هلال وظلال ـ من يوم ما اندلعت الحرب في السودان ملايين المواطنين فقدوا بيوتهم وأرزاقهم واتشردوا بين النزوح واللجوء وبقت المأساة أكبر من إنها توصف بالكلام وفي نفس الوقت استمرت حفلات عدد من الفنانين السودانيين داخل وخارج السودان ورسوم الدخول في بعض الأحيان كانت عالية بالنسبة لظروف المواطن السوداني وهنا بيجي سؤال مشروع وسؤال بيدور في ذهن ناس كتار هل في فنان سوداني أقام حفلاً جماهيرياً وأعلن بوضوح إن كل دخله أو أرباحه حتمشي لصالح ضحايا الحرب ..؟ حتى الآن ما في معلومات بتؤكد إن واحد من الفنانين السودانيين المشهورين أعلن عن حفل كامل خصص دخله بالكامل لمتضرري الحرب وفي المقابل في فنانين شاركوا في مبادرات إنسانية أو تطوعوا في أعمال الإغاثة أو دعوا للتبرع وشارك في أعمال تطوعية داخل السودان لكن دا يختلف عن إقامة حفل جماهيري والتبرع بعائداته كاملة للضحايا. ـ الموضوع ما اتهام لزول لكن دعوة لطرح سؤال عن المسؤولية المجتمعية للفنان لأن الفنان ما مجرد مغني بل شخصية مؤثرة وكلمته وموقفه ممكن يعملوا فرق كبير. ـ الناس ما بتطلب من الفنان يوقف شغله أو يعتزل الغناء لكن في ظل أكبر كارثة إنسانية في تاريخ السودان الحديث كان ممكن نشوف حفلات بعنوان (من أجل السودان) أو ليلة فنية تخصص كامل دخلها للأسر المتضررة وللمستشفيات والتكايا أو لغرف الطوارئ أو لدعم الأطفال والأرامل والتجارب دي موجودة في كل العالم كثير من الفنانين العرب والعالميين أقاموا حفلات خيرية وتبرعوا بعائداتها للمتضررين من الحروب والكوارث الإنسانية. ـ أكيد من حق أي فنان يكسب من فنه وما في زول يقدر يمنعه من دا لكن في أوقات استثنائية المجتمع بينتظر مواقف استثنائية والتاريخ غالباً بذكر المواقف قبل الأغنيات. ـ الحرب دي ما استثنت زول أصابت جمهور الفنانين قبل غيرهم ناس كانوا بملوا الصالات بقوا اليوم في مراكز إيواء أو في دول اللجوء وبعضهم ما قادر يوفر أبسط احتياجات أسرته عشان كدا السؤال سيظل مطروحاً لو الجمهور وقف مع الفنان في أيام الرخاء أليس من الوفاء أن يقف الفنان مع جمهوره في أيام الشدة ..؟ ـ لو خصص كل فنان حفلة واحدة في السنة يذهب ريعها بالكامل للمتضررين كان الأثر حيكون كبير مادياً ومعنوياً وكان حيرسل رسالة إن الفن ما منفصل عن هموم الناس. وفي النهاية القضية ما قضية لوم أو مزايدة وإنما دعوة لمبادرات إنسانية تليق بحجم المأساة التي يعيشها السودان لأن الفن الحقيقي ما بس بصنع الفرح وإنما كمان بوقف مع الناس وقت الحزن وبيثبت إن رسالة الفنان أكبر من المسرح وأبعد من قيمة تذكرة الدخول. ـ هل غاب الدور الإنساني للفنان السوداني ..؟ سؤال يتبادر إلى ذهن ناس كتار كلما شاهدوا حفلاً لفنان سوداني والكاميرات تلاحقه منذ لحظة نزوله من السيارة الفاخرة محاطاً بالبودي قارد وهو يرتدي أشهر الماركات من البدل والساعات والنظارات ويحمل في يده أغلى وأفخم الموبايلات وهناك من تفاخر بطول ونوع قماش العِمة والجلابية أما القونات فمن بعيد تسمع كشكشة الذهب الذي يحيط بالصدر واليدين وطرقعة الكعب العالي والثوب الفاخر الشفاف المربوط من الوسط الذي يظهر أكثر مما يستر. ـ ما في زول بعترض على إن الفنان ينجح أو يعيش حياة كريمة فدا ثمرة تعبه واجتهاده لكن السؤال الحقيقي هل انعكس هذا النجاح في مبادرات إنسانية توازي حجم المأساة التي يعيشها الشعب السوداني ..؟ ففي الوقت الذي تُنفق فيه مبالغ كبيرة على المظاهر ما زالت آلاف الأسر تبحث عن لقمة ودواء ومأوى وما زال ملايين السودانيين يدفعون ثمن الحرب كل يوم. ـ ربما لا يطلب الناس من الفنان أكثر من موقف ولا ينتظرون منه المستحيل لكنهم يتطلعون إلى مبادرة صادقة منهم تقول (نحن مع أهلنا في محنتهم.) فالمواقف الإنسانية هي التي تبقى في ذاكرة الشعوب أما الأضواء والمواكب والمظاهر فسرعان ما تنطفئ بانتهاء الحفل.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست