يا ناس، السودان اتحول لساحة مفتوحة من كل البلاوي ، حرب، نزوح، جوع، غلاء… لكن بدل ما نلقى نقاش جاد وحلول واقعية، لقينا أنفسنا محاصَرين بجماعة يسموا نفسهم نشطاء والحقيقة؟ هم نشطاء السجم والرماد.
تفتح الفيس بوك تلاقي زول عامل لايف من بيتو في المهجر، ماسك كباية قهوة ومتكلم كأنو في ساحة القتال:
تفتح تويتر، تلاقي تيم كامل شغال 24 ساعة في تخوين أي زول مختلف معاهم. واحد كتب الناس البتسأل أسئلة منطقية ديل عملاء الكيزان!… بالله ده نقاش سياسي ولا لجنة امتحانات وطنية؟
تجي الإنستغرام، تلقى ناشط/ة في جلسة تصوير كاملة: خلفية ملونة، إضاءة محترفة، وتعليق: "نحن بنناضل من أجل السودان الجديد". طيب يا بطل، السودان الجديد ده حيجي بالفلتر ولا بالبوسترات؟
وما ننسى القونات بتاعين اللايفات: زول يعمل بث 3 ساعات، يشتم كل من يخالفه، ويطلع من البث بألف لايك ومتFollowers زيادة… ومافي أي محتوى غير السباب و"الكلام السخن".
يا جماعة الخير، الشعب السوداني ما محتاج دروس مجانية في الوطنية. ده شعب دفع الثمن دم ولحم ودموع. الناس في المعسكرات ما محتاجين لايف، محتاجين أكل ودواء وأمان. الناس في الأحياء المقطوعة الكهرباء ما بتسعفهم شعارات .
احترموا عقولنا.
ما تلعبوا على وجع الناس. ما تتاجروا بيهو. وما تستعرضوا بالكيبورد كأنكم شايلين البلد فوق أكتافكم.
التاريخ ما برحم. والذاكرة الشعبية ما بتنسي. بعد شوية نفس "نشطاء السجم والرماد" ديل ح يطلعوا لينا في المشهد السياسي ببدل رسمية ويقولوا: "نحن جينا ننقذ الوطن". لكن الشعب السوداني واعي، وح يقول ليهم: اللعبة دي قديمة يا جماعة… وما بتتبلع تاني.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الطيب محمد جاده
فيس بوك
تويتر
انستقرام
يوتيوب
بنتيريست