|
|
|
 Re: إصابة قيادات بالجبهة الثورية بالذخيرة ال� (Re: Asim Ali)
|
تحياتي اخ عاصم ...
للاسف لاتوجد اي ضمانات تؤمن العاصمة من نقل المعركة اليها بعد يوم غد .
واذا كانت قوات حميدي لوحدها خلقت هذا الرعب والهلع والسيطرة الهمجية علي مواليد البلاد
فكيف سيكون الحال بعد دخول كل تلك القيادات بمليشياتها الي قلب الخرطوم؟
كلنا نتذكر حالات اشتباك عديدة حدثت في قوات مناوي في نفسها عندما كان مساعدا للبشير ودخل الخرطوم بحراسته الشخصية فقط .. فما بالكم بدخول فصائل متناحرة قضت اكثر من ٣٠ عاما في الحرب القبلية دون ان تتوحد اهدافها الاستراتيجية ..
| Quote: لشرطه الشعبيه مش اتحلت |
اعتقد ان اغلب مؤسسات الانقاذ اتحلت كالماء وظلت تمارس مهامها بواجهات اخرى
| |
 
|
|
|
|
|
|
|
|
Re: إصابة قيادات بالجبهة الثورية بالذخيرة ال� (Re: عمر التاج)
|
| Quote: وأضاف جدو بأن السلام خاطب جذور الازمة، وإذا ما تم تطبيقه في أرض الواقع ستكون حركة عبدالواحد خارج المشهد |
دي والله غلوتية صعبة خلاس.
جذور الأزمة وتطبيق السلام وحركة عبدالواحد المسلحة خارج المشهد، التلاتة ديل ما بتلموا.
حركة مسلحة خارج المشهد تنسف السلام تماماً
عدم وصول إتفاقية السلام إلى السلام يعني أن الإتفاقية لم تخاطب جذور الأزمة
| |
|
|
|
|
|
|
|
|
 Re: إصابة قيادات بالجبهة الثورية بالذخيرة ال� (Re: Hafiz Bashir)
|
اكيد الحركات المسلحه من بكره حنشوف الويل فى المدن وخاصه الخرطوم
شفت فيديو قبل فتره واحد وسط قواتعسكريه بيتكلم فى صيغه اختجاج انو مشى الخرطوم والناس واقفه فى صف العيش وهو مشى طوالى الشباك - بحكم انو لابس كاكى- والناس رجعتو يقيف فى الصف زيو وزى اى مواطن وزشايف انو الكاكى بتاعو يديهو الحق يتجاوز المواطن العادى وياخد ويمشى عادى.
الناس هسى رافضه وبتقاوم قصه الكروت -رافضين تنظيم القصه فى وقت الازمه- ويقول ليك دا شنو دا نحنا كلنا سودانيين تشترى من اى مكان لكن بعد دل يترحمو على موضوع الكروت الرفضو مبارين كلام الكيزان فى متاهه تصعيد الازمات
| |
|
|
|
|
|
|
|
|
|
Re: إصابة قيادات بالجبهة الثورية بالذخيرة ال� (Re: Asim Ali)
|
حرامية بازياء الدعم السريع ويحملون كلاشات ويداهمون البيوت
يا جماعه الليله زي الساعه ١١ ونص باليل يعني قبل تلات ساعات حصل لينا فيلم هندي . بطولته ناس لابسين دعم سريع .
احكي ليكم القصه من البدايه .
زي الساعه واحده ظهراً اتصلت لي زوجة عمي قال لي في نفرين غرباء تحت العماره دقوا الباب و عايزين يدخلوا البيت . وعمي برا البلد .
المهم زوجة عمي ما فتحت ليهم ، الساعه حداشر وشويه باليل اتصلت لي زوجة عمي تاني و قالت لي في بوكس ٢٠١٨ دبل كاب خالي لوحات واقف تحت وبحاولوا يفتحوا في الباب .
انا طوااالي اتصلت علي اولاد اعمامي وقلت ليهم تعالوا بيت عمي الفلاني سرعه وفعلاً كل واحد جا ب عربيته .
انا ومعاي اخوي وود عمي وصلنا اول .
انا وقفته عربيتي قدام البوكس واخوي ورا البوكس نظام نحاصرهم وود عمي حاول يقيف قصاد البوكس عشان البوكس ما يلقي فرقه يطلع اذا فكر يطلع .
المهم في واحد كان راكب في البوكس دوّر العربيه سرعه وضرب عربية ود عمي وطلع وقف بعيد .
بعد ثواني اولاد اعمامي كل واحد جا داخل من شارع . بعد ١٠ ثواني بالضبط طلعوا من البيت جوا زي ٤ عساكر وواحد مقدم كلهم لابسين زي الدعم السريع وشايلين كلاشات .
طوالي عمّروا اسحلتهم ووجهوها علينا ، ثابت ثابت ثابت . بعد داك نحن بقينا ما فاهين شي . منططين عيونّا وايدينا مرفوعات فوق في السما . واحد يقول ارقدوا في الارض وواحد يقول لينا اقعدوا وواحد يقول لينا ارفعوا ايدينكم زهجونا زاتو ، ما عرفنا نسمع كلام منو فيهم .
طبعا نحن جينا كابسين علي اساس انه الناس ديل حراميه بعد وصلنا وكسرنا عربياتنا واتبشتنّا وحالنا بقي بالبلا اكتشفنا انه ديل دعم سريع او لابسين لبس دعم سريع و عندهم اوامر تفتيش باليل الساعه ١٢ . ( يااااا اخوّانا دا كلام شنو ؟ )
المهم كفتونا تمااام وشتمونا وشتموا قبيلتنا وشتموا الخلفونا كمان ( نفسي اعرف لييه نبذونا قدر دا ) . بعد دقايق كدا اخوي رقد في الارض وقعد يفرفر علي اساس عنده ازمه وضيق في التنفس . ، ياخي انا في الوقت داك لما قلبي وقف ، بقيت لا بسمع ولا بشوف . دموعي بقت جاريه براها اول مره ابكي في حياتي كلها ، مشيت للمقدم قلت ليهو اخوي قاعد يموت ، قام عمّر لي المسدس وقال لي اثبت يا زول مكانك ، قلت ليهو يا زول انا بقول ليك اخوي قاعد يموت واته رافع لي مسدس !! يعني اخوي بموت قدام عيني و اقعد اتفرج فيه ؟؟ قال لي نحن عندنا اوامر لازم ننفذه . قلت ليه ياخ ماف زول منعك تنفذ اوامرك ثم ثانيا وين التصريح بتاع التفتيش بتاعك زاتو ؟؟ ( انا لغاية هسي محتار في كلمة تصريح دي انا قلتها كيف ) في اللحظه ديك طوالي المقدم قال لي خلاص سوقه وديهو المستشفي . والله في اللحظه النطيت فيها في عربيتي عشان اسوقه واودي اخوي المستشفي اشوف ليك البكوس دوّر وفحّط وفات . بعد شويه دون ما اشعر لقيت نفسي جاري ورا البوكس واخوي يقول لي يا زول اقيف الناس دي بملوك زخيره ما تجري وراهم ، وسامع صوته بعييييد . اثناء ما سايق بقيت بسترجع في الموقف الفات ، اتذكرته انه انا المفروض ماشي المستشفي اسعف اخوي وفي نفس اللحظه اخوي الكان مغمي عليه قاعد يتكلم معاي . وانه الناس ديل حراميه ما دعم سريع وانه انا جاري وراهم ليشنو !! ولو وصلتهم ح اقول ليهم شنو . بعد شويه كدا عاينت لاخوي كدا باستغراب بدون ما اسأله قال لي انا كنت بمثل ساي ما كنت متضايق ولا شي . في اللحظه دي ما عرفته اديه كف ما عرفت اضحك ، المهم رجعنا للشباب اكتشفنا انه الناس ديل حراميه وشالوا تلفوناتنا وشتمونا ودقونا ( كتر خيرم اولاد الحرام ) ،
شكلنا كدا ارهبناهم وقاموا جروا . اولاد الحرام .
الحاجه الحيرتني واقطع الشك انهم دعم سريع ما حراميه انه المقدم عمك كبير في العمر و تشوف علامة الصلاة تقول امام الحرم المكي والحرم المدني و جامع السيده سنهوري ، ودالحرام الله يازاهو . ان شاءالله ربنا ما يقبل صلاته لما يموت .
مشينا نفتح بلاغ في القسم الشرقي . قالوا لينا الليله جانا بلاغ بنفس المواصفات دي والبلاغ فتحوه ناس سوريين وشالوا منهم دولار .
الحاجه الانا استنتجتها انه اولاد الكلاب ديل بستهدفوا البيوت الفخمه بالذات الاهلها بسافروا او الناس الما عندهم زول كبير في البيت او ما عندهم كميرات . او البطلعوا ويخلوا بيوتهم فاضيه .
يا جماعه ما تفتحوا الباب لاي زول اوعه تفتحوا الباب لاي مخلوق خااااصه باليل .
بمجرد ما يجوك ناس لابسين دعم سريع وقالوا ليك عندهم امر تفتيش اول شي اتأكد تمااام انه ديل حراااااااااميه . ناس الدعم السريع ما عندهم علاقه بالبيوت نهاااااائ .
وربنا يحفظنا ويحفظ جميع امة سيدنا محمد .
ادعوا لينا ربنا يعوضنا في تلفوناتنا 😭😭😭😭😭
طبعا الكلام دا حصل اليوم الخميس ١٢/١١
منقول
| |
|
|
|
|
|
|
| |
عمر التاج
Asim Ali
Hafiz Bashir
فيس بوك
تويتر
انستقرام
يوتيوب
بنتيريست