بالرغم من كتابتي لعدد من المقالات بخصوص بنك الخرطوم الا ان هذا المقال تأخر كثيرا ربما لانني كنت خارج البلاد ولكن بعد العودة كان لا بد من مما لابد منه. بعد تخرجي من الجامعة اتيحت لي فرصة العمل في ادارة التقنية المصرفية ببنك السودان وهي كانت ادارة ناڜئة وجديدة تم استحداثها داخل البنك لمواكبة التطور واللحاق بتقنية المصارف خارج السودان. لا اطيل عليكم وقد اتيحت لي فرصة المساهمة في بناء ادارة التقنية المصرفية او المساهمة (بجهد المقل) مع بعض الزملاء الاجلاء اذكر منهم فتح الرحمن مالك وفتح الرحمن ساتي وموسى خليفة وابراهيم بابكر خيري وحميدة محمد صالح هؤلاء كانوا عماد هذه الادارة ولاحقا تم استقطابنا انا والزميلة مناهل عبد الجليل وجعفر الزبير وامين اوشي واخرين منهم د طارق احمد خالد. مدرائي الافاضل النور ابراهيم وامين اوشي في اعلى قمة الهرم. كان هناك من يدعمون هذا التطور واحداث نقلة نوعية في التقنية المصرفية ولا انسى فضلهم وهم محافظ بنك السودان صابر محمد الحسن ولست بحاجة لكي ازكيه فاعماله تشهد له وكذلك استاذي ودكتوري ومعلمي الفاضل بروف عوض حاج علي مدير جامعة النيلين سابقا واستاذي في مدرسة العلوم الرياضية (اسكول) بجامعة الخرطوم وارجع لهذين الشخصين كل الفضل في احداث هذه النقلة النوعية ما نراه الان هو من جهدهم وافكارهم العظيمة واخلاصهم وفكرهم وعلمهم. بدأنا من تحت الصفر فقد كان هناك 28 مصرفا جمعيها غارقة في الامية التقنية فتم عمل مسألة توفيق الاوضاع ورفع رأس المال وتوحيد الانظمة المحاسبية لسهولة ادارتها والرقابة عليها من قبل بنك السودان فتمت عملية اندماجات لو تذكرونها ومنها دمج بنك النيلين والخرطوم في مصرف واحد. هنا لا انسى فضل دكتوري عز الدين كامل امين لدوره البارز في سوداتل وفي انشاء شركة EBS (Electronic Banking System). الاجواء في ذلك الزمان كان مهيئة تماما لنقل العمل المصرفي السوداني من العمل اليدوي الى الالي عبر استخدام التقنيات الحديثة فسوداتل كانت في مجدها شبكة اتصالات حديثة والياف ضوئية(fiber optic) جديدة وضعتنا كاسن دولة عربية في مجال الاتصالات متفوقين على الخليج وبقية الدول وعشان ما يمسكنا الغرور بقينا احسن مش عشان سودانيين واحسن لا .. لا لأننا بدأ من حيث انتهى الاخرون الدول شبكاتها قديمة ومرمية قبلنا بسنوات ولامن بدينا بدينا باحدث ما توصل اليه العلم ودا خلانا الافضل. ومع الاسف كعادتنا ما حافظنا على التفوق دا وفي اقل من 20 سنة بقينا الاسوأ تخش اي مكتب حكومي عشان تدفع يقابلك الموظف/ة بابتسامة باهته ويقول ليك: معليش الشبكة طاشه :) عايز تحول او تعمل اي اجرء مصرفي الشبكة طاشة .. التطبيق تقيل .. بنكك ما بخش وغيرها من الاعذار الواهية. احد اهم اهداف التقنية المصرفية كانت
1. تطوير الجهاز المصرفي وبسط سيطرة البنك المركزي على المصارف. 2. اعادة الكتلة النقدية الى الجهاز المصرفي الناس. 3. تسهيل وتبسيط الاجراءات المصرفية عبر توفير الوقت والجهد ورفع الكفاءة.
وشوف نحن الليلة وين فيكفي ان تأتي عابرا لاحد المصارف لترى كمية البشر المكتظة امام المصرف وكمية الوقت والجهد المهدر عشان تعمل اجراء بسيط تنشيط حساب او فتح حساب او تغيير رقم الهاتف المرتبط بحساب. ما دعاني لكتابة هذا المقال هو ما حدث اليوم
1. فكل التطبيقات تقريبا كانت متوفقة فتعطلت معظم عمليات الشراء. 2. تحكم بنك الخرطوم واستحواذه على السوق وتحكمه في الكتلة النقدية في ظل صمت وعجز بنك السودان.
هذا الخلل يدفع ثمنه المواطن واقتصاد البلد
والحاجة دي مزعلاني شديد وكيف يسمح بنك السودان بحدوث مثل هذه الفوضى كيف يسمح لبنك واحد وهو بنك الخرطوم ان يتحكم في مصير بلد؟ ليه المواطن السوداني مصر انو يفتح حساب بس في بنك الخرطوم الوزير .... بنكك الخفير ... بنكك ست الشاي ... بنكك المواصلات .... بنكك
نحن السبب العملنا ليهو قومة وقعده بنكك دا
وللمعلومية بنك الخرطوم زيو وزي اي بنك تاني عنده تطبيق زي بقية البنوك
الشبكة القومية تتبع للدولة وتحت اشراف بنك السودان المركزي وتدار بواسطته
وعشان كدا احمل جزء من المسؤولية للتاجر والمواطن نحن سبب ازمات نفوسنا فنحن من صنع بنكك صنما نتعبده ليلا ونهارا
..... يتبع في الحلقة القادمة
مهندس/ الامين البشاري ادارة التقنية المصرفية ببنك السودان - سابقا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الأمين البشاري
فيس بوك
تويتر
انستقرام
يوتيوب
بنتيريست