|
|
|
 Re: ***** حكايات أحمد محمد عمر في الجامعة ***** (Re: ABUHUSSEIN)
|
أول يوم لي في الجامعة لاقيت زميلي من بحري وقعدنا نتونس اليوم كلو واتصاحبنا
تاني يوم قال لي
- أنا عازم البنتين ديلك فطور أرحك معانا انت ذاتك
- ما بعرف اتونس مع بنات
- فيزياء هي؟ ما ياها زي ونستنا دي .. خلي الجرسة يلا الكافتريا
- ما متجرس لكن أنا ما حصل اتونست مع بنات قبل كدة
- يا زول بطل الـ.... يلا قوم
ومشينا الكافتريا .. هو مشى يجيب السندويتشات والبنات بحاولن يفتحن معاي موضوع هواياتك شنو؟ بتمشي وين؟ بتلعب كورة؟ بتقضي وقتك كيف
قلت ليهم والله أنا بفضل قراية الكتب على الأنشطة الحركة
قالوا لي طيب كلمنا عن آخر كتاب قريته
أهااااااا دي العوجة الكبيرة .. وانا ما بعرف اكضب
الكتاب ما متذكر اسمه لكن كان بتاع سيجموند فرويد وبي براءة شديدة قعدت أكلمهم عن نظرية اللبيدو .. والله جد انتو قايليني بكضب لكن وحاة الله الموقف زي ما أقول ليكم كدي
البنات صبت فيهن موية بااااااااردة صاحبي أول ما جاء شايل السندويتشات لقاني بقول في عبارة ماسكها لي لحدي ما اتخرجنا (بقولوا طفولة الحياة الجنسية أو حياة الطفولة الجنسية) طواااالي بقى يضحك بي صوت عالي ضحك الإحراج داك وجراني من يدي أرح نجيب الشاي
يا زول خلينا نفطر في الأول
لاااا لا أرح نجيبو هسة
بس وصلنا محل الشاي كدة قال لي: شوف .. لحدي ما نطفح الفطور دة أوعك تفتح خشمك نهائي ما تقول أي حاجة
بس مع آخر لقمة جراني من يدي وقال للبنات عن إذنكم عندنا موضوع مستعجل
طلعنا برة في باب الكافتريا بقى هو يتكلم ونفسه قايم وانا ميت بالضحك شغال لي : طفولة شنو؟ أسمع تاني نهائي ما تقعد مع بنات ولو اتجبرت تتكلم مع بنت تحت أي ظرف ناديني في الأول لأنه لو بديت تتكلم براك بتكمل ونستك مع بوليس النظام العام .. أنا جادي معاك والله
وانا أضحك زي العوير واقول ليه أنا كلمتك لكن انت براك الأصريت
عديت الجامعة تجم كدة لحدي نهاية تالتة حتى بعد داك قررت أفتّح
صاحبي كان اكتشف بنات الدبلومات .. فاضياااات وما عندهن شغلة بالقراية ما زي بناتنا الونستهن كلها الشيتات والمشروع
اتشربكت في ود بحري ذاتو قلت ليه بس تدخلني في بنات الدبلوم
بننزل من المعامل بالعصر بكونن قاعدات في النجيلة تحت صاحبي يعرفني بيهم
عندي فرمالة واااااحدة بس ما بتتصلح لي براي إلا يصلحها هو .. بعد التعريف طوالي لازم يقول ليهم طبعاً دة أول الدفعة
لو لحق نساها بقطع ليه كرعينه بالتعفص والشلاليت بي تحت لحدي ما يفتش ليه موضوع من مافي يجييب بيه سيرة الفرمالة
بعد داك أنا برجع كتفي لي وراء وابتسامة للضرس الأخير والبنات يتخلّعن فيني واااااو عليك الله البرمجة صعبة ولا ساهلة؟ وأركب مكنة الخبير واقعد أدجّل في الحاجة الوحيدة البفهم فيها
بصراحة لو ختيت الفرمالة دي بتلقى عريبي بي بنطلون واحد وقميصين وشبط وشعر منكش ودقن مساجين معشكبة بتتحلق يوم الجمعة بس وجيب فاضي وشنطة مهلهلة مع الكراسات فيها ملاية وفرشة ومعجون محل تمسى ترسى
يعني حركات صاحبي بتاعة عازمكم ايسكريم في فورتي ون وغداء في صالة شنو كدة ما عارف ما بتنفع معاي .. البت حدي معاها البنش دة
المهم في ظل الإمكانيات التعبانة والحنك البيش بقيت بس ما أشوف صاحبي خالط واحدة طوالي بتتلحهم بضحكوا أضحك معاهم توزيع ما بتوزع لا بي تلميح لا بي طردة عديل
قدر ما يحنسوني أهو ديك النجيلة مليانة بنات وكلهن بعرفنك أمشي حنك أقول ليه إلا تجيبها لي محنكة جاهزة لكن غير كدة أنا في ضنبك .. لصقة بس
| |
 
|
|
|
|
|
|
|
 Re: ***** حكايات أحمد محمد عمر في الجامعة ***** (Re: أحمد محمد عمر)
|
حكايات أحمد عمر في الجامعة!!! عنوان كدا يديك احساس بأنه بتكلم عن حكايات العقّاد أو الأبنودي أو هيثم مصطفى!!
ياخي ما تطلعوه لينا فوق راسنا أمانة فلقصة اهل العوض كان قاموا عليها ما صعبين!
شوية منص ود حضر و مدينة فا فلقصته مبلوعة شوية!
ثم انت زاتك فقر ساي! يعني لازم كل يوم بوست! شنو طرمبة ما غرّد الليلة ولا أوعى يكون بلّكك
| |
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: امتثال عبدالله)
|
Quote: لكن يا أبو حسين كدة ما صعبت علي الزوغة
بهناك كان بنسحب براااااحة براحة :) |
انت هنا تحت حمايتي ما تخاف ....
اي عواليق اي وهم يتعرض ليك انا اولى به ....
انت بس إنداح ..... 😂
| Quote: قبل شوية شايف عاطف عمر بعبي في كارو الخدار بتاعته جايي يفرش هنا .. وصل ولا لسة؟ |
الزول دا انت مديه اكبر من حجمو ....
القول ما قاله الفقر ود البشرى دا زول ق......... ساي .... 😂😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: ABUHUSSEIN)
|
Quote: حكايات أحمد عمر في الجامعة!!! عنوان كدا يديك احساس بأنه بتكلم عن حكايات العقّاد أو الأبنودي أو هيثم مصطفى!!
ياخي ما تطلعوه لينا فوق راسنا أمانة فلقصة اهل العوض كان قاموا عليها ما صعبين!
شوية منص ود حضر و مدينة فا فلقصته مبلوعة شوية!
ثم انت زاتك فقر ساي! يعني لازم كل يوم بوست! شنو طرمبة ما غرّد الليلة ولا أوعى يكون بلّكك |
يا فقر كاتبنا لا يقل عن ناسك الجبتهم ديل بس الاعلام ظالمو و نحن حا نضعه في المكانة التي يستحقها ... 😂
منص ياهو شبهك فقر و عواليق زيك و لو كتب ليه عشرة سطور بفقد سوائل..
انا مشكلتي العواليق الحوليني لو خلوني بنطلق لي عوالم ارحب ...
😂😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: ABUHUSSEIN)
|
شوف يا ابوحسين و احمد شطّة
عاطف عمر ده صاحبي و اى لولة زيادة بجيكم و معاى صاحبى دينق
وقع ليك ولّ ما وقع ليك
يا احمد ياسين بى مناسبة كلامك ده| Quote: مفروض احمد محمد عمر دا نسميهو اسم عشان اول شىء اسمه طويل وما فني |
مقروءة مع كارو الخدار
انا سميتو احمد شطة خاصة بعد بقى يكتب حكاوي
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: جلالدونا)
|
Quote: مفروض احمد محمد عمر دا نسميهو اسم عشان اول شىء اسمه طويل وما فني
وثانيا عشان ما نلخبط بينه وبين احمد عمر محمد
انا اقترح نسميهو احمد ( كاكا) ..عشان العمايل العملها في بوست النصري امين.
اوع يكون فكرك مشى للاعب البرازيل ؟؟؟!! |
قال ليك "مفروض احمد محمد عمر دا نسميهو اسم"
اجي يا نسميهو ... !!!!!!!
الزول دا احجروهو .... 😂😂😂😂
يا زميل قول نديه اسم فني او لقب
(كاكا) في عينك
نسميه احمد جامعة
😂😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: جلالدونا)
|
Quote: ما تخاف يا ابو حسين ..انت لسه شباب وتعليقاتك كلها شبابية كلنا بنلخبط بين أحمد عمر محمد و أحمد محمد عمر ، .واظن حتىصاحب الحوش نفسه بيلخبط بيناتهم...
وهما طبعا مستفيدين من تشابه الاسمين وما بتقدر تلوم واحد فيهم لانك بتفتكر انه الثاني ..ههههه.....وما تستعجل يا احمد عمر ،عاطف عمر لسه ما شاف البوست ... |
اخاف من شنو يا بت الناس ؟؟؟
عايزة تلبسيني تهمة غصبا عني و ل كيف ... ؟؟
انتي بتلخبطي دي حقيقة 😂😂😂😂😂
انا ما بلخبط ....
كدي خليني من الغلاط رأيك شنو في قصص اديبنا المحتفى به في هذا البوست .. ؟
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: ABUHUSSEIN)
|
| Quote: لو خلوني بنطلق لي عوالم ارحب ... |
عندي حكوه لي جدي علي المدير في جخانين
المنبر دا بتنتهي بي ضربة من عصايتو في
كتفي ويقول لي أمشي يا شيوعي يا كلب ..
انطلقتا يا يابا لامن بقيت شيوعي ...
تاني ما فضل ليك إلا تتطالبم تبقي
وزير صحة وعينك في محل حمدوك ...
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: أحمد محمد عمر)
|
Quote: شوف يا ابوحسين و احمد شطّة
عاطف عمر ده صاحبي و اى لولة زيادة بجيكم و معاى صاحبى دينق
وقع ليك ولّ ما وقع ليك
يا احمد ياسين بى مناسبة كلامك ده
Quote: مفروض احمد محمد عمر دا نسميهو اسم عشان اول شىء اسمه طويل وما فني
مقروءة مع كارو الخدار
انا سميتو احمد شطة خاصة بعد بقى يكتب حكاوي |
زولك التحت دا مبروك و بخيت عليك .... 😂😂😂
بصلة معفنة اخير منو ...
اديبنا و استاذنا احمد يبرى من اسم شطة انت قايلو بتاع ام فتفت كمان ...
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: Ahmed Yassin)
|
Quote: عندي حكوه لي جدي علي المدير في جخانين
المنبر دا بتنتهي بي ضربة من عصايتو في
كتفي ويقول لي أمشي يا شيوعي يا كلب ..
انطلقتا يا يابا لامن بقيت شيوعي ...
تاني ما فضل ليك إلا تتطالبم تبقي
وزير صحة وعينك في محل حمدوك ... |
انا كدا مريحني كمان ابقى وزير ... ؟؟؟
عشان بكره عظمة و منتصر يدورو فيني بوستات لمن راسي يلف .... 😂😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: ABUHUSSEIN)
|
Quote: يا النبي نوح
أديب عدييييل كدة؟
انت كمان ما تصعبها ياخ :) دي ونسة ضللة ساي
يا البشرى النبي فيك منتصر طلع ود ولايات؟
وحاتك البشوف تقعد الكلام يقول شهادة عربية من الصافية |
صاحبك دق ليه خيمة ....
و إتعاقد مع فرقة حسب الله اليوم و الايام التالية .... 😂😂😂😂
الزول دا بحبك لكن ما عارف يعبر كيف .... 😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: ABUHUSSEIN)
|
Quote: بعد تخلصوا من قصص الجامعة، نزلوا لي قصّة كدا كان بمشي لحبشية وشراب شيشة وقانون النظام العام والمحل عندو بابين نظام تأمين وكدا،
ولو القصّة تبع قصص الجامعة، خير وبركة
بنتظر دورها
الاسم السينمائي:
الشبح ٢
زي عبد العظيم عثمان (الشبح ١) |
يا بكوري اديبنا ما شبح لكن مباري الاشباح .... 😂😂
بالنسبة لي طلبك بنحاول نلبيه ليك متى ما سنحت الفرصة لذلك ...
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: جمال ود القوز)
|
عاطف
ياخي انت ما تجي تكتب معانا فوق في البوست بدل تكتب في الفيس ،وإذا ما عندك
عضوية في المنبر ممكن محمد البشرى يعمل واسطة مع الباشمهندس بكري يقبلك عضو
لانك عضو نشيط...، واظن محمد البشرى صديق الباشمهندس صاحب الحوش الكبير ..
...وبالمناسبة دي وين النصري صاحب البوست ، لعله بخير وعافية
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: Hafiz Bashir)
|
Quote: عاطف عمر كورتو فكت
زمان كان بيستهدف كبار مثقفي ومفكري سودانيزاونلاين من أمثال مولانا حافظ بشير وإنت طالع😜
هسه بقي يساكك في المونساتية والضحكونجية😛
17 مداخلة يا عاطف عمر وما تجيب سيرتي فيهن؟!
أنا زعلان منك |
25 مداخلة يا كيشة ...... 😂😂
الردود على مداخلاته ما بتتحسب في المجموع الفوق
ما تقلل من مجهود التعبان و شقيان 😂😂😂
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: Arif Nashed)
|
| Quote: ود القوز اهلا بيك في صالون ابو حسين للجلسات الادبية 😂😂 |
ذكرتني عندي ود اختا لينا كان لامن لا مؤاخذة يخش (بيت الادب)
لو زول ساله كنت وين يقول ليك (كنت جالس)..
و لو السائل ما فهم و حكاها زيادة و قال ليو (جالس وين)
يقول ليو ابدا دي كانت (جلسة ادبية خاصة)
ادبية جاية من بيت الادب 🙂
فيا ابوحسين .. جلستكم محضورة ...
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: جلالدونا)
|
Quote: و لو السائل ما فهم و حكاها زيادة و قال ليو (جالس وين)
يقول ليو ابدا دي كانت (جلسة ادبية خاصة) |
أبو صاحبي كان في الحواشات مشى ياخد ليه جلسة أدبية قامت طقتو عقرب
جاء البيت اتلموا فيه أولاده وبناته .. مالك؟
قرصتني عقرب
قرصتك وين؟
في فجة مختصرة
البنات يشيلن ويحنسن يا أبوي ورينا مكان القرصة سريع عشان نفصدها ليك
وهو يشيل ويكرر قلت ليييييييك في فجة مختصراااا 
الحاج نفعتو مناعته ساي وعاش بعد القرصة دي أكتر من 10 سنين والآن بعد وفاته بما يزيد عن 15 سنة لازال مكان الفجة المختصرة مجهولاً
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: MOHAMMED ELSHEIKH)
|
البتاع دة موش كان في الصفحة التالتة؟
دة منو الحاقد النكتو دة؟
عندنا جارنا تاجر كبير في الخرطوم بجي الحلة يقعد فترة ويرجع تاني لتجارته .. مجنن بتاع الدكان جن شديد في كيس صعوطه
أنا بكون قاعد كتير مع بتاع الدكان في المصطبة يجي التاجر طالع من بيته يشحده السفة يسف ويتونس معانا شوية يتف السفة ويرجع البيت
رغم إني ما بحب اتدخل في علاقات الجيران لكن مرة اتمعطت شديد قلت لبتاع الدكان شنو الثقيل دة! ما يمشي يشتري ليه كيس زي الرجال بدل يقعد يشحد كدة!
بتاع الدكان ضحك قال لي أنا بشتري الكيس الكبير وبقعد معاي يومين عمك دة كل 3 أو 4 يوم بديني حق 10 أكياس بقول لي انت أصلاً بتمشي السوق اشتري لي وليك وانا بجي بسف منك
قلت ليه طيب بعد ما تديهو كيسو مالو بجي يشحد؟
قال لي أفهم يا أبو الشباااااب دة لا بقيف في محل صعوط لا بشيل كيس متعته بس يسف من أكياس الناس حتى لو يدفع أضعاف أضعاف سعر الكيس
فهمتو في النهاية الموضوع مزاج ما شحدة
فاااا شنو أنا ذاتي عجبتني الحركة دي وبقيت بسف في بوستات الناس السفة في بوستيك طعمها ما حلو زي ديك
| |
|
|
|
|
|
|
|
|
|
Re: ***** حكايات أحمد محمد عمر في الجامعة ***** (Re: أحمد محمد عمر)
|
| Quote: كيس متعته بس يسف من أكياس الناس ح |
اهههههههه
صاحبنا ومستثمر .. محل ما تمشي معاه يشحد سجارة
جيب سجارة.. مرة انا راكب معاه قلت ليه ياخي انت كترت الحكاية دي
عربيتك مليانة صناديق سجاير وتشحت سجارة؟
ما رد علي .. مشى وقف جنب سوبرماركت واشترى علبة سجاير وقال لي هاك امسك دي
قلت ليه انت عارف انا جني وجن ريحة السجاير .. قال لي عارف ياخ والله عارف.
انت كدي امسك دي .. مسكتها ..قال لي افتحها ... فتحتها بعد تعب ، قال؛لي ( جيب سجارة)
قلت ليه انت بتهظر؟ قال لي عليك الله المرة الجاية قبل ما تديني السجارة قول لي ياخ دي اخر حبة
| |
|
|
|
|
|
|
| |
ABUHUSSEIN
احمد عمر محمد
محمد البشرى الخضر
Ahmed Yassin
جلالدونا
Salah Zubeir
أبوبكر عباس
جمال ود القوز
Hafiz Bashir
Arif Nashed
يحي قباني
MOHAMMED ELSHEIKH
HAIDER ALZAIN
فيس بوك
تويتر
انستقرام
يوتيوب
بنتيريست