د احمد الطيب ابراهيم استشاري جراحة الكلي والمسالك 21/5/2020 س: يبخروا فيها وهي تفسي فمن هي ؟؟؟؟؟ ج : الصحة في السودان
مافي مثل ممكن ينطبق علي وضع الصحة في السودان غير هذا المثل الشعبي و قد كتبته علي سوئه و ان كان وضع الصحة أسوأ من هذا المثل بكثير .... _ بذلنا مجهودا مقدرا في إرجاع الكوادر إلي العمل في مستشفي امدرمان ولكن يبدوا ان هناك جهات لا تريد للحوادث ان تعمل....و تسعي لشحن الطرفين المواطن والكوادر الصحية ضد بعض وبكل صدق فقد نجحوا في ذلك... وساعدهم عدم وجود قانون يحمي العاملين و تراخي الجهات الأمنية و جهل المواطن نفسه وقيل (من أمن العقاب أساء الأدب..) .. __ السعودية التي وفرت للمواطنيها البنية التحتية والمستشفيات الراقية و الكوادر المدربة أصدرت القانون الآتي نصه : (( الاعتداء علي الممارس الصحي لفظيا أو جسديا جريمة يعاقب عليها القانون :
# بالسجن لمدة تصل الي عشرة سنوات # غرامة تصل الي مليون ريال.. هنا في السودان حيث لا توجد مستشفيات ولا معينات وكل ما تملكه وزارة الصحة هم كوادر صحية بلا حقوق بلا سكن بدون ترحيل بدون حتي توفير أدوات سلامة للتعامل مع العدوي عجزت الحكومات المتعاقبة عن استصدار قرار لحماية الكوادر.... __ وبما أنه الموضوع دق للدكاترة ودي طبعا سنة ليست جديدة ح احكي القصة دي نقلا عن بروفسور محمد إمام: كانوا نواب في مستشفي مدني و عندهم مريض اهله بتاعين مشاكل والمريض علي حافة الموت.... قاموا قالوا للدكاترة والله الزول ده لو مات ندق المستشفي ده كله... __ في طبيب عمومي قديم أمتنع عن زكر اسمه وما شغال في المستشفي خالص و مشاكل الميز كله سمع الدكاترة بتكلموا... قام قليهم المريض في ياتو عنبر ؟ __ قالوا ليه في عنبر الدرجة رجال __ قال ليهم المريض ده لو مات زول يمشي مافي لو انا ما جيت ولو نائم صحوني... __ ناس ود اللمام كلموا الممرض وطبيب الامتياز قالوا ليهم الزول ده لو مات ما توقفوا الدربات و تجونا في الميز. __ ربك رب الخير المريض يموت بعد ساعة واحدة والممرض جاهم ... نادوا الدكتور بتاع المشاكل وقال ليهم زول يجي معاي المستشفي مافي غير الممرض ده ... __ زولنا ده عنده سكين شالها معاهو في جيب البنطلون الخلفي . ..سكين نص متر بتاعة جزار بتاع إبل... و وصل العنبر لقي المريض متوفي وقف الدربات بعد اتأكد من توقف النبض والقلب وطلع السكين شرط الملاية المتغطي بيها المرحوم... وطلع ليهو منها شريطين تلاتة طوااال...واحد ربط بيهو القدمين و واحد ربط بيهو اليدين و الكبير ربط بيهو حنك المريض وراسه... و قبل ما يدخل السكين في جفيرها مشي علي المرافقين ووقف في نصهم و قال ليهم الفاتحة... شالوا فاتحتهم وشالوا جثتهم ولي يوم الليلة ما فتحوا خشمهم.... __ انا شخصيا ما قاعد اقصر في مريض وحتي في الكرونا دي مرات برجع من المستشفي الساعة واحدة بالليل لكن منذ خمسة سنوات ما حصل دخلت المستشفي بدون مسدس وعشرة طلقات... واتمني ما يجي يوم اضطر استعمل المسدس وانا جاي عشان انقذ لي مريض ونحن ربونا علي قاعدة(( دق الكلب قدام صاحبو حقارة)) فما بالك بي زول بدقك أو بدق دكتورة شغالة معاك .. __ ما يؤسفني أكثر الدكتور النزف كتير ده ليه اسبوعين متواصلة ما رجع بيتهم ..معرض نفسه للكرونا وقاعد في مستشفي الحمام فيه طافح معظم الإسبوع... الدكتور ده الان مصاب في الرأس وراقد في المستشفي وكلكم شفتوا الفديو... في دكتور تاني مصاب في الساعد والرأس __ في واحد من ناس الحماية أصيب بي طوبة في الرقبة...وحتي آخر كشف اجريته عليه أمس الساعة الواحدة صباحا يعاني من شلل رباعي و كنا منتظرين صورة الرنين المغناطيسي للرقبة فلو طلعت كسر في فقرات العنق و قطع في النخاع ح يكون شلل دائم....ولو طلع كسر و نزيف حول النخاع يكون محظوظ و نسأل الله له الشفاء فهو شاب في مقتبل العمر لا يزيد عمره عن 26 سنة .. __ يا جماعة الحادثة دي وفي الظرف ده هي كارثة وليس حادثة.. .فليس بمقدورنا ان نقول لأحد الكوادر تطوع للعمل المستشفي بعد الان وان كنت شخصيا سوف اواصل العمل في مستشفي امدرمان إلي حين انتهاء جائحة كرونا فلو ربنا كتب لنا النجاة والي ذلك الحين لم يصدر قرار لحماية الكوادر من الاعتداءات فأعتبروني مستقيل من العمل في وزارة الصحة... فساعة الغضب ليس لها عقارب لكي نضبطها والحكيم من ابعد نفسه عن المشاكل و الأكثر حكمة منه من هاجر وأدار للبلد ظهره و ظل يتابع أمر الصحة في الفيس بوك... __ يا جماعة حتي لا نلحق اي فعلة سيئة بالكيزان وحدهم دون بقية الشعب ..فقد تعرضنا في فترة حكم الكيزان للعديد من الاعتداءات من مواطنين وليس كيزان.. الاخوة الاطباء: __ من قام برفض إقامة الاطباء في كسلا و رميهم بالحجارة هم مواطنين سودانين وليس كيزان.. __ من قام برفض تسكين المواطنين في سنار عندما ظهرت النتائج اصابة طبيب هم مواطنين وليس كيزان.. __ من رفض تأجير عقارات للاطباء مستشفي امدرمان بحجة انهم ناقلين الكرونا هم مواطنين وليس كيزان.. هي الكرونا دي جابوها ليكم الدكاترة من بيت امهاتهم ما جبتوها انتوا بي فقعكم وقوة راسكم ويوم مظاهرات كيزان و يوم مظاهرات ضد الكيزان .... __ من رفض إسكان أطباء مستشفي شرق النيل مما دفع المستشفي لاسكان الاطباء في غرف المرضي خصما علي السعة الاستيعابية للمستشفي هم مواطنين وليس كيزان... وحتي لو كل الأشياء التي حدثت فعلها الكيزان. .. الكيزان ديل الان مواطنين ليس الا ...يطبق عليهم القانون كبقية الشعب و ربما بصورة أكثر تشفي في حالة إزالة التمكين.. . اذا المشكلة هي ليس من هو من يعتدي ولكن ما هو القانون الذي يردعه اذا اعتدي علي كادر صحي . ...القانون الذي سنه الكيزان اسمه قانون حماية المنشأة(( يعني لو المعتدي كسر تربيزة المستشفي ح يحاكم فوريا ولو كسر رأس الدكتور يعتبر مشاجرة )) __ اخي الطبيب: مافي عسكري ح يحميك لكن بعد تنتهي المشكلة ح يرفعكم القسم و تدون قضية مشاجرة بينك وبين المرافق فأنت و المرافق اتنين ملكية متشاكلين في المستشفي ليس إلا ..ومهمته وضعكم في الحبس إلي حين تسليمكم للمحكمة و هناك. القانون معروف و الجودية معروفة و ح يقولوا ليك الراجل كان منفعل واخوهو مقتول . ..وأولاد المرحوم هو مسؤل منهم سيد البيت طلعهم عشان ما دفعوا الايجار و الراجل ندمان وسافي التراب و بعد ما تندق يطلعوك ما عندك انسانية. ...وبمشوا للدقاك بي هناك يقولوا ليه والله رفعت راسنا والله كتر خيرك والدكاترةديل أصلهم مفتريين و يستاهلوا الدق و الشعب السوداني ده لو ما الأخطاء الطبية كان تعداده بقي قدر الصين والهند مع بعض ...وهو الدكاترة الشطار سافروا زمان برة السودان قاعدين ياهم البليدين ديل و الله الدق فيهم زاتو خسارة لكن دقوهم واعتذروا ليهم (( اصلا الزول الهوين بتدقوا وتعتذر ليهو ))... وبكرة الاعذار ح تطاقش ..شي وزير صحة وشي مدير شرطة شئ جيشنا الأبيض. __ يا شعب ويا حكومة نحن ما دايرين حماية من عسكري شرطةأو جيش أو دعم سريع دايرين حماية بإصدار قانون ... عليه : 72 ساعة حسب توجهات لجنة الاطباء الموحدة صدر قانون صدر ما صدر الصحة في فتيل ومجلس الوزراء زاتو في فتيل ..... وحتي قبل ال 72 ساعة تتم معظم المتطوعين انسحبوا من المستشفيات و اي زول عنده مريض يسوقوا يوديهو مجلس الوزراء بعد يوم الاحد ... و دمتم سالمين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد حمودى
فيس بوك
تويتر
انستقرام
يوتيوب
بنتيريست