هلال وظلال ـ بطولة كأس العرب ما بس لعب كورة دي منصة كبيرة شاشة مفتوحة للعالم كلو ومن خلالها بنقدر نوري صورتنا الحقيقية كسودانيين.. صورة السلام والطيبة والقلوب الصافية والتلاحم البشيل البلد فوق أكتافو. ـ جمهورنا أدهش الجميع وظهر بكثافة في الملاعب.. صوت واحد ولون واحد وقلب واحد ودا أكبر دليل إنو السوداني مهما قست عليهو الظروف وشتتو الحروب برجع يتوحد في لحظة لما يكون الموضوع وطن. ـ الجموع الكبيرة البتهتف والبتغني وترقص والبتساند كانت أجمل لوحة.. لوحة بتقول.. نحن هنا نحن شعب واحد وبلد واحد مهما كان ..! ـ الجمهور السوداني ملح البطولة والأكثر عددية اختاره الاتحاد العربي لكرة القدم كأفضل جمهور في الجولة الأولى من كأس العرب 2025. ـ كأس العرب فرصة ذهبية نخلي العالم يشوفنا بعيد من الشعار السياسي واللافتات البتفرق ولازم نرفع لافتة واحدة بس(الســودان). ـ لا شمال لا جنوب.. لا شرق لا غرب.. لا هلال لا مريخ بس سودانيين جايين نقدّم رسالة محبة وسلام ونوري العالم إنو البلد دي لو وقفت مع بعضها تبقى قارة براها. ـ الزي السوداني… سفارة ماشية على رجلين يا سلام لو جمهورنا يدخل الملاعب ب(الجلابية وتوب سروال ومركوب وعمة وسديري) هوية وتراث واحترام للناس قبل احترام لنفسنا. ـ الزي السوداني ما بس لبس دا رسالة ناعمة بتقول (نحن شعب جميل معتق بالأصالة) والشعوب التانية بتحب الشكل دا وبترتاح للسوداني الهادئ البشوش الما بخش في مشاكل والما بيخلق ضجيج. ـ الأخلاق السودانية رأس مالنا الباقي والسوداني معروف بطبعو طيب وبشوش وكريم ومؤدب ما بتاع مشاكل ودا لازم نظهر بيهو لازم نكون سفراء جابتنا الطيبة وحملنا الود ما السياسة ولا الشعارات ولا الصراخ. ـ نحن بلد اتربى على (السلام عليكم) قبل الكلام وعلى (إتفضل) قبل أي خطوة. ـ أولاد منتخبنا رجال رفعو الراية وقدموا الدرس وقدموا ملحمة رايعة لعبوا بروح وبثبات وبإصرار ودافعوا باستماتة عن الشعار. ـ شرفونا ورفعوا راسنا ورفعوا اسمنا والناس كلّها اتكلمت عن شجاعتهم وصلابتهم وأداءهم القوي. ـ والله كانوا قدر المقام… وقدر الوطن. ـ كأس العرب بالنسبة لينا ما مباراة دي فرصة نعيد بيها تقديم نفسنا للعالم. ـ فرصة نقول فيها نحن بلاد السلام.. نحن أهل المحبة.. نحن شعب مهما اتعبو الزمن قلبو لسه نضيف ولسه بخاف على بعضو. ـ فرصة نخلي العالم يشوفنا كما نحن لا كما تصورنا الحروب وتقارير الفضائيات. ـ ويا جمهور السودان أمشوا بالحب وبالطيبة وبالجلابيةوتوب وبالتراث وخلو كل زول يقول (السودانيين ديل شعب راقي بحق وحقيقة.) ـ و ..... أحبك ملاذ وناسك عزاز أحبك حقيقه وأحبك مجاز وأحبك بتضحك وأحبك عبوس بعزة جبالك ترك الشموس وما بين ظلالك أفتش وأكوس أفتش طفولتى وملامح صباى بناتك عيونن صفاهن سماى وهيبة رجالك بتسند قفاى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست