《 كورونا .. و حَظْرُ التَّبَوُّلِ 》

مرحبا Guest
اخر زيارك لك: 04-05-2020, 01:26 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
03-23-2020, 07:33 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
《 كورونا .. و حَظْرُ التَّبَوُّلِ 》

    07:33 AM March, 23 2020 سودانيز اون لاين
    دفع الله ود الأصيل-
    مكتبتى
    رابط مختصر

    ▪ و نعني به التبول في الكُوَش و على الحيط و في الطرقات.
    طبعن الدافعنا لكدا الحكومة كان البايدة و لا كان القحاطة ديل،
    فارضين رسوم باهظة تصل إلى شلنغ بالقديم لحمامات عمومية
    على شعب مفلس و أصلن جنو يتهرب من الضرائب . فبدل ما ننفع
    غفير الحمامات في الأسواق و المواقف و الرجال أصلن مواغف قلنا
    أحسن الواحد يشتتو فوق ركبينو ساي يبول زي بولة البعير واقف.
    وأهلنا ناس ألبل في البطانة هنا عندنا مثل : ( الشُّقوق و لا المخلوق ) .
    ▪ لكن جانا هدا كرونا رضي الله عنه و أرضاه، و رجع (الأمواه) قسراً
    إلى مجاريها في بيوت ( الحبس ) حفاظاً على صحة البيئة العامة.

    (عدل بواسطة دفع الله ود الأصيل on 03-23-2020, 11:51 AM)









                  
|Articles |News |مقالات |بيانات

03-23-2020, 08:01 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حظر التبول 》 (Re: دفع الله ود الأصيل)


    ● علا كان جينا للحق ؛ عشان برضو نكون منصفين و دقيقين كمان ،
    ليس تهرباً من الرسوم وحدها ، بقدر ما هروب حقيقتن من وضعية
    (المنافع) نفسها المبنية على أساس إنها (قبانات) للجباية و حِتحَيْت
    جيوب المتبولين في الأرض ، و هي خاوية الوفاض على عروشها .

    ● ياخي المرافق دي لا مؤاخذة، عليها جنس ريحة أكرم الله
    السامعين تخلي حال الجوَّاها يشحد في الله: يحلني الحل بلة
    لكن مو جايب خبر للواقف مستني برة حالو ألعن و ( أظرط ) و
    هو يدافع الأخبثين: يا رباً تدخلني تذهب عني الأذى و تعافيني.

                  
|Articles |News |مقالات |بيانات

03-23-2020, 09:41 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ♧ سأني واحد: طيب كلاب الزمن ديل ما عليهن رسوم و لا ضرايب يتهربن منها . و نان مالن بنتكلن على حيوط الناس يتبولن فيه. قلنالو: لا ياحبوب ديل سببن براهو : بنتلكن يتبولن في الحيطان من شدة  الضعف و الهزال الحاصل. فمرة حكي لي واحد كلب، و هو يغالب دموع التماسيح وغصة العبرة واقفة في الحلقوم تحسُّراً على أيام الزمن الجميل، زمان الناس هداوة بال و ربع الرطل يرسف القزازة لحدها قال : كان الواحد مننا كان يمرق على جيهة السلخانة دي قشة عينو من صباح الرحمن فتاح يا عليم رزاق يا كريم يلاقي ليك أخوانَّا الجزارين ديل فضلت خيرك راميين لينا الغفشة دي هنوووك و مصران العرنون دا أكان ما أخاف من الكضب تقول يجيب لو تلاتة ياردات؛ ودا ناهيك عن لضلافين ديل زي الشيء الكعب؛ كنا نشيلن نشدَّهن بالليل نظبط ليك منهن حلة بوش كوارع طاعمة بازول تعضي أصابعينك وراها، نمخمخ و نقزقز فيهن و نمزمز لي شقة
    حَمار اليوم التالي 

    (عدل بواسطة دفع الله ود الأصيل on 03-23-2020, 12:12 PM)

                  
|Articles |News |مقالات |بيانات

03-23-2020, 11:03 AM

عزالدين عباس الفحل
<aعزالدين عباس الفحل
تاريخ التسجيل: 09-26-2009
مجموع المشاركات: 13476

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)




    حتي حمامات الاجرة ،
    أعاذك الله تزكم الانوف ،
    من الروائح الكريهة ،
    دا اذا كان باب الحمام ،
    فيهو ترباس اصلاً ،
    يااااااااا بلد ،


    ،،،،
    ،،،،


    ،،،،


    ،،،،


    ،،،،







    عزالدين عباس الفحل
    ابوظبي


                  
|Articles |News |مقالات |بيانات

03-23-2020, 12:41 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: عزالدين عباس الفحل)



    حتي حمامات الاجرة ،أعاذك الله تزكم الانوف ،
    من الروائح الكريهة ،دا اذا كان باب الحمام ،
    فيهو ترباس اصلاً ،يااااااااا بلد ،
    عزالدين عباس الفحل – ابوظبي

    .......................................

    * حيا الله أخوي عز الدين ود الفحل و متشكر جدن لبهاء المرور.
    ▪ أها ، ما تميت ليك درامة عمنا الكلب : يلا ، تعال هسي شوف حالنا بقى يغني عن سؤالنا. و كان للناس أسيادنا الكانو بحنُّو علينا بقوا هسي يا عبد المعين تتعان و الحال من بعضو . فبقينا الواحد لامن يجي يشخ في الحيطة، أول حاجة يعمل تقدير موغف ، و ينتكل عليها ؛ و دا موش بس من مواتة حيلنا مو شايلنا بقدرما هو خوف على الحيطة ذات نفسها و هي جالوص تقوم تترَّع تنماص تجي واقعة متهايسة فوقنا تلحقنا أمات طه.
    ▪ قمت ضحكت و علقت بخباثة كدا قلتلو: و الله يا عمي الكلب
    تراهو ما في أبد زولن هاين روحو. طبعن نقشا و هي طايرة ؛
    فقام كشم معاي كشمة صفراء و قاللي : كيفن عاد يا ولدي و كان ماك عارف كمان ، أهو زييأنا مسلن، أصلن يوم أبوي جرقاس و أمي بُرييبة ولدوني جريوَن كدا حلاة الدنيا علي ، ضابحين لي خروفين و مسميني حاج أبراهيم :علا لكن هسة هانت الزلابية و شايف بعض المتطفللين بعدما سقطتْ و بس بقو بتحت تحت يتنمرو علينا ينبزونا بلألقاب "بئس الاسم الفسوق بعد الإيمان" و ينادوني: يا كلب!!

    ● و إتا في دا و لا و كمان الشُفع يكوركو فيني اللسان الشايلو أطول من حنكك دا زاتو مو حقك دا حق تمساح و هداك سيد الحق زاتوجاييك مارق من البحر يقلع منك لسانو. و المصيبة أتحخل إني مرات لامن أصدقم و أقوم جاري حرصاُ على لساني و ضنبي.
    ● فبالله شايف كيف .دي عشرة عمرنا مع بني الإنسان و حلات
    يتمشدقو ويقولولك:

    Dog Is The Man's Best Friend

    (عدل بواسطة دفع الله ود الأصيل on 03-25-2020, 10:17 AM)

                  
|Articles |News |مقالات |بيانات

03-23-2020, 12:53 PM

عمر التاج

تاريخ التسجيل: 02-08-2008
مجموع المشاركات: 10318

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    انت الظاهر عليك لخبت الاختساسات ياود الاصيل
    الحظروا فيها التبول في العراء ديك الاسهالات وليست الكورونا
    لكن الكورونا حسب كلام الخبراء الفسيولوجيين قالوا
    بتنشر بالسوائل والروائح العليا وليس الدنيا..
    وفي هذا انتشر فيديو احد المسؤولين في مؤتمر للكورونا في إحدى الدول الأوربية..
    الراجل ترك المنصة لزميلته ودخل الحمام ونسي الميكرفون مفتوح..
    وتاني اضانك ما تسمع الا النور، المتحدثة تقول كلمة والصوت من الحمام يرد عليها
    المهم كان تعليقي على المشاركين في الجلسه (مش اخير لكم من العطسة)
                  
|Articles |News |مقالات |بيانات

03-23-2020, 02:33 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: عمر التاج)


    ههههههههههاااااايييي ما ترا كبا!!!
    ( بالله دي ليها نكته براها تكطع الوضو
    فتجيني ليها في الخاس و مسدد أضنينك)

    ● يجازيج و يخلي محنك ود التاي يا فردة يا بتاع
    الكوميديا الأرضية السوداء. و تراني مانيختيان عليك ،
    أكان لي زمن ما فقعت لي ضحكة زي دي بالهاء المعطشة.
    ● ثمح كدي تعال هاك دي عشان نوريك إنو نحنا و نحنا
    فعلن ، بنفجر المفرقعات في (ساحات فداهن ) صااااح :
    فذات مرة راكب من الميناؤ البري ، مدني و قبال ما الباص
    يغلق و يتحرك بينا قلت الواحد يعمللو تستة سريع ؛ عوارض
    الطريق ميهن مضمونات وكدا.فنزلت فللي على الحمامات الله
    يعزكم . لقيت ليك عمك الغفير مصنقر هناك تقول هو زاتو إبريق
    عامل كركون فوق خشم الباب ، و قدامو طربيظة مفروشة بي
    خيشة و راصين فوقا الأشلان ديل مكوِّشات بالله متل أبراج دبي
    و جنبو لوحة إعلانات، أنا لمحتها افتكرتها دعاية يكونو عاملين
    بروموشن سبشل أوفر ، مسلن:لزبائننا الكرام بمناسبة بلا و انجلى
    (نزِّل تقيل على خفيف بتمن واحد ؛ و لا : بكرة القعاد مجاني )

    ● الشاهد: بالاستعجال طنشت عمك و أنا داخل؛ فناديلي واحد
    من شبيحة نظام اللسطاف جاني مارق من جوة زي المارد و الجرة.
    بس تقول المرحوم عمنا حيدر قطامة قام من ترب ود كنان . طوالى
    راح مقبقبني ليك و رجعني أدفع أولن. قاللي: مالك أعمى ماك شايف
    المكتوب هناك قدام عمك داك . فعلن مشيت طايع مختار دفعت ثم
    قريت: لقيتم (المعفنين) أتاريهم بالعكس مشددين الإجراءات كاتبين:
    منعاً الإحراج (الدفع قبل الرفع) تصدق. طبعن بالمغسة أصلي ما سكت
    بديت أحاجج في عمك قلتلو ياحاج حرام عليكم ، يعني الواحد حتى
    لو شرد منكم بيحق (هُووراراية) واحدة فيها شنو بالله . لكن تخيَّلو
    أفحمني بمنطق وحجة أقوى لامن قربت زاتي اشرق لكن ما شرقت ؛
    خفت كمان يدبسو لي تهمة كرونة قاللي : يا ولدي ، كدي هسي الباص
    الأنت ماش راكبو دا بيخلس منكم تمن تذاكرو مدافرة من الشباك قبال
    ترفع كراعك و لا برجاك لامن توصل ميسك. ياخ ناس عارغة شغلا صاح
    تاني تعال قواللي (شبكة)مجاري الصرف(الصَّحِي) كان فيها فساد!!

                  
|Articles |News |مقالات |بيانات

03-23-2020, 08:42 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ♧ قلنا قبل كدا إنو كورونا رضي الله عنه و أرضاه٩
    ، يبقى

    جُندياً مجنداً من أضعف جُند الله التي لا يعلمها إلا هو ، و
    ربما أودع فيها سره الخفي. ليثبتَ لنا العكس تماماً بأنما في ضعفه و تخفِّيه يكمن سرُّ جبروته الهادم للملذات المفرق للملمات.

    ● شأنه في ذلك شأنُ الكثير المثير من مخلوقاته التي
    لم تُخلق هكذا عبثاُ كالثعابين و العناكب و العقارب التي
    من سُمِّها نستخلص بلاسمَ و { تراييق } لمعظم علَلِنا و
    أوبئتنا " ربنا ما خلقتَ هذا باطلاً، فقنا عذاب النار" .

    ● و ذكرنا منها على سبيل المثال كائناتٍ شائعةٍ في أمثالناالشعبية السائرة.و قد بدأنا بأصغرها ثم الأمثل
    فالأمثل و لله المُثُلُ العُليا حينما يضرب لنا مثلاً ما
    بعوضةً فما فوقها" أي في كونها متناهية الصِغر
    و المدعاة للاستهانة و الحقارة في أعيننا.

     ● إلى أن جاء ذكرنا على الخنافس، ما نمسيه 
    أبو الجُعران الذي" في عين أمه أجمل من فراشة"
    مثلما أن "القرد يبقى في نظر أمه غزاله".نقول
    قولنا هذا، و { اللَّهُ أَعْلَمُ حَيْثُ يَجْعَلُ رِسَالَتَهُ}

    (عدل بواسطة دفع الله ود الأصيل on 03-23-2020, 10:25 PM)
    (عدل بواسطة دفع الله ود الأصيل on 03-24-2020, 07:07 AM)

                  
|Articles |News |مقالات |بيانات

03-23-2020, 09:42 PM

Ahmed Osman
<aAhmed Osman
تاريخ التسجيل: 01-22-2004
مجموع المشاركات: 719

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    يا سلام
    والله الواحد يشتاق لاي حاجة سودانية لما يغيب عن الوطن في غربة
    حتى جملة ممنوع البول يا حمار المنتشرة في الازقة والطرقات
    كالشعارات الثورية

    للاسف الشديد يبدو ان المحليات التي تمنح التصاديق للمطاعم المنتشرة لا تكترث كثيرا بنظرية الشحن والتفريغ
    ولا تشترط وجوب وجود حمام للزبون كشرط اساسي لاي مطعم او مقهى اوكافتريا
    الا فيما ندر ومحصورة في الاماكن الراقية دة لو وجدت

    وحتى تختفي لافتة ممنوع البول يا حمار ارجو النظر في منح التصاديق او تجديدها الا بعد زيارة المسؤلين لمكان قدرة الفول
    والتاكد من وجود مكب للنفايات البوشية
    البشرية
                  
|Articles |News |مقالات |بيانات

03-24-2020, 07:56 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: Ahmed Osman)


    تربت يداي و يسلم ضراعك أخوي أحمد موسى. بصراحة
    بعبارة" الشحن و التفريغ" دي أوقفتني كما وقف حمار الشيخ في
    العقبة ؛ و الذي لا أعتبره شخصياً مجرد جحشٍ مكاديٍّ نشحن على
    ظهره و نفرغ أحمالاً لنبلغ بها بلداً لم نكن ببالغيه إلا بشق الأنفس ،
    بقدرما أقف أمامه لأوفيه التبجيلا، لكونه معلماً لقننا في صمتٍ
    و بدون أن بنبس ب"نهقة" شفة واحدةٍ، متى و كيف يكون
    العصيان المدني ولو بالنظر. فإلام نظل نحن تلاميذَ أغبياء.

    ▪إذن، هلمَّ معي ندلف إلى أقرب مكبٍّ للنفايات لكي نقف
    بدورنا و لا مؤاخذة ، على جانبٍ من حكاية تلكم الخنفساء
    اللي برضو مسمينها أبو الجعران و في راوية أخرى بل هي
    الأحرى، يكنونه بأبي الدرداق من ظاهر مهنته الشاقة.و ما
    أدراك ما حكاية خطوبة أبو الدرداق لستي القمراء و التي
    تشبه كثيراً فصول أسطورة سيزيف للروائي ألبيرت كامو.

    ● أبو الدرداق يا سادة يا كرام، هو حشرةٌ من الخنافس
    الحقيرةٌ الهائمةٌ على وجهها بالكوش و البلاليع و مجاري
    صرفنا اللا-صحي . و في ذات غفوة كان ماخدلو تعسيلة
    مفترشاًقشرة موزةٍ مأكولة و ملقاةً على قارعة الطريق
    و ملتحفاً قبة السماء و ترعان لامن يتجشأً و هو مستلقٍ
    على ظهره و خالفٌ كراعاً فوقَ كراعٍ و قاعد يكتح كاساً
    وراء كاسٍ من (عبقري رباب) موية مجارينا البولية المعتقة.
    لحدت ما طشم وقف لمبة. يلا بقى يشوف ليك الجعرانة دي
    غزالة، و أبو الدنان هيلكوبتر. قعد يهضرب برة من راسو.
    ● يلا خلينا ناخد سندة هنا، ثم نواصل حين ميسرة:
                  
|Articles |News |مقالات |بيانات

03-24-2020, 12:14 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ●ولدي قاللي: يابوي الكلام دا ما أي زول بفهمو ليك. و ثبتني في حتة : "كرونا رضي الله عنها" دي ماظبطت معاه. و بصراحة معذور. و أنا زاتي ما صدقت إنو زي هرطقاتنا دي تلقى ليها أذن صاغية لدي جيل (حبيبي أمسك لي و أنا بكطع ليك). فدي ظاهرة صحية جدن.

    ● عمومن قلت ليه: لو كملت قراية للنهاية ح تفهم إنو جندي
    من جند الله المجندة التي أودع فيها أخفى أسراره التي لم يفهم
    الناس حتى الآن منها شيئاً إلا بمقدار ما يأخذ المَخيط إذ يُغمَس
    برأسه في عُرض المحيط.
    ● ما يمكن ربنا عاوز يشك لعبة الدنيا الجايطة دي من جديد
    و يعيد ترتيب أوضاعها. و شايف الناس مهلعين من كورونا من
    ناحية و متنافسون من ناحية في المتاجرة بمأساة ضحاياه .

    ●دي ذكرتتي كنا في قلب حادثة حريق منى الشهير ،
    و أنا جاري بولدي دا زاتو على كتفي و ألسنة اللهب ماسكة
    في هدومنا في عز معمعة التدافع و الزحام. و في وسطنا ناس مجانين كانو شايلين معاهم أنابير غاز تباخة و مهرولين من موت محقق. فشفت جنس عواقب طول الأمل و الطمع.

    على أية حالٍ الموضوع لسة محفوف بهالة غموضٍ
    بين قِوى العالم العظمي؛ مثلما بينا ضمن بوستينا الآخر
    (كرونا و لعب الكبار بالنار ) و لم ير الناس بعدُ من ديك
    الكرونة إلا رأسه. فيا ريت نعيش و نشوف.



    (عدل بواسطة دفع الله ود الأصيل on 03-30-2020, 01:54 PM)

                  
|Articles |News |مقالات |بيانات

03-24-2020, 08:38 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    قبل ما نرجع نسترسل في قصة غرام أب الدرداق غير
    المتكافئة للقمرة دايرين شبابنا ديل وكت فتحو معانا خط،
    نوريهم كيف يمكن لهذا الكورونا أن يعيد غشاء بكارة الطبيعة
    سيرته الأولى، بعدما عبثت بعذريتهأصابع العابثين. و يعيد
    دايناميكا منطق الأشياء إلى صوابها و سبيل رشادها .

    ● فمثلاً لقد سمعنا أنه بسبب احتباس الناس ( للتبول )
    في منازلهم تعطلت المصانع و المعامل و المطابع و الطائرات
    و القطارات و حتى المخابز عن العمل رفعى فقدانها للأيدي
    العاملة التي كانت تديرها ليل نهارمما خفض بنسر مقدرة انعاثات
    الغازية الضارة من عوادمها ، و هذا مما ساعد على انتعاش الحياة
    البرية من صيدٍ و طيور و سباع و ضباع و دببة ، إلخ. و الحياة
    البحرية من أسماك و تماسيح و دلافين و شعب مرجانية و أنوع
    كادت تنقرض سلالاتها . فخرجت تتمشى حرةً طليقة !!!

                  
|Articles |News |مقالات |بيانات

03-24-2020, 09:47 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ● تحتل إيطاليا المركز الأول أوروبياً و عالمياً بجدارة
    بين المتأثرين بتفشي وباء كورونا . و رئيسها في خطاب
    مكاشفته لشعب بلاده، نطق بحقائقَ صادمةٍ حين قال : " إذا
    لم يعكس منحى الإصابات بالوباء خط مساره نحو العد النانزلي حتى
    يوم غدٍ الأربعاء ، فنحن مضطرون لفرضنا حظراً شاملاً للتجوال و نغلق
    حدود البلاد نهائياً بحيث سوف لن يأتيها أو يخرج منها كائنٌ حيٌّ من كان
    بين يديها و لا من خلفها ؛ و سنقوم بتعطيل دواليب العملبكافة المصانع
    و المزارع و المعامل. مما سيضطرنا لدفع أجور الأياديالعاطلة عن العمل
    بها من الخزانة العامة للدولة. لا بل ، و سوف نتكفل عنهم بسداد فواتير
    الماء و الكهراء و التدفئة و الصرف الصحي. ونوصل إليهم رغيف
    الخبز يومياً إلى أعتاب أبوابهم . و كل ذلك حتى يبقوا ملتزمين لنا
    بالمكوث في ديارهم حفاظاً على سلامتهم و عوائلهم."

    ● ثم استطرد قائلاً: نقول ما تسمعون و نحن مدركون
    تماماًأن اقتصاد بلادنا على شفا جُرفٍ هارٍ من الانهيار.لكننا
    ندرك كذلك أنه قد آن الأوان لدولة إيطاليا أن تضحي ،و لو
    بالفناء في سبيل تأمين سلامة أبناء شعبها . ففي ظل الحروب
    السالفة كان على الشعب أن يفنى من أجل أن تحيا إيطاليا. أما
    اليوم فقد أتى الدور على أيقونة الدولة لكي تذهب مع الريح
    فداءً لأرواح من سوف يبنون مثلها و أمتن منها مجدداً.


                  
|Articles |News |مقالات |بيانات

03-25-2020, 09:12 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ▪وصلن لما كنا قطعناه من سرديتنا لدرامة عريس غفلتنا اللي
    نفض كبس حفلتنا االلي هو أخونا أبو الجعران و بي تحت تحت
    قال رنادوه أبو الدرظاق مز وحي طليعة ااكار و مشقة المهنة:

    ● ففى عز المزاج، فجأةً كدا عينو تقع ليك في مخلوقةٍ حسناء
    لامن قايلة للسماحةدي بس. وعليها جنس رفة و طعومية ياخي
    ترمي في الشوق المشيت ليهو .يلا أخينا دا راح زازل ليك فؤها
    تعشيقة رنمرة 5 من أول نظرة و رشقتني عيونوو جذبتنؤ فنونو
    و بقبت مجنونو من أول نظر و الليل و القمرة ضدين و اجتمعو.

    ♡ الشاهد: الود عسقها و أحب ناقتها بعيره. مسكتو ليك أم هلَّا هلَّا
    و كب جرس صاح لامن غلت. و يلا قعد يتودد و يكسر تلج لحدت ما
    نقش ليك اسما القمرة و ست السنسنة الحمراء ؛ و بقى مساقد الليالي
    يبحلق فيها و يتأمل فى {وشها الصبوح و منور}. و يلا فضل مِتَّلحا
    عامل وجع وش؛ لحد ما كرها الطلة زاتا المسخت خلق الله.

    ♡ ففيوم قررت( تشوكشو) رسلتلو؛ ركب ليها تكاسي الغرام
    هوى و قام جاييها فللي يسابق في الريح . و بالجد صاحبنا ما
    مصدق ظاتو يخاطبا مشافهة و كفاحاً هكذا : قال : قالت ليهو:
    تعال ..و فرح لامن كبرت كراعو من الفرح نص فى اللرض
    و نص فى النعال "و اتلخبت الشوق بالزعل و اتحاورو..
    و الخوف و الكــلام راح لي بقالي ساي سمبهـــار!!
                  
|Articles |News |مقالات |بيانات

03-25-2020, 03:39 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ♧ كرونة صخشياً من الصين اتصلت تطمئن علي جريواتا
    اللي كان رسلتم لينا هنا. لكن لومك علي حشرناهم ليها في فتيل عديل كدا:
    ~أها اخباركم شنو يا شفع ياشُطار ، عاملين كيف!!؟
    ~ شطار شنو، و الله يا مامي السودان فظيع سخانة تلحم العصار دا لولبي حلزوني يقوم ليك من (قنيطة) راسك و نحن هسه راقدين سكَّت عِمَي ، تحت زير سبيل في أمبدة كرور ؛ راجين الواطة تبرد شوية نركب ركشة كرونا ونمشي جبرونا قامو دقَّسونا.
    ~ سمح، و أخوكم الصغير عامل شنو؟!
    ~ ماقلت ليك يامامي كارينا دا ما يجي مبارينا الجنا دا شليق انا وصيتو يدخل حلق الزول بعد الوجبة قاام من شلاقته خش ليه في حلقواحد قبل الفطور و الزول فطر بحاجة يقولوا عليها ملوحه واسمهاالعلمي تركين و بعداك عوما لي ( كوز) بقنية غليد و قفلا بي سفة ود عماري جيد بس دُقار دفار !!
    ~ أها والحصل شنو يا ولدي، قول ، قلقتوني عليكم !!!؟

    ~ الحصل يا مامي الحاجة دي أولن عليها جنس عفُّونية بس تقولي شنو عاد: فسوة أبو العُفين بس. حصل شميتبها بالله ؟!
    يا زولة دي أصلن عبارة عن سلاح دغاع نووي بايولجي خطير من مشتقات ثاني أوكسيد اللعوتيك المُنضَّب. أها الحيوان السغير دا لامن يكون ساكيه وحش كاسر ولا (فكي) مفترس، بس ياهي دي حيلتو ؛ يقوم يفك ليك فيهو العفنة دي دقيق دقيق من الصلب و طوالي على النخرين ، تجيبو ليك بردلب
    واقع نجيض ؛ شخرة كدا و يلحق أمان طه.
    ● يلا شويفعك الشالق دا كانت الملوحة دي عاوزه تجيب
    خبرو من أول عطسة جانا متلب يرجف و هسع جبناهو مشمشناهو و عقمناهو ولبسناهو كمامة و عليك الله يامامي تكلمي بابي يرسل لينا منطاد جوي و لا بساط ريح هوا تجلينا من هنا قبل الجماعة ديل يمصُّو علينا قرضة يقرضونا.

    (عدل بواسطة دفع الله ود الأصيل on 03-25-2020, 08:24 PM)

                  
|Articles |News |مقالات |بيانات

03-25-2020, 07:57 PM

صديق مهدى على
<aصديق مهدى على
تاريخ التسجيل: 10-09-2009
مجموع المشاركات: 5485

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    سلام كتير يا ود الأصيل اها اسع البول كان حلف حرم منى طالع اها بوستك دا بمشئ وين ؟
    تحياتى
    يا مزمهمر ههههها
                  
|Articles |News |مقالات |بيانات

03-25-2020, 08:49 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: صديق مهدى على)


    مزهمر يا ود مهدي ، مقبولة منك الكف من يد الحبيب
    ترا زي مدغ الدبيب (شغل ناس نجيخاو الطلق فينا كرونة).
    ثم تعال هنا ياخ مالك مع ود التاج متنابزين بالألقاب بئس الاسم
    الفسوق بعد الإيمان. عيب عليكم تتشاكلو، أكتر اتنين بحبكم.

    ● نرجع لونستتا مع أبو الدرداق. ف الحقيقة، القمرة دلوعة
    رافعة القزاز حبتين ، فما حبت تضيع زمنا مع واحدن هلفوت،
    نازل فيها غزل كدا من قولة تيت. فأخدتو على قدر عقلو نادتو 
    بي غنج شديد : شوف يا دردوقتى أنا موافقة نعقد قرانا سوا ؛ 
    بس أنا عندى ليك شرطن فرد ويحيد . صاحبنا اتنفخ و قال ليها :
    "انتى تأمري يا ست الحسن تشرطي بطني دي ، إهيــي و نحنـا في
    ديك الساعـة؟! ياخي لو دايرانى أجيب ليك كاس العالم قبال الدوحة
    2022 و مليان لبن طير بجيبو. و بضحكة هنجكة غبشا كدا ، القمره 
    قالت ليهو: دردقوتى إتا كمان ما تبولغ ؛ خليك من( تقيل المحلبية)
    دى القاعدين يسقوهن لي ناس القرمبع و القراد ديل . أنا شرطى
    الوحيد إنك بس تنضف ليا كوكب الأرض دا تخليه بس زي صالة
    للأفراح و ليالينا الملاح جاهزة لساعة صفر ليوم ضبح كدبستنا.
                  
|Articles |News |مقالات |بيانات

03-27-2020, 09:44 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    《 ما يتحيَّر إلَّا مغيَّر 》
    ♧ جاتني فكرة ياخ نكسر بيها روتين الحبسة الكاتمة دي :
    ♤ إنو في ظل حظر(التَّبوُّل) و التناصل اللا-اجتماعي الحاصل دا نقوم نجمع القروبات دي كولها في لمة ونسة و لا عضةافتراضية ، على غرار قمة العشرين الكبار الفاشلة العقدوها أمس مع الدب الداشر بن سلمان بالفيديو كونفرنس(كلب يلحس خشومكم) .

    ▪ يلا ، نجيب شواهينا و لقيماتنا و آبرينا و مدايد عمباج كمان ، و نجي تمرين عادي(بدون رسوم لود الجمالي) ، و لا نمشي البر نعيش بقى مع الطببعة: نتعتشى برشوشة من وراكين (دفرنش) نملة، و لا أصابعين بعوضة مكشنة بفحلين بصل كلاب مع قدحة زيت خِروِع؛ عليها (كوزين) غولاد موية من ترس الحقنة ؛ لزوم (تعويم اقتصادي ). بعداك نحلِّي قرض و صفق لعوت مع شاي ح باجقلي مدنكل و مقنن بلبن حليب عُشَر ؛ و لا تجونا في أم هبج بطانة أب علي في مرقة قنيص. و نبقى ضارببن الهم بالفرح في همبريب العراء الافتراضي. و الزارعنا هناخليه كدي يجي يقلعنا.

    ▪بس أوعة ينط لي عمو الباشا يقوللي: يا مزهمر و لا شارب
    ليك عجين حامض و كدي. و مو عارف نحنا و نحنا العجين
    المُر دا مفطومينبو.. و قرن الشطة القبانيت بنتكحلبو..و اللسد النتر و لا تمساح جزاير الكرد بنسلخو و نعلق جلدو .. و كان لكرونة الهويِّن دا بنقرشرو ساااه (مكرونة ) و لا بنكابس ودُّو.
    لا، بل نقول ليه: ربنا و ربك الله. هييييععع أنا أخوك الراسية.

    ○ شهقة لون و تكية خط: خلى عمك سمعة يجي يتيرب المربوعة دي !!!
    ود اا ح ب س ا ن ال ت ل ا ت ة،،،
    رافع أذان ع الفاضي بجزيرة مالطة!

    (عدل بواسطة دفع الله ود الأصيل on 03-27-2020, 10:20 AM)

                  
|Articles |News |مقالات |بيانات

03-28-2020, 05:17 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    Salah Figada
    • يا سلام عليك يا صلاح ياخ. دايمن تعيدنا إلى أجواء
    حنتوب الجميلة. كيف ما بذكر شاعرنا الفُطحُل/ يحي إبراهيم.
    ▪ تصدق تلاقينا ذاتَ مرةٍ بمحض مصادفة "من غير ميعاد و اللقيا
    أجمل في الحقيقة بلا ميعاد). جمعنا ظهر باخرة و نحن نمخر العباب
    في عرض المحيطات عبر بلاد الله الواسعة. نفس ملاقاتنا أنا و أنت
    في عز معمعة رمي الجمرات سنة حادثة حريق منى الشهيرة. فشوف
    بالله مفارقات الدنيا دي! زي ما قالو عنها ضيقة لكن غريقة لتحت.

    ▪ و على طاري المفارقات العجيبة مما فرضه علينا هذا الوباء المستجد
    (كرونة) أنه مثلما (أغلق) دور العبادة ؛حتى صار المؤذنون في مشارق الأرض
    و مغارلها يرفعون عقائرهم بنداء( حي على الصلاة ..حي على الفلاح)..و كأنما
    لا حياة لمن ينادون؛ و كأنما اختُزِلت خارطة الكوكب بأسره في (جزيرة مالطة).
    و لكن بالمقابل فها هي ذي السجون نراها(تفتح) أبوابها على مصاريعها لتُفرِغَ
    بطون زنازنها ممن كانوا قابعين خلف قضبانها. و يا ما في الحبس مظاليم.
                  
|Articles |News |مقالات |بيانات

03-31-2020, 08:48 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    《 منقول》
    ♡ كورونا ليس شراً مطلقاً.. أخبار إيجابية لأنصار البيئة،
    لكن القصة أكبر بكثيرتراجع نسب التلوث بأكثر من الربع في ظرف أسابيع قليلة.
    محتويات الموضوع
    ~ ماذا حدث؟
    ~ ما فائدة هذا التراجع؟
    ~ لكن للقصة وجه آخر!!
    ~ 6 دروس من الفيروس
    ●بينما يواصل العالم جهوده لاحتواء تفشي وباء كورونا الذي يحصد الأرواح بالآلاف والمصابين بمئات الآلاف، وأصيب الاقتصاد بحالة شلل تهدد بموجة ركود قد تكون الأسوأ على الإطلاق، ظهر للفيروس وجه إيجابي يتعلق بتراجع ملحوظ في نسبة تلوث الهواء في المدن الكبرى، فما قصة التغير المناخي الذي يبدو أن كورونا قد جاء لصالحه؟
    ●ماذا حدث؟▪ أظهرت صور التقطها قمر صناعي، اليوم الإثنين 30 مارس/آذار، تراجع تلوث الهواء في المناطق الحضرية بأنحاء أوروبا خلال الإغلاقات المفروضة لمكافحة انتشار الفيروس، فقد أوضحت صور القمر الصناعي سنتينل-5 تراجع متوسط مستويات ثاني أكسيد النيتروجين الضار في مدن من بينها بروكسل وباريس ومدريد وميلانو وفرانكفورت في الفترة ما بين الخامس والخامس والعشرين من مارس/آذار مقارنة بنفس الفترة العام الماضي، بحسب تقرير لرويترز.

    ▪ تتزامن تلك الفترة مع الإغلاق في الكثير من الدول الأوروبية التي قيدت النقل على الطرق، الذي يعد أكبر مصدر لأكاسيد النيتروجين، وأبطأت انبعاثات غازات المصانع، وتظهر الصور الجديدة التي نشرتها وكالة الفضاء الأوروبية وحللها التحالف الأوروبي للصحة العامة، وهو منظمة غير ربحية، وجود تغير في كثافة ثاني أكسيد النيتروجين الذي يمكن أن يسبب مشاكل في الجهاز التنفسي والسرطان.
    ▪ وأظهرت بيانات صادرة عن وكالة البيئة الأوروبية اتجاهاً مماثلاً خلال الفترة من 16 إلى 22 مارس/آذار. فقد تراجع متوسط مستويات ثاني أكسيد النيتروجين في مدريد بنسبة 56% على أساس أسبوعي بعدما حظرت الحكومة الإسبانية السفر غير الضروري في 14 مارس/آذار.
    ▪ وكانت صور التقطتها الأقمار الصناعية للهواء فوق الصين مطلع مارس/آذار الجاري قد أظهرت تغيراً ملحوظاً في اللون من الأحمر القاني – الدال على وجود مستويات عالية من التلوث – إلى الأصفر الشاحب، وعلق الدكتور كلاوس زينر مدير مهام في وكالة الفضاء الأوروبية لصحيفة ذا ناشيونال بقوله: “هناك انخفاض بنحو 30% في مستويات ثاني أكسيد النيتروجين”.《صورة توضح تراجع التلوث بصورة ملحوظة في الغلاف الجوي》
    ● وخلال أسبوعين فقط اختفى ربع الانبعاثات الحرارية فوق الصين مع توقف حركة السيارات والشاحنات ومحطات توليد الطاقة والمصانع، وعلق فاي ليو باحث في جودة الهواء في محطة ناسا للفضاء بالقول: “هذه أول مرة أرى فيها هذا الانخفاض الدرامي فوق منطقة بهذا الحجم الشاسع بسبب حدث محدد”.
    ● والأمر نفسه ينطبق على كاليفورنيا –المعروفة بنسب تلوث هواء عالية للغاية– حيث انخفض تلوث الهواء بصورة ملحوظة، بحسب تقرير لموقع كوارتز الأمريكي عنوانه: “فيروس كورونا خفّض من الانبعاثات الحرارية عالمياً، لكن هل يستمر ذلك؟”.

    (عدل بواسطة دفع الله ود الأصيل on 03-31-2020, 09:04 AM)

                  
|Articles |News |مقالات |بيانات

03-31-2020, 08:51 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ● ما فائدة هذا التراجع؟

    ▪ التحالف الأوروبي للصحة العامة يقول إن الأشخاص الذين يعيشون في مدن ملوثة قد يكونون أكثر عرضة لخطر الإصابة بفيروس كورونا (كوفيد-19) لأن التعرض لفترة طويلة لهواء ملوث يمكن أن يضعف الجهاز المناعي ما يزيد صعوبة مكافحة العدوى، كما أن تلوث الهواء قد يتسبب في حدوث أو تفاقم الإصابة بسرطان الرئة والأمراض الرئوية والسكتات الدماغية.
    ▪ هذا التراجع في الانبعاثات الحرارية الضارة بالبيئة والذي كان قد تم رصده أيضاً فوق الصين أثناء فترة تفشي الفيروس هناك منذ يناير/كانون الثاني حتى 10 مارس/آذار الجاري، يؤكد أنه من الممكن فعلياً اتخاذ خطوات جادة في اتجاه الحفاظ على البيئة، حيث يرى العلماء وخبراء المناخ أن التراجع بسبب خطوات مكافحة الفيروس ليس كافياً للتغلب على تأثيرات التغير المناخي، مطالبين بوجود تغيير في الأنماط السلوكية بعد أن أثبتت محاولات الحكومات لمكافحة الوباء أن الأمر ممكن فعلياً، بحسب تقرير صحيفة ذا ناشيونال.
    ▪ المعادلة إذاً تبدو واضحة؛ التلوث بسبب الانبعاثات الحرارية يؤثر على الجهاز المناعي للإنسان، وهو ما يجعله أكثر عرضة للإصابة بفيروس كورونا المستجد وأقل قدرة على مقاومته فترتفع فرص أن يقضي الفيروس على حياته، وهذا يحتم على الحكومات أن تغير من طريقة عملها عند اتخاذ قرارات اقتصادية بحيث يكون العامل البيئي حاسماً في اتخاذ القرار.

                  
|Articles |News |مقالات |بيانات

03-31-2020, 08:53 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ♧ للقصة وجه آخر£
    ● قصة تأثير الفيروس على التغير المناخي لخّصتها ميهان كرايست، كاتبة العلوم البيولوجية في صحيفة نيويورك تايمز، في مقال لها بعنوان: “ماذا يعني فيروس كورونا لتغير المناخ؟”، بالقول إن وباء كورونا مأساة وكابوس بشري يكشر عن أنيابه في المستشفيات المتكدسة ومكاتب إعانة البطالة المنهكة والجو العام المعبأ بمؤشرات سوداء على كارثة اقتصادية، لكن هذه الكارثة العالمية هي أيضاً نقطة انطلاق لعدوى تتعلق بتلك الكارثة العالمية الأخرى الأبطأ لكن ذات المخاطر العالية المؤكدة، والتي لا تزال تحتل مرتبة متدنية في أولويات الحداثة، والمقصود هنا هو التغير المناخي.

    ● لكن المؤكد أن التأثير الإيجابي للفيروس على حالة المناخ في الكرة الأرضية هي أمر مؤقت، وبمجرد أن تتراجع الجائحة وتعود الحياة لطبيعتها، ستعود الانبعاثات الحرارية لمستويات على الأرجح ستكون أعلى مما كانت عليه قبل الجائحة، كما أن انخفاض أسعار النفط -حال استمرارها وهو المتوقع على المدى القصير والمتوسط- سيمثل خطراً داهماً على البيئة، بحسب خبراء تغير المناخ.

    《التغير المناخي لا يقل خطورة عن كورونا》
    ● وقد عبر الأمين العام للأمم المتحدة مؤخراً عن تلك العلاقة بين فيروس كورونا والتغير المناخي بقوله في تقرير لمجلة يو إس إيه توداي إن “التهديد من فيروس كورونا مؤقت بينما التهديد من موجات الحرارة والفيضانات والعواصف العاتية التي ينتج عنها فقدان الحياة البشرية سيظل قائما لسنوات طويلة”.


                  
|Articles |News |مقالات |بيانات

03-31-2020, 09:01 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)


    ♡6 دروس من الفيروس€
    ○المؤكد أن الحل لمواجهة التغير المناخي ليس الإغلاق الكامل والتباعد الاجتماعي والبقاء في المنازل -الذي تتطلبه مكافحة الجائحة- لكن الدرس الواضح حتى الآن هو أن كارثة التغير المناخي لا تقل خطورة على حياة البشر من الجائحة نفسها.

    ○ومع حلول الذكرى الخمسين لليوم العالمي للأرض (22 أبريل/نيسان)، من المهم استخلاص الدروس التي فتحت جائحة كورونا أعين العالم عليها، وهذه أهمها، بحسب موقع يوم الأرض:

    –    أهمية العلم: يمكننا إنقاذ حياة الملايين عن طريق تمويل وإتاحة وفهم أفضل العلوم المتاحة، وقد كان علم تغير المناخ واضحاً على مدار عقود ولكننا فشلنا في توصيل حجم الخطر للعامة، ما أدى للبطء في اتخاذ الإجراءات الضرورية وإنكار الحقائق.

    –  كيفية تعاملنا مع الطبيعة يؤثر على حياتنا: إن القضاء على التنوع البيولوجي الطبيعي يخلق الظروف المواتية لظهور فيروسات قاتلة مثل كوفيد-19 وينشره بين البشر، وإذا ما واصلنا تدمير أراضينا فإننا نستنزف مواردنا ونضر أنظمتنا الزراعية.

    –  كلما أسرعنا في اتخاذ الخطوات الضرورية، كلما قلت معاناتنا: التصرف السريع والدرامي يمكنه أن يوقف النسق التصاعدي لتفشي فيروس كورونا ويخفف الضغوط عن موارد الرعاية الصحية ويقلل معدلات الوفاة، وعلى نفس المنوال يمكن أن يقلل التحرك السريع بشأن تغير المناخ من أزمات نقص المياه والغذاء وارتفاع مستويات مياه البحار ويحمي الأفراد والمنتجات.

    –  لدينا القدرة على إجراء تغيرات درامية بسرعة كبيرة: عند الضرورة يمكننا أن نوقف نمط حياتنا المعتاد وأن نساعد أنفسنا وغيرنا، ونرى الآن حول العالم كيف يغير العاملون في مجال الصحة من نمط حياتهم لحماية المرضى في مجتمعاتهم، ويمكن لكل فرد أن يحدث اختلافاً ويلعب دوراً هاماً في إيجاد الحل.

    –  جميعنا مُعرّض للكارثة، وإن كان بنسب مختلفة: من يعانون من صعوبات اجتماعية أو اقتصادية أو مشاكل صحية يعانون أكثر من غيرهم، والمجتمعات التي تعاني من الظلم والطبقية وتفاوت توزيع الثروة تكون أكثر عرضة للتفكك أثناء الأزمات، كما أننا لابد أن نعترف بأن الصناعات والأفراد المستفيدين من الوضع الراهن سيحاولون مقاومة التحول الاجتماعي الذي فرضته كارثة فيروس كورونا.

    –  التمسك بالحفاظ على نظام اجتماعي عادل و مسالم والحفاظ على نظام
    بيئي مستدام هو السبيل الوحيد لضمان مستقبلٍ واعدٍ لأبناء البشرية جمعاء.



                  
|Articles |News |مقالات |بيانات

03-31-2020, 10:33 AM

Osman Musa
<aOsman Musa
تاريخ التسجيل: 11-28-2006
مجموع المشاركات: 18913

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    سلامات
    يا دفع الله اخوي في متحصل دبليوسيهات في موقف مشهور
    عندو عمارة .
    عمارة عديل .. شطب الطابق التاني فيها من عرق البوالين .
    حمامات زحمة يا زول .
    حمامات شغالة شغل زي الشغل .
    نفس زحمة مستشفي فضيل في زمن الكورونا .
    في مستثمر عربي فكر في إقامة سلسلة دبليوسيهات علي
    طريقة حديثة . والمستثمرين كلهم عندهم فكرة عن
    الأطعمة السودانية وعن الفول بي العطرون .

                  
|Articles |News |مقالات |بيانات

03-31-2020, 02:21 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: Osman Musa)


    ههههاااااااييييي ما ترا كب الزيت!!!
    يجازيك ي عصمان موسى و يخلي لي محنك .
    ياخي من ( كرونتك بالمنقة) نضحك لامن قربنا
    نشرق بس " أنا ما شرقتا بس أنا جيت أعاين".

    ● معقولة ياخ هيَ حصَّلِتْ الإنسان يبني عمارة من
    بولان أخيه الإنسان ! لا ، دي جات دقلا يكركب فعلن .
    ● ياخ إذا كان الباشمهندس(معمار ) أبو الدرداق هداك شغال
    إصحاح بيئة عاى ودنو و لله كدا في لله. أبو الدرداق للأسف
    جندي مجهول الهوية ، بدون ذكرى و بدون ميلاد. شأن غيره
    من المجاهيل و الدراديق في الأرض، و هم كثر منخرطين
    في مسيرات حشود أهلنا {الغبش أبان مسوحن موية}.

    ● ثم معروف إنو الحب العذري عقيمٌ بحيث
    لا ينجب أطفالاً، منذ عهود معتوه ليلى و قيس
    لبنى ، و مرورا بابن الملوح ؛ و حتى محلق تاجوج .
    فكلها عذريات رهبانية كانت مشرطة فواتير حاجات
    اسمها زي ناس/ بامبرز و حليب أطفال و الذي منو.

    ● طبعن، دا بخلاف عشق أخينا بو الدرداق هنا
    لستنا القمرة ، دا بالذات يعد إيجابياً إلى النخاع .
    ياخ ، يكفي إنو لاحس لينا ضهر كوكبنا المختطف
    دا من تلال {العفونيـــات} المتحركة حيثما كنا.

    تخريمة مع سهة لون مع تكية خط:
    ● و طبعن سامعين بلبنان الشقيق كان داخل
    سلسلة من تداعيات أزمة ( نفياتها ) بسبب تراكم
    القاذورات . فمن هنا يبرز سوعال مهم ليطرح نفسو
    بإلحاح شديد : فيا ربي بس الحكاية دي من شنو؟!
    فيا إمتن يكون ناس { تؤبرني } ديل ما عندهم أيِّ أبو
    (الدرداقات} ؛ و يا إمتن كمان نكون نحنا و نحنا يمكن
    ماسكانا جضمارة ، يابوسة ، أم بعيرة مزمنة ، فالتالي
    ما عندنا أيتها { فضلات } عشان نرميها نفايات؟!

    ● عمومن ، راجين الجواب بعد الفاصل و نواصل .
    و لو إنو عندي جواب منطقي موش خارم لارم ، إنو
    نحنا فضلاتنا قاعدين نعمل لها إعادة تدوير في شكل
    سماد عضوي ( ماروق ) و الله صحي. و كمان مرات
    ايخموه بالمسحة حار من تحت سيدو قبال يقوم.

    <<ود ال ح ي ش ان ال ت ل ا ت ة>>
    مؤذن في كوكبنا وكأنما بجزيرة مالطة!!
                  
|Articles |News |مقالات |بيانات

03-31-2020, 07:55 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    《 منقول》
    ♡البيئة "المستفيد الأول" من فيروس كورونا♡

     ● أظهرت صور التقطها قمر صناعي، الاثنين، تراجع تلوث الهواء في المناطق
    الحضرية في أنحاء أوروبا خلال الإغلاقات المفروضة لمكافحة انتشار فيروس كورونا.

    ● وأظهرت صور القمر الصناعي سنتينل-5 تراجع متوسط مستويات ثاني أكسيد النيتروجين الضار في مدن من بينها بروكسل وباريس ومدريد وميلانو وفرانكفورت.

    ● يتزامن هذا مع الإغلاق في الكثير من الدول الأوروبية التي قيدت النقل على الطرق، الذي يعد أكبر مصدر لأكاسيد النيتروجين، وأبطأت انبعاثات غازات المصانع.

    ● تظهر الصور الجديدة التي نشرتها وكالة الفضاء الأوروبية وحللها التحالف
    الأوروبي للصحة العامة، وهو منظمة غير ربحية، وجود تغير في كثافة ثاني أكسيد النيتروجين الذي يمكن أن يسبب مشاكل في الجهاز التنفسي والسرطان.

    ● ظهرت بيانات صادرة عن وكالة البيئة الأوروبية اتجاها مماثلا خلال الفترة من 16 إلى 22 مارس، فقد تراجع متوسط مستويات ثاني أكسيد النيتروجين في مدريد بنسبة 56 بالمئة على أساس أسبوعي بعدما حظرت الحكومة الإسبانية السفر غير الضروري في 14 مارس.
    ● وقال التحالف الأوروبي للصحة العامة إن الأشخاص الذين يعيشون في مدن ملوثة
    ربما يكونون أكثر عرضة لخطر الإصابة بفيروس كورونا (كوفيد-19) لأن التعرض لفترة طويلة لهواء ملوث يمكن أن يضعف الجهاز المناعي مما يزيد صعوبة مكافحة العدوى.

     ● كذلك قد يتسبب تلوث الهواء في حدوث أو تفاقم الإصابة بسرطان الرئة
    و الأمراض الرئوية والسكتات الدماغية.

    -----------------------------------------------------

                  
|Articles |News |مقالات |بيانات

03-31-2020, 09:25 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: 《 كورونا .. و حَظْرُ التَّبَوُّل 》 (Re: دفع الله ود الأصيل)

    《 منقول》
    {رئة أوروبا تتعافى و تتنفس هواءً
    أنظفَ بعد الإغلاق بسبب كورونا }
    30 مارس، 2020

    ♧ بروكسل – (رويترز): أظهرت صور التقطها قمر صناعي يوم الاثنين تراجع تلوث الهواء في المناطق الحضرية في أنحاء أوروبا خلال الإغلاقات المفروضة لمكافحة انتشار فيروس كورونا، لكن النشطاء حذروا من أن قاطني المدن مازالوا الأكثر عرضة لمخاطر الجائحة.

    ▪و أظهرت صور القمر الصناعي سنتينل-5 تراجع متوسط مستويات ثاني أكسيد النيتروجين الضار في مدن من بينها بروكسل و باريس و مدريد وميلانو و فرانكفورت في الفترة ما بين الخامس والخامس والعشرين من مارس آذار مقارنة بنفس الفترة العام الماضي.

    ▪ و يتزامن هذا مع الإغلاق في الكثير من الدول الأوروبية التي قيدت النقل على الطرق، الذي يعد أكبر مصدر لأكاسيد النيتروجين، وأبطأت انبعاثات غازات المصانع.

    ▪ و تظهر الصور الجديدة التي نشرتها وكالة الفضاء الأوروبية وحللها التحالف
    الأوروبي للصحة العامة ، و هو منظمة غير ربحية، وجود تغير في كثافة ثاني
    أكسيد النيتروجين الذي يمكن أن يسبب مشاكل في الجهاز التنفسي والسرطان.

    ▪ و أظهرت بيانات صادرة عن وكالة البيئة الأوروبية اتجاها مماثلا خلال الفترة من 16 إلى 22 مارس. فقد تراجع متوسط مستويات ثاني أكسيد النيتروجين في مدريد بنسبة 56 بالمائة على أساس أسبوعي بعدما حظرت الحكومة الإسبانية السفر غير الضروري في 14 مارس.
    ▪ و قال التحالف الأوروبي للصحة العامة إن الأشخاص الذين يعيشون في مدن ملوثة
    ربما يكونون أكثر عرضة لخطر الإصابة بفيروس كورونا (كوفيد-19) لأن التعرض لفترة طويلة لهواء ملوث يمكن أن يضعف الجهاز المناعي مما يزيد صعوبة مكافحة العدوى.

    ▪ و تلوث الهواء قد يتسبب في حدوث أو تفاقم الإصابة بسرطان الرئة
    و الأمراض الرئوية والسكتات الدماغية.


                  
|Articles |News |مقالات |بيانات


[رد على الموضوع] صفحة 1 „‰ 1:   <<  1  >>

تعليقات قراء سودانيزاونلاين دوت كم على هذا الموضوع:
at FaceBook




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de