد ذلك أموت ما في شك بفخر بك أنت مريودي
10-16-2022, 03:06 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
لو في الطيف وفي الصحيان زورني يا حبيبي انا عيان مالو لو في بعض الاحيان تسمحي لي صحوا اراك عيان زورني تاخد ياحبيب عن حالي بيان عسى تبقى ظروفنا في الغرام سيان زورني يا تومي انا عيان ديمة اساهر لي صيحة الاذان اناجي خيال اشعاري والنجم والاوزان زورني انت وين يا البي حسنك وطنا مزان انت تظهر وتمشي عني الاحزان زورني يا تومي انا عيان يالفريد الحسن وبهجة امدرمان لي من شوفتك ياحبيبي زمان زورني انا اساهر ونوم عيني حرمان وانت بين اترابك في نعيم وامان يا حبيبي انا عيان تنظم وصفك ياحبيبي لسان والبان اتعلم من خدك الميسان زورني غير حسنك ما رايت انسان
10-16-2022, 03:11 PM
مصطفى نور مصطفى نور
تاريخ التسجيل: 05-13-2022
مجموع المشاركات: 5019
اقيس محاسنك بمن .يا الدرة الماليك تمن نور عيني ونور الزمن ما شفنا في طول الزمن سواك بدر في داخل كمن الأنوار يتزاحمن في خدودك أخذن أمن ومن فاهك يتبسمن بروق في بروق يتقسّمن دي الدنيا أم جنة عدن شفنا ملاك لابس بدن إنسان لكن مفرداً. غصنه مهفهف أملداً وهيبة أسد في عيون شدن يا الجبرة المازجة العجن. جبينك زي فلق الدجن وجسمك بالطيب إنعجن إذا النسمات ليك عرّجّن طباق الجو يتأججن .والأنفس يتهيجن أنت نرجس من الوسن لعيونها الأعين جسن رأن آية الحسن الحسن .وغصون الروض يتمايسن في ذاك الزيّ الحسن وكل حسن مالك حسن روضك زى عارضين صِفنّ حلال سِحرك ما سِحر وفن كواكب النور البلصفن بدور الكون لو ينصِفن .يسجدن ليك وما يكون وفَن
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
محمد عبد الله الحسين
علي عبدالوهاب عثمان
فيس بوك
تويتر
انستقرام
يوتيوب
بنتيريست