هلال وظلال ـ اليوم ما يوم عادي.. اليوم منتخبنا الوطني واقف قدام امتحان حقيقي في بطولة الشان مباراة مصيرية قدام نيجيريا. ـ الليلة ما في حسابات ضيقة ما في ألوان غير ألوان العلم.. أخضر - أحمر ـ أبيض ـ أسود.. الليلة كلنا لازم نكون قلب واحد وصوت واحد ورا أولادنا. ـ المباراة دي ما بس نقاط في جدول.. دي كرامة بلد واسم وطن وفرصة عشان نوري العالم إنو السودان رغم الظروف الصعبة والحرب والشتات لسه واقف وقادر يتحدى. عايزين كل العالم يشوف لاعبينا بيقاتلوا في الملعب وبيمثلوا كل زول في السودان وبيرفعوا راية الوطن عالية خفاقة. ـ الله يرحم الزميل عبد المجيد عبد الرازق الكان بيشوف المنتخب فوق أي انتماء وبيشجع السودان من قلبو وليوم إحنا محتاجين الروح الكان بينشرها روح الحماس والدعم روح إنو (السودان أولاً وأخيراً). ـ المدرب كواسي أبياه الليلة قدامو فرصة يكتب اسمو بحروف من ذهب في تاريخ الكرة السودانية لكن النجاح ما بيجي إلا بتكاتف الجميع من الإدارة للمدرجات ومن اللاعبين للمشجعين. ـ قوتنا في إنو شبابنا متفاهمين وعندهم غيرة على الشعار البيلبسوه وقوتنا في عزيمتنا وفي إنو اللاعب السوداني لما يلعب للوطن بيكون عندو قلب حار وبيلعب بغيرة وبروح سودانية أصيلة. ـ تحدياتنا في قلة الخبرة لبعض اللاعبين وفي استغلال الفرص قدام المرمى ونيجيريا ما سهلة فريق سريع وعندو لياقة لكن السرعة واللياقة ما بتكسب من غير الروح ودي الروح البتخلي السودان دايماً صعب الهزيمة لما يلعب بجد. ـ ممكن نغلب نيجيريا لو آمنا بقدراتنا وختينا الرحمن في قلبنا واشتغلنا شغل صاح. ـ السودان اليوم بيمر بواحدة من أصعب مراحلو في التاريخ الحديث.. حرب فرقت الناس ودمار أصاب المدن وملايين أصبحوا بعيدين عن بيوتهم. لكن المنتخب الليلة واقف في الملعب لابس ألوان العلم بيقول للعالم إنو السودان ما سقط وإنو في قلب كل سوداني لسه في نبض وحلم ولمباراة دي رمز للصمود وصوت يقول لسه واقفين وما وقعنا ولسه بنحلم ولسه قادرين نكسب ولسه فينا روح من المك نمر ومن مهيرة. ـ الليلة عايزين كل لاعب يحس إنو وراهو 40 مليون سوداني واقفين معاهو. ما بنسمح للإحباط يدخل وما بنسمح لنيجيريا تفرض أسلوبها الليلة الملعب ملعبنا حتى لو برا السودان. ـ الليلة يوم الرجال .. الليلة يوم السودان. ـ الليلة ما في هلال ولا مريخ.. ما في شرق ولا غرب.. ما في شمال ولا جنوب.. في حاجة واحدة بس السودان لا غير والسودان لما يتوحد بيكسب أي معركة.. في الكرة أو في غيرها. ـ هتافنا الليلة كلنا مع المنتخب.. كلنا مع السودان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست