تحية كبيرة للهميم ول أبا زهير عثمان .. لنقله هذا الخبر:
Quote: إدارة العلاقات العامة والاعلام زارة الري والموارد المائية خبر صحفي قال مدير الإدارة العامة للدراسات ونظم المعلومات عبدالرحمن صغيرون، أن استيلاء قوة مسلحة من المساحة العسكرية على وحدة مدنية تابعة لوزارة الري والموارد، وحظر العاملين من مزاولة عملهم، رسالة واضحة مغزاها أن الأخيرة غير مؤتمنة على منظومة البيانات التي تحت يدها. واكد صغيرون في اول رد على تعليق الناطق الرسمي بأسم الجيش، أن الادارة العامة للدراسات هي المكون الأساسي لنظام دعم المعلومات في وزارة الري لكونها تتضمن دراسات المشروعات الزراعية المصاحبة للسدود القائمة والمقترحة وبيانات مشروعات حصاد المياه ومياه الشرب وحذر من مغبة فقدان قاعدة البيانات الموجودة في المركز وحمل المساحة العسكرية مسئولية حدوث اي خلل في انظمة الحماية او انظمةالتشعيل ولفت صغيرون الي ان منظومة البيئة الافتراضية لتخزين ومعالجة البيانات بالمركز تتكون ةمن 11 مخدم سيرفر تكفي لتشغيل 150 مستخدم منها مخدمين لتحقيق هوية الدخول لكل مستخدم ومثلهما لبرامج النسخ الاحتياطي والحماية من الفيروسات ،وتبلغ السعة التخزينية الكلية ( 180 تيرا بايت) منها 100 تيرا بايت لحفظ المعلومات واوضح ان اجهزة الربط الشبكي بالألياف الضوئية تمكن من الاتصال بالنظام من المكاتب الخارجية مثل رئاسة الوزارة بالخرطوم وادارات الري بمدني كما اشتمل على نظام اتصالات داخلية وعدد 100 تلفون مكتبي تعمل بنظام VOIP بجانب نظام تكييف ونظام لاستقرار التيار الكهربائي و مولد احتياطي يعمل اتوماتكيا عند انقطاع الامداد فضلا عن نظام لمكافحة الحرائق وكاميرات مراقبة واشار صغيرون الي ان العلاقة بين الوزارة والمساحة العسكرية علاقة تنسيقية ومتي ما طلبت معلومات توفر على الحال ليس لها فحسب بل لغيرها من المؤسسات والاجهزة ولكن الادارة تحدد طبيعة المادة حسب هوية طالب المعلومة ولم يستبعد صغيرون استهداف منجزات وزارة الرى كونها تساهم في الاستثمار الزراعي واستغلال حصة السودان من خلال زيادة سعة خزانات السودان التخزينية التي تمكنه من زيادة رقعة المشروعات الزراعية
واكد ان استلام الادارة تم باستخدام القوة العسكرية بدون اي خطاب أو مستند رسمي للوكيل او الوزير. وفند صغيرون ادعاءات المتحدث الرسمي باسم الجيش، العميد ركن عامر الحسن واشار الي ان قوة مسلحة استولت على المركز وطردت العاملين وبموجب ذلك تعطلت انشطة الادارة ولفت الي ان تلك القوة اشارت الي انها تنفذ تعليمات من المجلس السيادي وليس مجلس الوزراء كما ورد واعتبر ان الأمر اكبر من حراسة وتامين وتابع قائلا : الرسالة التي وصلت من الجيش معناها الوزارة غير مسئولة ولا مؤتمنة على البيانات التي بيدها. 9 أبريل 2020
أها يا أخوانا ناس شبكات المعلومات .. الفزعة .. لكن أنا شخصياً لدي رأي .. فيما يجب عمله لكل أنظمة المعلومات القومية في السودان ..
لكن الأن عايزين تنظير وعمل جاد لأنشاء شبكة بديلة .. ونقل كل المعلومات من الشبكة المستولي عليها .. وهذا ممكن .. وأنا ممكن أشارك من أمريكا في هذا الجهد إذا ما ظلت الجهة العسكرية تحظر دخول العاملين ..
بريمة
04-10-2020, 12:47 PM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
السلام عليكم من الاول هي ما كان فيها مشكلة الي ان صدرت الأوامر من المكون العسكري في المجلس السيادي واستولي عليها غير ذو الاختصاص ، بالتالي ما كنا محتاجين لأي شئ ، الان محتاجين إرجاعها والتأكد من سلامة الداتا . اي شئ تاني هو تغطية علي جريمة
04-10-2020, 12:54 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
Quote: السلام عليكم من الاول هي ما كان فيها مشكلة الي ان صدرت الأوامر من المكون العسكري في المجلس السيادي واستولي عليها غير ذو الاختصاص ، بالتالي ما كنا محتاجين لأي شئ ، الان محتاجين إرجاعها والتأكد من سلامة الداتا . اي شئ تاني هو تغطية علي جريمة
كلامك عايز توضيح يا دكتورة .. هل الوحدة تم الإستيلاء إليها بأمر المجلس السيادي؟ إذا تم الإستيلاء بأمر المجلس السيادي، إذن الوحدة في حماية الدولة؟
وفي هذه الحالة نحن ناس الكمبيوتر .. محتاجين فقط نقع طقع في المسؤول الذي يحذر و يفعل (تور الله الأنطح) الذي يضع كل البيض في سلة واحدة.
ولا شنو؟
بريمة
04-10-2020, 12:57 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
بت أبا دكتورة إخلاص ركزي معاي .. أنا لا يهمني الأن متابعة الجريمة سواء أمنية أو سياسية .. ما يهمنى هل قواعد البيانات في ايدي أمينة؟ .. أم الناس هناك محتارة تعمل شنو؟ .. فك الحيرة هو ما أتيت بسببه .. ح نقلع المعلومات منهم قلع ما لم يفصلوا السيرفرات من الشبكة .. وننقلها آمنة إلي شكبة جديدة ما دام موظف التامين متاح للوصول إليه.
بريمة
04-10-2020, 01:13 PM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
Quote: وانا ما يهمني الا مياه النيل لو ما ربطت موضوعك بما حدث ما كان ح يكون لي اهتمام بالموضوع .
لوفتحت الموضوع من دون الإشارة لوزارة الري ح يجوك ناس امن المعلومات والتقانة ، بصورته دي غالباً ح يجوك ناس يد النهضة
لا أعتراض البته بما تقومون به أنت وول أبا زهير عثمان .. لو ما أنتم من أهتم بالخبر؟ .. لكن شغلكم دا لا حقي لا بقدر عليه .. سواء العمل الصحفي أو الجريمة أو التعقيدات السياسية .. أنا جاييكم فزعة حتى لا يتكون معلوماتنا القومية ما تكون تحت يد ناس أستولوا عليها بالقرصنة .. نحن في المجال دا بنقلع المعلومات إن شاء الله من تحت أيديهم .. وإذا عطلوا الشبكة .. نعلن لكم نحتاج تدخل بالقوة .. وهناك أنتم الثوار أو الجيش أو الشرطة تشتبكوا مع القراصنة .. وكل مخلوق مسير لما خلق له.
بريمة
04-10-2020, 01:18 PM
حسام الدين حمودة حسام الدين حمودة
تاريخ التسجيل: 02-16-2020
مجموع المشاركات: 372
أتوقع بأن الإستيلاء قد تم من خلال جهة تعلم تماماً ما تفعله وعن ماذا تبحث ،، ولن تستغرق وقت طويل في التعامل مع المعلومات وهي أمامها مباشرة لا كونيكشن ولا باسوورد ولا فاير وول الجهة العسكرية هي العضلات فقط ، ولا ندري ماذا يحدث عندما يتم حظر التجول ،،، لا يجب قراءة الموضوع بمعزل عن زيارة وزير الري المصري ورئيس المخابرات المصرية ونشر الجيش في الفشقة ،،،، وزيارة رئيس أركان الجيش الأثيوبي ،،،،
الأخ حسام، سلامات .. إذا قواعد البيانات سليمة .. ويمكن الوصول إليها .. ممكن يتعمل "فحص" لصحة المعلومات ومن دخل وأين دخل وماهى المعلومات التي تسربت؟ .. كل ذلك يمكن رصده وإخراجه للناس .. أنا جاييكم من جانب أخر: أفتراضي هو أن القراصنة مستوليين علي المبني .. وهم ينبشوا في الكمبيوترات .. ونحن من بين أيديهم ح ننقل المعلومات .. أو ندورها معهم حرب جوه السيرفرات .. هم يحاولوا يدخلوا ونحن نغير حتى لو الباسوردات وذلك يساعد في تأخير الجريمة .. حتى يمكن عمل اللازم.
لكن الحمد الله .. فهمت أنكم تتابعون الأمر .. علي أعتبار ما كان هناك جريمة .. ودا شعر أنا ما عندي له رقبة ..
بريمة
04-10-2020, 01:34 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
في شنو يااااا بريمة !! أنا ما خبير ولا حاجة لكن قدر الفي راسي الكوت الفوق دة طرشقو لي كيف يعني 11 سيرفر تشغل 150 مستخدم؟!!! ياخوي سيرفر واحد 100 قيقا بشيل ليك مليون مستخدم زي الما حاصل حاجة وكيف التحقق من الشخصية يعملوا ليه سيرفرين؟ لشنو سيرفرين؟؟ الـ 180 تيرا بايت دي فوقها شنو؟ لأنه بصراحة زرت موقع الوزارة ولقيته ووردبريس الله والرسول ما فيه اي حاجة فريدة من نوعها بعدين كيف 180 تيرا منها 100 تيرا لحفظ المعلومات؟ أمال الـ 80 التيرا الباقية شغالة شنو؟ مافي تطبيقات بتشيل ليها زيادة من تيرا الورد بريس بتاعهم دة 50 قيقا يتجدع فيها ويعزم الجيران دة كلو كوم ومسألة نحمل المساحة العسكرية مسؤولية أي خلل أمني دي كوم هو وينه الأمان العندكم دة؟ هووووي يااااا ناس الري موقعكم الشايفو دة قاعد في الصقيعة قال أمان قال! ياخي قول ما بتعرفو سيكيوريتي ذاتو هسة في زول بخلي رابط لوحة التحكم في الموقع على الفولدر الافتراضي؟!!! wre.gov.sd/wp-admin أنا والله أكتر واحد عارف امكانيات تقنية المعلومات في السودان وعاذرهم على أي تقصير بس ما تتنفخوا لينا وتعملوا فيها مقطعينها وعليك دينك يا بتاع نظم المعلومات قبل ما تعمل حركات ذا النون دي أمشي موقع sslforfree.com ظبط ليك شهادة SSL مجانية بتعتمد على المتصفح ما ممكن تقول لي عندك 11 سيرفر وراجي فك الحظر عشان تعمل شهادة رسمية لأنه الحظر دة ما معروف يتفك متين ويمكن ما يتفك ذاتو عارف الشهادة الفوق دي بتكلفك كم؟ 20 دقيقة من زمنك وبس .. ولااااااا قرش ما بتدفعو
04-10-2020, 02:10 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
Quote: في شنو يااااا بريمة !! أنا ما خبير ولا حاجة لكن قدر الفي راسي الكوت الفوق دة طرشقو لي كيف يعني 11 سيرفر تشغل 150 مستخدم؟!!! ياخوي سيرفر واحد 100 قيقا بشيل ليك مليون مستخدم زي الما حاصل حاجة وكيف التحقق من الشخصية يعملوا ليه سيرفرين؟ لشنو سيرفرين؟؟ الـ 180 تيرا بايت دي فوقها شنو؟ لأنه بصراحة زرت موقع الوزارة ولقيته ووردبريس الله والرسول ما فيه اي حاجة فريدة من نوعها بعدين كيف 180 تيرا منها 100 تيرا لحفظ المعلومات؟ أمال الـ 80 التيرا الباقية شغالة شنو؟ مافي تطبيقات بتشيل ليها زيادة من تيرا الورد بريس بتاعهم دة 50 قيقا يتجدع فيها ويعزم الجيران دة كلو كوم ومسألة نحمل المساحة العسكرية مسؤولية أي خلل أمني دي كوم هو وينه الأمان العندكم دة؟ هووووي يااااا ناس الري موقعكم الشايفو دة قاعد في الصقيعة قال أمان قال! ياخي قول ما بتعرفو سيكيوريتي ذاتو هسة في زول بخلي رابط لوحة التحكم في الموقع على الفولدر الافتراضي؟!!! wre.gov.sd/wp-admin أنا والله أكتر واحد عارف امكانيات تقنية المعلومات في السودان وعاذرهم على أي تقصير بس ما تتنفخوا لينا وتعملوا فيها مقطعينها وعليك دينك يا بتاع نظم المعلومات قبل ما تعمل حركات ذا النون دي أمشي موقع sslforfree.com ظبط ليك شهادة SSL مجانية بتعتمد على المتصفح ما ممكن تقول لي عندك 11 سيرفر وراجي فك الحظر عشان تعمل شهادة رسمية لأنه الحظر دة ما معروف يتفك متين ويمكن ما يتفك ذاتو عارف الشهادة الفوق دي بتكلفك كم؟ 20 دقيقة من زمنك وبس .. ولااااااا قرش ما بتدفعو
كلامك دا من درر .. وأنا ذاتي قاعده أعاين ليهو رهاب رهاب .. لو لاحظت أنا ذكرت لو رجل التأمين متاح .. بأمكانهم أنشاء شبكة بديلة .. والدواس يكون في كيفية نقل كل المعلومات للشبكة البديلة ..
بعدين يا ول أبا أحمد عمر، بطني قاعدة تطم لما نشوف أو نقرأ مثل هذا السخف الذي يحصل في حماية المعلومات القومية .. يا أخي الناس ديل الله ما فتح عليهم أن يوزعوا هذه السيرفرات في مواقع متباعدة .. الناس ديل لو ضربتهم صاقعة في المركز .. يعنى معلومات السودان تلحق أمات طه وراهم؟
نفس التكلفة يا أحمد، تستطيع تبني نظام شبكة تأمن المعلومات .. ممكن نخط قاعدة في بورتسودان .. وقاعدة في الأبيض .. وأخري في الفاشر أبو زكريا .. بالإضافة للرئاسة .. ونغلق شبكات الأقاليم ونخليها "باك أب" للمعلوماتية بتاعت كل الدولة .. وتكون محروسة بالأمن القومي لحماية المؤسسات.
والله الأموال التي تصرفها الدول في الغرب علي تأمين المعلومات القومية شيئ مهول .. وللعلم كلامك في محله ... أين المعلومات التي تخزن في 180 TB .. بالله خلي المتنطع رئيس الوحدة يورينها هذه السعة capacities بعملوا بيها شنو؟ أم حرق قروش في الفاضي؟
خليك من أنظمة موزعة دي مرحلة بعيدة أقسم بالله أول يوم في حياتي اسمع بي سيرفر باك أب مختوت في مبنى واحد مع السيرفر الأصلي نان هو باك اب لشنو؟ ماهو البحصل على السيرفر بحصل عليه طالما قاعدين سواء!!!
04-10-2020, 03:11 PM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
Quote: أقسم بالله أول يوم في حياتي اسمع بي سيرفر باك أب مختوت في مبنى واحد مع السيرفر الأصلي نان هو باك اب لشنو؟ ماهو البحصل على السيرفر بحصل عليه طالما قاعدين سواء!!!
أنا مش قلت ليك كل مرة يأتي حدث يخص المعلومات القومية في السودان يقابلك العجب .. بل أكثر من العجب، في شنو تاني واضعين مدخل الصفحة.. في الهواء الطلق؟ يا أخي دي هكر مبتدأ ممكن يوقع ليهم الصفحة دي .. حتى و لم يدخل فيها .. هههاي، أهلنا في الغرب عندهم كلمة يقولوها في هذا الموضع .. تسمي "كَلواه" .. وتعني يا للحسرة .. أو يا عيني !
هههاي يا أحمد، الناس ديل ما دخلوا العولمة بعد ..
Quote: خليك من أنظمة موزعة دي مرحلة بعيدة
محو الأمية العلوماتية (من العولمة) ما جاتهم ولا شنو؟ محتاجين ندرسوهم من ال أيه بي سي ..
بريمة
04-10-2020, 09:00 PM
حسام الدين حمودة حسام الدين حمودة
تاريخ التسجيل: 02-16-2020
مجموع المشاركات: 372
الأخ بريمة ما فينا زول متابع الموضوع أو ليه علاقة رسمية بالشبكة دي ،،، لكننا بنحلل الموضوع من بعيد زيكم كده ،،، الإستهداف يعتبر إستهداف غريب ،، وعشان كده في هدف محدد وخطة مرسومة وخطوات مدروسة وكلو ح يتم أثناء وجود البشكة المصرية الموجودة في الخرطوم ،،، مشكلتنا نحن في السذاجة التي تظلل وتغشي على أعين المسئولين عندنا ،،، كل تاريخ الصراع في حوض النيل كنا دائما نحن الخاسرون وهم دائما الرابحون ،، وهم دي أي جهة تانية غيرنا ،،، يعني كلهم ،،،، ونحن بنفقد مدن وقرى ومناطق وتاريخ ، ولا نستفيد ولا حتى نتلة ،،، عند بناء سد جبل أولياء غمرت المياه كل المدن على شاطئ النيل الأبيض ،، ونحن في الدويم غمرت المياه كل المدينة وتم توزيع أراضي في الشاطئ الجديد تعويضاً لمن فقدوا منازلهم وتم بناءها كل من جيبه وعلى مسئوليته وهي مدينة الدويم الحالية ،، وقس على ذلك على طول النهر ،،، وحلفا وما أدراك ما حلفا ،،،، وفي ظني إن خزان مروي والذي طمر كل تاريخ الفراعنة في منطقة البركل ليس إلا مشروع إستراتيجي لمصر كحوض إحتياطي إضافي للسد العالي ، ولا أدري من أقنع من ببنائه ،،، نحياتي
04-10-2020, 09:18 PM
حسام الدين حمودة حسام الدين حمودة
تاريخ التسجيل: 02-16-2020
مجموع المشاركات: 372
لاحظ بحيرة ناصر (حوض مياه لمصلحة مصر) كلها في السودان وغمرت مدن وتاريخ وقرى وثروة ومزارع نخيل وموالح ،،،، بحيرة سد مروي (حوض مياه لمصلحة مصر) في أرض السودان وغمرت مدن وقرى وتاريخ وهدمت مزارع نخيل وموالح وجروف ،،،، بحيرة سد جبل أولياء (حوض لمصلحة مصر ) في أرض السودان وغمر مدن وقرى ومزارع وتاريخ ،،،، ولازال هناك من يحاول أن يقنع السودان بشق النيل من بعد كوستي ليتم وصله بمنطقة الدبة ،،، حتى يتم توصيل مياه النيل الأبيض مباشرة وبسرعة وبدون عوائق وشلالات ومسار طويييييل لمصر ،، ويمكن كمان يفكروا يعملوا حوضين تلاتة في الطريق ،،، وكله على حساب موت كل القرى في النيل الأبيض ،، وإنحسار نهر النيل بعد الخرطوم عندما يفقد مياه النيل الأبيض ،،،،،،، كنا ومازلنا وسنظل طيبين وسذج وننفذ مشاريع مصر مغمضي الأعين ، ومش بي بلاش ،، لأ نحن نموت ونفقد تاريخنا ونقتل أهلنا ويفقدوا مدنهم وتاريخهم وقراهم ،،،، نحن ندفع ونقطع من لحمنا الحي ياخ ده نحن طيبين أوي أوي
يا حسام عندنا اسمو الري المصري .. أيوة زي ما بقول ليك كدة الشئ البعرفو الحكومة المصرية مشرفة اشراف كامل على الري في السودان حماية لحقوقها ما داير اقول ليك أنا عندي شكل في إنه المصريين ممكن يكونوا متدخلين في تقنية المعلومات دي لكن الإمكانيات المذكورة فوق دي لا تتناسب مع كمية التطبيقات الما عارفينها دي ما سمعت لي بمزارع مثلاً بخش موقع وزارة الري عشان يعرف زرعه بتسقي متين ولا اتعودت في المؤسسات الحكومية السودانية على أنظمة متكاملة والشئ البعرفو إنه المواقع والتطبيقات الحكومية كلها مستضافة في المركز القومي للمعلومات ما داير اتهم لكن بستفسر عن الأنظمة المحتاجة لي 11 سيرفر و 180 تيرا دي شنو؟ في زول سمع بي سيستم اليكتروني بتاع ري قبل كدة؟
04-11-2020, 03:11 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
الأخ حسام، سلام .. أنت ودكتورة إخلاص .. أثرتم الموضوع .. وأنا أفتكر يجب أن يتم توسيع جهدكم ودعمه من قبل الثوار .. ما أظن الشباب الثائر وقف الوقف البطولية التي وقفها عشان يري إهمال وتعدي سافر بمثل ما يحصل في مواردنا القومية - مثل المياه. أنا شخصياً .. بشوف العمل السياسي وحده ليس كافي إن لم يكن مدعوم بخبرة في مجالات أخري مثل العمل القانوني والخبرات التقنية والفنية .. أفتكر الناس في الخارج تحتاج لي إكتشاف بدائل مثلاً تنظم نفسها في شكل بيوتات خبرة تدعم ناس الداخل.
Quote: والشئ البعرفو إنه المواقع والتطبيقات الحكومية كلها مستضافة في المركز القومي للمعلومات ما داير اتهم لكن بستفسر عن الأنظمة المحتاجة لي 11 سيرفر و 180 تيرا دي شنو؟ في زول سمع بي سيستم اليكتروني بتاع ري قبل كدة؟
وين ول أبا عمر التاج؟ .. مواضع المؤامرة دي يعرف يساعدنا فيها .. والله أستفسارك هنا يا أحمد وجهية تماماً وأنا أضيف نفسي معك مستفسراً .. نحن نستقبل ربما يومياً حركة في المعلومات حوالي 50 كيكا بايت .. ولمدة 6 سنوات لم نفق بعد 1.3 تيرا بايت .. الزول دا بسوي شنوا بال 180 تيرا بايت دي .. دا شيئ مهول؟ هذه السعة التخزينية أنا ممكن أحسب القروش التي يمكن أن تشتري بها .. دون الأضافات الأخرى مثل العاملين والصيانة والحماية .. وو .. دا باب صرف ضخم .. وممكن يكون فيه مآكلة .. الناس مفروض تنبش الموضوع دا .. يا أخ في حاجة ما تمام في الموضوع دا ..
بريمة
04-11-2020, 03:29 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10407
Quote: ما يهمنى هل قواعد البيانات في ايدي أمينة؟ .. أم الناس هناك محتارة تعمل شنو؟
مافي اي تأمين للمواقع دي المواقع الرسمية في الدولة كلها في سيرفر واحد و السيرفر قاعد في السهلة كنت بعد الساعة تلاتة بتوقيت السودان بتسلى بيهو بمسك السيرفر كلو و بدخل على اي موقع اختارو و من خلال برامج معينة انت عارفا بلاقي ثغرات الدنيا كلها بدخل بحقن الموقع و بستلم الكنترول بانيل و بعيث في الموقع طبعاً دا في ايام الكيزان لا بارك الله فيهم هم فاشلين و المسئولين من المواقع افشل منهم المهمة كانت بالنسبة لي شاقة لانها بتاخد مني وكت استعنتا بتلاتة اصحاب .. واحد يفتش الثغرات و هي طبعاً كتيرة و واحد يحقن الموقع المستهدف و انا بستلم الكنترول بانيل كأدمن و بعدها بعمل العايزو و بعمل ساين آوت انتهى الموقع
04-11-2020, 03:55 AM
adil amin adil amin
تاريخ التسجيل: 08-01-2002
مجموع المشاركات: 37024
Quote: كلامك عايز توضيح يا دكتورة .. هل الوحدة تم الإستيلاء إليها بأمر المجلس السيادي؟ إذا تم الإستيلاء بأمر المجلس السيادي، إذن الوحدة في حماية الدولة؟
وهل المجلس السيادي (اللجنة الامنية )) وكلاء الاستخبرات المصرية والاجنبية في السودان ديل يعبرو عن السودان وشعب السودان جنرالات نظام الانقاذ البشير الترابي جزء من مخطط اقليمي دولي شيطاني كبير جدا لانه بس لو ركزتو شوية ارسال الجنود لليمن وليبيا جزء من المشروع الاقليمي والخمسة ددول دي هم الدلالين للمشروع الامريكي المدمر مصر السعودية الامارات من ناحية قطر وتركيا من ناحية اخرى السيادة تستمد من الدستور ومن الشعب فقط وهولاء انتقاليين وظيتهم بس يوصلونا الانتخابات عشان تكون دولة ديمقراطية فدرالية اشتراكية زي زمان وذى الحبشة وليس عفطة عنز ذى نظام مصر والانظمة العربية المجرمة والمتخلفة
الثورة الثالثة ثورة وعي وبصيرة تجدع ايتام الترابي 1989 وبعاعيت مايو 1969 ديل مرة واحد (Passive Revolution ) ثورة توعي ال40 مليون سوداني بي مصالحو والنظام السياسي البنفع معاه والعزلة المجيدة ومراجعة ال64 سنة بعد الاستقلال بدون مجاملات ومليس ما بفيد نحن دولة موارد مهولة يا بريمة وهؤلاء الاقزام الفاشلين معلقننا مع النظام المصري والعربي القديم المنتهي الصلاحية ومصالح هذه الدول المبتزلة في نهب السودان والابادة ايضا داخل وخارج السودان (اليمن نموذجا ) السودان خرج ولم يعد حتي الان من اول انقلاب 1958 و1969 و1989 لي اخرانقلاب 2019 وبن عوف وفلول الناصريين والبعثيين في ق حت وبضاعة حمدوك البايرة
04-11-2020, 04:21 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
أووه ول أبا خضر، مرحب .. وإن شاء الله زعلتك خفت علي أخوك .. كلنا عورات وطالبين عفوكم في زمن الكورونا دا .. أها، أنبش لينا طبيعية المعلومات التي تخزن في هذه السيرفرات ال 11 وبسعة مهولة 180 تيرا بايت .. ؟ هل هي معلومات رصد مستمر؟ .. بمعنى لو هناك Active streams of data ممكن الناس تحتاج لسعات تخزينية كبيرة .. لكن ما فائدة تلك المعلومات بالنسبة للأمن القومي للبلد؟ وهل هي أهم أن يصرف عليها أم علي بدائل أخري؟ .. محّصوا هذه الوحدة .. يبدو والله أعلم أن هناك شيئ ما سليم ..
بريمة
04-11-2020, 04:46 AM
Biraima M Adam Biraima M Adam
تاريخ التسجيل: 07-05-2005
مجموع المشاركات: 27617
الأخ أحمد، هلما .. ربما أكتشفت ليكم الذهب .. سر السعة التخزينية .. أنظر الأتي: 180 تيرا بايت تساوي 180000 قيقا بايت ... (1)
أكبر سعة تخزينية للسيرفر Linux هي 16384 قيقا بايت .. لو ضربتها في 11 .. تجد 11ْX16384 = 180224 ….. (2) ماخد بالك، المسؤول قال: 180000 قيقا بايت تساوي 180224 قيقا بايت (أكلنا دغمسة في 224 قيقا بايت .. دي براها تشيل معلومات حكومة السودان كلها) ..
خلينا نأتي لأرقام العملة الصعبة التي يصرفها هؤلاء الناس .. أمازون تقدر تكلفة هذه السعة .. دوي أي إضافات أخري ب 20 ألف دولار في الشهر الواحد .. (بالضبط 20 ألف و12 دولار و23 سنت .. يعنى 20012.23$ في الشهر الواحد). هذا يعنى لو أشتروا هذه السعة من أمازون سوف يدفعوا 20 ألف مضروب 12 سنوياً = 240 ألف دولار في السنة الواحدة .. أضربها في 5 سنوات = مليون دولار و200 ألف دور. وأمازون تعتبر رخيصة جداً .. معظم الشركات الأمريكية تشتري من أمازون اليوم.
دا بيدي النار تصور عن حجم الخسارة المالية الكامنة داخل هذه المؤسسات .. لعدم الخبرة ... إن لم نقل الفساد بعينه ..
بريمة
04-11-2020, 04:24 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22984
يعنى المصريين وهم اكثر من مئة مليون الجيش المصرى اداكم كهرباء عشان سواد عيونكم ياسودانين الحمير البحكمو السودان الآن هم الخيار الأفضل لحكام مصر بعد شوية حانكتشف انو محمد بن زايد هو حاكم السودان يقول للسيسى طفى منهم النور زى ماكان البشير بقول لعوض الجاز اقفل البلف
04-11-2020, 05:43 AM
خضر الطيب خضر الطيب
تاريخ التسجيل: 06-24-2004
مجموع المشاركات: 10407
Quote: أووه ول أبا خضر، مرحب .. وإن شاء الله زعلتك خفت علي أخوك .. كلنا عورات وطالبين عفوكم في زمن الكورونا دا .. أها، أنبش لينا طبيعية المعلومات التي تخزن في هذه السيرفرات ال 11 وبسعة مهولة 180 تيرا بايت .. ؟ هل هي معلومات رصد مستمر؟ .. بمعنى لو هناك Active streams of data ممكن الناس تحتاج لسعات تخزينية كبيرة .. لكن ما فائدة تلك المعلومات بالنسبة للأمن القومي للبلد؟ وهل هي أهم أن يصرف عليها أم علي بدائل أخري؟ .. محّصوا هذه الوحدة .. يبدو والله أعلم أن هناك شيئ ما سليم ..
انا يا بريمة بحترم فيك تلاتة حاجات اساسية و مهمة اولاً انت شخص متمكن في مجالك و هذه حقيقة لا احد ينكرها ثانياً انت كتبتا عن تاريخ اهلنا البقارة بمهنية عالية ثالثاً انت كزميل في المنبر علي احترامك و تقديرك مرات لما تشوت في حتة العنصرية فعلاً بزعل منك و بردمك في وكتها و بنسى فكون بخير يا عزيزي ما بيني و بينك الا المحبة .. بس دا ما بمنع اني مرات مرات كده اردمك ههههههه نعم يا باشمهندس ال Active Stream of Data بتحتاج لسعة تخزينية اكبر كتير من المواقع الحكومية ربما انو ما فيها معلومات خطيرة لكن اهم موقع في اي بلد هو السجل القومي في معلومات كتيرة انا ما عاوز اقولا فيما يتعلق بالسجل القومي دا بتاعين امن المعلومات مفروض يبقو مارقين لتأمين الموقع دا في السودان ما عندي مشكلة اساعد و زميل المنبر الدكتور سبيل كمان متخصص في أمن المعلومات و ممكن يساهم مساهمة كبيرة لكن دكتور سبيل غائب ليهو فترة طويلة من المنبر .. ربما متابع و اتمنى ذلك لانو ما ساهل في مسألة أمن المعلومات الموضوع كبير و متشعب يا بريمة و محتاج اهتمام كبير من كل الحادبين على أمن المعلومات في ظل نظام جديد مستبشرين بيهو خير
المحك في إنه المصادر دي بتحتاج باندويدث قدر شنو؟ وبجيبوهو من وين؟ سيرفرات بالمواصفات دي معناها شغالة شغل تقيل أقل حاجة بتحتاج لي 10 تيرا باندويدث .. هل في شركة سودانية عندها باندويدث بالتيرا ؟!!! نحن هنا بنتكلم عن سرعة انترنت بالقيقا موش الميجا علماً بي إنه القيقا الواحد في كنار بسعر خرافي وما سمعت عندهم بزيادة من 2 قيقا مع الألياف البصرية
شكراً يا ول أبا خضر، وكتر خيراً .. وربنا يدم المحبة .. بدر الدين،
Quote: يعنى المصريين وهم اكثر من مئة مليون الجيش المصرى اداكم كهرباء عشان سواد عيونكم ياسودانين الحمير البحكمو السودان الآن هم الخيار الأفضل لحكام مصر بعد شوية حانكتشف انو محمد بن زايد هو حاكم السودان يقول للسيسى طفى منهم النور زى ماكان البشير بقول لعوض الجاز اقفل البلف
الكلام دا في بطنه كلام .. أفصح يا أخ العرب ..؟ كيف يحكمنا محمد بن زايد؟
بريمة
04-12-2020, 07:30 AM
حسام الدين حمودة حسام الدين حمودة
تاريخ التسجيل: 02-16-2020
مجموع المشاركات: 372
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Biraima M Adam
حسام الدين حمودة
علاء سيداحمد
خضر الطيب
adil amin
بدر الدين الأمير
فيس بوك
تويتر
انستقرام
يوتيوب
بنتيريست