يا جماعة الصورة دي صورة خالتي(ربيعة الله جابو) ، واللي بمناسبة عيد الام اتمنى ان تشاركوني قولة كل عام وانتي في تألق واناقة وعطاء لخالتي وصاحبتي وامي (ربيعة الله جابو) اللي شاركت امي في تربيتنا. ربيعة خالتي اللي بتذكر وانا في اولى ولا تانية ابتدائي، التي حينما راجعت كراس الاملاء حقي ووجدت الاستاذة كاتبه لي فيه كلمة اعدي بالاحمر إلا بكل حنية ومحنة وتفهم قالت لي تعالي يا رندا وبدأت تدرسني وتراجع معاي لحدي ما تعلمت القراءة والكتابة. يعني اللغة العربية اللي بتمتع وامتعكم بيها دي اساسها ربيعة خالتي، حيث بت بسببها وانا في سن صغيرة اقرأ مجلة حواء اللي كانت بتشتريها وتقرأها امي وخالاتي ومجلات الدوحة والعربي اللي كان بيقراها عبد الكريم خالي اما الروايات ناس رد قلبي ولا تطفيء الشمس ومجلة سمر فكنت بقراها بالدس من امي وناس بيتنا. باختصار في سن الرابعة ابتدائي انا كنت اتيت على كل الكتب والمجلات اللي في بيتنا عربية كانت ام مترجمة. ومع مرور الايام اصبحت ربيعة خالتي تصطحبنا إلى معرض الكتاب والسينما والحفلات الغنائية والمنتزهات بمعية خالاتي واخوالي. ربيعة خالتي الطويلة طول ملكة فرعونية من ملكات مملكة كوش واللي لمن اقيف عشان اقيس طولي بيها تطلق ضحكة ساخرة ما بعرف علي ولا على السنتميترين ولا التلاتة اللي بتفصلني عنها 😔 اوه بالمناسبة ربيعة خالتي كانت عضو في فرقة ترهاقا الفنية اللي تأسست في منزلنا وكانت برعاية جدي لامي اي والد ربيعة خالتي. ربيعة خالتي اللي لمن تكون في مشكلة ولا شكلة ولا معضلة بتتعلق او في البيت بتستعين بي سواء للتهدئة او حسمها وحلها ومرات بجتهد وبقوم بشعللتها وزيادة النيران حطب 😁 ربيعة خالتي مايسترو بيتنا واللي لمن تكون عاملة لينا عدس على الغداء ويقوم بغتة كدي يقوم يجينا ضيف إلا وبقدرة قادر تتحول ربيعة للشيف اسامة السيد وتعالوا شوفوا شيء اكلات بالفرن وشيء محمر وشيء حساء، والشوك والسكاكين والملاعق ما تديك الدرب واطقم المائدة اللي ياما كنا بتطلع ونشوفها في بيتنا من وراء زجاج تطلع وتزين بما لذ وطاب. والتحلية كمان حلو ترآيفل اللي لمن يذوب في فمي اشيل وادعي على مسمع من ربيعة خالتي قائلة: شاحداك يا ربي يا سيدي تجيب لينا كل يوم ضيف. عدس! عدس آل عدس آل ووو يا ربيعة يا خالتي وامي وصاحبتي انتي تحلية حياتنا ❤️ ربيعة خالتي هي ليست تحلية حياتنا فحسب بل هي من تقوم بتجميلها وتجميل منزلنا والتي ما ان تشير على تحفة او غرض ما إلا وجلبناه ووضعناه بين يديها في التو واللحظة. ربيعة خالتي الواقفة الف احمر دون إندثار حلو مر يمه والدليل انها خلتني قمت بعواسة جردل منه في رمضانا ده ايوه انا قمت بعواسة الحلو مر 😭 في كرري ام در مان في الاول من رمضان عام 2024م لكن طبعا متل كل مرة نجحت في الزوغان من الكوجين. كوجين الحلو مر 🤣 يا ربيعة تجارب الحياة اللي مررت بيها واللي جعلت معاييري ووجهة نظري تجاه الحياة تصطدم في بعض الاحيان بوجهة نظرك ومعاييرك لدرجة الخصام والتخاصم عمرها ما بتلغي حقيقة انك خالتي وامي وصاحبتي الراقية الانيقة الجميلة آه بالمناسبة يا ربيعة لو بتتذكري حضورنا لجائزة استاذنا الراحل محجوب محمد صالح للصحافة في قاعة الصادقة يوم ٣ أكتوبر 2022م بتتذكري لمن كنا الاتنين بنتمشى مع بعض وبنتونس امام قاعة الصداقة وقبالة النيل متأنقات بالتوب في ذاك المساء الخرطومي المنعش يا زولة انا اكتشفت انك اطول مني بس بفد سنتيمتر 💃🏽💃🏽💃🏽💃🏽 واخيرا وليس اخرا ربيعة خالتي رسامة وعندها رسومات جميلة وحلوة حلاوة روحها رسومات لكم استمتعت وانا اشاهدها وهي ترسمها بيدها اليسرى لذا وبمناسبة عيد الام هديتي ليها ح تكون دفاتر رسم والوان. 💐 ربيعة يا ربيع الدنيا يا خالتي وامي وصاحبتي كل عام وانتي بخير وفي تألق وأناقة وعطاء 💐
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
رندا عطية
فيس بوك
تويتر
انستقرام
يوتيوب
بنتيريست