هلال وظلال ـ مشاركة الهلال في الدوري الموريتاني لم تكن مجرد مشاركة عابرة ولا تجربة للتجريب دي كانت خطوة كبيرة وجريئة فتحت الباب لتعاون رياضي حقيقي بين الشعوب الإفريقية وقدمت نموذج حي لفكرة (كرة القدم الموحدة) في القارة السمراء. ـ الهلال مشى موريتانيا وهو شايل معاهو تاريخ تقيل وألقاب وجماهير وقيم ومبادئ ما مشى سياحة ولا تمشية حال بل مشى يمثل السودان بشرف ورفع اسمنا عالياً في بلد شقيق رحب بيهو ترحيب يشرح القلب ويشرح الخاطر. ـ الهلال وقت دخل في الدوري الموريتاني قلب الطاولة على المألوف فجأة بقى في ضغط إيجابي على الأندية الموريتانية تطور من نفسها وتحسن من أدائها وتعيد حساباتها وتعيد ترتيب صفوفها والهلال بخبرته وبلاعبيه وبجهازه الفني والإداري رفع السقف عالياً وما خلا أي فريق موريتاني يكتفي بالمعتاد. ـ الهلال استفاد لكن كمان موريتانيا كلها استفادت من الاحتكاك .. من الإعلام .. من الجماهير .. من التنظيم، من الإدارة وحتى من الروح الرياضية اللاعب الموريتاني شاف قدامو تجربة واقعية لفريق خاض المعارك الإفريقية وتعلم منها والمدرب الموريتاني شاف كيف الهلال بتعامل مع الخطط والانضباط والإداري شاف كيف النظام والهيكلة بتعمل فرق. ـ من إيجابيات مشاركة الهلال في الدوري الموريتاني أن برز نجم اللاعب الموريتاني أحمد سالم عقب توقيعه للهلال ومشاركته الفاعلة مع الفريق في منافسات الدوري الموريتاني ليتحول اسمه إلى أنشودة تتردد على ألسنة الجماهير الموريتانية المعجبة بأدائه. ـ ما ممكن نتكلم عن التجربة بدون نرفع القبعة للجمهور الموريتاني جمهور واعي وراقي ومحب للكورة استقبل الهلال كأنه فريق وطني شجعه وهتف مع اللاعبين وما حسينا بالغربة، بالعكس ... حسينا كأننا في إستاد الهلال في أمدرمان. ـ الهلال غلب التحديات وكسب الرهان والناس العايشة في السودان عارفة الظروف الصعبة وعارفة إن فريق يسافر ويلعب في مناخ وتقاليد وتحكيم مختلف ده في حد ذاته تحدي كبير لكن الهلال زي ما عودنا لم يتراجع واجه وتحدى وقدم أداء مشرف جداً رغم الغيابات والصعوبات وقدر بعون الله أن يتوج مشاركته بالفوز بالبطولة سواء كانت شرفية أو تنافسية المهم أنه كسب الرهان ورفع راس السودان. ـ هذه التجربة فتحت أبواب جديدة والخطوة دي ما حتنتهي هنا دي بداية لمسار جديد.ك لازم نفكر لقدام شنو المانع إنو نشوف فرق من السودان تلعب في تونس ..؟ أو فرق من نيجيريا تلعب في السودان بعد الإستقرار وعودة الأمن والأمان..؟ الكورة ما بتعرف حدود والمكسب الحقيقي في التبادل الرياضي والثقافي والإنساني. ـ وفي نهاية المشوار الجميل دا واجب علينا أن نوجه شكرنا العميق لموريتانيا الحبيبة: على الاستقبال الكان فوق العادة والكرم الفياض والتعامل الراقي أنتم ما بس استقبلتونا أنتم فتحتوا لينا قلوبكم ودي كانت أغلى من أي حاجة. للاتحاد الموريتاني: على شجاعتكم في فتح الباب لفريق كبير زي الهلال وعلى جهودكم التنظيمية التي تستحق الإشادة. للأندية الموريتانية: على الاحترام وروح المنافسة النبيلة. للإعلام الموريتاني: على التغطية المميزة والنقل الإيجابي والاهتمام الذي يساعد في تطوير الكورة. للجمهور الموريتاني: والله ما في كلمات توفيكم حقكم… شكراً من القلب. ـ الهلال ما بس فريق الهلال فكرة والهلال بفكرته بروحه وبتاريخه وبخلق لاعبيه وبمواقف إدارته… قدر يقدم تجربة تعتبر درس لكل من يهمه أمر الكرة الإفريقية. التجربة دي لازم توثق ولازم تتكرر ولازم تبقى نقطة انطلاق لمشاريع أكبر في المستقبل. وفي الختام… نقولها بصوت عالي: شكراً موريتانيا… شكراً شعب موريتانيا… شكراً جمهور موريتانيا… أنتم خليتونا نحس إنو الكورة ما بس تنافس… الكورة محبة وأخوة وأخلاق ووحدة ومستقبل. ونسأل الله يديم المحبة بين السودان وموريتانيا وتكبر المبادرات ويعم السلام والازدهار في أوطاننا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبد المنعم هلال
فيس بوك
تويتر
انستقرام
يوتيوب
بنتيريست