(العريسُ الداقسُ)

العريس الداقس دي على ز=وزن الدبِّ الدَّاشِرِ؛ أو إذا
شئئت، ف هي ، العريسُ اتحلسَ على وزن (الوزير دقس)

تبدأ الحكاية بعد أن تحس بالقلق يعربد بمشاعرك النبيلة ،
عندما تتبنة فجأة لتجد أن معظم أقرانك الكانو بيكاكلو معك في صحن
بوش واحد تحت العمود الجنب البقالة قد دخلو الأقفاص الذهبية كما تحلو
تسميتها للي المو عارف طبعن ح يقول عدس. رغم إنو العرفو البير وغتاه
لقوها عن خدعة فضفاضة و فخ (Bobby Trap) عبارة عن برميل زفت
و كابيه فوقو باقة عسل عاملة ليه بيها وشية (Topping) لزوم التمويه
وتغيبة اللَّتر. عمومن اللي شربو المقلب كفاية إنهم علموها طائعين
مختارين و بكامل قواهم العقلية المعتبرة شرعاً و قانوناً.

●صخشياً مؤمن تماماً بمسألة (قفص ) دي و لكن، لا أخفي أن لديًّ
تحفُّظاتٍ شديدةً واقفةً لي في لهاتي على حكاية إنو ( ذهبى ) دى !!
المهم أنو تأخذك الحمية حمية الجاهلية الأولى، فتعتريك غضبة الهبباي
و أنت حاسِّي بشبح خطر العنوسة يداهمك و تناجي نفسك أثناء وقوفك
(مطرِّفاً) متل كلب القنيص، حاضر ليك زفة عرس (شهييد) من صحبانك:
"ياخ الواحد بعدا عاد بس علا يشوف ليه بكانية بشرية يتغتى بيها!!

● معقولة ياخ هناى العرة داك الكنا بناكل فطورو، الليلة عريس
دارع الحريرة و جالط الضريرة؛ و أنا لسة هامل قاعد براي زى
( تور الساقية طاحونة الأنين) أشتت في بولي ساي فوق سياقني؛
و كلما أجيب سيرة العرس أمي تدعيني تقوللي: "تعرس ركبينك
إن شاء الله" و هي دعوة معفنة بالمناسبة لو كان الحاجة ناقشة
مغزاها متأكد أصلو ما ممكن تدعي بيها فِلذة كبدها الرطب .

♡ في تلك الأثناء تبدأ تستعرض بذاكرتك الخربة شبه المفقودة ،
خيالات طابور طويييل من معارفك البنات بدءاً من ناس نونة زميلتك
في الروضة (KG1) , مروراً ببلتون جكسويات أيامات (شم الصُّناح ) و
المراهقة، وصولاً إلى (خلاطات) نادي الفلاسفة داخل أسوار حرم الجميلة
و مستحيلة ، و زميلات الشغل، و ليس انتهاءً ببنيَّات الفريق ساي اللي لامن
يلاقنك قاشر العصير واردات الترعة يختن صفايحن في واطات الله دي ،
يدقن سدورن و يقولن ليك : "سنة يا الخنافس الحميتونا لقيط القطن".
● قلنا لأخونا شنتير:سمح هاك إحداثياتنا( GPS) تاني حذر و فزر براك:
♡البَكَرة القبيل فوق الحُوار بتَّاقي
و كت دانيتا جفلت مني دخلت
في بُتُّق لعوت القُنَن و النَّاجي..
...............................
♡ كمان هاك مربوعة عربون فوق البيعة:
دي ملطوشة من عروبنا في بطانة أب علي:
(مع الجكسويات)، طبعن):
ﺟﺎﺕ ﻣﻦ ﺍﻟﺒﻠﺪﺍﺕ ﻣﺎﺷﺔ تتبختر و ﺗﺘﻤﺨتر
ﺷﺎﻳﻠﺔ عنكوليب و لا ﻣﻮﻟﻴﺘﺔ ﻭ ﺑﺎﻟﻴﻤﻴﻦ ﻗﻨﻘﺮ
ﺟﻤﺎﻝ تاجوج طبع ﻳﺎ ﻧﺎﺱ.. ﻻ ﺑﺪﺭﺓ ﻻ أﺣﻤﺮ
دي ﻟﻮ ﺷﺎﻓﺎ ﺣﺎﺝ ﺼﺪﻳﻖ..ﻛﺎﻥ ﺷﺎﻏﻼ ﻭ ﺻﻔﺮ!!
------------------------------------------------------

● 》ثم فجأتن و برمشة عينٍ تنسى كل ذاك الرتل منضحايا
النواعم فى حياتك و ترمي به عرض الحائط خلفك ، عندما تسترعى
انتباهك حسناء غراء فرعاء مصقولٌ عوارضها تمشي الهوينى كما يمشي
الوجي الوحِل"..جالسة خالفة كراع فوق كراع هنوك فى ركنٍ قصيٍّ فى
حفلة زفاف ذات شهيد الغفلة . طوالي تروح حابيها ليك "من أول نظرة..
رشقتني عينو..و جذبتني فنونو .. و بقيت مجنونو" يلا ترصد حركاتها
و سكناتها بالموريبة , تلاحظك هى لكن تعمل رايحة.. و هىيتتلاهى مثلاً
بمكالمة وهمية مصطنعة فى موبايلها ..أو تتشاغل بأكل أظافرها خجلاً

●لحدما أمبير كثافتك يرفع ، و تحس بالسنارة : أنت من هنا (ترفرف)
ليها و تهز في كتافينك؛ كإشارة منك بأنك متحرفٌ لعراك ، بل و لي ضبح
الكديسة زاتو الآن الآن و ليس غدن ؛ و يلا سجن سجن..غراامة غرامة !!
و هى من هناك ترمقك من طرفٍ خفيٍّ كما يفعل زاحف كتايب ضل قناص
محترف؛ كإشارة منها بأنها رافعة البيرق الأبيض؛ و لكن متحيزةٌ إلى فئةٍ.

♡طبعن غمزة السنارة دي ما ساهي؛ لا بد في المية لها ما بعدها.
معناها : نظرةٌ فغمزة فهمزةٌ فبسمةٌ فلقاءٌ و البادئ أطعم ؛ لحدما تجبد
القرموط تجيب خبرو. زي عمنا الطيب ود علي زمن الخلوة قدرما الفكي.
يسج و يلج فوقو و يدقبالفلقة بس عشان يقول بسم الله! قال: ما أنا بقائل.
وكت يمرقو برة الشفع يوبخوه ياخ شن فيها بسم الله كمان ¡¿ يقول ليهم
عارفا ساهلة موية ؛لكن خايف مما أفتح بيها خشمي بسمِّع لي باقي اللوح .

● يلا بمناسبة فتحت الخياشيم دي ، المهم تتعارفوا إسفيرياً
بإحدى طرق التناصل اللا~اجتماعي الكتيرة . و تقعدو (تتحانكو)
و تتغازلو فتتأوهو و تتوحوحو بالساعاتِ الطِوال لحدما تتواعدان على
مرقة سوا سوا في مشوار تسكٌّع في الفاضي على متن هايس و على
حسابك طبعن من مجاميعو و هي مي عارفة جيبك المسخن و غتاه.

● يلا تحومو البلد دي على ساق كلب من خط مية غرب عبيد ختم ؛
"قوم بي و أخد سندة بالدرب التحت تجاه ربوع عنجة..يا السابق الفيات"
بدءاً بميدان جاكسون و من هناك أمبدة العاشرة ، عبوراً بسوق(يخسي) في
حي الشهداء إلى قندهار سوق ليبيا، فأمبدة كرور و أبو نيران ، بأنجمينا دار
السلام؛ و ليسانتهاءً بسوق صابربن و جلسة جلستين عند ود الهاجة على
فتة كوارع أصابعين جداد تكطع فيها شنباتك و تاكل صوابعك و راها.

☆ ثم تذهب سكرة الحُبُّكان لتداهمنا فكرة خُلعتْ الإنسان لأخيه الإنسان. و يلا
"ياهناي و الله ما ممكن أفضل طالعة و نازلة معاك كدا ساي برا شغلة ، من ضل لي
ضل ؛ متل ود أبرق و عشوشة؛و تشيل و ( تظعط ) لي في النجيلة: بتحبني ؛ لا لا
ما بتحبنيش. دحين اسمع يا زول هوي ، وحات الله بحبااوك و بموت كمدن كمدا في شلاضيم خلقتك الفظيعة دي لامن تكطع الخميرة من ببت النمل. بس لازم تفهم ياخ و
تخلصنا تعمل ليك خطوة لقدام و إن شاء الله بعداك تتُر تلاتة خطوات لي ورا ورا و لا
تمش سبعة تمانية. ياخ إتا داير الناس تقول علينا شنو؟! و بالطريقة دي سمعتى زاتا
حتبوظ. ثم تتنهف ليك بغنح و هنجكة كدا و تمسح دمعة تماسيح وهمية من عينها المقابلاك بس، و تسيل مدردقة سايلة بجسدها البلوري اللامع علي خدين ورديين
أملحين كلحم المارتديلا . و يلا تعال شوفنا بهنا《 نحن في الدمعات غرقنا 》

●》تصدق الكلام يا العوير و من حيثك و فورك تضرب موعداً للخِطبة
و أنت تردد هذا الكوبليه الفرايحي لعندليبنا الأسمر الراحل زيدان إبراهيم :
《 يا سلام على ريدي .. الخلاك بقيت CD. لو الأماني بإيدي كنتا أهديك
عيوني و أسقيك من وريدي 》. ثم في ساعة المربع الصفري تصطحب ثلةً
من عشيرتك الأقربين و قليلاً من جيرانكم وأصدقاءك فتخرج ميَمِماً بهم ديار
الملاك الطاهر. و الهدف المنتَقَى بعناية و دقةٍ فائقةٍ من دون نساء العاامبن.

 

●》هناك تفاجأ أنت و رهطك المرافقون بتحوُّلٍ دراماتيكيٍّ في جدول
مراسم الاستفبال. فإذا بحشدٍ حاشدٍ فى بيت العروس و خيمة صيوان أو
سرادق( عزاء) سمه نا شئتَ منصوباً أمام حوش البيت لامن قافلين الزقاق
مع الجيران . و صوت المايكرفونات و الساونات دي تلعلع في عنان السماء
بأعلى ما أتيتْ من قوة و من رباطة جأش الخيل مرددةً : (تست تست واحد
اتنين تلاتة تست تست تلاتة اتنين واحد .. حوِل) تأخذك قشعريرةً هي مزيخٌ
غريبٌ جدن من مشاعر الخوف الفرح يشوبها الادهاش. و سكرت جد. و انا
جاي راجع منتهي.. لاقتني هي.. قات لي " تعال " كبرت كراعي منالفرح نص
في الارض.. نص في النعال ..اتلخبط الشوق بالزعل. و اتحاورو الخوف
و الكلام هَيْ يا سعاد! قالت سعاد:( بطل كلام الجرسة و انجض يا ولد)

●》... دا قبل أن يجبدك أبو العروس و ينزوي بيك جانباً ,
يعدل عمته التوتل ثم يقول ليك: ( و الله يا ولدى أنحنا خطوبات
سلولن طويل و دخلات و مرقات و مساخر فارغة زي دي ما عندنا
ليها لا مجال و لا أخلاق . فشنو ، شغلنا هنا بس《حبيبي أمسك لي..
و أنا بكطع ليك..بالحاصل بي و الحاصل بيك》و طبعن عارفين نقطة
ضعفي و《الحاصل بي أنا شوق و حنين..و أقيم الليل أهات و أنين.》
فا عشان كدا قررنا نعقد ليكم طوالى و العرس لبعدييينك حبل المهلة
يربط و يحل) بعد تكوِّن نفسك ثم بحَدرة مخدِّرة:(ولا رأيك شنو؟! )
و في الأثناء تسمع الساون اشتغل بالبعيو《 تسلم يا الهميم تسلم》

●》و قبل أن تُدلى برأيك المسفوه و غير المعتد به أصلاً يكون وكيلها من
قبيلك قبض يد وكيلك كنكش قال فيها كب بأصابعينو العشرة و غتوهن سوا
بمنديل أبيض .. و جعل المأذون يلقنهما صيغة عقد النكاح المحفوظة بالتواتر :
" أنكحتك أو زوجتك أو ملكتك أو وهبتك مكفولتي، كله يجزي . المهم المعنى أو
ملكتك بأية لغة يفهمونها يقولها الولي و يرد وكيل الزوج اللي هو أنت : قبلت هذا
الزواج قبلت هذا النكاح و رضيته. و بكدا أتموا ( صفقة ) عقد القران على سنة
الله و رسوله و وفع الفأس في قنيطة الرأس، فى نفس خيمة (الفداء) و تحولت
أنت بقدرة قادرٍ من مجرد مشروع خطيب (حفلة) إلى زفة عريس (غفلة)
- مع وقف التنفيذ طبعن- و برمشة عين كسرعة البرق العبادي الخاطف .

●》لكن تعال عان جاي إتا يا قريعتي راحت و ما ليك وجيع و أنت
واقف كاضم غبينتك و ساكت ما عرف ذن بتقول إلا تردد برضو
مع حبيبنا زيدان:《 و رجعت حابس أدمعيو.. في الليلة دييييك .

●》بيننا تسمع أحدى عمات العروس و هى تقول: (شوفيهو يا بنات
امي يا حليلو يحنن ياخواني من الفرحة لامن غالبو يفتخ خشمو ) ثم
تطلق زغرودة مدوية و هى مدياك حُفافتها مبتعدة؛٥ تجتاحك معها نوبة غضب
و رغبة فى لكمها فى شلاضيمها لعلك تُخرسها مرةً و إلى الأبد لولا إنها بقت اسمها
نسيبتك.فرغم إنو العروس صارت شرعاً حرمك المصون حتى و لو مجرد دفقة
(حبر على ورق بس) إلا إنهواجبٌ عليك أن تقوم بطقوس مهولة و مراسم عرس
كامل الأوصلف و الدسم لأستلامها! و عندما تثور على الوضع و تحلف بالطلاق
بالتلاتة بعدما قايل خلاس :《رقصت ليه مسك حجباتا》 أن تمشى تجرها من
شعرها و تجيبا بيتك كراعا في رقبتا ، بدون حفلات و لا كلام فارغ وتخلص!!

●》لكن تتفاجأ بأن معارضةً شرسةً أنانيا2 تأتيك من نيرانٍ صديقةٍ؛
من داخل بطن بيتكم و عقر داركم يعني ناس أمك صخشياً و أخواتك .
(تعال هنا، ليه يعني ماك دايرنا نفرح بي جديدك متلنا متل غيرنا؟ مالنا
أنحنا قاصرين ضُفر من الناس ديل البسوو أعراسم في سبارك سيتي؟
و لا تكون إتا كمان يابا خمسو ضكر ، ماك راجلمتل الرجال.و الله ياهو
عاد يا حليل يا يمة زمن الرجال البكسرو، موش بس بوسرو العناقريب.
و الله قسمن عظمن لو ماعملت لينا عرسن كدي ليه يا يمة شنة و رنة
لامن يتحدسن بيه البلد و البلدين اصلنا عاد مانا رضيانين منك و لانا
عافيين ليك؟ عان دا بالله داير ناس ظعيط و معيط يأكلن لحم وشنا!

●》فبطببعة الحال كلامن حار متل دا لازم يرفع أمبير كثافة
واحد عميكة زيك كدا و عقلو كلو مكوم تحت صرتو و فوق ركبينو.
فترضخ للأمر الواقع و تبيع قطعة واطة و رثتها عن جدك لويس الرابع
عشر و ترهن بيت ناس أبوك برضو ورثة من جبوبتكم الحنكوسة ماري
أنطوانيتو، وتبيع لاب طوبك و موبايلك و تعمل زغبير بكم ختة صندوق
مع جارات ناس أمك ؛ثم تستلف من 10-15صديق قديم ؛ و هلمجرا !!

●》وأخيراً وأخيراً جداً تلقى نفسك قدلة يا مولاي حافي حالق جديد و بالطريق الشاقي الترام،
ولابس بدلة سوداء - أقرب إلى لون الحداد! ، و متأبط شراً عروستك المصونة التي عرفت تماماً
تعصرك لامن تطلع زيتك و تجيبك في القاطرة هدا مكلبش و رابطين ليك الحرية و الضريرة
والهلال غصب حسنة ترا متل عصابة الدبابين على جبين مجاهد ( شهيد رغم أنفه ) في إحدر
المعارك الضاريات بساحات الفداء أثناء ( صيف العبور ) و هدي جاءتك فى هيئة فيلة صغيرة
و كمان (دايرالا رفيقة ) بعد أن نجحتوصفات التسمين شيء مسيغورات و شيء جمرات خبيثات
و التى قامت بها العمات والخالات وبعض الصديقات الخبيرات , تأتيك متدحرجة فى فستان أبيض
طويل سابل لامن مجرجر - لون الفرح (...و ساحات لى فرح نَوّر ..و جمّل للحُزن ممْشى !!!

!!! *فتجلسان الحجل بالرجل تحت بقعة ضوء مزخرفة عليها كرسيان
يُطلقون عليها جُزافاً اسم الكوشة - والتى لأول مرة تدرك رمزية المغزي من تسميتها
لم يكن جُزافاً بل مقصود لحد ذاته. ، و السؤال المحيرني مين السطلنجي المُصِر على
نقلنا من قفص (اتهام) إلى كوشة (مزبلة) عشان الواحد برضو يفضل طول بقية ععمرو
طالع حمال و نازل ( زبَّال) . عمومن ، خلينا في جوحفل الزفة إلى مثواك الأخير؛ حيث
الجميع فى رقص هستيرى والفنان يصدح بسعادة غير مبررة إطلاقاً (شن بتقولوا فى الفرح
البعذب سيدو والريد البضيع زولو) فتلمس الاغنية فيك اوتاراً حساسة وتكاد تطفر الدموع
من عينيك, و تجول عيناك على الحضور السعيد و انت تحدث نفسك بحديثٍ لو سمعه
أحدهم لانفض سامر اهذا الاعتصام و انتهى كلُّ شيء و صعد كل قرٍدٍ إلى جبله :

فما معنى أن يفرح الناس و يهصيون في حفل عُرس صاحبه مقهورٌ
أخاك لا بطل .. و زي ما قالو الزادزاتوو لو ما كفى أهلو حرم علىالجيران
الهيتة بالهيتة. و فجاةً تتسمر عيناك على آخر العزاب من أصدقائك قدامى
المحاربين، و الذي ريما كان يغبطك من جوة قلبه ، على ما أنت فيه من أبهة ،
طبعن قايل الكوشة، قسدي (القبة تحتا فكي ) و لكن هل تدري يا نعسان بحالك
إنك كنت\تتمنى لو كنت فيمكانه متل الزول داك الجاي شاقي المقابر و يدندن
بكوبليه من أغنية لعبد الوهاب الصادق" أنا الفي الدنيا ما مرتاح لحدت ما
أحد المووتى رفع رأسو و قاليه ياخويتبادل" حتين زولكعرف الطفى ا
لنور منو لسح راحتو و قام مشتت فلليي بي نمرة (5 ) دفع رباعي .

الشاهد: أنو ذاك الصاحب العازب يرنو إليك بحسد تارة ثم تجول عيناه محملقتين بين
الحسناوات تارة أخرى وتكاد تقرأ أفكاره و تخلتج بخاطره نفس أفكارك يوم كنت مكانه
و لسانه حاله يقول بلغة عينيه الزائغتين :(هسى فلان الأهبل الكنا زمنان بنجضمو و ناكل
فطورو هدا بقى عريس وأنا قاعد براي زي تور الساقية؟) فتكاد تصرخ فيه محذراً و
لكن صوتاً خبيثاً فى داخلك يهم بمكر وحقد ( وأنا مالى ! خليه ياكل نارو، و هو أنا قبال
كدي كان فى زول حذرنى؟ و تاني رجعنا لحجوة أم ضبيبينة بتاعف سلفسة العم جحا و إنو
قرفان لامن طاقي من اللي سبقوه على القفص و برضو من اللسة بتاقو جايين بعدو.

{45}
(يوم زفاف الأســـد)

( و اخيرن جاء دور ملك الغابة في يوم زفافه الميمون)
♤ و لعل أنسب ما يمكن أن نختم به جولتنا هذه عبر دروب
و دواديب الغابة ، حيثنا بحكمةٍ عن ملك تاجها العظيم.

● حيث قرر ضرغام شاب أن يكمل نصف دينه الحلو من
"بغلة "حسناء يميل إليها قلبه، و تستكين إليها روحه.
*****(((((46)))))*****
® و في يوم الزفة ؛ و اليوم دا كان جِمعة و اللِّمة
مجتمعة و وسط أهازيج الفرح بين حشود المعازيم من
علية القوم من الأسود ، تقدم فأر( أم سيسي) بكل وِّدٍّ و تأدبٍ
و حذرٍ شديدين ليجد له موطأ قدمبين قامات هؤلاء ال"vip" .
.ثم لملم كل ما لديه من قوة رباطة جأش الخيل و تقدم ليصل
إلى أمام كوشة العريس النفض الكيس وصاح به:"اهنئك
أيها الأخ الكريم بهذه العرسة المهببة؛ متمنياً و لعك
أن تغلبها بالزئير و تغلبك بالصهيل.

© هنا انبرى له أحد قائد جهاز الأمن و الاستخبارات والوطني
من السِّباع الجائعة من بين لفيفٍالسادة المدعويين من الوحوش الكاسرة
و صاح به منأنت أيها الجربوع، و من أي جحرٍ خرجت لتقول لمليك
غابتنا كلمة أخي و كمان حاف و حاف كدا! ؟ ، فلتعُدْ يا هذا ، من
حيث أتيت وأمسك خشمك انطم؛ ماذا و إلا لقيت حتفك .

@ أجاب الفأر بهدوء أعصابٍ و دموع الحسرة تقطر
دماً من عويناته"على رسلك يا أخي الفاضل، فأنا اخوك
العبد لله أيضاً كنت ذات يوم و في أثوابي أسدٌ هصورٌ؛ قبل
دخولي القفص ، ثمتضائلت إلى، أم آوا ،ثم إلى ضبع و هلم
جراً إلى أن صرتكما ترى حيث تمخضت الأيام عني لگي تلد
مني فأراً شبهميت ؛ فهذاه و الحال و هي فأرةٌ ابنة عمي من
لحمي ودمي فما بالك بعريسنا هذا و قد اتخذ بغلةً : إن
تعلفها تعكر الأجواء بانفالاات ( ريحها ) و إن
تجوعها تملأ الدنيا نهيقاً بأنكر الأصوات ؟


طبع ن الأسلوب الحكينا بيه دا بيعكس الطريقة البعرسو بيها
ناس البنادر أو من جنيوينا لكن داقشين البنادر، ناس حِنِّي علي
أنا يا تِتُْتي حمامكم قاعد يدي و لا بس تعضي. علا لاكين تعال
عندنا بجاي، ناس هناية مرقنبو قرنبو ، مافي كلام متل جنس دا ،
هنا البشوفوك معاها دي واحدة من كارثتين ، يا إمتن تعرسا فورن
نظام "حبيبي أمسك لي وأنا بكطع ليك بالحاصل بي والحاصل بيك"
ولا يختولك السكين فوق مناخيرك و يقولولك وحاتي تشمها.!!

يا شيخي والله فاقدك جنس فقدةو ندمان لامن سافي الدَّغنا دي
خاتيك داب وردة في بوست "صناع حياتي في منبر من لا بامبرَ له"
بالله كان يوم صبحت لقتو لاحسنو مودنو كابنو في خور المايقوما.
*عمومن حركة متوقعة، و الجايات أحلى من الرايحات، و المقلب
هنا اول من عاشو عمو جحا قال زعلان من الاتمقلبو عرسو قبالو و
ما حدسوه بالشغلالنة كلها وهمة كبيرة عبارة عن برميل زفت وعاشقين
خشمو بي باغتين عسل أسود ، يعني من فوق هلا هلا و من تحت
يعلم الله ؛ و زعلان برضو من الناس الوقو قنا عشان م سألوه.

(}
مرحبنبك الخليفة الزبير بشير ، و إن شاء الله الجابك
لينا يجيب عقابك،و ساعل إلاهي و سيدي يجبر بخاكرك
و دام الصنف دا راق ليك يلا ندلف معاك على حاجةليها علاقة عضوية و حساسية جدن بالدقسان في العرس ألا و هي ما صار عرف مؤخرن بظاهرة الشلب و الغش التجاري في سوق العرايس و العرسان كمان، فبعدا دايرين نعرج بوستينا المهبب دا شوية نخش للغريق جوة لنوع مختلف تماماً و غريب خالس من حِرفنة التليب. متمثلة في ما يعرف بظاهرتي الشلب و التزوير ضمن ألاعيب «مسرح العرائس». و هذه الأخيرة ربما ليستجديدة علينا ، شأنها كشأن الكثير المثير مما هو مسكوتٍ و متغاضى و عنه من زنان ضمن عادات مجتمعنا هذا بزماننا هذا و في بلدنا الحبوب كريم الفراش هذا. دي بس قدحة و ش ملاح ، ثم نعمل لينا حتة فاصل و بنعود لكم لنواصل

(} أما الشلبان فسبق لناس خالتو/ سارة أبو
و معاذ شرفي و أقلام أخرى عديدة أن قتلوه
بحثاً و نبشاً و لَّتاً و عجناً , لدرجة أننا نخشى أنهم
لم يتركوا لنا شاردة ولا واردةً لنضيفها و من مصطلحاته
الشائعة مؤخراً في أوساط الشاشبين و الشابات: الشُّلباية
(على وزن حرباية) و هي الشالب(ة) ؛ و المشلوب(ة)
به(ا) و منه(ا) و المشلوب(ة) المطلق (ة)و المشلوب(ة) لأجله(ا). و المشلوب(و) معه(ا) فهي ظاهرة
مستحدثة مما عمت به بلوانا.
(} و من نوادر و المقالب ما يحدث في
لعبة تبديل العرائس ما قد يشيب له الرضيع
و يندى له جيبن عفريت من الجن حتى يتصبب
عرقاً. و كما يقال: إن من شر البلية فعلن ما
يُضحكك حتى يُجهشك البكاء

(}الشاهد،، عريسنا الحالف الليلة يضبح تور لامنحس بالغموض
يلف الموقف قال لنفسه بعد برهة تفكير عميقٍ في هذه الدقسة العويصة :
اللَّهم لا اعتراض في حكمك ، فهذا يعني أنو ربع ساكنات كوكبنا الأرضي
فقط من بنات حواءَ يعتبرن مصنفراتٍ أو مضروباتٍ بطبقة بوهية
كشامشى طامسةٍ لمعالم ما أفسده العطار و أكل الدهر عليه
و شرب من فطرة الله التي فطر الناس عليها.علا برضو
يا زول لو جينا حسبناها.
(}كويس، بنلقاها نسبةً ما بطالة و أمة
مُحمَّدٍ لا تزالُ لسة بصحةٍ وعافيةٍ.
(}المهم زولنا من شاف ليك كدارين عروس
غفلته الضَفر دا طويل لامن قادي ليها النعال
و عليها سنين مفنترات متل الحلوف و شلوفتا
غليدة لامن ليها ضل , عرفا ليك مي ياها
زولتو دي أختا البايريكس الكبيرة.

(}فطوالي عمل تقدير موغف سريع
و الرجالطبعن مواعف.. قام متسرسق بالراااحة
ومنسحب من جنب بت أم بعللو وأخدلو بشيرة
بشيرتين فوق ضيوفو و يلا بقى مارق منزغم بي
وراء صالة الفرح و مشى يكابس يك في البيوت .
[} تخيل لقى ليك مرتو الأصلية كامدنها ليك في
جخنون تكل و ملفحنها ليها بي توب جارات و
كريعاتا مغبشات و قاعدة تبكي و تتحسر.
(} فأصلو ما گضب خماها و جابا ليك معاه
سايقا من يدها و داخل بيها الصالة
و مشى على البايريكس طردا ليك طردت
الكلب الأكل الدريش في طاحونة فلاتة،
و راح ناهرا ليك :قومي من هنا قمقم
عصبك إن شاء الله و ختا ليك مرتو
ست اللسم بي حالتا ديك في الكوشة
حتين يادوبك بعداك الحفلة بدت
و الهجيج قج صاح.
دفع الله ود الأصيل

(} حكمة و الله وحكاية ..
أدهشتني من البداية£
∆ قف تأمل!
¶حاول أن تتزوج و أنت في ريعان صباك
و براطع عنفوان شبابك.. و حتى منذ نعومة
أظفارك لو أبوك مرطب ؛ المهم قبل إن تكبر، لأنك
إذا انتظرت لامن تكبر فيخشىى عليك أن «تعقل»
والعاقل من يتعظ بغيره و سوف لن يتزوج أبدن.

عريس من شدة الشفقة سالوهو:
العقد متين؟ قال ليهم: بعد صلاة الغداء، قالوا
ليهو :انحنا ماشين نجيب التلج،قال ليهم:عليكم
الله ما يغشوكم عزلوا التلج السااااقط !!

😂😂😂😂😂😂

1- واحد في ليلة القبض على فاطنة منحشر في زاوية وعروستو
في زاوية ، قاعد يبرق و يطربق ما خلا موضوع ما فتحو وهي مدنقرة في
الواطة مستنيها تقول ايب حاجة وبت الناس مبلمة وساكتة قال يازول خلني
اطنش واسكت شوية زيها
* فجأتن صحبان عريس الغفلة قالو لازم ننكد عليه ليلتو شغل غتاتة بس
ونحرجه قدام مرتو .المهم قام واحد منهم شاللو حصاية و ضرب بيها الشباك
عاد تخيل المشهد في قمة السكون وصوت الكركبة من لبعة الشباك سبب
للببينة خُلعة وجات ناطة ليك في سدر العريسالنفض الكيس ، جاتتو براها
تميريات فوق راس فكي مفترس و فضل مستكين معاها وعجبتو الحركة
وي معاين من الشباك لمح ليك صحبانو أ ولاد اللزينة ما آمنو و كورك ليهم
يلا كمان مرة ثانية يا شباب لو سمحتوا كمان تاني حجر غليد إن شاء الله تكسرو
الشبلك تفرطقوه حتة حتة و ديلك يعجبوك ما صدقو لامن دُرابة جات في فاخورة
العريس و كر يا ديك و تعال يا ليل يا ساتر عيون الناس و و طول علىا لواعيك و
البنية راقدة في حضنو تشيل في المكمدات و تداوي نارو و التياعو للبياح.