|
Re: أطلعوا من الخرطوم ( بوست متجدد) (Re: طلحة عبدالله)
|
سبب واحد يخليكم تتشعبطوا في أقذر عواصم الدنيا القذرة دي ما في ... لا ويا ليت لو متشعبطين ومنقطننا بالسكات، انتوا مكنكشين وتكوركوا وما عايز أقول تولولوا الكهرباء قطعت الموية قطعت العيش مافي البنزين مافي المواصلات مافي الزحمة العصابات النيقرز الحقونا انجدونا شوفوا لينا حل ورراك واك عوك عاك ( احترام وتقدير للما بعملوا كدا). طيب ياخ شنو البجبركم على الحاجات دي كلها وبلدكم دي فيها من البراحات والمساحات ما يغنيكم عن الشقاء والعذاب الانتوا فيهو دا ؟؟؟؟؟؟؟ شنو يعنى مستشفيات ؟؟ وينا ؟؟ في تجارة علاج ودي موجودة في كل حتة .. مدارس ؟؟ وينا ؟؟؟ في تجارة تعليم ودي موجودة في كل حتة . أمن ؟؟؟ ما عندكم حتى داخل بيوتكم . خدمات ؟؟؟؟؟ وينا ؟؟ وخدمات شنو أصلا ثم وناس الجزيرة والولايات ديل عايشين كيف إذا كان الخدمات بتوقف الحياة ؟؟ تاني شنو ؟؟ قاعة الصداقة ؟؟ دا كان زمن الأفلام الهندية الجميل .. والمهرجانات الغنائية والفعاليات الثقافية الدمروها الكيزان وذهبت إلى غير رجعة. الكورنيش وستات الشاي ؟؟ أه روتين ممل والقعدات ذاتا بقت ما بريئة ومشبوهة .. قونات مصنوعات الخلقة رزقن على المجانين وعاشقي الفشخرة والبوبار القروشم مشبوهة ديل ؟؟ أجزم بأنو دي جريمة في حق الفن والأخلاق والمباديء والقيم والتقاليد وأية حاجة حلوة للبعملا وبشارك فيها، كما أنها أصلا ما حاجة الزول ( العندو عقل) يتحمل فيها عذاب العيشة في خرطوم السجم دي. تاني شنو يا رب ؟؟؟؟ يتبع .....
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
ملحوظة البوست دا سبق عملت واحد شبهو لكن شالوا سيل البوستات الأي كلام المالية المنبر دا وحتل .. وشخصيا ما قاعد ارفع بوست حتل عشان كدا عملت البوست دا . يتبع ... .................... بالمناسبة الخرطوم دي نحن اهلها عندنا فيها أملاك قديمة وجديدة وبنعتبر تلاتة أرباع القاعدين فيها ديل ضيوف عليها جايين من الأصقاع والفجات البعيدة .. عشان ما يجي واحد يتسلبط . اللهم أرحم جدي أرباب العقائد مؤسس الخرطوم .. خخخخخخ
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
صديقي محمد عبد القادر (رئيس تحرير الرأي العام سابقا) بقول لي عربي جزيرة وهو جائي من الديوم ودرس في شندى ههههههه زيو وزي صديقو الاسمو ضياء الدين بلال بتاع جريدة السوداني برضو عامل نفسو خرطومي وبتعامل مع الناس على الأساس دا مع أنو أصلا من المناقل وأهلو قاعدين هناك بمشي ليهم خميس وجمعة وسبت . محمد وضياء و أحمد محمد عيسى القال ما بنطير برانا داك وكمال حامد والمعلق المريخابي السمين محمد فضل الله وناس قاعدين هنا في المنبر دا بالإضافة لآخرين أعرفهم ولا تعرفونهم دا كلهم نماذج للمتوهمين الفرحانين بالقعاد في أقذر عواصم الدنيا القذرة . فترت من محاضرتهم لانهم مكابرين رغم حججي المقنعة بالأدلة والبراهين لكنهم مكنكشين .. خرطوم العفن دي ما فجة يتفاخروا بالسكن فيها .. أطلعوا برة بلا وهم معاكم . انا متأكد تلاتة من الذكرتهم ديل ( من الما معانا هنا) متابعين البوست دا ومن يأنس في نفسه منهم أية حاجة يرسل لي رد على الكلام القلتو دا عشان اقتبسوا هنا وأوريهو أية حاجة ... خخخخخخ يتبع .........
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
سلامات شيخ طلحة. ضهارينا ولا كباريت الخرتوم. الحمد لله ما عندنا ولا شبر في دي العاصمة ام كرور. في بلدنا ساكنين في همبريب مساحة فدانين. تجر عنقريبك من ليمونة لى نخلة. شوف لينا يا طلحة معاك همبريب مساحة 1000 متر تكفي ولو كانت نواحي الجديد الثورة يكون تمام . تحياتي .
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
منعا للبس والالتباس سبب دعوتي للهجرة العكسية من خرطوم العفن دي لا علاقة له بسبب دعوة أخونا توفيق عيسى للخروج منها . دعوة عيسى هي طرد عديل باعتبار ان الخرطوم ملك حر له ودعوتي من أجل الإصلاح وفك الخنقة والتحضر والرقي والمشاركة في الانتاج بالولايات بدل قاعدين لا شغلة ولا مشغلة ومصدعين رؤوسنا نحن المنتجين بالعواك والكواريك . عيسى عايز يطرد الناس من الخرطوم بحجة انو جدتو صوفيا لورين وعمتو شاهيناز أتاتورك أو أيا كان اسمها وبعتبر نفسو سيد الجلد والرأس ودي دعوة حق أريد بها باطل . أما أنا فأريد من الطيبين أن يفضوا أكتظاظ الخرطوم ويفكوا خنقتها عسى أن ترجع تعود تاني . طول ما الناس ديل مكنكشين فيها يأكلون ويشربون ويرمون النفايات في الشوارع الخالية من عربات القمامة ستظل الخرطوم في صدارة أقذر العواصم القذرة بلا منازع. ناس المطرة تجي 5 دقائق تبهدل حالهم كما كان سكسك يبهدل دفاعات الهلال زمان ثم لا يستطيع أجعصهم أن يصرف موية في حوش بيتو أو عاملة بركة في الفسحة القدامو ومنتظر الحكومة تجي تتحمل عنو الشغلانية الساهلة دي وبرضو بتفاصح .. ويا ليت لو عالم جليل أو مفكر عظيم أو بعمل أية حاجة يستفيد منها البلد .. قاعد بس عالة عشان ينظر ويتفلسف ويلبس الحلابية اليضاء والنظارة السوداء خخخخ زي ديل وغيرهم من العايزين يأكلوا ويشربوا ويتناسلوا ومنتظرين أية حاجة جاهزة هم سبب أزمة السودان بلا منازع .. طلعوهم برة عشان يشاركوا في الانتاج بلا قلاصة بلا فلهمة عوراء . أطلعوا من الخرطوم وخلوا عندكم وطنية وصدقوني كل حاجة ح تكون كويسة . يتبع ...
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
مرحب الزميل الاستاذ طلحة الله يبشرك بالخير مرة جاي من السعودية عن طريق بورتسودان مريت بي كل المناطق دي و كلها كنت بسمع بيها و عندنا فيها زملاء في التلفزيون القومي و في تلفزيون مدني كان الوكت اربعة صباحاً هدوء نفسي اعتراني حقيقة الساعة ستة صباحاً جيت في منطقة قبل كبري حنتوب مباشرة لقيت ست شاي قلت ليهم بس وصلنا نزلتا انا و اولادي و كان معانا ضابط استخبارات في تفتيش سواكن الشباب قالوا لي ممكن تشيل معاك اخونا دا للخرطوم قلت ليهم جداً اتفضل قالوا لي معاهو سلاح MP5 تقريباً وانتو حتجو بي منطقة بين كسلا و القضارف فيها عصابات الشفتة تقريباً إسمها غابة الفيل وفعلاً لما جينا مارين بيها كانت موحشة جداً لو حصلت الحاجة دي الزول دا بعرف يتعامل معاهم زولك اول ما اتحركنا نام ما صحى إلا في محل الشاي دا كنا اول زبائن عند الخالة دي و ضربنا ليك الهمبريب جو ذي الجو كهربة شنو يا حنين من المكان دا يا طلحة انا عشقتا الجزيرة لانو دي كانت أول مرة اشق الجزيرة قلت ليهم ندخل مدني نشوف لينا فندق ننوم و صباح اليوم التاني نتحرك الضابط قال لي ياخ خلينا نواصل و انا بسوق ليك , قلتا ليهو اولاً انا ما بكون مرتاح لما يسوق لي زول الشى التاني يا سعادتك انت نايم خمسماية ساعة قال لي حرم اسوق ليك صاح و ارخيني من قصة الفندق دي قلتا ليهو طيب نتمشى في الكبري دا برجولنا و نجي راجعين و فعلاً مشيناها خطى كتبت علينا من الوكت داك يا استاذ طلحة قلبي اتعلق بالجزيرة هنا اتعرفتا على صديق إنسان رائع بكل المقاييس وهو من قرية اسمها عِبود هي في الجزيرة لكن وين في الجزيرة ما بعرفا ربما جنب تمبول و معروف سوق تمبول لأنو استاذنا بتاع اللغة العربية في مدرسة الدويم الشعبية كان من تمبول رجل وقور كلنا كنا بنحبو و كان قبل المحاضرة بحكي لينا عن تمبول عموماً اتعرفت على اخوان( جوزيف ) اتنين معانا هنا و بقت زيارات عائلية هو طبعاً اسمو يوسف انا بقول ليهو جوزيف في يوم قلت ليهو انا عاوز لي قطعة ارض تكون سكنية و زراعية و عاوز قطعة زراعية منفصلة بكم الحاجات دي ؟ قال لي يازول انت نصيح؟ انحنا ما بنبيع الأرض انحنا بنديها ساي بس ابقى مارق قلت ليهو عاوز البيت اربعة فدان و المزرعة 50 فدان قال لي مبروكات عليك مشى هناك و عمل كل الإجراءات و جاب لي كل الورق قبلها قلت ليهو حرّم سفرك علي و على الدرجة الأولى و الخطوط القطرية صور لي المنطقة و حبيت الفكرة ما فرقت بين النيل الأبيض و الجزيرة نعم بحب النيل الأبيض لكن عشقتا الجزيرة
كت آوت:- يا ريت يا حبيب تكتب لينا مقالات عن هذه الزيارة و ترفدها بصور عن كل المناطق التي زرتها و عن الناس و لو كان في فيديوهات يكون أفضل محبتي يا طلحة
ناس جميلين و لطيفين جداً
| |
|
|
|
|
|
|
Re: أطلعوا من الخرطوم ( بوست متجدد) (Re: خضر الطيب)
|
سلام ورحمة الله وبركاته الأخ خضر الطيب من أكبر عيوبي ( كما اعتقد) يا خضر اني ما بوثق بالصور .. كسلان جدا وربما غير مهتم بالحاجة دي .. زرت عواصم وفجات كتيرة حول العالم ما عندي إلا الصور القاعدين يلتقطوها الزملاء ودي ملك حر ليهم وحتى لما يرسلوا لي منها ما قاعد احتفظ بيها .. نفسي اعمل كدا وكل مرة أقول أنا ح أصور وأوثق أرجع من مكان الزيارة كما مشيت لو كان بحتفظ بصور او مهتم بيها كان احتفظت بصورى وأنا لاعب في أشبال الهلال أو اتصورت مع رونالدو وغاريث بيل ونجوم كأس العالم للأندية الكان في الامارات 2018 مع انو كل الزملاء اللى غطوا الحدث اتصوروا واحتفظوا بالصور .. زي ما اتصوروا مع الراحل العظيم ماردونا عندما كان مدربا للوصل بالدوري الاماراتي وأنا ولا اشتغلت بيهو مكتفيا فقط باثارة حفيظتو بالأسئلة الغياظة خخخخخ أحداث وفجات كتيرة كان تستحق أن أوثق ليها لكن ما اشتغلت بيها . يا خضر والله في الجزيرة بداية من بتري وأنت ماشي ياهو بتلقى الكلام القلتو ليك دا وأكتر لانو بعتبر نفسي عاجز عن الوصف .. ممكن أصور ليك بالكلام والله على كل كلمة أقولها شهيد والما عايز يصدق أو شايف اني ببالغ على كيفو .
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
سلام ورحمة الله الأخ عثمان موسي فعلا كما قلت تماما وأكتر من كدا صدقني كل ما ابتعدت عن أقذر العواصم القذرة دي وعشت في براحات الولايات ومساحات السودان الممتدة كل ما توسع رزقك وزادت رحابة نفسك وقل همك وغمك ومرضك واستنشقت هواء طبيعي يريح الأعصاب ويهدي البال، ونمت غرير العين منشرح الصدر مطمئن الفؤاد .. هناك النفوس طيبة والحواجز مرفوعة والمجتمعات محصنة من أمراض العصر وتعقيدات المدينة الزائفة. يشاركون في السراء والضراء كانهم من رحم واحد .. ملتزمون بلاتزمت ومحافظون بلا تطرف وقت الشغل للشغل كأنهم يريدون بناء العالم كله إناء ضحوة أو صبحية ، ووقت الرفاهية والراحة لها وكأنهم لا يعرفون هم المعيشة .. قلوبهم بيضاء كجلاليبهم وبيوتهم مفتوحة على شوارعهم لا غريب بينهم حتى لو كان ضيف تقطعت به السبل . ربنا راعيهم وحافظهم ومكفيهم شرور الدنيا وأحوالها وتقلباتها لأنهم انقياء بلا تكلف واتقياء بلا زيف . .............. الأراضى رحبة وواسعة من بترى لغاية قبل الكاملين دي الشفتها وبعرفا أنا .. انت بس أطلب وشوف.
| |
|
|
|
|
|
|
Re: أطلعوا من الخرطوم ( بوست متجدد) (Re: طلحة عبدالله)
|
لو حمدوك قدر يلقى حل جذري للطاقة، سوف تتحول منطقة صناعية الباقير لمنطقة جاذبة للهجرة، منطقة شمال الجزيرة لملوحة الأراضي فيها هي المناطق الوحيدة التي من الممكن أن تكون متنفس للخرطوم.
لو نجح حمدوك في توفير كهرباء مستدامة، الناس ح تخرج للزراعة في نهر النيل والشمالية.
——- قلت لي داير تحل مشكلة انقطاع الكهرباء بالخرطوم بلعب الكوتشينة في همبريب الجزيرة؟!! فعلاً صحفي سنترليق
| |
|
|
|
|
|
|
Re: أطلعوا من الخرطوم ( بوست متجدد) (Re: أبوبكر عباس)
|
عليك الله يا مستجير ما تكضب فينا هسة أنا متين قلت عايز اعالج مشكلة الكهرباء أصلا أنا كطلحة ما عندي مشكلة مع الكهرباء لو عندي أعالجا ليك لشنو ؟؟ انتوا ما بتعملوا حاجة براكم أصلو ؟؟ بعد كدا ما فاضل نعرس نيابة عنكم ..خخخخخخ ............ خليك في معافرتك لتفرض نفسك كزول ظريف
| |
|
|
|
|
|
|
|