إلى وزير خارجيتنا السودانية وإلى سفيرنا في مصر الفريق عماد عدوي من المسؤول عن فضائح سفارتنا في مصر ؟؟ د. كمال طيب الأسماء كلنا يعلم أن وزارة الخارجية وزارة سيادية بل الوزارة الأبرز التي يعول عليها في الشؤون الخارجية. وهي مسؤولة عن السياسة الخارجية وحماية مصالح الدولة ومصالح المواطنين بالخارج، فضلاً عن تمثيل الدولة لدى الدول الأخرى والمنظمات. فمهمة الخارجية لا تتوقف عند الشؤون السياسية. ثانيا : إن ميزانية وزارة الخارجية السودانية السنوية هي أكثر ميزانية تثقل كاهل ميزانية الدولة السودانية وفي المقابل وجد أكثر من تقييم واستفتاء شعبي لمعرفة مدى رضا المواطنين السودانيين في المغتربات والمهاجر عن مستوى الخدمات التي تقدمها سفاراتنا في كل العالم وللأسف خرجت بنتائج مخزية ومخجلة حيث أظهرت شكاوى عديدة سفارات لا تحمي رعاياها بالإضافة إلى كونها مجرد مراكز لتحصيل الجبايات. سفارات تبيع أوراقها مختومة للسماسرة اقرأوا معي ما حدث لهذه المواطنة السودانية في مصر (الليلة مشيت العباسية اجدد اقامتي ، بعد وصلت طلعت ورقي عشان اصور المطلوبات ((الجواز و الاقامة و خطاب السفارة)) اكتشفت اني نسيت الجواز و الاقامة في البيت ، جيت راجعة البيت شلتهم و رجعت ، المشوار ده اخد مني ساعتين ، صورتهم و مشيت دخلت للموظفة اخدت مني الجواز و الاقامة و الصور حقتهم و قالت لي هاتي خطاب السفارة هنا طبعا اتذكرت اني اصلا ما مشيت السفارة و لا شلت منهم خطاب ((مع العلم انو دي ما اول مرة اعمل اجراء الاقامة دي المرة التالتة يعني المسالة ما عدم معرفة بالمطلوبات المسالة نسيان المطلوبات)) عاينت للساعة كانت اتناشر الا ربع ، قررت امشي السفارة اجيب الخطاب واجي راجعة العباسية سالت الموظفة بتخلصوا الدوام الساعة كم ، قالت لي ((مش ح تلحقي تعالي بكرة )) قلت ليها ما عليك بس وريني بتخلصوا الساعة كم ((قالت بخلصوا الساعة اتنين)), طلعت بره موقف التكاسي قلت ليهم عايزة اوبر موتر . - حضرتك رايحة فين _ رايحة السفارة السودانية - عايزة ايه ؟ خطاب؟ -ايوه _ حضرتك مافيش داعي للمشوار ح نديك خطاب السفارة و بيكلف حضرتك ٣٠٠ ج خطاب السفارة السودانية البطلع للمواطن السوداني من السفارة مجان داك اكتشفت انو في مافيا داخل السفارة بتبيعوا لسودانين و مصرين عشان يبيعوه للمواطن السوداني الدايش زي انا و بينسى الورق او المواطن السوداني الما عارف المطلوبات _ في اللحظة دي طبعا اتذكرت شعارات الثورة و اننا كنا بنهتف ح نبنيهو و قلت لي نفسي ما ممكن نبنيهو و نحن بندعم في الفساد الطافح ده قررت ما اشتري خطاب السفارة من مافيا المتجارات الرخيصة ، و لكن قررت افضحهم و ده اضعف الايمان ، اخدت معاهم تلت ساعة لحدي ما جابو الخطاب استلمتو و اتاكدت انو ياهو خطاب السفارة بي اختام السفارة و قلت للزول البيبيعوا انا داخلة هات رقمك معاي ناس جوه ح ارسلهم يشترو منك برضو ، اداني الرقم اتاكدت انو شغال ، رجعت ليهو الخطاب قلت انا ما ح اقدر اشتري منك . هنا طبعا الجرسة ضربت و اتلموا علي عدد من الاشخاص عشان امسح الرقم لانهم حسو بالخطر ، قلت ليهم ح انادي الشرطة ، المهم ما مسحت الرقم هرشتهم و مشيت . اخدت اوبر موتر و مشيت السفارة سحبت الخطاب و رجعت العباسية . - وصلت النافذة الموظفة قالت لي خلاص خلصنا ، تعالي بكرة الساعة تسعة صباحا ، و انا بحاول اقنع فيها انو الدقايق البسيطة الباقية من الزمن كافية اني اخلص اجراءاتي و انا شايلة اوراقي خاتاهم في الكاونتر قداما و خطاب السفارة قاعد بي فوق للورق و كنت بتكلم معاها و بملا في البيانات ، جاء المسئول عنهم ماري ، يظهر انه خطي لفت نظره ، علق لي بأن خطي جميل ، اخد جوازي و الورق قال ليحضرتك دكتورة كمان؟ _ ايوه _ خلصوا للدكتورة بسرعة لسه معاكم شوية زمن . المهم خلصت الحمد لله ، مريت على الصيدلية اشتريت فايتمين اوميقا ثري لتقوية الذاكرة ، و هسه انا ما متذكرة وين مكانه ما يستفاد من القصة شيء مؤسف ومحزن أن يكون موظفو سفارتكم في مصر عبارة عن مافيا تبيع اوراق السفارة السودانية في شارع الله أكبر ، سفاراتنا في اي بلد في العالم هي خازوقنا الحقيقي حاولوا ما تركبوا الخازوق . إنها لفضيحة أم جلاجل والله.. وسؤال أخير : أين سعادة السفير السوداني في الفريق عدوي من هذه المهازل والفضائح ؟؟؟ وماذا إن لم يكن رجلا نظاميا وبرتبة الفريق ؟؟ لك الله يا وطني
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
كمال طيب الأسماء
فيس بوك
تويتر
انستقرام
يوتيوب
بنتيريست