الشطه.

مرحبا Guest
اخر زيارك لك: 06-12-2021, 03:49 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
06-07-2021, 07:10 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
الشطه.

    07:10 AM June, 07 2021

    سودانيز اون لاين
    محمد المرتضى حامد-
    مكتبتى
    رابط مختصر



    الشطه
    - محمد المرتضى حامد -
    من مِن أبناء العاصمة لم يمر بفول أبوالعباس والعشرة الكرام وسندوتشاتو الحازت شهادة الإيزو ISO 22000 في الزمن السمح، ومن مِن (المتفائلين) لم يتفوّل عند الصادق الجان وأحمد سعد وموسى نفخو بودنوباوي، سمعت أن جعفر نميري كان أحيانا يتخفى ويجُر ليهو بمبر عندما يحن لفول أولئك العماليق، فهو يعرف جيدا أن تركيبة الفول (المصلَّح) لا تتوفر إلا عندهم وأن سرها خاص بهم وحدهم لذا كانوا قِبلة (الحواريين) من كل أرجاء العاصمة الأصبحت ذكرى، وكي تكتمل (الروعة) لازم تتناوله عندهم، عند المنشأ، صحن ألمونيا كبير والفول من القِدره لايف مع 3 أنواع من السلطات والشمار اللخدر والشطة قاذفة اللهب TOS 1 وقليل من جِبنة الدويم مرشوشه على السطح كبواكير الجليد في الحقول، وأحيانا يكسِّروا فيهو البيض، أيوا، هي زاتا، أكسِّسسسروا؟ طلِّع ميتينو زاتو، ثم زيت سمسم من معاصر تندلتي تم فصله قيصريا من ام جغوغه. كان بعضهم (يهرِّب) طعمية من حجه عشَه لأنه عندها طعميه بالشمار والسمسم تشم ريحتها من المطار في دائرة شعاعها ١٠ كلم لا تخطئها الأنف حتى تلك التي شوَّشَ السُلاف استقبالها، كان (عبقها) يا سلام.. تُسعد المعدة المُعني وخير دواء لمتلازمة القلب المنكسر، طعميه GPS وصيدليه.
    مرت بي تلك الذكريات ونحن بالأمس مع عزيزنا د. ياسر حسن حمد في غداء سوداني متطرف مع شطة توأم الكوبرا، حكينا عن حُرَفا يحتفظون بشطه قبانيت في درج السياره كاحتياطي مركزي لأنو الأكل بدونها مضيعة وقت وخمج ساي، ديل ناسنا بتاعين ناكل حاره ما نضوق بارده كان الكلام عانيني، وهم نموذج من البشر يتطرف في كل تفاصيل الحياة طعاما وكرما وطربا وعشقا كأنهم من حواريي إليزابيث جلبرت صاحبة Eat, Pray, Love، أحدهم مسكون بالشطة ويحكي عنها بشغف غريب وهو من ألطف خلايق الله، وباعتباره رجلا كثير التسفار، كان يقرأ عن المطاعم الخلاسية في وجهته قبل تقديم طلب التأشيرة، يعرف أنواع الشطه المحليه والعالمية بدءا من أم نويويره وانتهاءا بكارولينا ريبر، راهب في محرابها.
    كنا أيام الشباب نتنافس في مقدرتنا على احتمال الشطة وكنا نظن أن السودانية الدانكابا والقبانيت ومجموعة عذبني وتفنن مافي زيهم، لكن بعدما جُلنا الكرة الأرضية اكتشفنا أن أشرسهن تعتبر مجرد دافوري بالنسبة ل (الموبقات) المعروضة في آسيا وأمريكا الجنوبية والتي، في رأيي، يجب حظرها وتداولها، ولعل الجميع قرأ عن ذلك السوداني المستجد في الدوحة، وهو من جماعة هيييع وانا أخوك يا فاطنه وانا اللِدِر الفوق ضهرو الخبوب والطين وتلك العنتريات الماجيبا حقها، وقصته مع الخُدرجي الهندي وشطته النابالم.
    المهم، الناس البيغنوا متين يا روحي نتلاقى فراقك نارو حرَّاقه ديل ماعندهم فكره عن الحرائق.
    هناك وحدة قياس لدرجة حرارة الشطه هي السكوفيل Scoville، وقيل إن حرارة الشطوط تتراوح بين ٣٠ ألف سكوفيل ومليونين، يعني البتقرُشا وتلقاها حاره خفيف دي بتكون ٣٠ ألف، وهذه يُسمِّها أهلنا في كردفان ودارفور شطه (باطله) وهناك ترينيداد سكوربيون الكافرة، حرارتها مليون وحدة سكوفيل، وفي ذات غداء لدى صديق بكندا حذرني من شطه كانت على المائدة صفراء تسر الناظرين ساحرة الرائحة لكنها قاتله، كبعض النساء، قالوا بت خالة الهبانيرو، أفادني أنه أتى ببذورها من الكاريبي واستزرعها في حديقته مضيفا أنها تسمى لسان الشيطان Devil's Tongue
    ولكن فضولي دعاني لتذوقها بطرف لساني.. باختصار، فيكم زول هبشوا سلك عريان في اللسان؟
    لكن (كارولينا ريبر) هي بحق أم الكبائر، تبلغ درجة حرارتها ١،٦ مليون سكوفيل وهو مقياس مستوى مادة الكابسيسين التي تتسبب في الطعم الحار اللاذع، وقد قام بتهجينها واحد أمريكي يسمى إيد كاري، غالبا يكون المعني بغنية الله يأذي الأذانا ياناس، فهذه الريبر دخلت موسوعة جينيس، وقرأت أن أمريكيا قبض كُمشه منها وقال متحديا ومقلِّدا علي اللحو الله يرحمه، أنا الدود النتر صَحّا المرافعين خوف، وقام كِدا قرَشها كرج كرج، عموما اللدر انتهى في الطوارئ بحالة ما يعرف بالصداع الرعدي Thunderclap Headache مع آلام مبرحه وتصلُّب في الرقبه والصدغين وشلل في الحبال الصوتيه ..
    ما قُتو يانكي!
    بالله لو عندكم تلفونات طباخين الجماعه بتاعين السياسه في البلد لأي خدمه.
    مُش في ناس يحكوا ليك عن الأكل لامن يشهّوك ليهو، ناس كدا زي المجيسترول؟ النوع اليخليك تبلع ريقك أثناء الوصف حتى إن لم تكن من أنصار الأكل عموما، أها ديل فيهم أمدرماني معروف كان عندما يحكي عن الخُدره المفروكه بالكِسره التوتال السويسري مع الشطه بالليمون والبصل اللخدر، حزب الخضر، بعدما تستمع إليه طوالي تتصل بالمدام تقول ليها الغدا خُدره بس والقرع يسقط بس والبشاميل تسقط تالت. زولنا دا لو جابوا خُدره مفروكه في عزومه وتبقَى منها قدر محترم في (الكوره) بيسأل المعاهو: يا اخوانا شبعتوا؟ لو قالوا الحمدلله بشيل الكوره يضري فيها الشطه وجووووووت يشربا والحمدلله،
    لوموهو اللاهي.
    شئ إلهي.
    كان يردد بيت نزار:
    (لم أعرف أبدا أن "الدمعة" هي الإنسان.. وأن الإنسان بلا "خُدره" ذكرى إنسان)
    يغازل الباميه المفروكه كما لو أنها سلمى حايك، لا سيما اللايوقه بالحيل، وبمناسبة اللَّيَاقه دي، حكى لي صديق أن أحدهم كان يلقّب ب (المدرسة التهويلية) يطربك بمبالغاته وأخيلته المجنحة، هذا التهويلي قال أنهم ذات غداء ببامية ممعنة في اللّيَاقه سمعوا طرقا على باب الشارع فرفع يده عن الصحن وذهب ليفتح للطارق فإذا بخيط الباميه يتبعه حتى الباب جيئة وذهابا..
    برضو في ناس كدا، تنتهي فترتهم السياديه وعايزين يمطوها للباب.
    صديقي بروف علي عوض يوسف يضيف للزغني الملهلب بالدليخ شطة وارد الأبيض لونها برتقالي مضلل، يحتفظ بها في آنية زجاجية، يعلق ساخرا البلاستك ما مضمون، بسيح، لكنه مروج للشطه التايلنديه الخدرا التي لا يمكنك تناولها إلا إذا كانت سيارة الدفاع المدني والإسعاف بالجوار، وكما هو معلوم ، هناك نساء لا يشق لهن في الطبخ غبار، ففي المناسبات يتم تكليف كل واحدة في مجال تخصصها، سهام عندها رِجله خطيره ( قصدي المُلاح)، وساره في النعيميه ما بتتلحق، وفاتن ملاح الورق حقها براها (تقول صحفيه)، مُلاحها بس بوهية الرينبو، وبالطبع هناك رجال يعرفون الصانعة من المذاق من بين مئات الأطباق، بالذات الزوج، يحكي للمدام بعد العزومه بأن طبيخها لقي إشادة الجميع فاستزادوا منه، لا تسعها الأرض فتبتسم مرددة في دواخلها (عشان تآمنوا). أها واحده جديده من منسوبات سيسترسكول وبليز بي كول تتميز برِقة وإتيكيت لازوردي، من النوع الذي يطرق باب التلاجه قبل أن يفتحها، بتاعات ال apple pie والسوفليه، بتاعات الحلويات إياهن ،تخصص ديزيرت مينيو ليست. أها ، في إحدى العوازيم ببيت صديق قامت بإعداد السلطة الخضراء، قالت ماخداها subspecilaity، وقطّعت معها شطه تايلنديه خضراء متخفيه كالحرباء بين الجرجير والفلفل اللخدر، هل سمعتم بأفعى المامبا اللعينة بين الحشائش؟ كل من تناول من تلك الكارثة اتجه على الفور نحو الماء البارد مغادرا بروفة جهنم إلى داره بعينين دامعتين.
    رجعت بدري مالك؟
    الخدار مرق لوداري.








                  

06-07-2021, 07:24 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22183

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    هههه مبالغة ياخ
    قالوا المرة لو ملاحها طلع ماسمح بتزيد الشطة
    يا زول الشطة دى بتجيب سؤ العاقبة 😆😆
                  

06-07-2021, 07:42 AM

muntasir

تاريخ التسجيل: 11-07-2003
مجموع المشاركات: 6173

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبدالحفيظ ابوسن)

    لا حول
                  

06-07-2021, 01:01 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: muntasir)

    Quote: لا حول

    والذي سمك السماء بلا عمد يا منتصر، مره في مطعم مكسيكي في مسقط جابوا لينا حاجه كدا زي عصير المنقه التقيل وقالوا دي شطه، شلت منها حاجه سغييييييره..
    بالجد ما عرفت أودي وشي وين..
                  

06-07-2021, 07:45 AM

ABUHUSSEIN
<aABUHUSSEIN
تاريخ التسجيل: 08-14-2002
مجموع المشاركات: 36202

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبدالحفيظ ابوسن)

    ياخ طلعت ميتينا زاتو ....
                  

06-07-2021, 01:09 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    Quote: ياخ طلعت ميتينا زاتو ....
    في نوع يا عادل لو لمستها بيدك ساي نيرانا ما بترحم، تاني إلا تأجر ليك أصابع ،
    جوانتيات بس.
                  

06-07-2021, 07:47 AM

Osman Musa
<aOsman Musa
تاريخ التسجيل: 11-28-2006
مجموع المشاركات: 20937

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبدالحفيظ ابوسن)


    مبالغة .
    الموسوعة الأدبية محمد المرتضى ينقل للناس ثقافة وطباع وعادات الشعوب .
    من العرب والافارقة و الاسبانيول في الجنوب وفي السنترال والويست انديز و عموم جزر الهند الغربية .
    محمد المرتضى حنك في القانون وخيال في الكتابة البدون كتاحة.
    كتابة سودانية بت ناس .
    كتابة متسامحة و متصالحة.
    كتابة مسرح للشيطنة.
    ومسرح للصعلكة.
    ومسرح للغناء .
    ولذكريات البلد .
    كتابة معرض للفنون الجميلة .
    وللنكات والمديح.
    كتابة محشية دعوات للالتفات للجمال والمحبة السودان .
    والعودة للعادات الأصيلة.
    يا جماعة دي كتابات فارهة .
    و كاتبها النجم .محمد . نجم في الكتابة يزاحم دينزل واشنطن في الشاشة.
    له التحية .


                  

06-07-2021, 01:26 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Osman Musa)

    أخجلتني يا رجل..

    عثمان موسى يا صديق،
    عاين،
    عندنا واحد صاحبنا موبوء بالكوارع وكبدة الجمل ،
    زوجته لامن يجب كوارع البقر بتجيب أنبوبة غاز احتياطي ، أظنها كوارع Bison ، ولامن يجهز الشطه بالدكوه وتبدأ مناورات النجم الساطع يتوقف عن الكلام والعقل ياخد إجازه على طريقة البخور والدلكه الخلَن عقلي لِكه.
    تلي ذلك مرحلة الهذيان..
    بنفس الصوره من بدري يقطع كبدة الجمل ويعطنها اليوم كله في زبادي ويجهز البصل اللحمر ب الليمون مع الفلفل الأسود والأخدر مع شوية عصير عرديب وقليل من مسحوق الثوم والخل ويلُخ القصه دي..
    يلا يجيب مخلوط الشطه بالدكوه والليمون لامن مكعبات الكبده تبقى مقرمشه ، ببكي في الأول ويستغقر ويصلي ركعتين ، بعد داك لا بيعرف الولع النار لا الطفا النور..

    سوق ليبيا كيف..
    قالوا ناس قندهار فتحوا فرع جنبكم.
                  

06-07-2021, 08:00 AM

Haytham Ghaly

تاريخ التسجيل: 01-20-2013
مجموع المشاركات: 4430

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبدالحفيظ ابوسن)

    Quote: يتم تكليف كل واحدة في مجال تخصصها، سهام عندها رِجله خطيره ( قصدي المُلاح)


    ههههههههههههههههههه

    عجبتني الجدعة دي والله


    سنة 2001 سافرت الى ملكال بغرض قضاء الخدمة الوطنية كمعلم

    المهم السفرة كانت بالجرار طويلة جداً من كوستي لحدي ما وصلنا ملكال قضينا داخل الجرار 8 ايام من اصعب واجمل الايام
    اكلت خلالها الفول بالقراصة ويسألني الله من شدة لذاذتو عادي ممكن يرفع الاصبع الوسطى بتلك الحركة لي بيتزا هوت
    في ايام السفر الاخيرة اصبح الميز شحيحاً فتضورنا جوعاً فوق رهق وترقب وتشويق اكتشاف الاماكن وبعض جوع من نوع اخر
    المهم وصلنا ملكال وكان في استقبالنا طاقم من وزارة التربية والتعليم واعدوا لنا مائدة عشاء فاخرة جداً فيها ما لذ وطاب
    ومع الجوعة ديك الواحد فينا استعد للعضة بكل حواسو وكان من ضمن المائدة شطة خدرة لكن هي غبشة شوية كدا يعني ما خداراً يانع وقصااار
    واخوك زول شطوط مع اول لقمة شلت واحدة وقلت كدا قرشتها بكل استهتار واردد في سري بللاي دي شطتكم مع الرجال هههههه
    اقسمبلاي يا ود المرتضى بعدها ما قدرت اصلاً اكل ولا لقمة ولا حتى قدرت اقعد في مقعد ولا استلقى في سرير
    ياخي ديك شطة ما حصل لاقاني مثيلها ابداً .. يمين اضنيني الاتنين الا المسهم بيدي عشان اعرف انهن قاعدات
    جازفت النوم بالمسارقة وتاني يوم اصبحت مورم الوجه ومشيت الدكتور وكان شاب من نواحي الجزيرة
    بعد سألني الحاصل شنو قلتلو امس اكلتلي شطاية صغيروونة دا كل الحصل
    فقالي تستاهل عشان تبطل طفاسة ههه المهم قال انو الشي دي اسمها قبانيت وبتقوم في الخلا براها وكم حبة منها بخلطوها بي ربع من الشطة العادية

    كانت تجربة مريرة لكن ما لدرجة اتوب من الشطة .. الى الان الشطة الهندية الرقيقووونة ديك شطتي المفضلة

    تحياتي
                  

06-07-2021, 12:56 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبدالحفيظ ابوسن)

    Quote: قالوا المرة لو ملاحها طلع ماسمح بتزيد الشطة

    بعضهن يتفنن في الإخفاء بوسائل مختلفة تتراوح بين الشطة والإبتسامة..
    كيفك يا حفيظ يا غائب عن العين..
                  

06-07-2021, 01:30 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    Quote: عجبتني الجدعة دي والله
    الغالي هيثم..إنت زول بتاع مشاكل..
    صدقني في ناس عندهم كيس في جيبم زي كيس السعوط..
    قبانيت،
    ممكن ينسوا التلفون لكن الشطه لا..
    الشطه خط احمر يا هيثم..
                  

06-07-2021, 02:27 PM

يحي قباني
<aيحي قباني
تاريخ التسجيل: 08-20-2012
مجموع المشاركات: 16380

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    مولانا يا صديقي ..

    زمان .. لامن كنا بنقول البت دي (شطة) بس .. كان بالنظر بس و بي دقة القلب ..
    لو كنا نعرف السكوفيل وقتها ..
    لكانت هناك اوصاف تفوق ما قاله ابو صلاح :

    السيوف ألحاظك تشهرا
    للفؤاد المن بدرى انهرا
    اخفى ريدتك مرة و اجهرا
    نار غرامك ربّك يقهرا
    يا بدور القلعة و جوهرا

    رغم ظني الجازم .. ان ابو صلاح في كلمة (إنهرا) دي .. كان عنده سر مقياس السكوفيل ..

    ما علينا ..

    اصحابك ناس كارولاينا .. ما كفتهم الرييبر الليلُم .. قامو يولدو الشطوط من بعضها (البعضُ) و جابو حاجة اسمها Pepper X
    احر من Space X حقت زولنا المجنون ايلون مسك ..
    قالو قالو عليها شقي و مجنون .. و قد تصل الى 3 مليون و ميتين اسكوفيل و لكنهم منتظرين ناس جينيز للاعتماد ..
    و ناس جينيز راجين ناس استاذ محمد الرفيع حقنهم للتقرير و الاقرار ..

    و تستمر القرقشة ..

                  

06-07-2021, 02:47 PM

ABUHUSSEIN
<aABUHUSSEIN
تاريخ التسجيل: 08-14-2002
مجموع المشاركات: 36202

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: يحي قباني)

    Quote: عندنا واحد صاحبنا موبوء بالكوارع وكبدة الجمل ،
    زوجته لامن يجب كوارع البقر بتجيب أنبوبة غاز احتياطي ، أظنها كوارع Bison ، ولامن يجهز الشطه بالدكوه وتبدأ مناورات النجم الساطع يتوقف عن الكلام والعقل ياخد إجازه على طريقة البخور والدلكه الخلَن عقلي لِكه.
    تلي ذلك مرحلة الهذيان..
    بنفس الصوره من بدري يقطع كبدة الجمل ويعطنها اليوم كله في زبادي ويجهز البصل اللحمر ب الليمون مع الفلفل الأسود والأخدر مع شوية عصير عرديب وقليل من مسحوق الثوم والخل ويلُخ القصه دي..
    يلا يجيب مخلوط الشطه بالدكوه والليمون لامن مكعبات الكبده تبقى مقرمشه ، ببكي في الأول ويستغقر ويصلي ركعتين ، بعد داك لا بيعرف الولع النار لا الطفا النور..

    غايتو يا ابو اكرم جنس حكيك دا يا مجنون يا مسطول ...
    وحات نظري و عافيتي زول نصيح ما بقولو ..
    يا خي لكن صاحبك دا و الله لا قصر مع الكوارع و لا قصر مع كبدة الإبل
    غايتو بوستك دا حا يكون السبب في وحم الرجال البقروه ...
                  

06-07-2021, 07:08 PM

اخلاص عبدالرحمن المشرف
<aاخلاص عبدالرحمن المشرف
تاريخ التسجيل: 03-04-2014
مجموع المشاركات: 8736

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    أمنتو بالله
    هي كتابة نصاح!!!
    امنتو بالله
                  

06-08-2021, 01:02 AM

waleed nayel
<awaleed nayel
تاريخ التسجيل: 10-31-2008
مجموع المشاركات: 1152

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: اخلاص عبدالرحمن المشرف)

    مبالغه ،،،ابداع فات الكبار و القدرو ،،،
    شكرا شكرا شكرا
                  

06-09-2021, 09:04 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: waleed nayel)

    أخونا وليد،
    شكرا وفيرا يا سيدي،
    ثمة أشياء تشكل بعض يومك وتفرض وجودها في حياتك لازم تديها حقها زي الشطه ,اشياء أخرى لا نأخذها كمسائل تافهة لاتستحق النظر..
    الحكمة في الشطه يا عزيز أنها تقول لك أن أية متعة لحظية لها ثمنها.
                  

06-08-2021, 06:13 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: اخلاص عبدالرحمن المشرف)

    شكرا د. إخلاص..
    المبدعون هم من نقلنا عنهم يا عزيزة.
                  

06-08-2021, 09:55 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: يحي قباني)

    Quote: السيوف ألحاظك تشهرا
    للفؤاد المن بدرى انهرا
    اخفى ريدتك مرة و اجهرا
    نار غرامك ربّك يقهرا
    يا بدور القلعة و جوهرا
    إنت يا باشمهندس فاكر الناس البياكلو الشطه البغنوا ليها "طلعه ما بتتقابل زي لهيب النار" ديل كلهم
    عايزين يفتحوا شهيتهم للأكل؟ ديل بيعملوا عدوان تعويضي على العيون الشافت والقلب الراد..
    يا يحيى أنا جربت الكثير من أنواع الشطه التي يجب حظرها دوليا والتي يجب إخضاع مزارعها للوكالة الدولية للطاقة الذرية لأنها تهدد السلم العالمي،
    لكن على قناعة تامه أن النوع الذي أورته في كلامك ال Pepper X ، وكما قلت يزيد على 3 مليون سكوفيل ، دا مستحيل يكون مقصود بيهو أكل،
    في رأيي أي حاجه حارقة وتتخطى ال 300 ألف دي ما بتخليك تتذوق شئ مما تأكل لأنه اللسان ، وهو المعني بالتذوق، يصاب بالشلل التام،
    ياخ ما اللسان براهو، أي شئ بتشل،
    غايتو اللمريكان ديل شعب عجيب، في زمن الشباب كنا بضيافة صديقنا د. جمال محمود بلوس أنجلس ومشينا ديزنيلاند ، ركبنا حاجه كدا إسمها المركبه الفضائية
    النوع البيربطوك مع إظلام واشكال نجوم طائرة باتجاهك ، باختصار العذاب الإتعذبناهو يتضاد مع المتعة، وهذا ينسحب على الشطة أيضا.
                  

06-08-2021, 06:39 PM

أبوذر بابكر
<aأبوذر بابكر
تاريخ التسجيل: 07-15-2005
مجموع المشاركات: 7109

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    كيفنك يا محمد المرتضى
    صحبة الرهط الكرام هنا أجمعين

    الشطة، والجمع شطوط

    شطوط دي جمع سكرجية سالم مرفوع بالواو البين الطاءات الاتنين

    والله وعن تجربة شطية مريرة، في نوع شطة ينفع وقود نووي عدييييل

    في نوع شطة يتوحوح أكلها ولا يعاقب تاركها
    ونوع فرض كفاية، يعني لو أكلها واحد او اتنين، الباقين المعاهم عرقهم بسيل مع بقية ضحاياها الاكلوها
    وفي نوع لو عاينت ليهو بس شعر راسك بقيف
    والله جد

    انا طبعا السيدة الشطة عملت لي عاهة مستديمة، تسمى التهاب القولون الحاد جدا
    وما عافي ليها تب وهدا قاعد ادعي فيها مع كل اطلالة صحن فول وكل اشراقة بامية مفروكة
    الي ان يرث الله القبانيت والجروف ومن عليها

    في نوع انا مسميهو "نيكول كيدمان" وللتسمية سبب طبعا

    وفي نوع، وده مزالف تب ومارق من ملة الكائنات النباتية كلها

    بنفع وقود نووي

    يمين بالله ما عندو اي شي غير انو يشتغل وقود نووي بس

    كان الله مد في الايام، وبقيت شديد من قولوني السبب لي اذايا وفرقة وفقدان هنايا علي قول حسن عوض ابو العلا
    بقص ليك قصة السجم الاسمها نيكول كيدمان

                  

06-09-2021, 04:08 AM

Ahmed Yassin
<aAhmed Yassin
تاريخ التسجيل: 01-31-2013
مجموع المشاركات: 3662

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: أبوذر بابكر)

    بوست يخلي الواحد يتوحوح
    ما يقدر عليه الا ( العينو حمرة وشرارة) لانه الانواع الجابوها ناس محمدالمرتضى وشركاه
    من فصيلة (حرقتني النار النار) طبعا بدون يا ( حبيبي )..واظن ان ابوصلاح القائل:-
    (جوفك ياكل اللهيب وان جوفى بياكلو اللهيب)
    (واجريت دمعى البسيل)
    ( كل ما اتخيل صفير من جوفى يزداد زفير)
    (تجرى شمالا يمين قلبك قط ما بلين)
    دي غناها فضل المولى زنقار ..مساعد المغنية ( رابحة ) العلمتو التم تم
    واظنه جاب صوتو التاني( المستلف ) منها وسجل بيهو الاغنية دي ( من بف نفسك يا القطار )
    مع انه كان يمتلك صوت رجالي وبغني ( قرار )
    لكن احكام الشطة يمكن تخلي الزول ..(لى حبيبى يقدر يطير)
                  

06-09-2021, 10:12 AM

بابكر قدور
<aبابكر قدور
تاريخ التسجيل: 02-26-2013
مجموع المشاركات: 1555

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Ahmed Yassin)

    يقولون أن هناك خيط رفيع بين العبقرية والجنون .. ولا أظن أن هذا القول صحيح
    فالعبقرية والجنون هي شطة بي ليمون!
    تحياتي محمد المرتضى
    عدت بذاكرتي سنوات عديدة إلى الوراء .. أيام العهد الذهبي .. ذهبنا أنا ومعي صديقي
    إلى فندق الهيلتون في شارع النيل في ليلة كانت ليلاء .. نريد أن نتعشى .. أذكر جيداً
    كان العشاء "كري بالأرز" وبعد أن أحضر طعام العشاء طلبت شطة فجئ لي بفتيل أضفت
    من محتواه على "الكري" فلم أتذوق طعم شطة فناديت النادل وهو سوداني فقلت له"يا أخي
    أنا طلبت شطة ولم أطلب صلصة" فقال لي ولا يهمك يارجل .. فأحضر لي صينية مرصوص
    فيها صف من "الفتايل" وشرح لي أن هذه كلها شطة ولكن درجة حرارتها مختلفة فنمرة
    واحد ده شوية بارد وتمشي لنمرة إثنين أسخن شوية ونمرة ثلاثة وأربعة وخمسة ...إلخ أسخن
    فأسخن حتى وصل الرقم أحد عشر .... فقلت له ياخي أنا فاضي عشان أضوق عشرة فتايل
    فتناولت رقم أحد عشر وصببت منه على الطعام وأخذت ملعقة واحدة فاكتشفت أن النادل إبن
    الذين واقفاً يرقب الموقف .. ورب الكعبة فقدت القدرة على التنفس ....وعندما جحظت عيناي
    قال لي "ود الـ ........." فأحضر لي الرجل جاتو وبيبسي كولا وقال لي "ألحق نفسك" ..
    آمنت بالله ماتقول لي دنقابا ولا شطة قبانيت .. وبعد أن شفيت بنسبة 50% واستعدت بعض
    وعيي سألته "ده شنو دا" فقال لي أمريكا الجنوبية" ....
                  

06-10-2021, 12:22 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: بابكر قدور)

    بابكر سلام..
    كيف حالك يا عزيز..
    ياخ مسألة تناول الأطعمه دون سابق معرفة بالمحتوى جد خطيرة،
    منذ سنوات كنا معزومين في مطعم باذخ بمدينة خليجية، وعند بداية تناولنا الطعام ، وكنا مجموعة، بدأ أحدنا يكح ، إفتكرناها عشراقه ساي،
    تدريجيا الزول بدأ يعاني في صعوبة في التنفس وجحظت عيناه واحمرت وفي أقل من دقيقة أصبح يشابي للهوا بصوت مخيف ..
    مافي مويه نفعت ولا غيرها، العاملين ومدير المطعم واللمه كلهم جو، بسرعه تركنا المكان وأخدناهو جري لأقرب مستشفى،
    تم إجراء اللازم في قسم الطواريء قبل أن يفارق الحياة.
    عملنا أن صاحبنا عندو حساسيه من اللوبستر ..
    رجع بعضنا المطعم لسداد حساب العزومه المطرشقه، المدير حلف بس نمشي،
    تاني مافينا زول رجع للمطعم..
    أها الشطه دي مامعها هذار لأنها إذا رحمتك في بداياتها بعدين ما أظن.
                  

06-09-2021, 10:31 AM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1730

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Ahmed Yassin)

    تحياتي أستاذنا المرتضى
    إنت عارف سِر عجيب رباني في الشطة دي
    ياخ الخشم يريدها وباقي الوجه بفز منها فزيز
    وبعدين ماحصل لقيت زول بحب الشطة دي ماهو ظريف ودمو خفيف!!!
    طبعن ياسيدنا وأنت أدرى، أهلك الكردافة ديل لهم فنون وفنون في الشطوط!!
    شطتهم عجيبة عجيبة وخاصة الدنقابة بجاوزوها ب
    (الكمون والقرفة والحلبة وشوية كسبرة وشمار.....الخ)
    عارف حاجتين مابفارقني (علبة الشطة "الدُّقّة") (علبة الشرموط)
    ديل قبل ضيلهن مايرق،السافورة بتجيب من البلد.
    مرة عزمني صديق من آسيا والدنيا رمضان،ياخ داير يسل ضمتي ب الشطة، إلا أتّابنت لي تُقزة روب في شقي!!!
    معزة ونفلا سمح
                  

06-09-2021, 02:20 PM

محمد حمزة الحسين
<aمحمد حمزة الحسين
تاريخ التسجيل: 04-22-2013
مجموع المشاركات: 1854

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبيد الطيب)

    وهل مثل مولانا محمد المرتضي يشكر علي كتاباته الرصينه ما ياهو شغلو في البورد دا أومال نحن الجابنا هنا شنو ...
    تحياتي يا مولانا ....

    Quote: آمنت بالله ماتقول لي دنقابا ولا شطة قبانيت .. وبعد أن شفيت بنسبة 50% واستعدت بعض
    وعيي سألته "ده شنو دا" فقال لي أمريكا الجنوبية" ....


    الشدي بتاكلوها حااااارا وتمرقوهااا حاااارا شن فايدتا ...
                  

06-11-2021, 12:15 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد حمزة الحسين)

    Quote: الشدي بتاكلوها حااااارا وتمرقوهااا حاااارا شن فايدتا ...
    سلامات يا ابوحميد ولك الشكر على الكلام الطيب.
    الإنسان عموما بيحب المغامره ولولاها ما فكر في صعود الهملايا بكل مافي ذلك من مخاطر قد تفضي إلى الموت ، ليس تسلق الجبال وحسب بل
    القائمة تطول إذا ما تبنينا معايير الأمن والسلامه والربح والخساره ، لكن موضوع الشطه دا موضوع مختلف، الشطه دي فيها سر عجيب وغيابها
    تصبح معه المائدة كمباراة بلا أهداف، ياخ هسه لو جابوا ليك شيّه بدون شطه باليمون مش بتحردا؟.
                  

06-11-2021, 11:55 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: عبيد الطيب)

    Quote: وبعدين ماحصل لقيت زول بحب الشطة دي ماهو ظريف ودمو خفيف!!!

    صدقت يا عبيد..
    ملاحظه في محلها..
    في دكان البربري جنوب شارع الشنقيطي كان لازم نتزود بفول غريب وعجيب ونقفل القصه بيبسي بارد البيطلع من الخياشيم داك قبل ما نمشي
    أي حفل أيا كان لأنه فول البربري لا يضاهى كما أننا لم نكن من أنصار الأكل في المناسبات، المهم يا عبيد في الشله في إتنين هم المسئولين عن
    الإعداد لأنهم بيعرفوا نسب المقادير المطلوبه من كل التوابل والجبنه ومويتها والزيت لكن أهم مقدار هو الشطه، دي ما فيها هزار، لأنه أي لخبطه في
    الوزنه بتبوظ عمليات تخصيب اليورانيوم وبالتالي العشاء والحفله طارت من المزاج. الإتنين ديل كانوا من أجمل وأحلى وأرقى أنواع البشر ..
    عموما يا ود الطيب الناس البيهتموا براحة وتستيف الجهاز الهضمي ديل تلقاهم ظريفين وخفيفين مهما تصاعد وزنهم وما بحبوا زول يشاغلهم في التخصص دا ،
    بيعملوها بحب.
                  

06-10-2021, 11:34 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Ahmed Yassin)

    Quote: بوست يخلي الواحد يتوحوح
    الموسيقار اللطيف ود ياسين،
    صديقي محمد الجمري أرسل لي رسالة في الخاص قال لي إنت ماشي بعيد ليه، في شطه إفريقية إسمها Hoho وطبعا من الإسم بتكون عرفت الحاصل، هوهوة بس..
    مش أحبابنا الحبش عندهم شهقة في الكلام تفيد الإستمرارية أو (آييي)؟
    قال الشطه دي بتعمل حاجه زي دي في البداية لكن بعد فتره ، للتبريد، آكلها بيعمل صوت زي الهوهوة..
    كنت ح أنزل ليك صورة الهوهو ، بس نسينا تقنيات بكري ..
    شكلها قبيح
                  

06-10-2021, 11:25 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: أبوذر بابكر)

    Quote: في نوع شطة يتوحوح أكلها ولا يعاقب تاركها
    ونوع فرض كفاية، يعني لو أكلها واحد او اتنين، الباقين المعاهم عرقهم بسيل مع بقية ضحاياها الاكلوها
    وفي نوع لو عاينت ليهو بس شعر راسك بقيف
    والله جد

    أبوذر الحرس القديم والأشعار الملهمة..
    كلام صحيح ، أخوك زمان كان شٍفت شطه، عندما كانت المصارين galvanized لكن هسه كل الجهاز الهضمي عايز سباكه..
    ما تشوف التنظير دا، بقينا نجيب الشطه الخدرا ونعاين ليها وناكل ما تيسر بعيدا عنها.

    قلت لي نيكول كيدمان ؟
    الشرق أخطر يا أباذر ..
    حليل زمن بوستات ساره نورو..
                  

06-10-2021, 01:26 PM

امتثال عبدالله

تاريخ التسجيل: 05-15-2017
مجموع المشاركات: 6352

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    غايتو يا ود المرتضى وصفك للشطة وصف اوسكار...
    اساسا انا ما بحب الشطة ...لكن دوري في المطبخ يوم الاحد ،وقررت بعد قريت وصفك للشطة
    ازيد كمية الشطة ام قرون في الملاح للمسنوحات الصديقات العزيزات واشوف تعليقهن على سخانة
    الشطة كيفن...
                  

06-10-2021, 02:40 PM

Ahmed Yassin
<aAhmed Yassin
تاريخ التسجيل: 01-31-2013
مجموع المشاركات: 3662

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: امتثال عبدالله)

    (ازاني) سرف دمعي بلاني
    دا بالضبط ما حصل للفنان القلع والمعروف عنه انه لا ياكل الا والشطة قدامه
    وهو من النوع اليخليك تاكل ما تشبع وله طريقة (مشهية في الاكل) حتى لو انت شبعان
    يحب اللحمة المحمرة خاصة (الضلع) و ملاح ام رقيقة بالكسرة البيضاء والسلطة الخدرا
    وكوم من الفلفل الاخدر الرهيب تقريبا يصل لى مليونين على مقياس محمدالمرتضى المعروف بـ سكوفيل.
    وعادي جداالقلع المتين يقرقش ليك قرن الشطة دون ان يهتز او يرمش له جفن مع انو نارا حمرا ..
    البحاول يجرب سيتجه مباشرة الى الموية ليطفىء ذلك اللهيب المتقد في لسانه وفمه
    لكن هو كأنه بقرقش في تلج ولا بعرق ولا بقول (اح) ولا بشهق ولا بجيهو ابوالشهيق
    كأنه عنده حصانة ضد ذلك السعير المتقد ..
    المهم واحد من اصحابه جاب من بريطانيا حبة شطة وقال دي حتكون نهاية قصة
    القلع ..ونهاية شهرته في اكل الشطوط وهو يستهزىء بها وبالحضور
    فعلا ذات يوم وفي لمة مخصوصة لمشاهدة تلك النهاية المحزنة لاسطورة الشطة
    جابوا الغداء وكان (سمك) وكمية من الشطة والليمون والجرجير والبصل الابيض
    اول ما بدأ به القلع هو عصر الليمون فوق السمك وفوق الجرجير وتناول قرنا
    كفتح للشهية .. ودار حديث بسيط عن ونحن نترقب ان يخرج الرجل ما خفي
    وطلع ليهو كيس فيهو حبة واحدة صغيرة ولونها احمر فاتح وناولها لعمك القلع
    قال ليهو دي شنو دي ؟ شال الكيس وعاين فيهو وقال ما تقول لي شطة !!!؟
    هاك عليك الله امشي ألعب بعيد ..
    داك قال ليهو دي 220 فولت .. وجايبنها من انجلترا من بيرمنجهام واسمها (دراقونز)
    القلع قال انجلترا شنو ياخ بلا ديراغونز بلا.. هو الخواجات ديل بعرفو الشطة؟ انحنا ناس القبانيت
    وناس ماعارف شنو .. المهم شال ليهو لقمة كاربة من السمك وقرم ليهو قرمة
    من البريطاني دا .. وطبعا في البداية ما حس بى حاجة وقال
    طعمها زي ال..... وفجأة شخر و بقى يقلب في عيونو وبقت بيضا من غير سوء والسواد راح





                  

06-10-2021, 02:45 PM

Osman Musa
<aOsman Musa
تاريخ التسجيل: 11-28-2006
مجموع المشاركات: 20937

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: امتثال عبدالله)

    دي في غواتيمالا بيسموها سم العقرب النتاحة.
    قاعدين يحاولوا يبردوا الشححان حقها بي كأس نبيذ أحمر بدل الحويان بعرق العقرب.
    الأ بس الشححان ما بروح الا بعد ما حمار الوادي يهنق في براري انتيغواء في جنوب غواتيمالا.
    chili peppers of Guatemala

    When you visit Guatemala there is no doubt that you will want to eat something spicy. It is Latin America and suddenly your blood will say – hell, I’m a Latino too! And we like to eat spicy stuff. So, you would want to learn something about chili peppers that are common for Guatemala.

    Chili peppers are one of the most widely consumed species of spice around the world. Like Mexico and Central America as a whole, Guatemala has been considered by many researchers as a center of origin and diversity of some of the most important species of chili peppers. Some are common with Mexico, some came all the way from Peruvian Amazonas area. Let us see most of the species that you will encounter in Guatemala, their dispersion, and their strength. As you might hear, the unit for spiciness is a Scoville unit. So, let start from less killing ones to the brain damage causing ones. Of course, you can listen to Red Hot Chili Peppers while reading.
    الشيلي دي اكتر شطة مسنوحة في العالم .
    وفي ناس كتيرين منهم بيفتكروا أنها هي السبب في مد الأمة في الثاوث الامريكي بحميان الدم
    والحرفنة في الرياضة والجمال والغناء السمح و رقصة السالسا.

                  

06-10-2021, 03:17 PM

محمد عبد الله الحسين
<aمحمد عبد الله الحسين
تاريخ التسجيل: 01-02-2013
مجموع المشاركات: 7534

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Osman Musa)

    االاخ محمد المرتضى
    تحياتي
    طبعا الواحد لا يمكن ان يقرا مثل هذا الموضوع
    دون ان يعلق..
    قراته قبل اسبوع ونقلته لعدة قروبات في الواتس
    من فرط المتعة والإعجاب..
    ومن بين ركام مشغوليات السفر والتنقل تبدت لي من استعادة
    تفاصيل الموضوع عدة معاني واشارات ساعود لذكرها
    قريبا جدا ان شاء الله..
                  

06-10-2021, 06:05 PM

طلحة عبدالله
<aطلحة عبدالله
تاريخ التسجيل: 09-14-2007
مجموع المشاركات: 16719

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد عبد الله الحسين)

    سلام محمد المرتضى
    كتابة بديعة بحق
    عندنا بلدياتنا عندو حوش في طرف الحلة عامل فيهو أوضة
    واحدة قداما راكوبة قش مسميها غرفة العمليات الغرفة
    فيها عنقريب هبابي ودولاب نملية صغير فيهو خمسة كبابي
    شاي وجك موية بتاع بلاستيك وحوض غسيل بستعملو للعضة
    وجمب النملية توجد ( الحنينة) كما يطلق عليها وهي حلة كبيرة
    داكنة السواد لم تشهد منذ أشتراها صنفا من الطبيخ غير الكمونية
    والكوارع .. أصلو هو بتاع شربة وتوابعا.. الحوش زارع فيهو شطة
    وبصل وفجل بس.. مرة سافر ليهو اسبوع جا لقى أختو زرعت
    جهنمية وصباح الخير وحنة .. جاب الطورية قلعا من جذورا
    قال دي نباتات طفيلية ..خخخخخخ
    أها الزول دا عاااادي بقرش ليهو تلاتة أربعة قرون قبانيت مكس مع
    فحل بصل وفص توم غليد ولاحم كنوع من المشهيات ..
    بالمناسبة فول أبو العباس والأفوال الجارة اللي كانت
    بطلة القصة في البداية ضاعت مع تسلسل القصة (شطة
    في مرقة) .. لو تلاحظ الردود كلها بقت عن الشطة بس
    مع انو الأفوال كتف الحكاية ان لم تكن رقبتها .
    Quote: فاتن ملاح الورق حقها براها
    بالله فاتن بتعرف تعمل ملاح
    وفي الملاحات كمان ملاح ورق ؟؟ والله اتاريهن
    فاتنات زمان ما هينات .
    نحن عندنا سوهندا ما بتعرف تسلق بيض استنادا
    على اسمها.. خخخخخ
                  

06-10-2021, 07:24 PM

الشيخ سيد أحمد
<aالشيخ سيد أحمد
تاريخ التسجيل: 07-14-2008
مجموع المشاركات: 3126

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: طلحة عبدالله)

    ممتع كالعادة.
    روعة في السرد والإنتقال من مربع الى آخر.
    ممتع جدا جدا.

    تسلم يا حبيبنا.
                  

06-10-2021, 08:13 PM

ABUHUSSEIN
<aABUHUSSEIN
تاريخ التسجيل: 08-14-2002
مجموع المشاركات: 36202

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: الشيخ سيد أحمد)




    بدون تعليق
                  

06-10-2021, 08:43 PM

Mahjob Abdalla
<aMahjob Abdalla
تاريخ التسجيل: 10-05-2006
مجموع المشاركات: 7369

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    Quote: وفي ذات غداء لدى صديق بكندا حذرني من شطه كانت على المائدة صفراء تسر الناظرين ساحرة الرائحة لكنها قاتله، كبعض النساء، قالوا بت خالة الهبانيرو، أفادني أنه أتى ببذورها من الكاريبي واستزرعها في حديقته مضيفا أنها تسمى لسان الشيطان Devil's Tongue
    ولكن فضولي دعاني لتذوقها بطرف لساني.. باختصار، فيكم زول هبشوا سلك عريان في اللسان؟

    انا برضو جربت شئ زى كدا في مطعم اسمو Fish House.
    الزولة حذرتنا منها و قالت لينا اقرو المكتوب و جربو علي مسئوليتكم. كل الناس زاغو لكن انا علي فضولى اخدت هبشة كدا, لكن من يومها ما قدرت اوصف الحالة الدخلت فيها و الناس الحولى قدرو يوصفو حالتى.
    حتي هذه اللحظة, فهى بحق هبشة سلك عريان او يا هو ضربة ام كردوس.
                  

06-12-2021, 01:36 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Mahjob Abdalla)

    Quote:
    انا برضو جربت شئ زى كدا في مطعم اسمو Fish House.
    الزولة حذرتنا منها و قالت لينا اقرو المكتوب و جربو علي مسئوليتكم. كل الناس زاغو لكن انا علي فضولى اخدت هبشة كدا, لكن من يومها ما قدرت اوصف الحالة الدخلت فيها و الناس الحولى قدرو يوصفو حالتى.
    حتي هذه اللحظة, فهى بحق هبشة سلك عريان او يا هو ضربة ام كردوس.

    عزيزنا المحجوب سلام..
    الفضول ربما تكون عواقبه جد وخيمة، كنا في مؤتمر بالبرازيل ونحن ثلاثة محامين سودانيين شخصي ود. مكاوي عوض مكاوي ووزير سابق ، وفي إحدى
    (حوامتنا) في مدينة الريو الغريبه المدهشة، بعد جلسه طويله، قررنا تناول وجبة في مطعم بمنطقة إيبانيما حيث الفندق، جابوا لينا المينيو المصور وانا اخترت طبقا
    أعجبني شكله ومكوناته وفيه فاكهة استوائية، نعم فاكهة مع الإستيك. صاحبنا الثالث (وأسكت عن ذكر إسمه) إختار بالصوره، لم يحذروه كما حذروك ، قسما عظما الزول دا
    قرش ليهو حاجه في شكل الكرز أنا زاتي خفت عليهو .. نادينا النادله الخلاسية الجميلة تجيب لينا مويه بارده ما فهمتنا.. مافي زول هناك بيعرف انجليزي.. وزولنا انضرب مليون
    فولت.. في النهاية جابوا المويه وقالوا إسمها في البرتغالية ( أكوا) واعتذروا لنا عن عدم التحذير..
    زمان كنا عارفين أننا يجب ما نهاذر الجهلاء ولا نكشف سرا لإمرأة (نص نص) وما نلعب كوتشينه مع زول ما بنعرفو أو كشيه،
    لاحقا عرفنا برضو ما ناكل حاجه ما بنعرفا ولا دواء ما قرينا عنه ..
    وأخيرا ما نصاحب كوز..
                  

06-12-2021, 12:53 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    شكرا أبوحسين على صورة شطة الهوهوة
                  

06-12-2021, 11:39 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: طلحة عبدالله)

    Quote: ( الحنينة) كما يطلق عليها وهي حلة كبيرة
    داكنة السواد لم تشهد منذ أشتراها صنفا من الطبيخ غير الكمونية
    والكوارع
    (الحنينه) الوصفتها دي يا طلحه كوبي بيست من حلة مساعد اللوري..
    الموضوع يا العزيز (رقبتو) الشطه رغم أني استهللته بالفول الباهي وعرضت فيه للباميه والخدره وربما كانت الشطه قاسما مشتركا
    لكن أتفق معك في أن الفول يجب أن يُفرد له بوست خاص به لأنه يستحق سِفرا بحاله عند القاريء السوداني والمصري، مع قناعتي
    بأن أروع خلطة وطعم للفول حصريا عندنا في السودان.
    شوف يا طلحه، البربري ونفخو وأبو العباس وأحمد سعد والجان ديل لو اتكلمت سلبا عن أي منهم عندي أصحابي ممكن يصنفوك ..
    لكن سوهندا وشاهندا ديل بيطبخوا في الفيسبوك بس..
    وجه بشفة مائلة.


    سلمت يا عزيز.
                  

06-11-2021, 03:20 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد عبد الله الحسين)

    Quote: االاخ محمد المرتضى
    تحياتي
    طبعا الواحد لا يمكن ان يقرا مثل هذا الموضوع
    دون ان يعلق..
    قراته قبل اسبوع ونقلته لعدة قروبات في الواتس
    من فرط المتعة والإعجاب..
    ومن بين ركام مشغوليات السفر والتنقل تبدت لي من استعادة
    تفاصيل الموضوع عدة معاني واشارات ساعود لذكرها
    قريبا جدا ان شاء الله..
    سلمت يا عزيزنا محمد وبيننا موعد لو صالحنا الزمان..
                  

06-11-2021, 03:17 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: Osman Musa)

    Quote: قاعدين يحاولوا يبردوا الشححان حقها بي كأس نبيذ أحمر بدل الحويان بعرق العقرب.

    يا عثمان ، بمعاشرتك للناس بتاعين أمريكا الوسطى والجنوبيه ديل ، ما عرفت أسباب تطرفهم في حياتهم جملة وتفصيلا ليه؟
    مش ملاحظ شطتهم زي مخدراتم وحرفنتم في الكوره وتحررهم وأعمالهم الروائية..إلخ ما بتلحقوا؟
    منذ مشوار البرازيل وأنا عندي لوعة وأمنية ألا أغادر العبوس الغراره دي قبل ما أمشي أمريكا الوسطى ناس غواتيمالا ونيكاراجوا وبقية المنظومه العجيبه..
    ديل عندهم حاجات غريبه وأنا مبسوط منهم..
                  

06-11-2021, 12:23 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: امتثال عبدالله)

    Quote: اساسا انا ما بحب الشطة
    فَشّلتيني، زي ما بقولوا أهل الخليج..
    معقوله بس؟
    أولا مستحيل السودان دا يكون فيهو طبيخ ليس فيه قدر من الشطه يا امتثال ، وأولا أنك ضاعت عليك متعة الطعام بشكل عام..
    وأولا برضو الزييك دا لو عزم أصحابي الحكيت عنهم ح يجوا شايلين شطتهم معاهم ودا ما كويس في حقك .. وش ملهلب.
    بتبالغي..
                  

06-11-2021, 12:50 PM

ABUHUSSEIN
<aABUHUSSEIN
تاريخ التسجيل: 08-14-2002
مجموع المشاركات: 36202

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    اصحابا لينا جنهم لحم و شطة
    لو جابو لي شاي معاه لقيمات بتوقع يكونو داسين في نصهم صحن شطة 🤣
    لو معزومين في اي حتة الشطة الخدرا بتكون في جيوبم عشان ما يحتارو ... 🤣
    و من عمر سنتين تلاتة شفعهم بكونو اتعودو خلاص ....
                  

06-11-2021, 03:49 PM

يحي قباني
<aيحي قباني
تاريخ التسجيل: 08-20-2012
مجموع المشاركات: 16380

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    Quote: أولا مستحيل السودان دا يكون فيهو طبيخ ليس فيه قدر من الشطه يا امتثال ، وأولا أنك ضاعت عليك متعة الطعام بشكل عام..
    وأولا برضو الزييك دا لو عزم أصحابي الحكيت عنهم ح يجوا شايلين شطتهم معاهم ودا ما كويس في حقك .. وش ملهلب.
    بتبالغي..

    امس في الليل يا مولانا ..

    بتفرج في الباسكتبول .. و بقزقز في ترمس ..

    اها اخوك الترمس بجهزوا براو .. ملح خفيف .. شمار .. ليمونه كاملة و شطة قبانيت تدمع لها العيون ..

    الحاجة جات في نص الالمباراه قالت لي بتاكل في شنو ؟ ناولتها معاي ..

    اها استلمت الكوريه .. و بعد ما انتهت من باقي الترمس .. قالت لي .. انت ختيت شطة ؟

    فشنو .. تحياتي لامتثال .. ههههههه
                  

06-11-2021, 07:56 PM

امتثال عبدالله

تاريخ التسجيل: 05-15-2017
مجموع المشاركات: 6352

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: يحي قباني)

    والله يا ود مرتضى ويا ود قباني ما دام انتو بتشكروا الشطة كده ،بحاول يوم الحلة بتاعتي بوم الاحد اكتر الشطة في الملاح ونجرب ، مع اني كنت عاوزة اعمل دغيلة واعمل للمسنوحات المعاي شطة تفقع المرارة وانا اجيب وجبة ديلفري من ماكدونالد ....

    (عدل بواسطة امتثال عبدالله on 06-12-2021, 02:21 PM)

                  

06-12-2021, 02:52 PM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10631

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: امتثال عبدالله)

    Quote: فشنو .. تحياتي لامتثال .. ههههههه
    بالضبط يا يحيى،
    تخيل زي إمتثال دي ، وبرضو المعاكم والعندنا، ما بكونوا عارفين الشطه القاصدنها نحن..
    يقولوا ليك بالله الفلفل التوباسكو؟ فاكرين القصه كلها باسكو..
    الفلبينيين بيسلقوا الكورن بالبخار وبيعملوا ليهو ليمون مع الخل وبهارات لطيفه في ستاند في المولات حاجه لطيفه زي بتاعتك دي،
    مرات بيعملوا ليهو فلفل اسود خفيف ومرات بيسألوك عايز فلفل أحمر؟ برضو الهنود وناس شرق أفريقيا بيقطعوا المنقه الخدرا وبيعملوا ليها
    شطه وليمون (زي التبش والعجور) على أيامنا.. أها، ناس امتثال ديل فاكرين دي الحكايه.
    فشنو... تحايا لإمتثال.. المثل بيقول الخواف ربى لسانو..
    اللسان دا سبب البلاوي كلها.. من الشطه للحروب..
                  

06-12-2021, 02:59 PM

ABUHUSSEIN
<aABUHUSSEIN
تاريخ التسجيل: 08-14-2002
مجموع المشاركات: 36202

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: محمد المرتضى حامد)

    Quote: شكرا أبوحسين على صورة شطة الهوهوة

    دي بتخليك زي الكلب و ل شنو .. ؟؟؟ 🤣🤣🤣
    الجماعة بسكرو ايام الشري كان راقد هبطرش ...
    اها واحد قام يهوهو كما الكلب
    جنبهم في جماعة واعين واحد سمع الهوهوة سأل :- دا مالو ؟؟
    رد ليه واحد :- دا شرب ابو كلب
    🤣🤣🤣🤣🤣🤣
                  

06-12-2021, 03:22 PM

عبدالمنعم الطيب حسن
<aعبدالمنعم الطيب حسن
تاريخ التسجيل: 11-15-2012
مجموع المشاركات: 3919

للتواصل معنا

FaceBook
تويتر Twitter
YouTube

20 عاما من العطاء و الصمود
Re: الشطه. (Re: ABUHUSSEIN)

    هلا يا محمد المرتضى
    بوست حريف،
    هذه كتاية العيد الفات
    لا تخلو من شطة، وعلاجات..
    👇
    بمناسبة عيد اللحم
    بعض نصائح حتى تصل المتعة مداها
    تجنب الشحوميات عموما،
    وتجنب الهُبر من اللحوميات
    والقطع الكبيرة ما امكن...
    وثق دائما ان احلى اللحم ما حاور العظم...
    واماميات المذبوح دوما فايتة الخلفيات بمسافات،
    لجهة الطعم والهشاشة والدسامة،
    كل ما تقدمت في المذبوح احلوا....
    النيفة ما اطعمها للاكيلة الحرفاء
    اليوم لم يسلمني الجزار راس خروفي زعلتا شوية
    اعداده في الغربة مضني،،
    وبعدين مشيت،
    المهم الشطوط والليمون والبصل الابيض اساسيات
    اذا واجهتك حرارات في الاخراجات هنا وهناك،
    جراء الشطوط الحريفة فعليك بالنصيحة الذهب التالية:
    بس خت موية في الفريزر او بيبسي او شربوت او اي مشروب
    وخليه بارد شديد واشربه بعد الاكل مباشرة
    الشربة بالرمدة،
    وللخايفين من النزلة التلج الفوق دا (بشرط السكر موزون)
    عليهم بحجر، حجرين من الطحنية العادية دي،،،
    برضو فعالة،،
    لابد من الكاتول بالعدم (فسن اب) كما يقول طيوبي صغيري،،
    ولمن يعاني من داء الملوك استخدم الحبة
    فليس كل الايام عيد لحمة كنا يقول الراسخون في القاوت،،
    المرارة ما اطعمها ولو اخدت شلهبة بالنار فهي ازرط،
    وتظل الكمونية سيدة المائدة هذه الايام، وكل الايام..
    ومن لا يحب الكمونية فقد فاتته متعة المتعة،
    والشاي الاحمر بالهبهان وبالقرنفل المغلي مع الموية وسكر يتم الكيف...

    ههههههههها
    لا تتخيلوا انني نهم،
    فانا في الغالب غير متطلب، وغير متبرم...
    لم اطلب ابدا في حياتي تجهيز طعام خاص،،
    اكتفي بالموجود،
    وانبسط به..
    وآكل واقش شنبي...
    واتفكفك،،

    ....
    تحياتي
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de