♧ حنبكيييهوو.. البِنَحلم بيهو يوماتي £

تأبين الفقيد الدكتور زكي الحسن في لندن
لغز إخفاء جثمان محمود محمد طه
مرحبا Guest
اخر زيارك لك: 02-22-2020, 06:46 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
02-12-2020, 07:26 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
♧ حنبكيييهوو.. البِنَحلم بيهو يوماتي £

    07:26 PM February, 12 2020

    سودانيز اون لاين
    دفع الله ود الأصيل-
    مكتبتى
    رابط مختصر




    (1)
    ♤ خبر عاجل وحزين : إصابة أول زول بفيروس كورونا
    مما أدي الي وفاة الفيروس متأثراً بالضغوط و الاحباطات
    التي صُدِم بها داخل جتة هذا السوداني المغلوب على أمره😂
    ..: يا جماعة اطمئنوا الفايروسات دي ما بتقدر تزاحمننا في البلد
    المولعة دي دي😰 ..جلودنا خشنة ما بتدَّاقش حتى (للزواحف)

    {] أيام انفلونزا الطيور كانت فرصة شبعنا جداد ضاربو سمير🐔🐔
    و أيام جنون البقر🐄🐮 السودانيين كلهم جاهم قاود من كترة العضات.
    و أيام سارس سارس ظاتو عرف الطفى النور منو في البلد دي درجة الحرارة
    ٤٠ و قاعد تحت الحيطة و بشرب في شاي و السجاره مولعة يعني راس السوداني
    الوكت داك درجة حرارته فوق ال١٠٠ تغلي الموية و شغال يلحم في سرير ..ههه
    قال فايروس قال. أيبولا العالم وقف الرحلات الجوية إلي أفريقيا ..والزؤلان
    شغالين تهريب جاز و دقيق باللواري لتشاد، أفريقا الوسطي، الكمرون و بنين. الفايرس زاته خايف من الوقوع رهينة في أيدي عصابات( النصب المصلح)😁

    ● أكتر فايروس مستوطن و متأقلم معانا الكوليرا ..غايتوا بجازف معانا اسبوعين
    بآخر نفس كدا في الخريف و بموت
    ● الفايروس بتاع الملاريا دا في العالم بره قاتل ..لكن نحنا نزلناه المعاش تم الخدمة
    عشان كدا مخلينو عايش في دمنا عادي بقي مننا و فينا عادي لو جاتك اعراض بتمشي تفحص عشان تطمئن انها ملاريا ما حاجة تانية 🤣🤣 الموضوع ما خطير يعني😌 ..

    ● الالتهاب الفايروسي البنشط في البرد دا معروف عندنا بقولوا ليك ما تشتغل
    بيه بياخد ايامه وبموت 😁عجيب و الله .. كرونت شنو ياخي الخايفين منها 😕
    عليك أ٨مان الله إن بقي كريسيدا و لا ليلى علوي عديل ما يهدد البلد دي 😂😂😂🤣🤣🤣








                  
|Articles |News |مقالات |بيانات

02-13-2020, 03:08 AM

adil amin
<aadil amin
تاريخ التسجيل: 08-01-2002
مجموع المشاركات: 23133

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: دفع الله ود الأصيل)


    وَالْبَلَدُ الطَّيِّبُ يَخْرُجُ نَبَاتُهُ بِإِذْنِ رَبِّهِ ۖ وَالَّذِي خَبُثَ لَا يَخْرُجُ إِلَّا نَكِدًا ۚ كَذَٰلِكَ نُصَرِّفُ الْآيَاتِ لِقَوْمٍ يَشْكُرُونَ (58)


    حيا الله ود الاصيل
    حالة الموت انفصال الروح من الجسد وسبيل الاولين والاخرين
    حالة الموات هو الكعب
    السودان يعيش حالة موات ...
    الحياة البائسة الخاوية روحيا وفكريا والميانة غيبيات عاجزة وتفاق غير مفيد واعلام مسيخ ذى اكل المستشفيات وبعاعيت اشكال والوان
    والشمس جوا الجب
    والحكمة خلف السور
    وعالقين بين السيء والاسوا في نفس حوض التفتيش المسمي بالعاصمة المثلثة ونفس الناس ونفس الوعي الوقف ما زاد من 1964 وراضين يكونو مامبو سوداني بس في العالم العرب المدهش
    الفرق شنو ا صلا بين الزواحف الكيزان والبرمائيات القصرية ...
    ونحن رقيناهم عملناهم قردة خاسئين زعلو مع العلم القرود من الثديات العليا
    بالله هم حيين اساسا عشان يخافو من المرض وذى ما قلت حتي فيروس كرونا عافهم والله لو جا صيني عطس لينا في اجتماع المجلس السيادي مع مجلس الوزراء بكون حل مشكلة السودان نهائي وحررهم من اسوا ناس في السودان
    نكتة :
    في واحد من الامن اللاوطني لقي اتنين مساطيل ايام تسقط بس قاعدين جنب مبني التلفزيون نص الليل
    قال لهيم بتعملو هنا شنو
    قالو ليه نحن شغالين في التلفزيون
    قال ليهم شغالين شنو هسة نص الليل
    قالو ليه لمن تفتح التلفزيون الوقت ده بتسمع شنو
    قال لهيم بسمع ششششششششششششششششششششششششششششششششششش
    قالو ليه
    ديل نحن البنقول شششششششششششششششششششششششششششششششششششششششششششششششششششششششششششششششششششششششششششششششششششششششششش
    وذهبت مثلا
    بالله ِِِِِِِِِِِِِِِِِِِِِِِِِِششششششششششششششش
    دي مش احسن من عشة الغبشاوي والحبر وساعة شباب
    قلت احيك في مفتتح الحقبة الجديدة من سودانيز اون لاين
    ونحن يا ود الاصيل منطقة كوارث من 1965 خمسة اوبئة ذات قوة خماسية للابادة كرونا يجي يسوي شنو
    الكيزان والسلفيين والشيوعيين والبعثيين والناصريين
                  
|Articles |News |مقالات |بيانات

02-13-2020, 04:39 AM

adil amin
<aadil amin
تاريخ التسجيل: 08-01-2002
مجموع المشاركات: 23133

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: adil amin)

    ده حال السودان يا الاصيل
    دارونية عمر الطيب الدوش
    شفت اذا قدرت تفك شفرة سعاد دي
    بتعرف كل شي وحالة الموات دي واسبابا في السودان
    فكك هذه القصيدة ذى ام احمد

    نشرةارسل: الاربعاء ابريل 30, 2008 2:12 am موضوع الرسالة: النص الكامل لقصيدة ( سعاد ) للشاعر الراحل عمر الطيب الدوش رد مع اشارة الى الموضوع
    في المقال الموسوم ( لسعاد قصة تروي ) وعدت قرائي بنشر النص الكامل لقصيدة ( سعاد ) للشاعرعمر الطيب الدوش في موقع سودان للجميع. هذا هو النص:

    سعاد

    عمر الطيب الدوش

    ٠ - ٠ - ٠


    دقّت الدلوكة
    قلنا الدنيا ما زالت بخير
    اهو ناس تعرس و تنبسط
    تكّكتَ في الراكوبة بالحنقوقة سروالي الطويل
    سويتلو رقعات في الوسط
    في خشمي عضيت القميص
    اجري و ازبّد شوق و انُط
    لامِنْ دخلت الحفلة فجّيتْ الخلوق

    و ركزت
    شان البت سعاد
    اصلي عارف جنها في زولا بيركز و ينستر
    لكني عارف انها
    لو كل زول في الحلة بالسترة انجلد ياني الاذاها و جنها
    برضي عارف اظنها
    ديمة في صرة وشيها
    يلفحني شوق نافر لبد
    و ركزت للحرقة المشت فوق الضلوع
    تحت الجلد
    طبّيت قزازتي مرقت عِنْ طرف البلد
    و سكرت جد
    و انا جاي راجع منتهي
    لاقتني هي
    قات لي " تعال "
    كبرت كراعي من الفرح
    نص في الارض نص في النعال
    اتلخبط الشوق بالزعل
    اتحاورو الخوف و الكلام
    هَيْ يا سعاد
    علي ود سكينة الكِلْتِي في خشمو الرماد
    علي ود سكينة المات أسي
    و انا بت بلاك منعول هواي ان كنت ارضي اعرّسها
    و انا يا سعاد
    وكتين تطلي سحابة رقصت للدعاش
    بفرش علي روحي و اجيك
    زولا هلك تعبان و طاش
    و انا يا سعاد
    وكتين اشوفك ببقي زول
    فرشولو فرش الموت و عاش
    قالت سعاد:
    ( بطل كلام الجرسة انجض يا ولد )

    طبّيت قزازتي مرقت عن طرف البلد
    و سكرت جد
    اذّنت في الشوق و السلم
    و سرحت بالناس و الغنم
    و ركعت للعرقي البكر
    و رقدت في الالم الحِكِر
    و حلمت زي شايلني وسط الزحمة نبي الله الخضر
    صحاني صوت العمدة قال
    ( مسئول كبير زاير البلد
    قبال يهل قبال يصل
    لازم تقيفوا صفوف صفوف
    و تهيجوا الخلا بالكفوف
    و تقولوا عاش .. يحيا البطل )
    صلحت طاقيتي الحرير
    و ضراعي زي داير يجن
    و الجوف يطقطق بالكلام
    و رميتو من حلقي الوصل
    قت ليهو يا عمدة اختشي، مسئول كبير في الحلة غير الله انعدم
    ما شفنا زول سكّت جهال
    ما شفنا زول رضع بهم
    ما شفنا زول لطخ تيابو
    و جانا من طرف البلد
    ما شفنا زول لملم رمم
    لا صحينا عاجبنا الصباح
    و لا نمنا عاجبنا العشم
    و الحلة من كل الجهات محروسة
    بالخوف و الوهم
    و مضينا من زمنا قديم – يا عمدة – مرسوم انتحار

    الموت مباح
    و الحب نطاح
    و الصدق من جنس الزنا
    و العافية مولودة سفاح
    و الرغبة مكسورة جناح
    و الحلم و الوعد النبيل
    و الطفلة و الام، النخيل
    الرنة في الوتر الاصيل
    تلقاها في قاموس نكاح
    يا يمة واح.. يا حلة واح

    يا سعاد تعالي و لمّي من كل البيوت
    عدة السفر الطويل
    زخرفي الفجر النهار
    شخبطي الضحي و الاصيل
    المغرب
    الفجر
    النجوم،
    في صرة و ارميها البحر
    خلّينا فوق الشك نعوم
    و العمدة فاض
    و العمدة صار مليون عُمَد
    و العمدة فيل
    جبلا تقيل
    لبوة و أسد
    حسنة و غصب
    جمعة و أحد

    بقّيت قزازتي
    مرَقتَ عِنْ طرف البلد
    ووترت جد
    و انا جاي راجع اجهجهو
    لاقاني هو
    سايق العساكر و الكلاب
    رامي بين عيني و عينو
    كلِب و تكشيرة و حُراب
    ضاقت نعالي من الزعل
    من تحتها اتململ تراب
    الغيب سكب ضُلو و مشي
    و الدنيا غيما سراب سراب
    و الحلة زي بلدا بعيد
    زوّد بعاد و قرّب سعاد
    اتجمعت كل البيوت في راحتا
    زي بت لعاب
    مجنونة تصرخ في الزوال
    ممزوجة في الدم و اللعاب
    عيني ضاقت نظرتها
    و الجوف يطقطق بالكلام
    قبال يقولوا لي سلام اتلموا حولي بلا نظام
    شال و عمة
    توب و غُمّة
    فاس و طورية و حزام
    شالوني بي كل احترام
    و رموني في قعر السجن
    حصلني قبل اليوم يتم
    جارنا المدرس ود خدوم
    قال ليّا
    لا زولاَ هتف
    و لا كف مشت بتلاقي كف
    و العمدة زي همبول وقف
    يا صمتُ اف
    يا دنيا تف
    و انا يا سعاد للشوق نغم
    للهم علف

    ****
    وحتعرف ليه انا بستعمل الخنجر في الكتابة مع عكاز مضبب لزوم دعم لوجستي
    بكتب وبعري ناس غير محترمين وهم قايلين نفسهم محترمين في الساحة السياسية والثفاقية حتي تكتمل الصورة
                  
|Articles |News |مقالات |بيانات

02-13-2020, 04:43 AM

adil amin
<aadil amin
تاريخ التسجيل: 08-01-2002
مجموع المشاركات: 23133

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: adil amin)

    Quote: و مضينا من زمنا قديم – يا عمدة – مرسوم انتحار

    الموت مباح
    و الحب نطاح
    و الصدق من جنس الزنا
    و العافية مولودة سفاح
    و الرغبة مكسورة جناح
    و الحلم و الوعد النبيل
    و الطفلة و الام، النخيل
    الرنة في الوتر الاصيل
    تلقاها في قاموس نكاح
    يا يمة واح.. يا حلة واح

    يا سعاد تعالي و لمّي من كل البيوت
    عدة السفر الطويل
    زخرفي الفجر النهار
    شخبطي الضحي و الاصيل
    المغرب
    الفجر
    النجوم،
    في صرة و ارميها البحر

    وفكينا يا سعاد
    من الحالة بقت طيزين في لباس
    من منافينا الملل
    من شر البعاد
    من الورجغة والالتباس
    ****
    فتك بالعافية
    جقود مر من هنا
                  
|Articles |News |مقالات |بيانات

02-13-2020, 06:30 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: adil amin)

    Quote: ده حال السودان يا الاصيل
    دارونية عمر الطيب الدوش
    شفت اذا قدرت تفك شفرة سعاد دي
    بتعرف كل شي وحالة الموات دي واسبابا في السودان
    فكك هذه القصيدة ذى ام احمد.

    ♤ و كم أنا سعيد بمعيتك عم جقود، في أول إطلالةٍ
    مع التدشين الجديد ، رغم رائحة البارود الفايحة منفوهة
    قلمك و بين سطورك . و زي ما قالو (مرق ) النصيحة في زماننا
    هذا و بلدنا الحبوب هذا زي قاسي بلحيل ، زي مرقة الوقيعة
    من جوة ود العين. و كما قال الفاروق عمر رضوان الله عليه :
    لم تترك لنا النصيحة صاحباً .فحياك و أستاذي و أوعدك
    بتفكيكة نقدية متواضعة علها تليق ب(شفرة سعاد).
    ¤ كن بعافية و خلينا قراب؛؛؛؛
                  
|Articles |News |مقالات |بيانات

02-13-2020, 06:33 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 4998

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: adil amin)

    الحبيب ود الأصيل ..
    كالعادة مبدع أنت ..
    كلام بليغ لوصف السودان
    (( اليأس والاحباط ينتقل من الانسان السوداني إلى الفيروسات ويدمرها ))
    ده كلام بليغ جداً .
    فلتفتح الدول المنكوبة أبوابها لنا ..

    يا سلام على الموهبة والقلم الرائع






                  
|Articles |News |مقالات |بيانات

02-13-2020, 10:46 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: علي عبدالوهاب عثمان)


    ▪ لك منا التجلة و التحية (لقمان) هذا المنبر
    و رمانة أتزانه المبجل/ علي عبد الوهاب عثمان.
    كما نعتذر لك عن خشونة بعضألفاظنا إن وُجِدت.
    مما قد تُمليه علينا شدة قتامة الصورة و سوداوية
    المشهد. فمثلاً من وحي ما تفضل به عمو جقود
    من تشبيه ما يعترينا من حالة (ورجغة و التباس)
    بما سمَّاه مشكوراً (طيزين اتنين في كراع لباس )
    فقد لاحت لنا خاطرة تشبيه نظام الزواحف البايظ
    و تناحتهم، الله لا طراهم و لا جاب باقيهم. حيث
    شبهناهم بدورنا ب (قُرادة طيز ) أعزكم الله.

    ● أوعز لي بها أحدُ رعاة البقر فسرحت فيها متمدِّداً بخصب
    خيالي الوثَّاب. و معذرةً أولن و أكرم الله آذان السامعين و السامعات
    الشابّين منهم و الشابات و الأحياء منهم و الأموات ؛ لبذاءة العبارة
    الهابطة؛ و التي لم نهتدي إلى سواها من شوارد حظيرة بنت عدنان
    وصفاً مما قد يلائم حضيض المقام ، مثلما يوافق شنَنٌ طبقةً.

    ● فهل سمعتم من ذي قبل بحاجة اسمها {قرادة الطيز } و ما أدراك؟!
    إنها قرادةٌ مصاصة دماء (من سلالة الدراكولا ) تلتصق متل (سافوتة )
    اللضان في تلك المنطقة الرخوة و الملايَن شديدة الحساسية من
    صلب البهيمة ؛ بس( لابسة فيها متل لبسة القِدَّة في مخلوفة)

    ● فلا ذيل البهيمة قادرٌ ليطالَها حتى تنفضها عن مؤخرتها.
    كما أنه ليس بمقدورها الالتفات لدهسها بحوافرها أو التخلص
    منها بفمها أو قرونها أو ما شابه. حيث إن الوصول إلى مكمنها
    الغميس الحساس يكون أشبه ب(لحسة كوعٍ). و كذلك إذا تدخل
    السيد (الراعي) بأية قوة محولاً الاقتحام للدعم ( السريع ) لنزعها
    منها و ( انقاذ) ما يمكن اتقاذه ، فحتما سيكون جزاؤه رفسةٌ قاتلةٌ
    في الأنكل بحوافر البهيمة درءاً ربما، لما قد تظنه حركة بايخة
    منه( للتحرش ) بها و نبقى في دواس و مناطحة، لا سمح الله .

    ● عمومن ، تظل تلك القرادة عالقةً ب(دفرنش) البهيمة،
    معكننةً لها مزاجها و منغصة عيشتها. و لذلك تجد الضحية
    بين الفينة و الفينة تضرب برجليها الأرض بكل ما أوتيت من
    قوةٍ و من رباط الجأش ؛ معبرةً بذلك عن سخطها و تبرمها ؛
    حتى تبوء كل حِيَلها لنزعها بفشل ذريعٍ ؛ بينما تستمر تلك القرادة
    المتطفلة مستمتعة للنُّخاع بدفء ذاك الموقع الاستراتيجي.

    *هكذا هو لسان حالنا مع الكيزان ..و الله المستعان*
    😂😂😂😂😂😂😂

                  
|Articles |News |مقالات |بيانات

02-13-2020, 03:55 PM

adil amin
<aadil amin
تاريخ التسجيل: 08-01-2002
مجموع المشاركات: 23133

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: دفع الله ود الأصيل)

    Quote: هكذا هو لسان حالنا مع الكيزان ..و الله المستعان*


    يا ود الاصيل
    القرادة ما مشكلة يحلها الراعي يودي البهيمة البطري جقود يديها حقنة مخذرة ويقلع القرادة ويعمل ليها سبغة يود كمان
    وتقوم البيهمة ذى الفل من غير القرادة
    لكن جماعتك ديل ما اقل من القرادة دي زاتا وعاملين فيها منقطنها وقعدو مع الانقاذ في وحلا
    وما سمعو مقولة برنارد شنو
    لا تصارع الخنزير في الحول ستتسخ انت ويسعد ذلك الخنزير
    هسة دورو بيهم بي ازمة الخبز وما ادراك ما الخبز يا اخ كان18 والي عسكري قاعد ام فكو ساكت ما قادرين يمشو الامن والنظام في 18 ولاية في السودان مقعول يجو 18 والي مدني يفعل ذلك مع الزواحف
    قلنا ليهم من اول يوم قعدو مع جنرالات زمن الكوليرا
    اسقطو الولايات ال18 ورجعو الاقاليم الخمسة طوالي بتنتهي 90 من مشاكل السودان قالو كو ...
    يخمو ويصرو
    ق ح ت لا تمثلني من الاساس
    هذه البلادة المؤدلجة تجازوتها من 40 سنة
                  
|Articles |News |مقالات |بيانات

02-14-2020, 09:35 PM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: adil amin)

    Quote: لا تصارع الخنزير في الحول ستتسخ انت ويسعد ذلك الخنزير.

    ● طبتَ دوماً عمو عادل و طاب ممشاك إلى هنا و تبأتَ من سويداء القلب منزلةً.
    و نحن كما الضيوف و أنت رب المنزل ، إذ ترفد طرحنا المتواضع بإضاءاتٍ لا تزيغ
    عنها إلا عين متغافل أو مكابر . و قيل إن الحقيقة كصندوقٍ أسودً لا نتنبه لوجوده
    إلا بعد سقوط منطادنا في قاع أحشاء المحيط إثر ارتطامه بمثلث برمودا القاتل .

    ● فقد سبق و أشرنا في موضعٍ آخر إلى أن (ق ح ت) بحاجة منا لمزيدٍ منالصبر و
    قليلٍ من(النقة). بل ذهبنا إلى حد تشبيههم بخضراوات الدِّمن ، أي النساء الحسناوات
    في منابت السوء ؛ باعتبار انتمائهم تنضم أكثر مما تعمل و تنقض أكثر مما تبني.

    ● و على هذا المنوال دعني أسوق إليك مثالاً آخر للمقاربة.
    فقد نظم الشاعر أبو إسحاق الغزي بيتـاً في شكل سؤال، فال فبه :
    مالي أرى الشمع يبكي في مواقده..
    من حرقـة النار أم من فرقة العسلِ؟
    مالي أرى الشمع يبكي في مواقده
    من حرقـة النار أم من فرقة العسلِ ؟

    ● فأعلنت إحدى الصحف عن جائزة لمن يستطيع الإجابة على هذا السؤال
    فأجاب بعض الشعراء :بأن السبب هو الألم من حرقة النار ، وأجاب آخرون
    إن السبب هو فرقة الشمع للعسل الذي كان معه و لكن أحداً لم يحصل على
    الجائزة.!و ما إن بلغ الخبر الشاعر صالح طه حتىأجاب بقوله :
    من لم تجانسْه فاحذر أنْ تجالسَه..
    ماضر بالشـمع إلا صحبة الفتـلِ.
    و فاز بالجائزة.
    ● نعم إنَّ سبب بكاء وجود لشيء في باطنه و ليس من جنسه و هو الفتـيلة
    التي ستحترق وتحرقه معها. وهكذا يجب علينا : انتقـاء من نجالسه و يناسبنا
    من البشر حتى لا نحترق بسببهم ونبكي يوم لا ينـفع البكاء

    ● و قد قيل : "ما أعطي العبد بعد الإسلام نعمة.. خيراً من رفيقٍ صالحٍ
    فإذا وجد أحدنا وداً ممن يلازمه فليتمسك به".. و إلا فمن لم تجانسْه
    فاحذر أنْ تجالسَه ماضر بالشـمع إلا صحبة الفتـلِ.
    ● فهذه الحكومة الانتقالية مولودة ميتة أو أنها جاءت تتأبط عوامل
    فنائها منذ تكوينها من الشيء و ضده ( عسكر و حرامية). هذا فضلاً عن
    كونها محاصرةً من ناحية بزواحفَ خُضرٍ يتبصون بها الدوائر ؛ و من
    ناحية أخرى بشعب ملول معلم بلغة الكورة في رفع الكورنات و لكنه
    أفشل الفاشلين في التسديد في المرمى أو هز الشِّباك بالأهداف.


                  
|Articles |News |مقالات |بيانات

02-15-2020, 04:48 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
Re: ♧ حنبكيييهوو.. البِنَحلم بيهو يوماتي £ (Re: دفع الله ود الأصيل)

    Diyaa al-Batalكتب:
    Quote:
    I think therefor I exist
    Descartes. أنا افكر اذن أنا
    موجود مقولة ديكارد المشهورة
    ماذا تفهم منها؟

    ي♧ ضياء الدين يا بطل. بالله خليني أديك ياها على بلاطة كدا
    و من أرض واقع حالنا المايل، و اللي بقى لا يسر عدو و لا صليح.:
    ® ففي جمهورية موزنا الگاااااذب . π√
    ® بتلقانا ناصبين لينا صيوان سرادق للعزاء
    و يصلك أيضاً كمسرح في الهمبريب الطلق £

    ® و على طريقة گوميديا عمنا الفيلسوف ديگارت الأرضية ،
    حيث :أنا أفگر و أتململ و أشاگس ، إذن ، فأنا موجود ، و حي أرزق.
    و العبارةٍ بالفرنسية تقول : { Je Pense Donc, J,suis}.

    ¶ ياخي برا عفراء برا مولات ، خلوها معانا بجاي على خط مية غرب ما بين الحاج يوسف سوق ستةو الأسكانات في سوق صابرين و أمبدة كرور و أب نيران مرورن بي سوق الناقة -قندهار .
    ● حيث للمفارقة العجيبة من هنا ينعكس لك الوجة الحقيقي ل{جمهورية موزنا الگضبن گاضب}
    ● هنا، حيث :لا مستحيل تحت الشمس ، و الشمس و السياسة هي فنُّ اللاممكن بعينه؛ إلى أن يصير كل شيء جائزاً و ممكناً. حتى تلد الأمة ربتها ، و تكاد الشمس تُشرق من مغربها؛ و حيث الهزل في محل الجد و العكس تماماً ، هو عين الصحيح تماماً ؛ و حيث إنو أسغر منك
    دوسو طوالي و لا تأخذُك فيه لومةُ لائمٍ أو تبالي؛ و {ما في أيتها سم عقب النار؛ و حيث ود الفار طالع حفار، ود المستشار شغال سمسار، و ابن المحامي أشفتْ شرامي؛ و إنو اللي أمو حكامة و خالو طبال، دا عادي جدن، ينفع أشفت طمبار، - و حيث أي بقجة عفش جوة الدفار بتكون
    على مسعولية صاحبها ؛ و {حيث الدنيا فرندقس و هي مدرسة و أستاذها الظروف}.
    ● نقول ما تسمعون و نحن وقوفٌ مشبوحون ما بين صفين واحد لرغيف العيش و التاني للبنزين ( بعدما رفعو عنهم الدعم السريع ). تمامن كمن يدافع الأخبثين أو كمن يسعى عبثاً لينتعل بكلا خُفَي حُنين؛ او كبالع شفرة موس حلاقة على حدين.

    ● هناك، حيث الكل تقريباً ناس ضهاري كايسين لي مسعول كبير في البلد، عشان
    نتأفف ليه و نشكي ليه مرَّ الشكية معاناتنا من شنو و لا شنو ظاتنا مانا عارفين: يعني
    نقول مسلن من ضبابين الكُوَش من وسخ الحواري ؛ و لا من خريات المجاري ؛ و لا من زلقة قدم على ضهر قشرة موز من بطن الملجة و لامن تمرقنا نسند في شُبَّاك (الطوارئ)

    ● و دا طبعن في حال لو تجاوزنا عن غباين و عَبَرات تانية كتيـرة خانقاني و هي ألعن و (أظرط) من نوعية: النوم الإجباري، و الجري و الرحيح كداري، والشوت الضَّفاري و صفوف
    رغيف العيش الحَجَّاري و البنزين التجاري (لمن استطاع إليه سبيلاً طبعن». و دي كولها تعابير مجازية و أسامي حركية لضروريات بشكلن مع غاز التبيخ ثالوث فلْم الرعب المفضي مباشرتن إلى ساحة السوق السوداء .ما وراء مغرب الشمس في سوق ليبيا و بي هناك حراج قندهاري.

    ● و نحن نضيف نقطة صغمبوطية كدا ، بعد هذه الفاصلة: إنو كأننا جوقة أشباح
    على خشبة مسرح عرائس عملاقة بحجم شبه قارة ، أصابتها غرقرينة مزمنة ؛
    و قد بُتِرعلى إثرها (صلبها) ؛ و توشك أن تُبتر باقي أطرافها , واحداً تلو الآخر.
    و گأنما نصبوا لها مقصلةً على تلة زعتر في رمالٍ متحركةٍ في وادي عبقرَ،
    و إنو الثابت الوحيد فيها هو: أن بطل عروضها هو دوماً ذات نفس ال{ون-
    مان- شو}، و بقية الناس {متعودة دايمن }، تلعب جوقة {كومبارس }.
    و حيث و حيث من هناك سننقل واقع فصول و مشاهد مسرحنا في
    الهمبريب الطلق ، كلها حية و على الهواء مباشرتن ، فإلى هنالك:-

    * ود الحيشان الت لا تة
    الدولة و العنوانُ: مُنْزَلِقٌ فُوْقَ جبين جِدَارِ الْخَاطِرَةِ.
    سيرتنا الذاتيه: في نبذة خاطفة: بما أننا ظللنا هائمين على وجوهنا
    و منحدرين من جوف رحم المعاناة، فإن شُعُورِي حيالَ كل مَنْ يقرؤني
    أنه يظل مني و أنا منه، على مقربةِ ما بين مِرْآتَيْ رهانٍ، لا بل هي مرآةٌ
    واحدة ٌ.قستمها عصا الترحال إلى نصفَينِ، لِتَعْكَسَ لي ، من على بعدٍ سحيقٍ،
    تفاصيلَ فسيفساء َبواطن أمري.. گأقرب ما توهمني ، فتوحي به إلي أضغاث
    أحلامي ، و تهاويم بعض ظني ، حد تلاقُح بنات أفكاري و تشابه مرابط أبقاري
    و تشبك خطوط حنابل أمطاري لدرجة تلطم أمواج بحاري . هذا ، و إنَ لواعج
    الشوق و الحنين إذا ما عجزت أن ترتق فتقاً أحدثه شَقَّة البين والبعاد ما بين
    ضفتي نَهَرِ ،فحتما سوف لن تفشل أن تضعنا ضمن مزاجية أن نسترق
    السمع لما يدور من همس على الضفة الأخرى. حيث:
    {بسمة بالسن.. و نظرة بالعين، و البادئ أطعم}.
    الجنس: ذكر
    المهنةُ: مَنْ شَغَلَ بَالَه بِمَا لَا يَعْنِيْهِ مَاتَ هَمَّاً
    * و لكن حاليَّاً : شغَّال مؤذن في جزيرة مالطة،،،
                  
|Articles |News |مقالات |بيانات

02-15-2020, 10:48 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
♧ ناس عايشة و ناس دايشة£ (Re: دفع الله ود الأصيل)


    ستكتش (1)
    في بلاد تعيش مظاهر التناقض بحذافيرها

    (STOP / ACTION )
    ¤حيث يفتح الستار للماسشتري يتفرج ، على واحد من
    من القطط السمان إياهم و هو رافع القزاز حبتين. و شايل
    الريموت ليفتح مصاريع البوابة الراجمات لباحة قصره المنيف
    و الكائن بضاحية المنشية شرقاً . ليجده منحشطاً أمامه: شاباً
    أشعث أغبر بائس الهيئة ؛ تبدو عليه أثار و عثاء الرحيح و السفر
    و كآبة المنظر .. الأقرب إلى زوال شَبَحَ كان نحيلاً لامن كملان من
    لحم الدنيا ؛ عظيم التِّفة هزيل القامة نحيف الرجلين و شبه منعدم
    ما بين المنكبين. وقف أمامه مصلوباً متل (عود الفسو) ببنطلون جنز
    مهيريت، تحتو سروال مقدود و مرقع . فتَّاح يا عليم رزاق يا كريم ،
    ا للهم اجعلو خير يا رب، داير شنو يا زول مالك منشط لينا هنا
    و مصاقرنا من صباح الرحمن؟!
    ~ أنا داير أشيل ليكم كيس القمامة، ي أستاذ (و هنا يتنفس صاحبنا
    الصعداء): طيب خش شيلا و انكشح أبقى مارق خلصنا، و بالله اتخارج
    لينا سريع قشة ما تعتر ليك ،عشان أنا ما فاضي ليك ؛ ماشي التمربن
    في صالة ااجِم و منها مارق وراي مية مشوار و مقاضي مهمة بالهبل.

    ~ لاكين سعادتك عندي ليك سؤال و نصيحة في نفس الوكت، إنو شايف
    كلبكم الوولف دا زي الما مرتاح؛ شكلو بعاني من حالة شيزوفرينيا متأخرة
    و إخصاء عاطفي حاد ، بالمناسبة عندكم برضو كديسة دلوعة؟!

    - و ما لا دي كمان ! و ديناها أمبارح تاخد مساج وحمام مغربي حنبينا في
    حي المنشية هنا و لا أقول ليك حاجة، يا زول بطل رغي، و شيل وساختك
    دي و انكشح من هنا أدينا عرض كتافينك ، هو إنت بتاع كرتة و لا تمرجي
    بيطري ما لاقي شَغُل ، أما و الله دي بجاحة شماشة عواطلية و صعاليق؟!

    ~ لا و أنت الصادق ي وجيه ، و كمان لو ما عجبي ، و أزيدك في الشعر
    بيت محسوبك استتشاري نفساني متخصص بلاذات في الحيوانات الزيك
    گدا {طبعن دي برطم بيها سرياَّاً كدا في حنانو ساي} ؛ قصدي زي كلابكم
    و قططكم السمان ديل ! ثم بعد تنهيدة : لكن أهو ترا ظروف المعايش
    جبارة جابتنا ليكم نلم وساختكم و نسمع منك إهانات تكسر الخاطر.

    ● ثم ينصرف الشاب و يخلِّي صاحبنا واقف مندهش و فاتح خشمو
    شبرين. ياخي دا لدرجة إنو قرر لأول مرة و منذ نعومة أظفاره ، يخلي
    اللاندي كروزر(VXR) بتاعو مقرش في محلو ، و يمشي يركب مواصلات
    عامة و يقضي مقاضيه مع سواد خلق الله {الغبش أبان مسوحن موية}.
    عشان ظاطو يشوف الدنيا دي فيها شنو و الحياة ماشة كيف!!!
                  
|Articles |News |مقالات |بيانات

02-15-2020, 10:49 AM

دفع الله ود الأصيل
<aدفع الله ود الأصيل
تاريخ التسجيل: 08-15-2017
مجموع المشاركات: 6108

للتواصل معنا

FaceBook
تويتر Twitter
YouTube

20 عاما من العطاء و الصمود
♧ ناس عايشة و ناس دايشة£ (Re: دفع الله ود الأصيل)


    ستكتش (1)
    في بلاد تعيش مظاهر التناقض بحذافيرها

    (STOP / ACTION )
    ¤حيث يفتح الستار للماسشتري يتفرج ، على واحد من
    من القطط السمان إياهم و هو رافع القزاز حبتين. و شايل
    الريموت ليفتح مصاريع البوابة الراجمات لباحة قصره المنيف
    و الكائن بضاحية المنشية شرقاً . ليجده منحشطاً أمامه: شاباً
    أشعث أغبر بائس الهيئة ؛ تبدو عليه أثار و عثاء الرحيح و السفر
    و كآبة المنظر .. الأقرب إلى زوال شَبَحَ كان نحيلاً لامن كملان من
    لحم الدنيا ؛ عظيم التِّفة هزيل القامة نحيف الرجلين و شبه منعدم
    ما بين المنكبين. وقف أمامه مصلوباً متل (عود الفسو) ببنطلون جنز
    مهيريت، تحتو سروال مقدود و مرقع . فتَّاح يا عليم رزاق يا كريم ،
    ا للهم اجعلو خير يا رب، داير شنو يا زول مالك منشط لينا هنا
    و مصاقرنا من صباح الرحمن؟!
    ~ أنا داير أشيل ليكم كيس القمامة، ي أستاذ (و هنا يتنفس صاحبنا
    الصعداء): طيب خش شيلا و انكشح أبقى مارق خلصنا، و بالله اتخارج
    لينا سريع قشة ما تعتر ليك ،عشان أنا ما فاضي ليك ؛ ماشي التمربن
    في صالة ااجِم و منها مارق وراي مية مشوار و مقاضي مهمة بالهبل.

    ~ لاكين سعادتك عندي ليك سؤال و نصيحة في نفس الوكت، إنو شايف
    كلبكم الوولف دا زي الما مرتاح؛ شكلو بعاني من حالة شيزوفرينيا متأخرة
    و إخصاء عاطفي حاد ، بالمناسبة عندكم برضو كديسة دلوعة؟!

    - و ما لا دي كمان ! و ديناها أمبارح تاخد مساج وحمام مغربي حنبينا في
    حي المنشية هنا و لا أقول ليك حاجة، يا زول بطل رغي، و شيل وساختك
    دي و انكشح من هنا أدينا عرض كتافينك ، هو إنت بتاع كرتة و لا تمرجي
    بيطري ما لاقي شَغُل ، أما و الله دي بجاحة شماشة عواطلية و صعاليق؟!

    ~ لا و أنت الصادق ي وجيه ، و كمان لو ما عجبي ، و أزيدك في الشعر
    بيت محسوبك استتشاري نفساني متخصص بلاذات في الحيوانات الزيك
    گدا {طبعن دي برطم بيها سرياَّاً كدا في حنانو ساي} ؛ قصدي زي كلابكم
    و قططكم السمان ديل ! ثم بعد تنهيدة : لكن أهو ترا ظروف المعايش
    جبارة جابتنا ليكم نلم وساختكم و نسمع منك إهانات تكسر الخاطر.

    ● ثم ينصرف الشاب و يخلِّي صاحبنا واقف مندهش و فاتح خشمو
    شبرين. ياخي دا لدرجة إنو قرر لأول مرة و منذ نعومة أظفاره ، يخلي
    اللاندي كروزر(VXR) بتاعو مقرش في محلو ، و يمشي يركب مواصلات
    عامة و يقضي مقاضيه مع سواد خلق الله {الغبش أبان مسوحن موية}.
    عشان ظاطو يشوف الدنيا دي الحاصل فيها شنو و الحياة ماشة كيف!!
                  
|Articles |News |مقالات |بيانات


[رد على الموضوع] صفحة 1 „‰ 1:   <<  1  >>

تعليقات قراء سودانيزاونلاين دوت كم على هذا الموضوع:
at FaceBook




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de