أكبر مقلب يتمقلبو حرامي من حرامية المواتر الختافين

سلام يا عصمان و ضيوفك الكرام البررة عندي الحقيقة واحد من
{مطبات النواعم} قريب من مقلبك دا بس ضحيتو شيف موش حرامي.

بصراحة ، نظرا لخشونة المطب الجاي دا . قلنا نگسرو برمية خفيفة گدا، لزوم
امتصاص الصدمات. فقال لك عمك دا في سگرات الموت رفع راسو نبه الحواليهو ،
إنو أول ما رويحتو تطلع و يگسرو عويناتو ،لازم ( يفرمتو الموبايل بتاعو)؛ قاللو ليه:
فال خايف علوية مرتو لو شافت البلاوي الفيهو تثور ثورتا و تقوم تفرگش لمة الفراش.
٪٪٪٪٪٪٪٪(((+++)))٪٪٪٪٪٪٪٪٪

∆ خلي بالك من شلاقة عيالك∆ ∆ خلي بالك من شلاقة عيالك∆
‏​‏حافظوا على نظافة مدينتم و أخص خصوصيات حريماتكم

® قصة أخشن مطب ؛ واقعية مية مية ومحرجة جدا يرويهآ
بطلها و ضحيتها في آن واحد. إذ يحكي يقول و الذمة على راويها :

© يقول قصتي كنت ماشي أزور صاحبي عازمني على الغدا ؛
دخلت البيت .. بعد شوية كدة مرتو نادتو وقالت له : الغاز خلس و كطع !!

¶ المهم صاحبنا جاني ووراني انو ماشي قريب هنا يعبي الغاز وراجع لك سريع انت استريح البيت بيتك!!!
- تفاديا للحرج ، قلت له : لا لا ياخ خليني امشي معاك أساعدك في شيل الأسطوانة !!!

- قال لي : لا خليك مستريح واشرب لبظ فنجان قهوة مظبوووط اعدل دماغك ...المشوار قريب ... شوية كدة و بجي راجع هوا!!
¶ قعدت اشرب القهوة فجاة جاني وليدو صغيروني، بنططو شايل لباس امو!!! بصراحة انا اتلبشت بس قلت اكيد هو بلعب وح يقوم
يشيلو معاهو!! و شافع الجن اللايوق بقي يلعب و يجدع اللباس فيني و انا اجدعو بعيد مني..!!! يقوم يجري و يجيبو ويجدعو تاني فيني!!
بصراحه انا زدت اتلباشة و بقيت متوتر و منحرج جدا! قام الولد الصغير خلي لي اللباس في عبي؛ و قام جاري يلعب بعيييييد!!!

¶ اللباس مجدوووووع في عبي متل جنا الحرام!! وبقيت اكورك للشافع عشان يشيل البلوة دي والود ما شغال بي الشغلة!انا أكورك انادي الشافع
- يابابا ياحبيبي تعال شيلو وديهو هناك عند ماما!! الولد صغيير و علي عماه ، ما فاهم مني حاجة!! وفي هذه الاثناء انفتح باب البيت وجا صاحبي
أبوه راجع ما لقيت حل قدامي الا اشيل اللباس وأحشرو ف جيبي!و الطامة الكبرى إنو الولد نقشني و الأبو كمان طينا زيادة جاء قعد جنبي لصق.

¶ و بعد شوية يجي الشافع الصغير و يحاول حشر يدو ف جيبي!! يقول:(جيبو حقي، سرقتو ي حرامي)
لحد ما أبوه استغرب منو إصرارو ؛ سألني : هو داير منك شنو حمودي بالضبط؟ قلت: ماني ؛عارف لكن
اظنو داير قروش! قبيلك كان اديتو جنيه لكن حردو رماهو في الواطة !! يمكن هسي غير رايو!
¶ المهم انا بقيت اطلع في القروش كمش كُمَش و أكمد للشافع في جيبو.:خلاص
هاك ياحبيبي كلو عشان ينسى الموضوع كنو لسة مندرع ؛ يبكي و يدردق بالواطة.
¶ بي صراحة انا عرقت وخفيت كمان من فضيحة بجلاجل و واىد سوء الظن ،
لا سمح الله!!و الألو ريو مشطوب! سألني : مالك يا سيد عرقان كدة انشا الله خير؟!

- قلت ليه: ‏​‏​‏​‏​‏​لا و الله مافي شيء ؛ بس المدام اتصلت و قالت تعبانة شوية كدة و لازم
امشي ليها هسي عشان اطمن عليها وكدا!!! صاحبي قال : و الغدا جاهز ياراجل!؟
- قلت : لا والله لازم امشي حالا وخليهو مرة تانية اوعدك ان شاء الله فأرجو انك تعذرني يا صاحبي!!!

دا كلووو وانا روحي طالعة من الخوف والاحراح والشافع لسة وراي ويكورك (جيبه ..جيبه )
:' ( و يأشر علي جيبي . بصراحة ماصدقت اني طلعت منهم وليت مدبرا و لم أعقب. منطلقا لا
ألويعلى شيء. و أول حاجة عملتها جدعت اللباس في أقرب كوشة؛ و بقيت اسب للشافع : انعل
ابوك لأبو أ م و مك و لباس أمك ظاطو ي مقصوف الرقبة ، حرمتنا من عضة گاربة مضمونة!!

يجازي محنك يا عصمان و يكلبش لي بنات إبليسك ياخي .
تحين قت لي مهلبية طبعن لازم مهلبية و لا تكون قاصد محلبية.
عمومنطبعن لأنو ود مغترنين بالخارج. موش أكلو كلو باسطرمة
و نغانغ و بلاليط (بالمناسبة دي شعيرية ما حاجة كعبة في الخليج )
زي الشكشوكة عندنا : تسمع اسما لامن تقعد تضمضم في كرعينك
تضوقا تقفعد تتمطق. يلا خلني نديك من تجاربنا الخاصة لامن كنا في
الإبتدائية و د ناظرنا بذكر كان اسمو عبد اللإله . طبعن الوحيدين الكانو
بتغدو بملاح ( لحم) والبتالي مخرجاتم بتختلف تمامن عننا نحنا يوماتي
دابنها فتريتةعليها لوبا بي دغلوبا و لا كان بحبحناها خلاس يضبحو لينا
كليقة قصب لملاح ويكاب ( Wake-Up ) يعني أصحي يا بريش و قوم
أتمغى يا نعسان ، عبارة عن عصير أملاح معدنية منقوعة تحت تيبار
الموية. الشاهد: كنا نخلي ود الناظر دا لامن يرمي (مهلبيتو) دي
و نجي وراهو نتغزل فيها زي الشيء السمح أحييينا أنا آآآآ عبد
اللإله. وأسفين ليك ياخ و للسامعين لحكاوينا القرف دي.

《 هههههههههههاي ما ترا كبَّاوووو 》
طبعن دي نكتة تكطع الوضوء و تشحتف
الخميرة من بيت النمل و مقابها لا يصلح للمقام.
علا كان مصر عليها إلحاحن ، تجيني خاس بس.

● لكن يا جنا ما تضحكتني لامن قربت تشرقني
بالأقاشي.. لكن (أنا ما شِرِقتا .. أنا جرت أعاين )
ثم بعداكا《 أجشهني البكاااؤوو .. و انتشيتو 》.
● ثمح هاك دي: أخونا راكب بصات القندلة من مدني
لمحل البُلهان بنوم و تيارة دا زاتو بقوم .. و ظنيتو كان
متعشي بوش بكوارع جريوات مغلتات عليو. و صبحان
مسافر و بطنو مكركبة. و كتين فاتو الفداسيات و متلهمين
العيكورة زولنا بقي في حالة مخاض بطني حاد و لازمو إجهاض
في داك الحزة . طوالي صفَّر في الكمساري . قالولو: مالك عمنا
يدوك موية؟ قاللهم دا أنا الداير أكب مويات بي ورا ورا.. المهم
السواق مهذب جزاه الله خير قال ليو أنزل ياخي أقضى غردك
تحت البص و أنا بكون واقف أضاريك .. أها قال مما نزلت ليك
ملصت سروالي لبستو عمة..و فتحت ليك بلف 8 لينين(كُباب)
مرقت لهاميق من عمنوَّل. يلا مشتح كرعيني لامن بردن و أرمي
في القراريص تلات بوصة أعرض من أنجيرة الحبش. و كلما أوسع
نصف قطر لانشتاحة تزداد دوائر الطرشي اندياحاً. قام الكمساري
جاني نازل يفقدني: يا زول كفاك ما انحليت. لقاني أعرق و أجف
بس لوحت ليو بيدي: "أتوكلو أنتو ، وأنا الليلة يحلني الحل بلة".

●بالهنا و الشفا أسامة يا ود أبارو.
و تعيش إنتا و ينحبس غيرك . ثم كلنا هديل
رهينين محبسين: كمامة و كمان جابت ليهاعوامة.
لكن معاك حق البباري عُصمان دا بودينو الكوشة.
● عمومن، و كتين شهيتك فاتحة خلي لينا بابك
متركش نص كم و هاك دي من الصنف الممنوع
امش كبها لينا في لجنة العليا لإطالة التمكين.

♧ كلَّ عامٍ تُرذَلونَ £ • دفع الله ود الأصيل/

♧ بخيتة قالت لي : انزل تحت .. بتقع £
●ناس حلتنا جاهم خبر بكاين بعيد في أم صفقن عوراض .
أها، ركبوا لوري داووري حق ود علي الجاك ، نساوين و رجاجيل.
اللعمى شايل المكسَّر قالو: لافيين الدافنة قبال الجنازة ما تبرد. بقو
الرجال متشعبطين فوق في السيخ و النساوين مصنقرات تحت .

●عمك البلولة الزول الاتوفي دا قريبو تب لحم و دم. لامن لما سمع
كان خامج ليو حوض زبالة لياس و حاقب عراقيهو بي خيت دُبارة فوق
كتافينو و قايم عليها. أها لامن جابو الخبر انخلع و قمز ركب ساه بدون
سروال . وكتين مرقو في الخلا و الصي حاسي ليك بالهبمريب الطلق
ضاربو ليك صاااقط و يهبهب في العراقي و هو مو عارف روحو عريان.

● و الحروم ديل بي تحت عويناتن يلاقطن متل البصل في الروب .
و باسحياء يغضغضن في البصر و يضَّاحكن في سرهن عاد يقولن قررر.

● أها مرتو البِخَيتَه مبلمة محكرة وسطن حتها شافت المنظر لامن انحشرت
في أضافريها. يلا قعدت تناغم فوقو تقول ليو : يا راجل هوي انزل إتا بتقع .
يقول ليها لا لا، ما تخافي آالبِخَيتة أنا عارف روحي ماسك في السيخ سمح .
تاني تقول ليو: ياراجل إنت بتقع ؛ دايراهو يستر عورتو. و هو مع تباريح الهوى
الغلاب مو جايب خبر ؛ يقول ليها يا ولية قت ليك ما بقع أنا هدا لي راكز تب.

● كمان صُوَيحبات البِخَيتَة حتهن يهمسن ليها : كلامك صحي و الله يا دي ،
فعلن، شعليق السيخ دا مو لي المتل راجلك البلولة؛ دا عاد للجنيات الصبايين
الراستات الناس الوقفو قنا و الجيل الراكب راسو. لكن راحت على الجلاكين.

● بتاع اللوري وقف للصلاه؛ و عمك البلولة شاللو إبريق و دقش التُّبَّاس ؛
داير يكطع الجِمار. و لامن رفع العراقي حتي شاف مدفع الدلاقين لقي نفسو
ام فكو. طبعن خجل تب، دخل في ربع لباسو المافي أصلن ؛ و يا دوبك وقع ليو
حديس مرتو البِخَيته القبيل، لكن وين، بعدما حدس ما حدس و الفاس فلق الراس!

●المهم صلُّوا و تاني ركبوا يواصلو.لكن عمك البلولة المرة دي قنع و نزل قعد
تحت وسط الحريم😂 واحدة منهن قالت ليو بنوع من الخبث و الخايز : إتا يا
البلوله ود أمي، هسة المقعدك متفَّن وسطنا القرفصاء تحت هنا شنو؟عمك دنقر
و قال ليها: نان آالِّخَيَّة ما سمعتي مرتي البِخَيتة قبيلك قالت لي:" انزل.. بتقع"؟!
بعدينك ياخ الهوا زاتو ما ريحني شال عِمتي رماها لي جدعا من راسي🙈🙊

☆فبالله مين يقول للسيد أبو برنيطة : تنحى و ترجل، انزل أقعد تحت بتقع
▪يلا، إن شاء الله بس وقع ليك يا المشتح إضنيك.أوَليسَ كلَّ عامٍ تُرذَلونَ¿!
🤣🤣🤣

♧ههههههههههااااااااااايييي .. ما ترا.. كباووو ♡
{ العفش.. مشعلق فوق السيخ على مسعولية صاحبِه}
ياخي قسمن عظمن دي أخطر ما قبل في هذا الصدد .
علا ،أسامة ود 《أبَّارو》 الحث دا أبدن مو غريب علي؛
إن شاء الله تكون من أهلنا جعليين مشايخة ؛ غادي في
شرق الله البارد جيهة الحديبة؛ حيث بلد عمنا و صديقنا
اللدود ، الجمهوري الراكب/ راسو أحمد مصطفى دالي.

▪ ما لحقت شرف، أنا جيت البركس بعدم بكم سنة. 1978
دي أخوك لسة طفلن أحبو حَبَيان على حنتوب الجميلة.
لكن مبفَن ما بذكر ناس محمود ساردية و عصمان الجلال
ديب فرويد الهلال. لاقيناه في فرنسا مع شلة من زملانا في
رابطة المترجمين المتحدين. و عوض حكام، أمل عطبرة.

● علا يجازي محنك ي دا و يكلبش ليى بنات أبليسك عصمان
يا بتاع الكوميديا الأرضية السوداء. و تراني ماني ختيان عليك ،
أكان لي زمن ما فقعت لي ضحكة زي دي بالهاء المعطشة كدي.

● ثمح كدي تعال هاك الفلم دا ظنيتك داخلو معاي دور أول ؛ لكن
عشان نفرفش مع أخونا ود أبارو . و نوريك إنو نحنا و نحنا بجاي
موش حناكيش زيكم؛ مستراحاتنا سفرية على متن بصات عم ريكا.

●و إنما فعلن، بنفجر مفرقعاتنا في (ساحات فداهن) صاح :
فذات مرة راكب من الميناء البري ،من مدني و قبال ما السايق
الفيات يغلِّق "يقوم بي و ما ياخد سندة" قلت الواحد يعمللو تستة
سريع كدا ؛ عوارض الطريق ميهن مضمونات وكدا. فنزلت فللي على
حمامات سوق الله أكبر . لقيت ليك عمك الغفير مصنقر هناك تقول هو
زاتو(إبريق) عامل كركون فوق خشم الباب ، و قدامو طربيظة مفروشة
بي خيشة و راصين فوقا الأشلان ديل مكوِّشات بالله متل أبراج دبي
و جنبو لوحة إعلانات، أنا لمحتها افتكرتها دعاية؛ قلت : يكونو عاملين
بروموشن سبشل أوفر ، مسلن : لزبائننا الكرام بمناسبة سقطت بس بلا
و انجلى(نزِّل تقيل على خفيف بتمن واحد ؛ و لا : بكرة القعاد مجاني)

● الشاهد: بالاستعجال طنشت عمك و أنا داخل ؛ فناديلي واحد
من شبيحة نظام اللسطاف؛ جاني مارق من جوة زي المارد و الجرة.
بس تقول المرحوم عمنا حيدر قطامة قام من ترب ود كنان . طوالى
راح مقبقبني ليك و رجعني أدفع أولن. قاللي: مالك أعمى ماك شايف
المكتوب هناك قدام عمك داك . فعلن مشيت طايعن (محتار ) دفعتام
المجعول و قريت: لقيتم (المعفنين) أتاريهم بالعكس مشددين الإجراءات
كاتبين:منعاً الإحراج: (الدفع قبل الرفع) تصدق. طبعن بالمغسة أصلي ما
سكت بديت أحاجج في عمك قلتلو ياحاج حرام عليكم، يعني الواحد لو
حتى شرد منكم بيحق (هُراراية حُبِنا) واحدة فيها شنو بالله . لكن تخيَّلو
أفحمني بمنطق وحجة أقوى لامن قربت زاتي أشرق لكن ما شرقت وقفت؛
أعاين خفت كمان يدبسو لي تهمة كرونة؛ قاللي : يا ولدي ، كدي هسي الباص
الأنت ماش راكبو دا بيخلس منكم تمن تذاكرو مدافرة من الشباك قبال ما
ترفع كراعك و لا برجاك لامن توصل ميسك. ياخ ناس دي عارغة شغلا صاح
أها تاني تعال قوللي(شبكة) مجاري الصرف الصَّحِي صحي فيها فساد وكدي!

▪معليش يا ود أبارو. بتاعت الشلن ما عندي ؛ لكن زيها كتير
بيحكن عن جلاكينا لامن ياخدو راحتم خسوين في بلاد غربتكم
دبك. فهاك دي بس تقرأ، و أنت متركش بابك و مسدد أضنيك.

《 أًعْضَاءٌ مُنْتَهْيَةُ الصَّلَاحِيَِّة》

●مع بالغ اعتذارنا مسبقاً عن أي ما من شأنه أن يخدش حياء
أو يجرح مشاعر القارئ الگريم و نقلا عن بعض (منصات التناصل
اللا~اجتماعي) ؛ إذ يروى ، و الذمة طبعن ، على الرواة ، أن محكمةً
بريطانيةً تعاقبُ كهلاً سودانياً ناهز عمره ال65 نهزاً ، ليلوكن المشين
حيث قضت بتغريمه الشيء الفلاني ؛ و ذلك على إثر دعوًى قضائيةٍ
مرفوعةٍ ضده من قِبَلِ جيرانه الهيتة بالهيتة، تفيد بامتعاضهم من جراء
وقوفه مطولاً أمام باب منزله متلبساً بتهمة العبث ب(أعْضَائه السفلية)
تصوًّروا بالله عليك دبل جيران المعفنين ديل!؟ تبن لكم، و ثكلتكم
أمهاتكم و أخواتكم من الرضاعة و ربائبكم اللائي في حجوركم!!

[} و قد أقرَّتْ المحكمة في نهاية حيثيات مرافعتها، بعدم ثبوت الأدلة
و المسوغات الكافية لدمغه بتهمة الإرهاب (الجسدي) لا سمح الله ، مما
كان قد ينذر بترحيله من أراضي المملكة المتحدة . و لكن نظراً لكونه مرافقاً
لابنته الطالبة ، أثناءَ دراستِها بإحدى الجامعات البريطانية العريقة، فقد تحرگت
دلدوماسيتنا الشعبية و الرسمية بالخارج عبر السفارةالسودانية ، حيث قامت
بتحرير خطابٍ رسميٍّ و شَعْبِيٍّ لهيئة المحكمة الموقرة ، مؤكدةً فيه أن ما قد
أقدم عليه هذا الزول يعدُّ جزءاً لا يتجزأ من موروثنا الشعبي على نطاق
ربوع جمهوريات موزنا الكضبن كاضب. فشايفين گييييف بالله؟!!

∆ كذلكـ قدم محامِيُ الدفاع المعيًّن من قبل سلكنا الدلدوماسي بمدينة
ااتي لا ينقشع عنها الضباب ، مذكرةً رسميةً، تتضمَّنُ نزاهة موقف موكله ؛
و قد فَصَّلَ فيها لحضرات السادة المستشارين شرحاً ضافياً وافياً بما يلي
نصه :" أن: مداعبتنا العَفَوِيَّةَ لأعْضاَئنا التناسلية ، بالذات ( القلقتين ) تُعْتَبَرُ
عادةً أصيلةً وحميدةً جدَّن، بل إنها تعد تقليداً ضارب الجذور لدى السواد الأعظم
من الذگور الكهول من أفراد شعبنا السودانيِّ الأبيِّ الباسل، حيث يشغلون بها أوقات
فراغهم المُمِل و القاتل؛ خصوصاً بعد تقاعد (أعضائهم الذكورية بامتياز) عن العمل
و خروجها نهائياً من دائرة الانتاج و هجرها تماماً (للفراش) بغرفة (العمليات) ، و إلى
غير رجعة. فحينئذٍ ، يصير استخدامها لدى الكثيرين، فقط ، لقدح تفكيرهم الخلاق ،
أثناء نوبات تأملاتهم الإيحائية. و في ختام المرافعة، ضرب المحامي للمحكمة
مسلن سودانياً معروفاً و مفاده أنو: ( اللي ما عندو شغلة
يا إمتن يلعب بي قلقاتو ، و يأ إمتن يستسلم للهم يزمو) .

[} هذا ، و جدير بالذكر أنه لما طالب قاضي التحقيق
بإحضار مترجمٍ( إشارة) ليتولَّى فك طلاسم مثلنا المهبب
دا أمامه ، و قد لبوا له طلبه، قيل إنو الخواجة العلج لامن
نقش الحاصل لم يتمالك نفسه من نوبة ضحكٍ هستيريِّ لحد
ما شرق قرب يروح فيها. لولا لحقوه بي تلاتة ( كيـزان ) موية.
على فكرة ، الخبر رغم بذاءته صحيح مائة بالمائة ، و ليست
مجرد نكتهً سَمِجَةً؛ لطرد خلوف الصائمين عن الإفصاح ببعض
الحديس المباح. و من شرما يضحگك حتى يجهشك البكاء!