هلال وظلال في زمن بقى الدم فيه أرخص من الموية والخراب بقى خبر يومي والقلوب اتعودت على الوجع لسه في ناس بتحلم.. بتحلم بوطن يرجع يضحك ويرجع آمن وسالم زي ما كان. ناس بتحلم ترجع لبيوتها تشوف جيرانها وتسمع صوت الأذان بدل صوت المدافع. الحرب يا جماعة شر ما وراهو خير.. من يوم ما اندلعت في السودان قلبت حياة الناس رأس على عقب.. البلد الكانت مضيافة وحنينة بقت خراب ودمار والمواطن البسيط بقى ضايع بين النزوح واللجوء والتشريد. ناس كانت عندها بيوت وأحلام بقت بتسكن في الخيام.. السودان البنعرفو بكرمو وإنسانيته بقى وطن موجوع من نزيف الحرب. الناس بقت تتمنى الكهرباء والموية والأمان أكتر من أي شي تاني.. والله يا جماعة الحرب دي ما فيها منتصر الكل خسران.. خسرنا أرواح شباب في عز عطائهم وخسرنا بيوت عمرنا فيها سنين وخسرنا الأمل في بكرة أفضل. لكن رغم كل دا لسه في بصيص نور.. لسه في أمل في السلام. السلام من أسماء الله الحسنى.. السلام ما ضعف السلام قوة وعقلانية.. السلام هو الكلمة البترجع البسمة للأطفال والبترجع الناس لأوطانهازوالبترجع البلد لسكتها الصح. نحنا محتاجين نقولها بصوت واحد.. كفاية حرب.. لا للدم.. لا للدمار.. لا للتشريد. عايزين سلام يعم ربوع البلد.. سلام يبني ما يهدم.. يضمد الجراح ويزرع الأمل من جديد. السلام هو الطريق الوحيد البيرجع السودان للسكة المستقيمة.. هو المفتاح البفتح باب الحياة بعد ما قفلته الحرب. نحن ما دايرين من الحكومة ولا من الأطراف المتحاربة غير كلمة واحدة.. كفاية. كفاية دم.. كفاية خراب.. كفاية معاناة لناس ما عندها ذنب غير إنها بتحب بلدها. كفاية.. تعبنا خلاص. السودان دا كبير بيسعنا كلنا.. ما محتاج لسلاح ولا كراهية عشان نختلف. الاختلاف طبيعي لكن الحرب مرض قاتل بيأكل فينا من جوة. نحنا محتاجين لعقل راجح وقلوب بيضاء ولغة حوار بدل لغة الرصاص. الناس تعبت.. الأطفال كبروا في الخوف والشباب ضاع مستقبلهم والأمهات سهرن على الوجع. فخلونا نوقف لحظة ونسأل نفسنا.. هل دا السودان الدايرنو ..؟ البلد دي بتستاهل نتصالح عشانها بتستاهل نرجّع ليها الأمن والعافية.. بتستاهل نعيش فيها متحابين متصافين زي زمان. نعم للسلام.. لا للحرب.. لأنو بالسلام بس ممكن نرجّع البسمة للسودان ولشعبو الطيب. السلام ما بس كلمة.. السلام حياة وعدالة وضمير صاحي بيرفض يشوف الدم. الحرب بتكسر وتهدم وتدمر لكن السلام بيبني ويعمر.. وبلدنا ما حتقوم إلا بالسلام.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست